Kʼusitik kʼot ta pasel ta voʼne

Laj yaʼiik li aʼyej mas lek ti muʼyuk toʼox jech yaʼiojike

TA 1923, li George Naish ti jaʼo te oy ta jun bodega ta Saskatoon, ta yosilal Saskatchewan (Canadá). La xbech kʼobta batel jtel teʼ ti vaxaklajuneb metro snatile, vaʼun xi la sjakʼe: «¿Kʼusi sventa leʼe?». Albat ti laj yichʼ tunesel sventa xichʼ meltsanel torre kʼalal jaʼo echʼ li Baʼyel Mukʼta Paskʼop ta spʼejel Balumile. Ta mas tsʼakale xi laj yal li ermano Naishe: «La jnop ti xuʼ xichʼ tunesel sventa xichʼ meltsanel jayibuk torre sventa radio, vaʼun jaʼ jech lik talel ti chichʼ meltsanel junuk estasion ta radio sventa chichʼ cholel li mantale». Li ta 1924 kʼalal jaʼo lik abtejuk li estasion ta radio ta Canadá ti CHUC sbie, li vaʼ kʼakʼale toj jutuk toʼox li estasion ta radio ti jaʼ sventa relijione.

Ta skoj ti jaʼ jun mukʼta lum, ti jutuk mu jechuk kʼuchaʼal Europae, li Canadae jaʼ jun lum ti lek stakʼ cholel mantal ta radioe. Li Florence Johnson ti te ch-abtej li ta radio ti te oy ta Saskatoon, xi laj yale: «Koliyal li radioe, li mantale kʼot ta stojolal epal krixchanoetik ti bu muʼyuk toʼox kʼotemunkutike. Ta skoj ti achʼ toʼox slokʼel li radioe, kʼusiuk ti xichʼ lokʼesele tskʼan chchikintaik li krixchanoetike». Kʼalal 1926 xaʼoxe li Jchanolajeletik ta Vivlia (ti jech toʼox ojtikinbilik li yajrextikotak Jeovae) oy xaʼox chanib estasion ta radio yuʼunik ta chanib lumetik ta Canadá. *

¿Kʼusi van chaʼiik li buchʼutik chchikintaik li estasion taje? Chaʼiik kʼejojetik ti jaʼ chkʼejinik li ermanoetik ta tsobobbail te noʼoxe xchiʼuk oy jtijsonetik. Jech xtok, chetʼesik mantaletik li ermanoetike xchiʼuk chloʼilajik ta sventa Vivlia. Li Amy Jones, ti te laj yal sloʼil li ta radio eke, xi chale: «Kʼalal yakal ta jcholmantal xchiʼuk chkalbe jbi li krixchanoetike, jlome xi chalbeikune: “A, voʼot ti chakʼopoj ta radioe chaʼa”».

Li Jchanolajeletik ta Vivlia ta Halifax (Nueva Escocia), oy kʼusi la spasik ti muʼyuk buchʼu jech spasoje, jun programa ti xuʼ xkʼopojik batel ta telefono li krixchanoetike xchiʼuk ti sjakʼik li kʼusitik ta sventa Vivliae. Jun ermanoe xi laj yale: «Toj labal sba li kʼusi kʼot ta pasel yuʼun li programa taje. Ta skoj ti ep buchʼutik chkʼopojike mu xa xtakʼ kuʼunkutik skotol».

 Jech kʼuchaʼal kʼot ta pasel ta skʼakʼalil jtakbol Pabloe, li krixchanoetike toj jeltos ti kʼuyelan la xchʼamik li mantale (Hech. 17:1-5). Jlome toj lek chaʼiik li kʼusi chchikintaike. Jech kʼuchaʼal liʼe, li Hector Marshall kʼalal laj yaʼi ta radio ta sventa li Estudios de las Escrituras sbie, la skʼan vakib volumen. Jech kʼuchaʼal laj yal ta tsʼakale, yaloj mi chkoltaat sventa xakʼ chanubtasel sventa relijion ti tspasik jujun domingoe. Pe kʼalal laj xaʼox skʼel li baʼyel volumene, la snop ti chikta srelijione. Kʼot ta jun yajtunel Jeova ti oy tajek ta yoʼonton chchol mantale xchiʼuk tukʼ-o tun ta stojolal Jeova jaʼ to ti kʼuxi cham ta 1998. Li ta slokʼeb Kʼakʼal ta Nueva Escocia, jun coronel yuʼun soltaroetik ti John A. MacDonald sbie, laj yaʼi li mantal ti jaʼ sbi: «El Reino, la esperanza del mundo». Ta yokʼomale xi laj yalbe jun ermanoe: «Voljee, li jnaklejetik ta Cabo Bretone laj yaʼiik li aʼyej mas lek ti muʼyuk toʼox jech yaʼiojik li ta jun lum liʼe».

Pe mu skotoluk lek laj yaʼiik. Jech kʼuchaʼal li jbabeetik ta relijione solel ilinik. Li ta Halifax jlom jkatolikoetike laj yalik ti tslomesik li estasion ta radio ti bu tsjelubtasik mantaletik li Jchanolajeletik ta Vivliae. Ta skoj ti la sujik ajvalil li jnitvanejetik ta relijione, li ajvalile laj yal ta 1928 ti muʼyuk xa chakʼbe permiso Jchanolajeletik ta Vivlia sventa slokʼesik ta radio li mantale. Ta skoj ti chʼabal srasonike, li ermanoetike la spukik jun vun ti xi sbie Who Owns the Air? (¿Buchʼu jaʼ yuʼun li ikʼ ti chakʼ abtejuk radioe?). Akʼo mi jech, li j-abteletik yuʼun ajvalile muʼyuk jel li kʼusi snopoj tspasike.

Taje muʼyuk xchibajesatik li jtsop yajtuneltak Jeova ta Canadae. Li Isabel Wainwright xi laj yale: «Yileluke jaʼ kuch yuʼun li kajkontrakutike. Pe jnaʼoj ti jechuk ta yoʼonton Jeova ti ta jcholkutik mantal ta radioe, oy kʼusi la spas jechuk sventa mu xmake. Ta skoj li kʼusi kʼot ta pasele skʼan jsaʼkutik yan kʼuxi xuʼ jcholkutik li lekil aʼyej ta sventa li Ajvalilal yuʼun Diose». Li Jchanolajeletik ta Vivlia ta Canadae maʼuk xa la stunesik li radio sventa chcholik mantale, yuʼun jaʼ laj yakʼ ta yoʼontonik svulaʼanel li krixchanoetik ta snaike. Akʼo mi jech, oy onoʼox kʼuk sjalil ti lek tun sventa «laj yaʼiik li aʼyej mas lek ti muʼyuk toʼox jech yaʼiojik» li krixchanoetike. (Kʼusitik kʼot ta pasel ta voʼne ta Canadá.)

[Tsʼib ta yok vun]

[Lokʼol ta pajina 31]

[Lokʼol ta pajina 32]

(1) Estasion ta Edmonton (Alberta) (2) Li ermano ti jaʼ oy ta sba skʼelel lus sventa li smakinail radio ta Toronto (Ontario)

[Lokʼol ta pajina 32]

(3) Ti bu chkʼopojik li ta estasion CHUC ta Saskatoon (Saskatchewan)

[Lokʼol ta pajina 32]

[Tsʼib ti mukʼtik sletraile ta pajina 32]

«Ta skoj ti ep buchʼutik chkʼopojike mu xa xtakʼ kuʼunkutik skotol»