Jtos li kʼusi xuʼ tskoltautik ti toj tsots skʼoplal sventa xkuch kuʼuntik batele, jaʼ li spatobil oʼontonal chakʼik li kutsʼ kalaltike, li kamigotike xchiʼuk li kermanotike.

Kʼalal lek xlamet chkʼopoj jun amigoile chpoxtavan xchiʼuk chchʼayesbe yipal li kʼusi kʼux chkaʼitike (Prov. 16:24; 18:24; 25:11). Akʼo mi jech, li melel yajtsʼaklomutik Cristoe maʼuk noʼox ta jkʼan ti chkichʼtik patbel koʼontontike. Yuʼun chlokʼ ta koʼonton jtuktik sventa «jech xuʼ ta jpatbetic yoʼnton ec li bochʼotic oy cʼusiuc noʼox vocolal chaʼyique, yuʼun stsatsubtasojbutic xa coʼntontic ec li Diose» (2 Cor. 1:4; Luc. 6:31). Li Antonio ti jaʼ jun jkʼelvanej ta distrito ta Mexicoe, jaʼ jech laj yil ta xkuxlejal stuk ti melel li kʼusi chal li teksto taje.

Kʼalal tabat xchamel ti linfoma sbie —jtos kanser ti tsokes jchʼichʼeltike—, toj echʼ noʼox laj yat-o yoʼonton. Akʼo mi jech, tsal yuʼun li kʼusitik chopol chtal ta sjole. ¿Kʼusi la spas? Chakʼ persa svulesel ta sjol kʼejojetik sventa Dios xchiʼuk tskʼejinta sventa snopbe skʼoplal li kʼusi chale. Jech xtok, chpatbat tajek yoʼonton kʼalal tsots chal li s-orasione xchiʼuk kʼalal tskʼel li Vivliae.

Akʼo mi jech, li Antonioe laj yakʼ venta ti bu lik talel mas li koltaele jaʼ ta stojolal li yermanotake. Xi chale: «Kʼalal toj tsots chkaʼi jvokolkutik xchiʼuk li kajnile, ta xkalbekutik junuk kutsʼ kalalkutik ti jaʼ mol ta tsobobbail ti akʼo xtale xchiʼuk ti spas orasion ta jtojolalkutike. Taje jaʼ la spat koʼontonkutik xchiʼuk jaʼ pas-o ta jun koʼontonkutik. Koliyal ti la skoltaunkutik li kutsʼ kalalkutike xchiʼuk li kermanotakutike, mu jaluk tsal kuʼunkutik komel li kʼusitik chopol chtal ta jolkutike». ¡Solel la stoj ta vokol ti koltaat yuʼun yamigotak ti lek xkʼanvanik xchiʼuk ti chkʼuxubinvanike!

Yan koltael ta jtatik kʼalal mi la jnuptantik tsots vokolile jaʼ li chʼul espiritue, jech kʼuchaʼal laj yal li jtakbol Pedroe, jaʼ jun matanal (Hech. 2:38). Taje te vinaj kʼalal laj yichʼik chʼul espiritu li epal yajtsʼaklomtak Cristo ta Pentecostés ta sjabilal 33 ta jkʼakʼaliltike. Pe xuʼ skoltautik jkotoltik avi li chʼul espiritu eke, xchiʼuk xuʼ jkʼantik ti kʼuyepal ta xtun kuʼuntike. Jaʼ yuʼun, epuk me jkʼantik (Is. 40:28-31).

Li jtakbol Pabloe tsots laj yil svokol, yuʼun ep ta velta jutuk xa mu cham (2 Cor. 1:8-10). Pe muʼyuk bu xiʼ ti ta xchame, yuʼun snaʼoj ti ta xkoltaat yuʼun li Jeovae. Xi la stsʼibae: «Acʼo ichʼatuc ta mucʼ li Diose, jaʼ li Stot Cajvaltic Jesucristoe, jaʼ li Totil ti ep chcʼuxubinvane, jaʼ li Dios ti chispatbutic coʼntontique. Jaʼ chispatbutic coʼntontic ta sventa scotol jvocoltic» (2 Cor. 1:3, 4). Li Pabloe muʼyuk bu laj yakʼ ti akʼo xat-o mas yoʼonton ta skoj li svokole, yuʼun li vokoliletik la snuptane jaʼ koltaat-o sventa x-ayan ta yoʼonton li yantike. Yuʼun jaʼ chapanat lek sventa xuʼ spatbe yoʼonton li buchʼutik tskʼanik patbel yoʼontonike.

Kʼalal mas xaʼox lekub jutuk li Antonioe och yan velta ta jkʼelvanej ta distrito. Li Antonio xchiʼuk li yajnile oy onoʼox ta yoʼontonik li ermanoetike, pe li avie mas xa chakʼ yipik sventa svulaʼanik xchiʼuk spatbeik yoʼonton li buchʼutik ip chaʼiike. Jech kʼuchaʼal liʼe, kʼalal jaʼo ay svulaʼan jun ermano ti tsots xchamele, laj yaʼi ti mu skʼan xbat ta tsobajeletike. Xi chal li Antonioe: «Maʼuk ti yuʼun muʼyuk skʼanoj li Jeovae o li ermanoetike, pe ta skoj li xchamele solel mu xa kʼusi xtun-o laj yaʼi sba».

Sventa tspatbe yoʼontone, li Antonioe la skʼanbe ti akʼo spas orasion li ta jun reunion sosiale. Akʼo mi mu sta-o chaʼi tspas li orasione, la spas. Li Antonioe xi chvul ta sjole: «Toj alakʼ sba li orasion la spase xchiʼuk yan krixchano xa yilel. Yuʼun jtunel laj yaʼi sba yan velta».

Tsots me skʼoplal ti te oyuk ta joltik ti kiloj jvokol jkotoltike, akʼo mi tsots o mi jutuk. Pe jech kʼuchaʼal laj yal li jtakbol Pabloe, li tsatsal vokoliletik ta jnuptantike jaʼ chchapanutik sventa jpatbetik yoʼonton li yantike. Jaʼ yuʼun, oyuk ta koʼontontik li kermanotaktik ti chil svokolike xchiʼuk jchanbetik stalelal Jeova sventa jpatbetik yoʼonton li jchiʼiltaktike.