Ta sjunul yoʼonton bat tunikuk ta Ecuador

JUN KEREM ti jaʼ yajrextiko Jeova ti likem ta Italia ti Bruno sbie, oy kʼusi skʼan tsnop tspas. Jaʼ toʼox tajek slokʼel li ta preparatoriae, ti toj echʼ noʼox lek lokʼ li skalifikasione, li yutsʼ yalaltak xchiʼuk li smaestrotake albat ti akʼo to xbat chanunajuk ta universidade. Pe kʼalal jaʼo laj yakʼ sba ta stojolal Jeova ti oy xa jayibuk jabil yechʼele, la snop onoʼox ti jaʼ chakʼ baʼyel ta xkuxlejal li spasbel yabtel Jeovae. ¿Kʼusi la spas un? Xi ta xale: «Kʼalal jaʼo laj kakʼ jkuxlejal ta stojolal Jeovae laj kalbe ta orasion ti jech ta jpas li kʼusi laj kalbee xchiʼuk ti jaʼ baʼyuk ta jpasbe li yabtele. Pe lek jamal laj kalbe Jeova xtok ti mu xtaetuk chkaʼi li jkuxlejale, yuʼun jaʼ ta jkʼan ti epuk kʼusitik stakʼ jpas li ta yabtele».

 Kʼalal echʼem xaʼox jayibuk jabile, li Brunoe bat tunuk ta Ecuador, ta Sudamérica. ¿Kʼu yelan laj yil xkuxlejal te? Xi ta xale: «Ti kʼuyelan la stakʼbun j-orasion Jeovae solel mas to xjelav ti kʼuchaʼal la jkʼanbee». Labal sba, yuʼun kʼalal te xaʼox oy ta Ecuadore, laj yojtikin epal kerem tsebetik ti oy xa sjabilalike, ti te batemik ek sventa chepajesik li yabtelik ta stojolal Jeovae.

KEREM TSEBETIK TI XCHʼAMOJIK LI TAKEL TA IKʼEL YAKʼOJ JEOVAE

Li Brunoe, jech la spas kʼuchaʼal epal kerem tsebetik ta spʼejel Balumil, yuʼun la xchʼam li takel ta ikʼel yakʼoj Jeova liʼe: «Pasic preva avilic; te chavilic me muc ta jamboxuc li sventanail vinajele, me muc ta jmalboxuc yalel tal li [bendisione]» (Mal. 3:10). Ta skoj ti skʼanojik Diose jaʼ tijbat-o yoʼontonik ta spasel ta preva xkaltik li Jeovae, ti la stunes skʼakʼalik, yipalik xchiʼuk stakʼinik ta spasbel li yabtel Ajvalilal yuʼun Dios ta jun lum ti bu skʼan mas jcholmantaletike.

Kʼalal mi kʼotik xaʼox ti bu chtunike, mu jaluk chakʼik venta ti «ta melel toj ep li cʼaoje, pero jaʼ muʼyuc ep li jcʼaojetique» (Mat. 9:37). Jaʼ jech kʼot ta stojolal Jaqueline ti likem ta Alemania, ti solel xmuyubaj tajek la stsʼibabe batel li Betel ta Ecuadore: «Mas xa jutuk ta chib jabil liʼ chitune, pe oy xa oxlajuneb krixchanoetik ta jchanubtas ta Vivlia, li chanvoʼe chkʼotilanik xa ta tsobajel. Ta melel, ¡solel ximuyubaj tajek!». Li Chantal ti likem ta Canadá, xi chale: «Ta 2008 bat tunkun ta stiʼil nab ta Ecuador, ti kʼajomal noʼox jun tsobobbail tee. Li avie oy xa oxib tsobobbail xchiʼuk  mas ta 30 prekursoretik. ¡Muʼyuk kʼusi xkoʼolaj-o ti chkiltik chchʼi ta mantal epal krixchanoetike! Mu to jaluk yechʼele, libat tunkun yan velta ta jun lum ta yok vitstikaltik Andes, ti te van 2,700 metro stayleje. Akʼo mi mas ta 75,000 krixchanoetik te nakajtik, kʼajomal noʼox oy jun tsobobbail. Toj lek chaʼiik mantal li krixchanoetike xchiʼuk yakal ta jkʼupin li cholmantale».

TSAL YUʼUNIK LI VOKOLILETIKE

Lek xvinaj ti oy vokoliletik ta jnuptantik kʼalal chijtun ta yan lume. Melel onoʼox ti oy kerem tsebetik ti la snuptanik vokoliletik kʼalal skʼan toʼox xlokʼik ta slumalike. Li Kayla ti likem ta Estados Unidos, xi chvul ta sjole: «Li kʼusi chalik ermanoetike solel chchibaj koʼontontik yuʼunik, akʼo mi jaʼ sventa jlekilaltik yalojik. Yuʼun li ermanoetike mu toʼox xaʼibeik smelolal kʼu yuʼun ti ta jkʼan chbat tunkun ta yan lume. Ta skoj taje jaʼ toʼox laj yakʼ jnop mi lek o mi muʼyuk lek li kʼusi ta jnop ta jpase». Akʼo mi jech kʼot ta stojolal, bat onoʼox li Kaylae. Chalbutik li kʼusi koltaat-oe: «Ep la jpas orasion xchiʼuk la jchiʼinan ta loʼil ermanaetik xchiʼuk ermanoetik ti lek xa yijik ta mantale, koliyal taje jaʼ la skoltaun ti akʼo xkakʼ venta ti chakʼbe bendision Jeova li buchʼutik chtunik ta stojolal ta sjunul yoʼontonike».

Yantik xtoke jaʼ tsots chaʼiik xchanel li yan kʼope. Li Siobhan ti jaʼ yajrextiko Jeova ti likem ta Irlanda, xi chal ta jamale: «Lichibaj xaʼox tajek kʼalal vokol laj kaʼi yalel li kʼusi oy ta koʼontone. La jchan ti oyuk smalael kuʼune, laj kakʼ ta koʼonton xchanel li kʼope xchiʼuk ti chitseʼin noʼox mi muʼyuk lek bat ta alel kuʼune». Li Anna ti likem ta Estonia, xi chale: «Mas toj tsots laj kaʼi xchanel li españole, jaʼ mas kʼun laj kaʼi ti kʼalal toj kʼixin tajeke, ti ep tajek li pukuke xchiʼuk ti xi-atin ta sikil voʼe. Ep ta velta jaʼ xa mas lek yaʼel ti xkikta komel skotole. Solel la jsuj jba sventa jchan mas, maʼuk laj kakʼ ta koʼonton li kʼusitik mu x-al kuʼun leke».

Toj vokol tajek kʼalal nom oyutik ta stojolal li kutsʼ kalaltik xchiʼuk ta stojolal li kamigotaktike. Li Jonathan ti likem talel ta Estados Unidos, xi chale: «Kʼalal muʼyuk toʼox jal jkʼotel ti bu chitune, solel toj kʼux laj kaʼi ti nom oyun ta stojolal li kutsʼ kalale xchiʼuk ta stojolal li kamigotake. Pe kʼalal laj kakʼ ta koʼonton tajek li cholmantale xchiʼuk li xchanel Vivlia ta jtuk noʼoxe, jaʼ la skoltaun sventa stsal kuʼun li at-oʼontone. Li kʼusitik labalik sba kʼot ta pasel ta sventa li cholmantal xchiʼuk kʼalal la jta kamigotak ta tsobobbaile jaʼ la skoltaun sventa ximuyubaj yan velta».

 Pe kʼalal nakalutik ta yan lume oy yan vokolil xtok. Li ermano Beau ti likem ta Canadá, xi chale: «Li ta jlumal jtuktike mu xkakʼtik lek venta mi toj tsotsik skʼoplal li luse xchiʼuk ti ta stiʼ xa noʼox jnatik chkʼot li voʼe. Pe liʼe solel jujulikel noʼox chbatilan». Li ta lum taje oy povreal, muʼyuk lek karoetik, muʼyuk lek xchanojik vun li krixchanoetik li ta jlom jteklumetik ti povreik noʼoxe. Li kʼusi koltaatem li Ines ti likem ta Austria, jaʼ ti mas chakʼ ta yoʼonton stalelal li krixchanoetik tee. Yuʼun xi chale: «Toj lek yoʼontonik li krixchanoetike, lek xchʼamvanik, lek x-abtejik xchiʼuk bikʼit chakʼ sbaik. Pe li kʼusi mas leke, jaʼ ti oy ta yoʼontonik xchanel ta sventa li Diose».

BENDISIONETIK TI «CH-EPAJ CʼUSITIC OY AVUʼUNIQUE»

Jech kʼuchaʼal laj xa kiltike, skotol li kerem tsebetik taje, ta sjunul yoʼonton chtunik ta Ecuador. Jech xtok, yiloj stukik ti xuʼ chakʼbutik Jeova «ti echʼem to jech tspas jech chac cʼu chaʼal ta jnoptic, o ta jcʼanbetique» (Efe. 3:20). Jech xtok, yakʼojik venta ti chakʼ onoʼox li kʼusi yaloj ta sventa li bendision ti «ch-epaj cʼusitic oy» yuʼunike (Mal. 3:10). Jkʼeltik kʼusi tsnopik ta sventa li cholmantal tspasike.

Bruno: «Kʼalal likʼot ta Ecuadore, baʼyel bat tunkun ta jun alakʼ sba teʼtikaltik ti bu oy ukʼumetike. Ta jelavele, laj kolta jba kʼalal la smukʼibtasik li Betele, li avie te xa chitun. Kʼalal te toʼox oyun ta Italiae, la jnop ti jaʼ baʼyel chkakʼ ta jkuxlejal li Jeovae, pe li Jeovae jech yakʼoj kʼotuk ta pasel kʼuchaʼal ta jkʼane, yuʼun toj lek noʼox li jkuxlejale xchiʼuk ep kʼusitik ta jpas ta sventa li mantale».

Beau: «Solel mas xa lek xkil jba xchiʼuk li Jeovae, yuʼun li ta Ecuadore jaʼ batem ta koʼonton spasbel li yabtele. Li yan bendisionetik xtoke, jaʼ ti kojtikinoj yan lumetik ti labalik sbae, taje jaʼ li kʼusi mas oy ta koʼontone».

Anna: «Ta skoj ti tsebune mu toʼox bu jnopoj ti xuʼ jech jkuxlejal jech kʼuchaʼal misionerae. Pe li avie jnaʼoj xa ti xuʼe. Yakʼojbun sbendision li Jeovae, li voʼone solel ximuyubaj ti ta jpas li abtelal ta spasel ta yajtsʼaklomtak Cristo li krixchanoetike, ti ta jkolta jba ta Svaʼanel Salonetik sventa Tsobobbaile xchiʼuk ti ep xa kamigotake».

Elke: «Li ta Austria ti bu likemun tale, la jkʼanbe Jeova ti akʼo skoltaun sventa jta junuk buchʼu xuʼ xkakʼbe chanubtasel ta Vivlia. ¡Li avie voʼlajuneb xa chanubtasel ta Vivlia chkakʼ! Kʼalal chkil ti chchʼiik ta mantal li krixchanoetike mas chimuyubaj-o».

Joel: «Toj echʼ noʼox lek ti chijtun ta stojolal Jeova ta jun lum ti bu mu xkojtikintike. Ta jchantik sventa mas jpat koʼontontik ta stojolal, vaʼun solel labal sba chavil kʼuxi chakʼbot sbendision Jeova ta sventa ti avakʼojbe yipale. Li voʼone likemun ta Estados Unidos, pe kʼalal likʼot ta Ecuadore kʼajomal vakib jcholmantaletik li ta grupo ti bu chitune, kʼalal lokʼ xaʼox jun jabile, oy xaʼox 21, li ta Snaʼobil slajel Cristoe 110 la jtsob jbakutik».

¿KʼUSI CHAPAS LI VOʼOTE?

Mi jaʼ yajrextikoot Jeova xchiʼuk mi muʼyuk kʼusi tsmakot sventa xbat tunan ti bu skʼan mas jcholmantaletike, ¿mi ta van xachʼam li takel ta ikʼele? Melel onoʼox ti skʼan lek xichʼ nopele. Pe li kʼusi mas chtune, jaʼ mi akʼanoj tajek li Jeovae xchiʼuk li krixchanoetike. Mi jech taje xchiʼuk mi spas avuʼun li kʼusi chichʼ kʼanele, albo ta orasion Jeova. Jech xtok, ¿kʼu yuʼun mu xavalbe atot ameʼ xchiʼuk li moletik ta atsobobbaile? Xuʼ van xavakʼ venta ti xuʼ xbat akʼupin ek li chʼul abtelal taje.

[Tsʼib ti mukʼtik sletraile ta pajina 3]

«Ep la jpas orasion xchiʼuk la jchiʼinan ta loʼil ermanaetik xchiʼuk ermanoetik ti lek xa yijik ta mantale, koliyal taje jaʼ la skoltaun ti akʼo xkakʼ venta ti chakʼbe bendision Jeova li buchʼutik chtunik ta stojolal ta sjunul yoʼontonike.» (Kayla, likem ta Estados Unidos)

[Rekuadro ta pajina 6]

Ti kʼuxi xuʼ xachapan aba sventa chatun ta yan lume

• Nopeso aba ta xchanel Vivlia atuk

• Kʼelo li Kabteltik sventa Dios ta agosto ta 2011, pajina 4 kʼalal ta 6

• Chiʼino ta loʼil li buchʼutik ayemik xa ta cholmantal ta yan lume

• Sabo skʼoplal ti kʼuyelan stalel xkuxlejal li krixchanoetik xchiʼuk li lum ti bu chabate

• Ochan ta junuk kurso sventa xachan jutuk li kʼop taje

[Rekuadro ta pajina 6]

Ti kʼusitik spasojik jlom sventa sta yuni takʼinike

• Ch-abtejik jayibuk u ta jabil ta slumal stukik

• Xuʼ xavakʼ ta chʼom ana o apʼolmajebal

• Xuʼ xapas abtelaletik ta Internet

[Lokʼol ta pajina 4 xchiʼuk 5]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)