¿Mi xvul ta ajol?

¿Mi oy akʼeloj lek li revista Li Jkʼel osil ta toyole, ti mas achʼik to lokʼeme? Mi jeche, paso preva mi xtakʼ avuʼun li kʼusitik liʼe:

¿Mi jaʼ van akʼbat yip ti natik sjol li Sansone?

Li yip Sansone mu jaʼuk ta skoj ti natik sjole, moʼoj, li kʼusi skʼan xale: jaʼ ti lek tajek xil sbaik xchiʼuk Jeova ta skoj ti jaʼ jun nasareoe. Muʼyuk xa me lek laj yil sbaik xchiʼuk Jeova kʼalal laj yal Dalila ti xuʼ slokʼbeik sjol li Sansone (15/4, pajina 9).

¿Kʼusitik oxtos skʼan jpastik sventa lekuk noʼox li koʼontontik chal ta Vivliae?

1) Veʼlil. Li batsʼi oʼontonale skʼan me lekuk li veʼliletik jlajestik sventa jtatik li kʼusitik chtun yuʼune. Li jun yajtsʼaklom Cristoe skʼan me lekil veʼliletik ta mantal skʼan slajes. 2) Ejersisio. Li koʼontontik chalbe skʼoplal ta Vivlia eke, sventa lekuk noʼox oye skʼan xijlokʼilanutik ta cholmantal. 3) Li kʼusitik oy ta jpat jxokontike. Li kʼusi xuʼ xkutik sventa mu kʼusi spasbe koʼontontik li kʼusitik oy ta balumile, jaʼ ti mas jchiʼintik li ermanoetik ti oyutik ta yoʼontonike (15/4, pajina 16).

¿Kʼusi ora laj yichʼ albel Noé ti akʼo smeltsan li arkae?

Li Vivliae chal ti kʼalal albat ti akʼo smeltsan arka li Noee, li xnichʼnabtake mukʼtik xaʼox xchiʼuk oy xaʼox yajnilik. Li Jeovae xi laj yalbe li Noee: «Li voʼote ta xcom ta atojol li cʼusi chapanbil cuʼun ta sventa coltaele. Chaʼochic ta barco achiʼuc avajnil, anichʼnab, xchiʼuc avalibtac» (Gén. 6:9-18). Jaʼ yuʼun, kʼalal albat ti akʼo smeltsan arka li Noee, xuʼ van skʼan xaʼox 40 o 50 jabil skʼan xtal li Nojelal ta voʼe (15/4, pajina 23).

¿Kʼu yuʼun muʼyuk to nupunemik li jlom yajtsʼaklomtak Cristoe?

Jutuk mu skotoluk li krixchanoetike tsnop chnupunik, pe jlom yajtuneltak Jeovae muʼyuk chnupunik ta skoj ti mu staik li buchʼu lek chilike xchiʼuk ti muʼyuk lek chil li Jeova eke. Li yantik xtoke mu skʼan xnupunik, jaʼ yuʼun xuʼ xtunik mas ta stojolal Jeova, yuʼun muʼyuk kʼusi chchʼaybat yoʼontonik jech kʼuchaʼal li buchʼutik nupunemike (15/5, pajina 7).

¿Kʼu yuʼun skʼan mu stunes li buchʼu chetʼes mantal sventa jaʼ chalbe skʼoplal li buchʼu chamem xa li kʼusi chal ta Salmos 116:15?

Xi chal li tekstoe: «Li Mucʼul Diose tsots scʼoplal chaʼay cʼalal chchamic li bochʼotic xchʼunojique». Li kʼusi la skʼan yal li jtsʼibajom yuʼun salmoe, jaʼ ti kʼalal chcham skotol li tukʼil yajtuneltake toj kʼux chaʼi, jaʼ yuʼun mu xakʼ jech xkʼot ta pasel taje. Ta melel, li loʼil taje jamal chal ti Diose muʼyuk chakʼ ti oy buchʼu xlajesbat skotol li tukʼil yajtuneltak ta Balumile (15/5, pajina 22).

¿Buchʼutik li colportore?

Kʼalal skʼan toʼox 1931, li jpʼel kʼop colportor xiʼe, jaʼik li buchʼutik chtunik ta prekursore (15/5, pajina 31).

Jech kʼuchaʼal chal ta Daniel 2:44, ¿buchʼutik jaʼik «scotol li yantic ajvaliletique»?

Li albilkʼop taje jaʼ noʼox chalbe skʼoplal li ajvaliletik ti laj yil Daniel ta jun mukʼta lokʼole (15/6, pajina 17).

¿Kʼusi ora kʼot ta svukubal mukʼta tsatsal lum li angloamericana ti chal ta albilkʼopetik ta Vivliae?

Li mukʼta tsatsal lum angloamericanae, jaʼ to vul tal ta lokʼel kʼalal koʼol abtejik li ta Baʼyel Mukʼta Paskʼop ta spʼejel Balumil li Gran Bretaña xchiʼuk Estados Unidose (15/6, pajina 19).

¿Kʼusitik chkʼotanuk ta pasel kʼalal mi poʼot xa chtal li Armagedone?

Li ajvaliletike xi chlik yalike: «Jun coʼntontic, muʼyuc cʼusi xiʼbal sba» (1 Tes. 5:3). Li ajvaliletike chlik skontrainik li jecheʼ relijionetike (Apoc. 17:15-18). Li ajvaliletike chbat stsakik ta kʼop li yajtuneltak Jeovae, vaʼun chtal li slajebal kʼakʼale (1/7, pajina 9).

¿Buchʼutik chkʼopojik li ta náhuatl, xchiʼuk kʼusi yakal chichʼ pasel ta stojolalik?

Jaʼ toʼox sbatsʼi kʼopik li voʼneal j-aztecaetike, li avi kʼakʼale oy to jun miyon xchiʼuk oʼlol ti jech sbatsʼi kʼopik li ta yosilal Mexicoe. Li yajrextikotak Jeovae ta xcholik mantal ta náhuatl xchiʼuk oy ep vunetik li ta kʼop taje (1/7, pajina 13, 14).