«Kʼot ta pasel li kʼusi oy onoʼox ta koʼontone»

Leʼ xa ta voʼlajuneb jabile, li Emiliae jaʼ toʼox prekursora, pe oy kʼusi jel ta xkuxlejal jaʼ yuʼun laj yikta. Mu to jaluk la snop lek ti toj echʼ noʼox muyubaj kʼalal prekursora toʼoxe, jaʼ yuʼun ayan ta yoʼonton yan velta ti tskʼan tslikes li prekursorale.

Ta skoj li yabtele, muʼyuk xa mas xokol skʼakʼal, jaʼ yuʼun muʼyuk xmuyubaj. Jun veltae, li Emiliae xi laj yal ta stojolal xchiʼiltak ta abtele: «¡Ti xuʼuk jayibuk xa noʼox ora xi-abteje!». Kʼalal laj yaʼi li smeʼ ajval ta abtele, bat kʼelatuk xchiʼuk jakʼbat mi melel li kʼusi laj yale. Li Emiliae laj yal ti jaʼ jeche. Pe li ta empresae, chkʼanbatik ti x-abtejik ta tsʼakal ora li buchʼu te ch-abtejike, jaʼ yuʼun li Emiliae bat skʼel direktor sventa sjakʼbe mi xuʼ jutuk noʼox x-abtej. Li Emiliae bat ta jun tsobajel xchiʼuk li direktore xchiʼuk la spas orasion, vaʼun tsots yoʼonton laj yalbe li kʼusi oy ta yoʼontone.

Li ta tsobajel taje, li Emiliae muʼyuk xiʼ xchiʼuk ta slekil yoʼonton la xchiʼin ta loʼil li direktore, laj yalbe ti jayib xa noʼox ora tskʼan ch-abteje. Laj yalbe direktor ti kʼalal jaʼo muʼyuk chbat ta abtele, jaʼ chakʼ ta yoʼonton skoltael li krixchanoetike. Xi laj yale: «Yajrextikoun Jeova xchiʼuk ta jkolta ta mantal li krixchanoetike. Li avie, epal krixchanoetik mu snaʼik kʼusi jaʼ li leke xchiʼuk li kʼusi chopole, jaʼ yuʼun ta anil xa noʼox skʼanik beiltasel ta Vivlia li krixchanoetike. Ta skoj li kʼusitik ta jpas kʼalal maʼuk xa yorail abtele, mu jkʼan ti akʼo mu xa lekuk jpas li kabtel liʼe, pe ta jkʼan ti oyuk mas yorail kuʼun sventa jkolta li krixchanoetike. Jaʼ yuʼun ta jkʼan ti akʼo mas xa jutuk ora chi-abteje».

Lek chikintabat kʼusi tskʼan li Emiliae xchiʼuk albat ti snopoj xa onoʼox ti tskʼan tskolta li krixchanoetik eke. Xi to laj yal li direktore: «Ta skoj li kʼusitik laj xa avale, ta xkakʼbot li kʼusi laj akʼane. Pe anaʼoj ti mas chyal atojole, ¿mi mu jechuk?». Li Emiliae laj yal ti snaʼoje xchiʼuk laj yal ti oy ta yoʼonton tsjutukajes li kʼusitik ta xkuxlejale. Vaʼun xi jamal laj yale: «Li kʼusi ximuyubaj-o yuʼune jaʼ ti jkolta li yantike». Xi albat yuʼun li direktore: «Toj labal sba chkil li buchʼutik tstunes skʼakʼalik sventa tskoltaik li yantike».

Li Emilia avie, kʼajomal xa noʼox chanib kʼakʼal ch-abtej ta xemana, taje muʼyuk toʼox buchʼu jech ch-abtej yuʼunik li ta empresae. Li kʼusi toj yan sba yutsil kʼot ta stojolal xtoke, jaʼ ti toyesbat li stojole, jaʼ yuʼun jech-o tspas kanal kʼuchaʼal onoʼoxe. Xi chale: «Kʼot ta pasel li kʼusi oy onoʼox ta koʼontone. Prekursoraun xa li avi xtoke».

Li voʼote, ¿mi oy anopoj ti oy kʼusi xuʼ xajel ta akuxlejal sventa xa-och ta prekursore?

[Tsʼib ti mukʼtik sletraile ta pajina 32]

Xi albat yuʼun li direktore: «Toj labal sba chkil li buchʼutik tstunes skʼakʼalik sventa tskoltaik li yantike»