Li María Isabele jaʼ jun jcholmantal tseb ti lek baxbole, likem ta San Bernardo ta Chile. Li María Isabel xchiʼuk li yutsʼ yalale jaʼ mapuche stsʼunbalik, xmuyubajik noʼox tskolta sbaik sventa chlik jun tsobobbail ta mapudungún ti jaʼ skʼopike.

Kʼalal laj yichʼ alel ti chichʼ jelubtasel ta mapudungún li Snaʼobil slajel Cristoe xchiʼuk ti laj yichʼ pasel imprimir 2,000 uni vunetik sventa Snaʼobil slajel Cristo li ta kʼop taje, li María Isabele la snop kʼuxi xuʼ skolta sba ta spukel li uni vunetik taje. La svules ta sjol kʼusi spasojan jlom kerem tsebetik ti lek kʼotem ta pasel yuʼunik kʼalal chcholbeik mantal xchiʼilik ta chanune xchiʼuk li jchanubtasvanejetike. La xchiʼin ta loʼil stot smeʼ, vaʼun albat ti akʼo snop kʼuxi xuʼ xakʼ li uni vunetik ta xchanobvune. ¿Kʼusi kʼot ta nopel yuʼun?

Baʼyel la skʼanbe permiso buchʼutik sbainojik chanobvun sventa tsjokʼan jlikuk uni vun ta yochebal chanobvun. Li buchʼutik sbainojik skʼelele, maʼuk noʼox ti laj yakʼbeik permisoe, yuʼun la skʼupil kʼoptaik ta skoj li kʼusi la snop tspase. Jech xtok, kʼalal jaʼo chetʼesik lista ta jun sobe, li direktore laj yal ta vosina ta sventa li takel ta ikʼel taje.

Laje la skʼanbe permiso jchanubtasvanejetik sventa xbat ta jujun salonetik li María Isabele. Kʼalal akʼbat permisoe la sjakʼbe jchanunetik mi oy buchʼu chkʼopojik ta mapudungún. Xi chale: «Kaloje jaʼ noʼox van oy lajuneb o voʼlajuneb jchanunetik ti chkʼopojik ta mapudungún li ta chanobvune, pe oy mas. ¡Ta slajebale laj kakʼ 150 uni vunetik!».

Jun ants ti laj yil li uni vun te jokʼol ta yochebal chanobvune la sjakʼ mi oy buchʼu xuʼ x-albat mas skʼoplal ta sventa li uni vun taje. Nopo noʼox avaʼi ti kʼuyelan labal sba laj yil kʼalal ikʼat batel ta stojolal jun uni tseb ti jaʼ noʼox lajuneb sjabilale. «Yaloj mi jaʼ xa jun ants», xi stseʼet laj yal li María Isabele. Kʼalal laj xaʼox yakʼbe li uni vune xchiʼuk ti laj yalbe jutuk skʼoplale, la sjakʼbe bu nakal sventa chbat svulaʼanik xchiʼuk stot smeʼ yoʼ chalbeik mas ta stojolal li Ajvalilal yuʼun Diose. Li jtob jcholmantaletik ti te chtunik ta mapudungún kʼope, muyubajik tajek kʼalal laj yilik ti kʼot li ants ta Snaʼobil slajel Cristoe xchiʼuk kʼotik yan 26 ti chkʼopojik ta ­mapudungune. ¡Li avie jaʼ xa jun tsobobbail ti yakal chchʼie!

Mu ventauk jayib jabilaltik, ¿mi xuʼ van jech jpastik kʼuchaʼal la spas li uni tseb sventa xkalbetik jchiʼiltik ta chanun o jchiʼiltik ta abtel sventa xbatik ta Snaʼobil slajel Cristo, ta Mantal sventa Skotol Krixchanoetik o ta jun Mukʼta Tsobajel ta oxib kʼakʼal? Mi la jsabetik jutuk skʼoplal ta jvuntike, te ta jtatik sloʼil ermanoetik ti chakʼ jnoptik kʼusi xuʼ jpastik sventa lekuk kʼusi chkʼot ta pasel li kʼusi ta jnop ta jpastike. Jech xtok, jkʼanbetik ta orasion Jeova ti akʼo xakʼbutik xchʼul espiritu sventa xakʼ kiptik yoʼ xkalbetik krixchanoetik ta sventa li Diose (Luc. 11:​13). Mi oy kʼusi lek ta jnop ta jpastike, xuʼ me labal sba chkiltik ek xchiʼuk tspatbutik koʼontontik li kʼusi lek chkʼot ta pasel yuʼune.