¿Mi xvul ta ajol?
¿Mi xvul ta ajol?
¿Mi oy akʼeloj lek li revista Li Jkʼel osil ta toyole, ti mas achʼik to lokʼeme? Mi jeche, paso preva mi xtakʼ avuʼun li kʼusitik liʼe:
¿Kʼusi xuʼ jpastik sventa mu stsan yuʼun kʼokʼ li kʼusi chkaltike?
Jaʼ ti jkʼeltik kʼuyelan oy li koʼontontike. Skʼan mu chopoluk jnoptik, skʼan jkʼeltik ti kʼu yuʼun ta jchopol kʼoptatik li kermanotike. ¿Mi ta jchopol kʼoptatik ta skoj noʼox ti ta jnoptik ti voʼotik mas lekutike? Yuʼun mi li jchopol kʼoptavane, xuʼ me mas stsatsaj li kʼope (15/8, pajina 21).
Kʼalal poʼot xa skʼan xlik skʼakʼalil li Jeovae, ¿kʼusi chkʼotanuk ta pasel?
Chichʼ alel ti «Lamajem cʼop, muʼyuc xiʼel, lec oy scotol». Li lumetike tstsakik ta kʼop xchiʼuk tslajesik li «Mukʼta Babiloniae». Tstsakik ta kʼop steklumal Jeova. Li paskʼop ta Armagedone. Li Satanás xchiʼuk li spukujtake chichʼik jipel ochel li ta natil xabe (15/9, pajina 4).
¿Kʼusi chkʼot ta pasel mi laj xaʼox yichʼ ulesel li lajele?
Li Vivliae yaloj onoʼox ti «slajeb yajcontra chulese jaʼ li lajele» (1 Cor. 15:26). Taje oy me chaʼchop buchʼutik tstabeik sbalil. Li june jaʼ ti «epal cristianoetic» ti kuxulik avie xuʼ kuxul ch-echʼik li ta achʼ balumile xchiʼuk ti muʼyuk xa chchamik-oe. Ta yan xtoke, jaʼ ti ta epal miyon krixchanoetik ti chamemik xae xuʼ chchaʼkuxiik (15/9, pajina 11).
¿Kʼuxi ta jtabetik sbalil ti mu jnaʼtik kʼusi ora chtal li slajebal kʼakʼale?
Kʼalal mu jnaʼtik kʼusi ora chtal li slajebal kʼakʼale, jaʼ chakʼ ti akʼo xkakʼtik ta ilel li kʼusi oy ta koʼontontike, ti akʼo jmuyubtabetik yoʼonton li Jeovae, tstij koʼontontik sventa mu jkʼuxubin jba jtuktik, tskoltautik sventa jpat koʼontontik ta stojolal li Jeovae xchiʼuk chkakʼ ta jkuxlejaltik li kʼusi chalbutik ta Skʼope xchiʼuk kʼalal chkil jvokoltike jaʼ tstsatsubtas li xchʼunel koʼontontike (15/9, pajina 24, 25).
¿Kʼuxi ti chakʼ perton xchiʼuk ti chchʼay-o ta sjol mulil li Diose?
Li Jeovae xi chalbe ta melel li yajtuneltake: «Jʼechʼel ta jchʼaybe o ta coʼnton li xchopolilique; muʼyuc xa ta jtʼabbe o ta coʼnton li smulique» (Jer. 31:34). Kʼalal jaʼ tstsak ta venta li pojelale, li Diose xuʼ xchʼay-o ta sjol li muliletik chichʼ pasele. Kʼalal jech tspas taje muʼyuk xa tsvules-o ta sjol sventa mu xakʼbutik kastigo (1/10, pajina 18).
Kʼalal chal Apocalipsis 1:16, 20 ti stsakoj ta «sbatsʼicʼob» Jesús li «vucub cʼanal[e]», ¿buchʼu jaʼik taje?
Taje jaʼ li buchʼutik tʼujbil chbatik ta vinajele, te tsakal skʼoplalik ek skotol li moletik ta tsobobbailetike (15/10, pajina 14).
¿Kʼusi tskoltautik sventa jpastik li kʼusi chkaltike?
Li ta «slajebal cʼacʼale» joyolutik ta krixchanoetik ti muʼyuk tukʼ yoʼontonike, ti «jchʼunolajel scuyoj [sbaike], pero mu xaqʼuic ta ilel ti oy stsatsal li Diose» (2 Tim. 3:1-5). Jaʼ yuʼun skʼan xkakʼtik persa mu jchiʼintik li krixchanoetik taje, jaʼ jchiʼintik li buchʼutik tspasik li kʼusi chalike (Heb. 10:24, 25) (15/10, pajina 30).
Li kʼusi chal ta Isaías 50:4, 5, ¿kʼuxi te laj yakʼ ta ilel Jesús ti bikʼit laj yakʼ sbae?
Li versikuloetik taje chal ti Jesuse muʼyuk la svalopatin komel li pʼijubtasel akʼbat yuʼun Stot sventa jech tsnaʼ kʼuyelan chkʼopoj. Ta skoj ti oy ta yoʼonton chchan li Jesuse bikʼit laj yakʼ sba, la xchikinta li kʼusi ch-akʼbat xchan yuʼun li Stote. Li Jesuse oy ta yoʼonton chchanbe stalel li Jeovae, jaʼ yuʼun la skʼel lek kʼuxi laj yakʼ ta ilel ta stojolal krixchanoetik ti bikʼit chakʼ sba xchiʼuk li xkʼuxul yoʼontone (15/11, pajina 11).
¿Kʼu yuʼun oy bakʼintik vokol chkaʼitik ti xij-akʼvan ta pertone?
Taje jaʼ ta skoj ti kʼuyelan chkaʼi jbatik kʼalal oy buchʼu chopol kʼusi la spasbutike. Xuʼ van kapemutik, loʼlabil chkaʼi jbatik, ti lekuk xkichʼtik chapanele o xuʼ van ta jkʼan ta jpak jkʼoplaltik (15/11, pajina 27).