Kʼusitik kʼot ta pasel ta voʼne

Yakalun ta vulaʼal xchiʼuk peregrinoetik

«¡MU XUʼ kuʼun xibat ta naetik!». ¿Jayib li buchʼutik chchanik Vivlia xchiʼuk voʼotik ti jech chaʼi sbaik kʼalal chcholbeik mantal li buchʼutik mu xojtikinike? Pe li buchʼu jech laj yaʼi sbae jaʼ jun peregrino —ti chal mantal sventa skotol krixchanoetike xchiʼuk ti chchanubtasvan ta Vivlia— ti lek xa chaneme.

Ep li buchʼutik tskʼelik li revista Zionʼs Watch Tower (La Torre del Vigía de Sión) ti yiktaojik xa srelijionik ti oy ta yoʼontonik snaʼel li kʼusi melel ta Vivlia jech kʼuchaʼal li stukike. Li ta revista taje, tstijbe yoʼonton ermanoetik ti akʼo saʼik li buchʼutik koʼol xchʼunel yoʼontonike xchiʼuk ti stsob sbaik sventa xchanilanik li Vivliae. Te van ta sjabilal 1894, li Sociedad Watch Tower sbie lik stak batel jvulaʼanvanejetik li ta grupoetik ti laj yalik ti tskʼanik vulaʼanele. Taje jaʼ ermanoetik ti lek chapalike xchiʼuk ti lek baxbolik ta abtele, ta mas tsʼakale peregrino la sbiinik, laj yichʼik tʼujel ta skoj ti bikʼit yakʼoj sbaike, ti lek xchanojik Vivliae, ti lek xalik mantale, ti lek xchanubtasvanike xchiʼuk ti tukʼ yakʼoj sbaik ta skoltael li yantike. Li vulaʼal tspasike jaʼ noʼox chjalij jun o chib kʼakʼal, pe epal abtelal skʼan pasel. Epal Jchanolajeletik ta Vivlia lik xcholik mantal kʼalal la spukik li vunetik sventa xbat yaʼiik li mantal sventa skotol krixchanoetik ti jaʼ chetʼes junuk peregrinoe. Li Hugo Riemer ti jaʼ kom ta Jtsop Jbeiltasvanej ta tsʼakale, kʼalal laj xaʼox yetʼes jun mantal ta akʼobaltik ta jun chanobvune, lik stakʼ li kʼusitik jakʼbat yuʼun yantik ta sventa li Vivliae, ti mas xa ta oʼlol akʼobal laj yoʼontone. Manchuk mi lubem xa tajek pe xmuyubaj noʼox, yuʼun laj yal ti «lek echʼ li tsobajel taje».

Li revista Zionʼs Watch Tower laj yal ti «ep sbalil» kʼalal chvulaʼanvanik li peregrinoetik sventa «tstsatsubtasik li xchʼunel oʼontonale», taje jaʼo kʼalal tstsob sbaik ta sna li jchʼunolajeletike. Li Jchanolajeletik ta Vivlia ti te noʼox nakalike, chbat yaʼiik li mantaletike xchiʼuk li tsobajel ti bu chichʼ jakʼel xchiʼuk chichʼ takʼel ta sventa Vivliae. Kʼalal mi echʼ li mantaletike, chakʼik ta ilel li slekil yoʼonton ermanoetike. Jun tseb ti jaʼ sbi Maude Abbott chal ti kʼalal bikʼit toʼoxe, bat yaʼi jun mantal ta sob, kʼalal tsuts li tsobajele la stsob sbaik ta jun mukʼta mexa te ta amakʼ. Xi chvul ta sjole: «¡Toj ep veʼlil xchiʼuk toj muik! Oy jamon, chʼilbil alakʼ, ep ta tos panetik xchiʼuk pasteletik. Jkotolkutik toj echʼ noʼox liveʼkutik, kʼalal chib xaʼox ora ta mal kʼakʼale la jtsob jbakutik yan velta sventa xkaʼikutik yan mantal. ¡Pe chivay kaʼi jkotolkutik!». Jun peregrino ti jaʼ sbi Benjamin Barton ti lek chaneme xi la stsʼibae: «Ti lajuk jlajes [...] li veʼliletik chakʼik ti lek muike [...], voʼne xa maʼuk peregrinoun ti jechuke». Echʼ kʼuk sjalile, li Betel ta Brooklyne la stak batel karta sventa xichʼik albel li ermanaetik ti lek yoʼontonik ti «jutuk xa noʼox xchiʼuk ti lek noʼox sba» xakʼbeik sveʼel li peregrinoetike xchiʼuk ti xakʼik akʼo «lekuk xvayike».

Li buchʼutik tunik ta peregrinoe solel lek chapalik, yuʼun tstunesik mapaetik, lokʼoletik o jaʼ ti kʼusi staik sventa xakʼik ta ilel li ta mantaletik chetʼesike. Jech kʼuchaʼal liʼe, li R. H. Barbere «stuk noʼox jech» ti kʼuyelan chal li mantaletike. Li ermano W. J. Thorn sbie, toj lek tajek yoʼonton yuʼun chalik ti xkoʼolaj la «kʼuchaʼal moltotil ta voʼne» li skʼopojele. Chalik xtok ti kʼalal jaʼo tikʼil batel ta karo Ford modelo A, li Shield Toutjiane, xi avane: «¡Malato!». Vaʼun yal li ta karoe xchiʼuk la skʼok nichimetik, ep kʼusitik la xchanubtas-o xchiʼiltak ta sventa li kʼusitik spasojan Jeovae, taje jaʼ to te la snop li kʼusi laj yale.

Li peregrinoetike oy onoʼox kʼusi ep la snuptanik, mas to kʼalal chmolibike. Li kʼusi mas vokol laj yaʼiik li yantike, jaʼo kʼalal oy kʼusi jel li ta yabtel tspasike, jaʼo  kʼalal laj yichʼik albel ti jaʼ oy ta sbaik li cholmantal ta naetike. Li ta revista ta inglés ta 15 yuʼun marso ta 1924, La Torre del Vigía xi laj yale: «Li yabtelik mas tsots skʼoplal tspasik [li melel yajtsʼaklomtak Cristoe], jaʼ li xcholbel skʼoplal li Ajvalilal yuʼun Diose. Taje jaʼ me sventa chichʼik takel batel li peregrinoetike».

Pe oy jlom peregrinoetik muʼyuk lek laj yaʼiik ti jel li yabtelike, yuʼun li yantike laj yiktaik li yabtelike, li jlom xtoke la spas yan srelijionik. Li Robie D. Adkins laj yal ti oy la jun peregrino ti lek snaʼ sjelubtas mantale, solel tsvul tajek yoʼonton xchiʼuk xi chalilane: «Li kʼusi noʼox jnaʼ spasele jaʼ ti jcholmantal ta plataformae. ¡Mu xuʼ kuʼun xibat ta naetik!». Li ermano Adkins xi chvul ta sjole: «Kʼalal la jkil ta yan veltae jaʼ ta jun mukʼta tsobajel ta 1924 ta Columbus (Ohio). Te vaʼal ta jun yaxinal teʼ, solel chat yoʼonton ta kʼelel. Akʼo mi te joyol ta stojolal ta smilal noʼox ermanoetik ti xmuyubajik noʼoxe, li stuke solel muʼyuk xmuyubaj. Muʼyuk xa laj kil yan velta, ta jelavel jutuke laj yikta li steklumal Jeovae». Pe oy epal ermanoetik ti mu jechuk kʼuchaʼal li jun ermanoe, «yuʼun xmuyubajik noʼox te ch-echʼik ta stsʼel li ermanoe, yichʼojan batel slivroik ta skaroik», yuʼun oy ta yoʼontonik xcholel mantal ta naetik (Hech. 20:20, 21).

Li peregrinoetike ta xiʼik jech kʼuchaʼal li yantik ermanoetik ti jaʼ chchanubtasike, pe manchuk mi jech, ep li ermanoetik taje ta sjunul yoʼonton la xcholik li mantale. Li Maxwell G. Friend (Freschel), jaʼ jun peregrino ti chkʼopoj ta germanae, xi la stsʼiba ta sventa li cholmantal ta naetike: «Kʼalal chivulaʼanvane, jaʼ jun bendision chkil ti ta jcholmantal xtoke». Yan peregrino ti jaʼ sbi John A. Bohnet laj yal ti jaʼ mas li ermanoetik ti xmuyubajik noʼox la xchʼamik li xcholel mantale. Jech kʼuchaʼal laj yale, jutuk mu skotolikuk solel «oy ta yoʼontonik chbatik ta jbabe li ta cholmantale».

Ti kʼuxa sjalil echʼem talele, li tukʼil jvulaʼanvanejetike ep kʼusitik lek kʼotem ta pasel yuʼunik. Jun yajrextiko Jeova ti Norman Larson sbi ti oy xa ta sjaylajunebal jabil lek chaneme, xi laj yale: «Ta jkeremal toʼox laj kaʼibe smelolal ti toj echʼ noʼox sbalil kʼalal chvulaʼanvanik li peregrinoetike. [...] Yuʼun jaʼ la skoltaikun sventa jaʼ jtam batel li lekil bee». Li jkʼelvanejetik avie, koliyal ti tukʼ yoʼontonik xchiʼuk ti chakʼ svokolike, yakal tskoltautik sventa xi xkaltike: «¡Li voʼone xuʼ kuʼun xibat ta naetik!».

[Tsʼib ti mukʼtik sletraile ta pajina 32]

Jaʼ jun muyubajel kʼalal chvulaʼanvan li peregrinoetike

[Lokʼol ta pajina 31]

Li bu snopoj chbat Benjamin Barton ta 1905, te van 170 bu ch-echʼ batel ta vulaʼal

[Lokʼol ta pajina 32]

Walter J. Thorn jaʼ jun ermano ti lek yoʼonton xchiʼuk lek xkʼanvane, jaʼ yuʼun li ermanoetike chalbeik Jtot

[Lokʼol ta pajina 32]

J. A. Browne echʼ kʼuchaʼal peregrino ta Jamaica ta 1902 sventa tspat oʼontonal xchiʼuk sventa tstsatsubtas chanlajuneb bikʼtal grupoetik

[Lokʼol ta pajina 32]

Li peregrinoetike la stsatsubtasik xchʼunel oʼontonal, sventa jmojuk tsobolik xchiʼuk la snopajesik ermanoetik ta steklumal Jeova