Ta sjunul yoʼonton bat tunikuk ta Brasil

OY XA ta sjayibal jabil, Rúbia (1), jun ermana ti oy xa ta 30 sjabilale, bat svulaʼan Sandra (2) ta sural Brasil, ti te chtun ta prekursora regular ta jun bikʼit tsobobbaile. Kʼalal te yakal chvulaʼanvane, oy kʼusi kʼot ta pasel ti jelbat-o xkuxlejale. ¿Kʼusi kʼot ta pasel? Akʼo yalbutik stuk li kʼusi labal sba laj yile.

«¡VOKOL TA CHʼUNEL LAJ KAʼI!»

«Li Sandrae laj yikʼun batel ta svulaʼanel jun ants ti chakʼbe chanubtasel ta Vivliae. Kʼalal yakal chchanik li Vivliae, li antse xi laj yalbe li Sandrae: “Li ta kabtele oy oxvoʼ tsebetik ti tskʼan xchanik li Vivliae, pe jnaʼoj xa onoʼox ti solel muʼyuk kʼusi xavut li jabil liʼe, jaʼ yuʼun laj kalbeik ti skʼan smalaike”. ¡Vokol ta chʼunel laj kaʼi! Ta skoj ti oy epal krixchanoetik tskʼan chojtikinik li Jeovae, jaʼ yuʼun li Sandrae oy  slistail yuʼun li buchʼutik yakal to tsmalaik xichʼik chanubtasele. ¡Pe jaʼuk li voʼone toj vokol tajek chkaʼi ta stael junuk krixchano sventa xkakʼbe chanubtasel ta Vivlia ti bu ta jchol mantale! Kʼalal laj kil ti kʼusi chkʼot ta pasel ta sna li ants taje, solel ayan tajek ta koʼonton skoltael li krixchanoetik tee. Ta tsʼakal jutuke te libat ta naklej ta bikʼit lum ti bu yakal chtun li Sandrae.»

¿Kʼusi kʼot ta stojolal li Rubiae? Xi chale: «Ta chib noʼox ue yakal xaʼox chkakʼ voʼlajuneb chanubtasel ta Vivlia. Pe akʼo mi vokol ta chʼunel yaʼeluk, akʼo mi mu to jaluk yechʼel oy xaʼox slistail kuʼun ek li buchʼutik tsmalaik sventa xkakʼbeik chanubtasel ta Vivliae».

LA XCHAʼKʼEL LI YABTEL TA CHOLMANTALE

Diego (3), jaʼ jun kerem ti mas xa jutuk ta jtob sjabilale, bat svulaʼan jun nupultsʼakal ti chtunik ta prekursor ta jun bikʼit lum ta sural Brasil ti jaʼ sbi Prudentópolis. Solel kʼot tajek ta yoʼonton, jaʼ yuʼun la xchaʼkʼel li yabtel ta cholmantale. Xi chale: «Li ta jtsobobbaile muʼyuk noʼox chkakʼbe yipal xchiʼuk jayib noʼox ora ta jchol mantal ta u. Pe kʼalal te oyun xchiʼuk li prekursoretik xchiʼuk ti kʼalal laj kaʼi li kʼusi snuptanojik ta xkuxlejalike, te laj kakʼ venta ti kʼuyelan xmuyubajike mu xkoʼolaj ti kʼuyelan ta jnop ta sventa li cholmantale. Kʼalal laj kil ti solel xmuyubajik noʼox xchiʼuk ti jun yoʼontonike, xi la jnope: “¡Ta jkʼan ti jechuk ximuyubaj eke!”». Kʼalal sut batel ta sna li Diegoe och ta prekursor.

¿Kʼusi xuʼ xapas li voʼote? ¿Mi kerem tsebot ti yajtsʼaklomot Cristo xchiʼuk ti chabat ta tsobajeletik, pe chavakʼ venta bakʼintik ti chachʼajub xchiʼuk ti chalokʼ ta cholmantal ta skoj noʼox ti nopem chavaʼi ti jech chapase? Mi jaʼ jeche, xuʼ van oy kʼusitik xajel ta akuxlejal sventa xata muyubajel kʼalal chbat tunan ti bu chtun mas jcholmantaletike. Melel onoʼox ti xuʼ van vokol chavaʼi yiktael jlomuk kʼusitik lek avuʼun. Epal kerem tsebetik ti jech sjabilalik kʼuchaʼal voʼote, jech spasojik taje: laj yakʼ ta ilel stsatsal yoʼontonik kʼalal laj yiktaik li kʼusi oy ta yoʼontonike, ti jaʼ laj yakʼ ta yoʼontonik spasel mas li yabtel Jeovae. Jkʼeltik kʼusi kʼot ta stojolal li Brunoe.

 ¿TA STIJ SON O TSPASBE YABTEL JEOVA?

Bruno (4), ti 28 sjabilale, la xchan stijel son ta jun chanobvun ti solel lek ojtikinbile. Li kʼusi oy ta yoʼontone jaʼ ti xkʼot ta direktor yuʼun li jtijsonetike, lek la xchan, jaʼ yuʼun laj yichʼ ikʼel jayibuk velta sventa jaʼuk sbeiltas li jtijsonetike. Toj lek yilel li kʼusi tsta ta xkuxlejale. Akʼo mi jech, xi chale: «Xkoʼolaj ti oy to kʼusi skʼan ta jkuxlejale. Kakʼoj xaʼox jkuxlejal ta stojolal Jeova, pe jnaʼoj lek ti muʼyuk kakʼojbe skotol li jkuxlejale, jaʼ yuʼun chopol laj kaʼi jba. Laj kalbe li kʼusi oy ta koʼontone xchiʼuk la jchiʼinan ta loʼil jayvoʼuk ermanoetik ti lek xa chanemike. Kʼalal ep xaʼox ta velta la jnope, kʼot ta nopel kuʼun ti jaʼ chkakʼ ta koʼonton li cholmantale: laj kikta li xchanel stijel sone xchiʼuk libat ti bu mas chtun ta melel jcholmantaletike». ¿Mi lek li kʼusi kʼot ta nopel yuʼune?

Li Brunoe bat tunuk ta jun jteklum ti jaʼ sbi Guapiara ti oy 7,000 jnaklejetik tee, jutuk mu 260 kilometro yiloj li São Pauloe. Jech kʼuchaʼal chal stuke, solel ep kʼusitik jel ta anil li ta xkuxlejale: «Toj bikʼit li jnaile, chʼabal refrijerador, television mi jaʼuk Internet. Pe li kʼusie, jaʼ ti oy kʼusitik achʼik kuʼune, jech kʼuchaʼal teʼetik ti chakʼ sate». Li Brunoe chtun ta jun tsobobbail ti bu chʼabal ep ermanoetike. Jun kʼakʼal ta xemana chichʼ batel sportafolio ti noj ta vunetik, ta veʼlil xchiʼuk ta voʼ, vaʼun chbat ta smotosikleta sventa chbat xchol mantal ta bikʼit lum ti bu oy ep krixchanoetik ti muʼyuk yaʼiojik jsetʼuk li lekil aʼyeje. Xi chale: «Vaxaklajuneb chanubtasel ta Vivlia chkakʼ. Toj kʼupil sba ta ilel kʼalal tsjel xkuxlejalik li krixchanoetike. Vaʼun laj kaʼibe smelolal li kʼusi skʼan toʼox kuʼune: li muyubajel chakʼ kʼalal jaʼ chkakʼtik ta baʼyel ta jkuxlejaltik li Ajvalilal yuʼun Diose. Ti jaʼuk la jsaʼ li kʼulejale, muʼyuk jech ximuyubaj ti jechuke». ¿Kʼuxi tsta stakʼin li ta Guapiarae? Xi xmuyubaj la stakʼe: «¡Chkakʼ chanubtasel ta stijel vob!». Jaʼ yuʼun li kʼusi tspase, ¡jaʼ li stijel sone!

«PERSA LIKOM»

Ti kʼuyelan xkuxlejal li Mariana (5), ti mas xa jutuk ta jtob sjabilale, xkoʼolaj kʼuchaʼal li Brunoe. Akʼo mi ep tspas kanal ta skoj ti ch-abtej ta abogadae, pe muʼyuk xmuyubaj. Xi chal stuke: «Li jkuxlejale xkoʼolaj ta jnuts ikʼ ti muʼyuk kʼusi ta jtae» (Ecl. 1:17). Oy jayvoʼuk  ermanoetik albat mi xuʼ x-och ta prekursor. Kʼalal laj xaʼox snop leke, li Mariana xchiʼuk li oxvoʼ yamigatak ti jaʼ sbiik Bianca (6), Caroline (7) xchiʼuk Julianae (8) la snop bat tunikuk ta jun tsobobbail ti jaʼ sbi Barra do Bugres, jun lum ti nopol xil Boliviae, ti oy ta jaymil kilometro yiloj li snae. ¿Kʼusi kʼot ta pasel?

Li Marianae xi chale: «Li kʼusi toʼox ta jkʼane jaʼ ti te xikom oxibuk ue. Pe akʼo mi jech, kʼalal echʼ xaʼox li oxib u taje yakalun xaʼox yakʼel voʼlajuneb chanubtaseletik ta Vivlia, vaʼun li jchanunetike tskʼanik mas koltael sventa xchʼiik ta mantal. ¿Kʼuxi xa noʼox chkalbeik ti chibate? Muʼyuk x-al kuʼun. Persa likom». Jaʼ jech la spas xchanvoʼalik. Li avie mas xa jun yoʼonton li Marianae: «Toj lek chkaʼi jba ti tstunesun Jeova sventa ta jkolta li krixchanoetik yoʼ xlekub xkuxlejalike xchiʼuk ti ta jchʼakbe yorail xchiʼuk ti chkakʼ kip li ta kʼusitik oy sbalile». Li Caroline xi chal li kʼusi tsnop xchanvoʼalike: «Kʼalal chivay jujun akʼobale jun noʼox koʼonton kʼalal ta jnop ti kakʼoj xa skotol ta sventa li Ajvalilal yuʼun Diose. Chkakʼ ta koʼonton skoltael li buchʼutik ta jchanubtas ta Vivliae xchiʼuk toj kʼupil sba ta kʼelel kʼalal chkil chchʼiik ta mantale. Kiloj jtuk ti oy srason Vivlia kʼalal xi chtojobtasvane: “Qʼuelavilic, pasic preva avaʼyic, toj lec li Mucʼul Diose”» (Sal. 34:8).

Ta melel, xmuyubaj Jeova kʼalal chil ti oy xa mas ep kerem tsebetik ta spʼejel Balumil ti ta yutsil yoʼonton chakʼ sbaik sventa xcholik li lekil aʼyej ta sventa Ajvalilal yuʼun Dios li ta namal lumetike (Sal. 110:3; Prov. 27:11). Li kerem tsebetik ti yakʼoj xkuxlejalik taje chichʼik epal bendisionetik (Prov. 10:22).

[Rekuadro ta pajina 5]

«Oy noʼox kʼusi kuʼunkutik»

Kʼalal laj yalik ti tskʼan chbat koltavanikuk ti bu chtun mas jcholmantaletik li João Paulo xchiʼuk li yajnil ti Noemi sbie, mu skotoluk lek laj yaʼiik. Jlom ermanoetik ta stsobobbailike xi albatike: «Mi labatik ta jun bikʼit lume, xuʼ me xavil avokolik ta takʼin», xchiʼuk «¿Kʼu yuʼun chabatik ta naklej ta yan lum ti toj ep noʼox kʼusitik skʼan pasel li ta jtsobobbailtike?». Li João Paulo xi chale: «Jnaʼojkutik ti ta slekil yoʼonton li kʼusi chalbunkutike, pe akʼo mi jech laj onoʼox xchibajes koʼontonkutik». Pe kʼalal oy xaʼox jayibuk jabil te chtunik ti bu chtun mas jcholmantaletik li João Paulo xchiʼuk li Noemie xmuyubajik ti mas xa ep chcholik mantale, jech kʼuchaʼal snopojik xa onoʼoxe. Li João Paulo xi chale: «Ti kʼu xa sjalil liʼ oyunkutike oy noʼox kʼusi kuʼunkutik. Ta sventa li kʼusitik mas tsotsik skʼoplale, mas xa ep bendision jtaojkutik». Li Noemie xi to chale: «Ti laj kakʼbekutik yipale la jtabekutik sbalil ta melel».

Li saʼel takʼin ta jun uni bikʼit lume toj tsots. ¿Kʼusi tspasik li buchʼutik chbatik ta naklej ta yan namal lume? Tsabeik smelolal. Jlome chchanubtasvanik ta inglés o ta yan kʼop, chchanubtasik ololetik, tstsʼisomajik, tsbonik na o kʼusuk abtelal tstaik ti jayib noʼox kʼakʼal ta xemanae. Skotol snaʼojik ti toj echʼ noʼox ep bendisionetik tstaik kʼalal ta sjunul yoʼonton tspasik li abtelal taje.

[Rekuadro ta pajina 6]

Tstsalik li at-oʼontone

Tiago: «Ti kʼalal naka toʼox likʼot li ta achʼ tsobobbaile, toj ep laj kat koʼonton. Li ta lum taje toj jutuk jcholmantaletik xchiʼuk jutuk tajek ti bu xuʼ jchʼay koʼontontike, jaʼ yuʼun lik kat koʼonton. Ta skoj ti jnaʼoj ti skʼan oy kʼusi jpas sventa jpat koʼontone, laj kakʼ ta koʼonton yojtikinel lek li ermanoetike, jaʼ yuʼun, ¡lek li kʼusi kʼot ta pasele! La jta yan kamigotak, vaʼun mu ta sjaliluke ximuyubaj xa noʼox xchiʼuk ta jna xa noʼox laj kaʼi jba».

[Lokʼol ta pajina 3]

Noemi xchiʼuk João Paulo ta Ascurra (Santa Catarina)

[Lokʼol ta pajina 4]

[Lokʼol ta pajina 4]

[Lokʼol ta pajina 4]

[Lokʼol ta pajina 5]

[Lokʼol ta pajina 6]

[Lokʼol ta pajina 6]

[Lokʼol ta pajina 6]