«Ta sventa scʼop bicʼtal ololetic» tspatik oʼontonal

Li ta disiembre ta 2009 te laj yichʼ alel li kʼusi kʼot ta nopel yuʼun li Tribunal Supremo ta Rusia ta stojolal li yajrextikotak Jeova ta Taganrog, albatik ti mu xa x-akʼbat spasik li yabtel Diose. Albatik xtok ti mu xa xuʼ te stsob sbaik li ta Salon sventa Tsobobbaile xchiʼuk 34 jvuntik laj yichʼ alel ti xibal sbae. Li ta yavil akʼbil ta Internet yuʼun yajrextikotak Jeovae te laj yichʼ albel skʼoplal ta sventa li kʼusi kʼot ta pasele. Li ta pajinae te chvinaj slokʼol ermanoetik xchiʼuk jayvoʼ ololetik ti laj yil svokolike.

Jayib u ta tsʼakale, li ta Centro Administrativo de los Testigos de Jehová ta Rusiae la yichʼik akʼbel jun kaja xchiʼuk jun karta ti jaʼ la stakik talel jun utsʼ alalil ti jaʼ yajrextiko Jeova ta Queensland (Australia) ti la skʼelik li kʼusi laj yichʼ alel ta Internete. Xi chal li kartae: «Kermanotak: Li kalab jnichʼnabkutik Cody xchiʼuk Larissae solel tijbat yoʼontonik li xchʼunel yoʼontonik xchiʼuk li prevaetik chilik li kermanotaktik ta Rusiae. La stsʼibaik bikʼtal vunetik xchiʼuk la xchapanik uni matanaletik sventa li ololetik ta Taganrog lume. Tskʼan ti akʼo xanaʼik, ti akʼo mi nom oyik, oy yan ololetik ti tukʼ chtunik ta stojolal Jeova xchiʼuk ti oyoxuk ta yoʼontonike. Chalboxuk ti skʼanojoxuk tajeke».

Kʼalal laj xaʼox yichʼik li matanaletike, li ololetik ta Taganroge la stojbeik ta vokol li utsʼ alalil ta Australia kʼalal la stakik batel kartaetik ti oy yuni lokʼoltake. Ta skoj ti xmuyubajik tajek «ta sventa scʼop bicʼtal ololeti[ke]», jun ermano ti te chtun ta Betel ta Rusiae xi la stsʼibabe batel li Cody xchiʼuk Larissae: «Akʼo mi mukʼ o mi kʼoxutik, ¿mi mu jechuk ti toj chopol chkaʼi jbatik kʼalal chkichʼtik tsitsel akʼo mi muʼyuk kʼusi jpasojtike? Li ermanoetik ta Taganrog lume chat tajek yoʼontonik, yuʼun laj yichʼik pojbel li Salon sventa Tsobobbail yuʼunike akʼo mi muʼyuk kʼusi chopol spasojik. Pe xmuyubajik noʼox kʼalal chaʼiik ti kʼanbilik yuʼun yan ermanoetike, manchuk mi jot-o to balumil oyik. ¡Kolavalik ti oy slekil avoʼontonik xchiʼuk ti chakʼanvanike!» (Sal. 8:2).

Ti melel kermano jbatik ta spʼejel Balumil xchiʼuk li kʼanel oy kuʼuntik ta jujuntale jaʼ tskoltautik sventa xkuch kuʼuntik li vokoliletik ta jnuptantike. Pe yoʼ to yakal tskʼelik mi chakʼ jkontrain jbatik li jvuntik li snail mukʼtik jchapanvanejetike, li uni ololetike chal ta slekil yoʼontonik ti chat yoʼontonik ta stojolal li yermanoike, muʼyuk tspʼaj sbaik ta skoj stsʼunbalik, ta skoj stalel xkuxlejalik kʼalal chakʼik ta ilel ti melel li kʼusi laj yal Jesús liʼe: «Jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35).

[Lokʼol ta pajina 32]

Ololetik ta Rusia (ta tsʼetkʼob) ti laj yakʼbeik smoton li ololetik ta Australiae (ta batsʼikʼob)