Li revista ti mas kʼun ta aʼyele: ¿kʼu yuʼun laj yichʼ pasel?

TA EPAL jabiletik, vinik antsetik ta spʼejel Balumil staojbeik sbalil Li Jkʼel osil ta toyole, yuʼun yan sba yutsil mantaletik lokʼemik ta Vivlia ti te yichʼoj talele. Jaʼ yuʼun li ta julio ta 2011 jaʼo lokʼ li baʼyel achʼ revista ta inglés ti mas kʼun ta aʼyele, taje laj yichʼ alel ti chichʼ pasel preva jun jabile.

Ximuyubaj chkalbotkutik ti la jnopkutik ti chichʼ lokʼesel-o li revista ti mas kʼun ta aʼyele xchiʼuk ta jelavel xtoke chlokʼ ta español, francés xchiʼuk ta portugués.

TI KʼU YUʼUN EP SBALIL CHILIKE

Kʼalal jaʼo laj yichʼik li revista ta inglés ti mas kʼun ta aʼyele, jlom yajrextikotak Jeova te ta Pacífico sur xi laj yalike: «Li ermanoetik avie, mas xa chaʼibeik smelolal kʼusi chal Li Jkʼel osil ta toyole». Yan karta xtoke xi chale: «Li jkʼakʼal ta jchʼakutik toʼox sventa ta jsaʼkutik ta diksionario li jpʼelantik kʼop sventa xkaʼikutik lek smelolale, li avie jaʼ xa te ta jtuneskutik sventa ta jkʼelkutik li tekstoetik yichʼoj talele xchiʼuk ti jnopkutik kʼuxitik stsakojbe sba skʼoplal li xchanobile».

Jun ermana ta Estados Unidos ti chanunajem ta universidade xi chale: «Te van vaxaklajuneb jabil ti jech chikʼopoj xchiʼuk chitsʼibaj ti tsotsik ta aʼyel jech kʼuchaʼal chkʼopojik li buchʼutik lek chanunajemike. Li kʼusi ta jnope xchiʼuk ti kʼuxi chkale toj tsots toʼox ta aʼyel. Laj kakʼ venta ti oy kʼusi skʼan jpas ta sventa ti kʼuyelan chikʼopoje». Li ermana ti toj lek xtojob ta cholmantal avie, xi chale: «Ep koltavanem li revista ti mas kʼun ta aʼyele. Yuʼun li kʼopetik tstunes  tee jaʼ jun skʼelobil ti stakʼ xkaltik kʼusi ti mu tsotsuk ta aʼyele».

Jun ermana ta Inglaterra ti laj yichʼ voʼ ta 1972 xi laj yale: «Kʼalal yakal ta jkʼel li baʼyel revista lokʼ ti mas kʼun ta aʼyele, jaʼ Jeova la skʼelbun laj kaʼi, ti te xchiʼinojun jech kʼuchaʼal jun totil ti tskʼelbe jun loʼil li yuni tsebe».

Jun ermana ti chtun ta Betel ta Estados Unidos ti mas xa ta 40 jabil yichʼoj voʼe chal ti koltaat li revista mas kʼun ta aʼyel ta yaʼibel smelolal jaytosuk kʼusitik chal Vivlia ti mu toʼox xaʼibe smelolale. Jech kʼuchaʼal chal li rekuadro ta revista 15 yuʼun septiembre ta 2011 te laj yalbe smelolal li «epal testigoetic» ti te chal ta Hebreos 12:1, chakʼ ta aʼyel ti jaʼ li epal yajrextikotak Jeova ti mu stakʼ chapele. Xi chale: «Mas to lek laj kaʼibe smelolal li versikulo taje». Ta sventa li xchanel revista ta tsobobbaile xi chale: «Mi laj yal sloʼil jun olol ti tskʼel noʼox li ta revista ti mas kʼun ta aʼyele, skotol li buchʼutik jaʼ chichʼik batel li revista Li Jkʼel osil ta toyole ti ta onoʼox jchantike, solel tskʼupinik tajek li sloʼil chakʼe yuʼun mas jelel li kʼopetik tstunes li uni olole».

Yan ermana ti chtun ta Betele, xi la stsʼibae: «Toj kʼupil chkaʼi xchikintael sloʼil ololetik li ta tsobajeletike. Li achʼ revista ta inglés ti mas kʼun ta aʼyele skoltaoj ololetik sventa xalik li kʼusi oy ta yoʼontonike. Solel tspat koʼonton li sloʼilike».

 Jun ermana ti laj yichʼ voʼ ta 1984 xi la stoj ta vokole: «Xkoʼolaj ti jaʼ la stsʼibabikune. Toj kʼun chkaʼi ta yaʼiel li kʼusi ta jkʼele xchiʼuk kʼalal chkal jloʼil ta tsobajele mas lek jpatoj koʼonton ti lek chkale».

JUN KOLTAEL TA SVENTA LI TOTIL MEʼILETIKE

Xi laj yal jun meʼil ti oy jun skerem ti vukub sjabilale: «Toj ep yorail ta jchʼakbekutik xchiʼuk kipkutik kʼalal chkalilanbekutik smelolal jpʼelantik kʼop kʼalal ta jchapan jbakutik ta sventa Xchanel Li Jkʼel osil ta toyole». ¿Kʼuxi koltaat yuʼun li revista ti mas kʼun ta aʼyele? Xi chale: «Toj labal sba ta ilel ti kʼuxi tskʼel parafoetik xchiʼuk ti lek chaʼibe smelolal li jkereme. Ta skoj ti mas kʼun ta aʼyel li kʼuyelan chchap talele xchiʼuk ti mu natikuk li kʼopetik tstunese, toj lek chaʼi. Yuʼun chchapan stuk li sloʼil chakʼ ta tsobajele xchiʼuk lek tsʼetel xchikin kʼalal jaʼo chichʼ chanel li revistae».

Jun ermana xi chal ta sventa stseb ti baluneb sjabilale: «Mu xa persauk jkoltakutik ta xchapanel li kʼusi tstakʼ ta tsobajele. Bakʼintik xa noʼox ta jkoltakutik ta yaʼibel smelolal ti solel lek ta jchapbekutike. Ta skoj ti xaʼibe xa lek smelolale, mas xa tskʼupin Xchanel Li Jkʼel osil ta toyole».

¿KʼUSI CHAL LI OLOLETIKE?

Ep ololetik chalik ti jaʼ laj yichʼ pasel ta sventaik li achʼ revistae. Li Rebecca ti lajcheb sjabilale xi laj yale: «¡Avokolikuk jech lokʼesik-o! Solel ta jkʼupin li rekuadro ti bu chalbe mas smelolal li jpʼelantik kʼope. Toj kʼunik ta aʼyel, yuʼun xkaʼikutik li ololunkutike».

Li Nicolette ti naka to vukub sjabilale jechtik tsnop ek: «Toj tsots toʼox chkaʼi yaʼibel smelolal Li Jkʼel osil ta toyole. Li avie mas xa ep chkakʼ jloʼil jtuk». Li Emma ti baluneb sjabilale xi la stsʼibae: «Mas xa chkaʼibekutik smelolal kʼusitik xchiʼuk li jmuk ti vakib sjabilale. ¡Kolavalik!».

Jech kʼuchaʼal laj xa kiltike ep buchʼutik tstabeik sbalil li revista ti mas kʼun ta aʼyel li kʼuyelan chchap talele xchiʼuk ti mu natikuk li kʼopetik tstunese. Lek xvinaj ti skʼan oyuk taje, jaʼ yuʼun chichʼ lokʼesel-o xchiʼuk li revista ti ta onoʼox jtunestik talel leʼ xa ta 1879 ti ep chkoltavane.

[Lokʼol ta pajina 29]

[Lokʼol ta pajina 30]

[Tsʼib ti mukʼtik sletraile ta pajina 30]

«Li jkʼakʼal ta jchʼakutik toʼox sventa ta jsaʼkutik ta diksionario li jpʼelantik kʼop sventa xkaʼikutik lek smelolale, li avie jaʼ xa te ta jtuneskutik sventa ta jkʼelkutik li tekstoetik yichʼoj talele xchiʼuk ti jnopkutik kʼuxitik stsakojbe sba skʼoplal li xchanobile»

[Lokʼol ta pajina 31]

[Tsʼib ti mukʼtik sletraile ta pajina 31]

«Toj labal sba ta ilel ti kʼuxi tskʼel parafoetik xchiʼuk ti lek chaʼibe smelolal li jkereme»