1, 2. ¿Kʼusi albilkʼop ta sventa slajebal kʼakʼal tskʼan tsnaʼik li yajtsʼaklomtak Cristoe, xchiʼuk kʼu yuʼun?

 JAʼ TO stuk xa oyik xchiʼuk Jchanubtasvanej yuʼunik li Pedro, Santiago, Juan xchiʼuk li Andrese. Solel te xvulvun yoʼontonik ta sventa li kʼusi laj yal Jesús ti kʼuyelan chichʼ jinesel li chʼulnae (Mar. 13:1-4). Jaʼ yuʼun xi la sjakʼbeike: «¿Kʼusi ora chkʼot ta pasel li kʼusitik taje, xchiʼuk kʼusi senyail ti liʼ xa oyote xchiʼuk li slajebal kʼusitik chkʼotanuk ta pasele?» (Mat. 24:1, 2; 24:3, TNM). Li Jesuse laj yal kʼusitik chkʼotanuk ta pasel ti maʼuk noʼox tsjelbe tajek xkuxlejal li krixchanoetike, moʼoj, yuʼun jaʼ senyailtak xtok slajeb li xchopol balumil Satanase. Taje jaʼ li kʼusi toj labal sba laj yaʼiik li yajtakboltake, jaʼ yuʼun la skʼan la snaʼik kʼusi jaʼ. Kʼalal laj xaʼox yalbe skʼoplal li kʼusitik xibal sba chkʼotanuk ta pasel li Jesuse, jech kʼuchaʼal paskʼopetik, viʼnal xchiʼuk ti ch-epaj li choplejale, laj yal ti oy kʼusi lek chkʼot ta pasel xtok li ta slajebal kʼakʼale, yuʼun xi laj yale: «Persa baʼyuc ta xichʼ cholel ta sbejel banamil li Lequil Aʼyej ta jventae; jaʼ to ta xtal li slajebal cʼacʼale» (Mat. 24:7-14).

² Li yajtsʼaklomtak Jesuse solel tskʼupinik ti jmoj chcholik «li Lequil Aʼyej ta sventa ventainel yuʼun Diose» (Luc. 8:1; 9:1, 2). Jaʼ yuʼun tal van ta sjolik li kʼusi laj yal li Jchanubtasvanej yuʼunike: «Ta melel toj ep li cʼaoje; jaʼ muʼyuc ep li bochʼo tscʼajique. Jaʼ lec cʼanbeic Yajval cʼaoj ti acʼo stac batel ep jcʼaojetic yuʼune» (Luc. 10:2). Pe ¿kʼusi xuʼ spasik sventa xcholik mantal «ta sbejel banamil»? ¿Bu van chlokʼ tal li yan jkʼajojetike? ¡Jaʼ to van laj yaʼibeik smelolal jechuk ti lajuk yilik li kʼusi chkʼot ta pasel ta tsʼakal kʼalal te xchiʼukik li Jesuse! Toj labal to sba laj yaʼiik ti lajuk yilik kʼuxi kʼot ta pasel li kʼusi chal ta Mateo 24:14.

3. ¿Kʼuxi yakal chkʼot ta pasel avi li kʼusi chal ta Lucas 21:34, xchiʼuk kʼusi skʼan jakʼbe jbatik?

³ Li albilkʼop laj yal Jesuse yakal xa chkʼot ta pasel  ta melel li avie, yuʼun ta smiyonal noʼox viniketik xchiʼuk antsetik jmoj ch-abtejik ta xcholel li lekil aʼyej ta sventa li Ajvalilal yuʼun Dios ta spʼejel Balumile (Is. 60:22). Jech xtok, li Jesuse laj yakʼ ta aʼiel ti oy jlom yajtsʼaklomtak ti vokol chaʼiik xcholel mantal li ta slajebaltik xa kʼakʼale, jaʼ xkaltik, ti chchʼay xchiʼuk ti chyijub yoʼontonike (kʼelo Lucas 21:34). Li avie kilojtik ek ti yakal chkʼot ta pasele. Li jlom yajtuneltak Diose chchʼay yoʼontonik ta yan kʼusitik. Taje te chvinaj ta sventa li kʼusi tsnop tspasik ta sventa yabtelike, li chanun ta universidade, li kʼusitik x-ayan yuʼunike, o ti kʼu sjalil ta xchʼakbeik yorail li tajimol xchiʼuk li chʼayob oʼontonale. Li yan yajtsʼaklomtak Cristoe yakal chlubik ta skoj ti chichʼik sujel xchiʼuk li kʼusi chat-o yoʼontonik ta jujun kʼakʼale. Jaʼ yuʼun, lek ti xi jakʼbe jbatike: «¿Kʼu van yelan xbat li jkuxlejale? ¿Kʼuxi chkakʼ ta ilel kʼusi mas tsots skʼoplal chkaʼi ta sventa li kʼusitik ta jnop ta jpase?».

4. 1) ¿Kʼusi la skʼan ta s-orasion Pablo ta stojolal li yajtsʼaklomtak Cristo ta Filipos, xchiʼuk kʼu yuʼun? 2) ¿Kʼusi ta jkʼeltik li ta xchanobil liʼe xchiʼuk li ta yan xchanobile, xchiʼuk kʼusi sbalil ta jtatik?

⁴ Li yajtsʼaklomtak Cristo ti kuxiik ta baʼyel sigloe, laj yakʼik persa sventa jaʼuk baʼyel xakʼ ta yoʼonton li kʼusitik ta sventa mantale. Jaʼ yuʼun li jtakbol Pabloe la spas orasion ta stojolal li ermanoetik ta Filipos ti akʼo snaʼik li kʼusi «más tsots [skʼoplale]» (Filip. 1:9-11, ATH). Jech kʼuchaʼal la spas li Pabloe, jutuk mu skotolikuk li krixchanoetik li vaʼ kʼakʼal taje «lec tsots yoʼntonic jamal chalic batel li scʼop Diose» (Filip. 1:12-14). Jaʼ jechtik chkʼot ta pasel li ta jkʼakʼaliltik eke. Jutuk mu jkotoltikuk tsots koʼontontik ta jcholtik batel li Skʼop Diose. Akʼo mi jech, ¿mi xuʼ skoltautik sventa xkakʼ mas ta koʼontontik li xcholel mantal mi ta jkʼeltik li kʼusitik chkʼotanuk ta pasel yuʼun li s-organisasion Diose? Ta melel jaʼ jech. Li xchanobil liʼe, chakʼ jnoptik li kʼusi yakal tspas Jeova sventa xkʼot ta pasel li kʼusi chal Mateo 24:14. ¿Kʼusi oy ta yoʼonton tspas li s-organisasion Diose? Xchiʼuk, ¿kʼuxi tstij koʼontontik li voʼotik xchiʼuk kutsʼ kalaltik li kʼusi oy ta yoʼonton tspase? Li ta xchanobil chtale, te ta jchantik kʼusi tskoltautik sventa xkuch kuʼuntik xchiʼuk jmojuk xijxanav batel xchiʼuk li s-organisasion Jeovae.

5, 6. 1) ¿Kʼu yuʼun laj yakʼ ti xkojtikintik kʼuyelan li jvokʼ s-organisasion Jeova ta vinajele? 2) ¿Kʼusi akʼbat yil yuʼun Dios li Ezequiele?

⁵ Ep kʼusitik muʼyuk laj yakʼ ta tsʼibael ta Vivlia li Jeovae. Jech kʼuchaʼal liʼe, xuʼ van toj lek ti lajuk yalbe skʼoplal ti kʼuyelan ch-abtej li jchinabtike o ti kʼuyelan ch-abtej li vinajelbalumile, pe mu jechuk la spas. Moʼoj, yuʼun solel jaʼ laj yalbe smelolal li kʼusi tskʼan tspase xchiʼuk ti jechuk xijkuxi kʼuchaʼal tskʼan yoʼontone (2 Tim. 3:16, 17). Jaʼ yuʼun toj labal sba ti kʼuyelan lek chalbe skʼoplal Vivlia ta sventa li jvokʼ s-organisasion Jeova ti mu xvinaj ta kʼelele. Toj labal sba li kʼusi la stsʼibaik Isaías, Ezequiel, Daniel xchiʼuk Juan ta sventa ti kʼuyelan oy li s-organisasion Jeova ta vinajele (Is. 6:1-4; Ezeq. 1:4-14, 22-24; Dan. 7:9-14; Apoc. 4:1-11). Xkoʼolaj kʼuchaʼal tsjambe lek stiʼ li vinajele xchiʼuk lek jamal chkom ti xkiltik skotole. ¿Kʼu yuʼun la skʼan ti teuk tsʼibabil ta Vivlia taje?

⁶ Jaʼ tskʼan ti teuk ta joltik ti te oyutik li ta s-organisasion Jeova ti oy ta sjunul vinajelbalumile. Ep kʼusitik chkoltavan sventa xkʼot ta pasel li kʼusi tskʼan tspas Jeovae, manchuk mi mu xkiltik li jlome. Jech kʼuchaʼal liʼe, li j-alkʼop Ezequiele laj yil li jvokʼ s-organisasion Jeova ti mu xvinaj ta kʼelele, ti xkoʼolaj kʼuchaʼal  mukʼta kareta te ta vinajele. Li kareta taje anil tajek chanav xchiʼuk ta anil chjoypʼij ti bu tskʼan chbate (Ezeq. 1:15-21). Kʼalal chjoypʼij ta jujukoj li skarosal karetae nom to bu chkʼot. Li Ezequiele laj yil xtok kʼuyelan li Buchʼu tstij li kareta taje, yuʼun xi laj yale: «Jaʼ jech chvinaj jech chac cʼu chaʼal bronce ti lec stsʼayayete, joyibtabil ta cʼocʼ ta joyob yilel [...]. Jaʼ jech laj quilbe yutsilal slequilal» li Jeovae (Ezeq. 1:25-28). ¡Li j-alkʼope chʼayal to van kʼot yoʼonton kʼalal laj yil taje! Laj yil ti lek tspas ta mantal s-organisasion li Diose, ti lek tsbeiltas ta xchʼul espiritue. ¡Toj labal xa noʼox sba kʼuyelan xvinaj li jvokʼ s-organisasion Jeova ta vinajel ti yakal ch-abteje!

7. ¿Kʼuxi tspat koʼontontik li kʼusi akʼbat yil yuʼun Dios li Daniele?

⁷ Li Daniel eke ep kʼusitik laj yil ti tspat koʼontontike. Laj yichʼ akʼbel yil kʼuchaʼal «jun Mol» li Jeovae, ti chchoti ta jun chotlebal ti xkoʼolaj kʼuchaʼal leb kʼokʼ ti oy skarosaltake (Dan. 7:9, Ch). Li Jeovae tskʼan ti akʼo yil Daniel ti yakal ta xanbal li s-organisasion sventa xkʼot ta pasel li kʼusi tskʼan tspase. Li j-alkʼope laj yil ti oy buchʼu «xcoʼlaj xchiʼuc cristiano yilel», ti jaʼ Jesuse, ti jaʼ chichʼ akʼbel ta skʼob skʼelel li jvokʼ s-organisasion Jeova ta Balumile. Li tukʼil abtelal tspas Jesuse maʼuk noʼox junchib jabil, yuʼun «li yabtel iʼacʼbate mu xlaj scʼoplal o; li yabtel ta ajvalilale mu xuʼ chichʼ tuchʼbel o» (Dan. 7:13, 14). ¿Mi mu jechuk ti jaʼ tskoltautik sventa jpat koʼontontik ta stojolal Jeova xchiʼuk ti oyuk sbalil chkiltik li kʼusi chkʼot ta pasel yuʼune? Li Jeovae laj yakʼbe «tsots yabtel; laj yakʼbe svuʼel» li Xnichʼone, ti laj yichʼ akʼel ta preva xchiʼuk ti laj yakʼ ta ilel stukʼil yoʼontone. Jamal xvinaj ti lek spatoj yoʼonton Jeova  ta stojolal li Xnichʼone. Li voʼotik eke xuʼ jpat koʼontontik ta stojolal Jesús ti jaʼ li Bankilal kuʼuntike.

8. ¿Kʼu yelan laj yaʼi sbaik li Ezequiel xchiʼuk Isaías kʼalal oy kʼusi akʼbat yilik yuʼun Jeovae, xchiʼuk kʼu yelan chkaʼi jbatik ek?

⁸ ¿Kʼusi tstij koʼontontik ta spasel ti ta jnaʼtik li kʼusi tspas li jvokʼ s-organisasion Jeova ti mu xvinaj ta kʼelele? Jech kʼuchaʼal li Ezequiele xuʼ van labal sba chkaʼitik xchiʼuk mas bikʼit chkakʼ jbatik kʼalal chkaʼibetik smelolal li kʼusi yakal tspas Jeovae (Ezeq. 1:28). Mi ta jnopbetik skʼoplal li s-organisasion Jeovae jaʼ tskoltautik sventa oyuk kʼusi jpastik jech kʼuchaʼal li Isaiase. Yuʼun kʼalal sta-o laj yile laj yalbe ta ora li krixchanoetike (kʼelo Isaías 6:5, 8). Spatoj lek yoʼonton ti chkoltaat yuʼun Jeova ta stsalel kʼusiuk vokolale. ¡Tspat tajek koʼontontik ek ti chkiltik ti muʼyuk chpaj ta xanbal li s-organisasion Jeova ta vinajele xchiʼuk ti tspas skotol li kʼusitik tskʼan tspase!

9, 10. ¿Kʼu yuʼun skʼan oyuk jvokʼ s-organisasion Jeova liʼ ta Balumile?

⁹ Ta stojolal Xnichʼon li Jeovae oy kʼusi la spas ta Balumil sventa jmojuk x-abtej xchiʼuk li jvokʼ s-organisasion ti mu xvinaj ta kʼelele. ¿Kʼu yuʼun skʼan junuk organisasion liʼ ta Balumil sventa xkʼot ta pasel li kʼusi chal Mateo 24:14? Jkʼelbetik oxib srasonal.

¹⁰ Ta baʼyele, li Jesuse laj yal ti chcholik mantal «ta sbejel banamil» li yajtsʼaklomtake (Hech. 1:8). Ta xchibale, skʼan oyuk buchʼu xchapan sventa xichʼ pukel li veʼlil ta mantale xchiʼuk ti oyuk buchʼu xchabiatik li jcholmantaletike (Juan 21:15-17). Ta slajebe, oy kʼusitik skʼan xichʼ pasel yoʼ stsob sbaik sventa xichʼik ta mukʼ Jeova li jcholmantaletike xchiʼuk ti xichʼik chanubtasel ti kʼuyelan chcholik mantale (Heb. 10:24, 25). Ti chʼabaluk li kʼusitik laj xa kalbetik skʼoplale mu xkʼot ta pasel ti jechuke. Sventa lekuk xbat yuʼunik xcholel mantal li jchankʼopetike skʼan lekuk chapalik.

11. ¿Kʼuxi xuʼ jkolta jbatik spasel li kʼusitik chichʼ pasel ta s-organisasion Jeovae?

¹¹ ¿Kʼuxi xuʼ jkolta jbatik spasel li kʼusitik chichʼ pasel ta s-organisasion Jeovae? Li kʼusi mas tsots skʼoplal xuʼ jpastike jaʼ ti jpat koʼontontik ta stojolal li buchʼutik tsbeiltasik li cholmantal ti jaʼ vaʼanbilik yuʼun Jeova xchiʼuk Jesuse. Li ta balumil avie, ep ti kʼusi chchʼaybat-o yoʼontonik li ermanoetike. Li jvokʼ s-organisasion Jeova liʼ ta balumile, ¿kʼusi batem ta yoʼonton spasel?

12, 13. ¿Kʼuxi chakʼik ta ilel ti tspas li yabtel sbainojik li moletik ta tsobobbaile, xchiʼuk kʼusi tstij avoʼonton spasel?

¹² Yichʼoj vaʼanel moletik ta tsobobbail ti lek chanemik ta spʼejel Balumil sventa tsbeiltasik batel li xcholel lekil aʼyej ta sventa li Ajvalilal yuʼun Dios ti bu nakalike. Kʼalal oy kʼusi tsnop tspasike tsaʼik beiltasel ta Skʼop Dios, yuʼun jaʼ jech chkʼot kʼuchaʼal lus li Skʼop Diose xchiʼuk chkʼot kʼuchaʼal toj sventa xil sbeik (Sal. 119:105). Jech xtok tskʼanbeik Jeova ti akʼo xbeiltasatike (Mat. 7:7, 8).

¹³ Jech kʼuchaʼal li buchʼutik tsbeiltasik li cholmantal ta baʼyel sigloe, li moletik ta tsobobbail avi eke jaʼ batem ta yoʼontonik «spuquel li scʼop Diose» (Hech. 6:4). Xmuyubajik tajek kʼalal chilik ti chpuk xa batel ta spʼejel Balumil li xcholel mantale, maʼuk noʼox ti bu slumalike (Hech. 21:19, 20). Sventa xichʼ cholel batel li mantale, tskʼelik li kʼusi chal Skʼop Diose xchiʼuk chchʼunik li beiltasel chakʼ xchʼul espiritue, ti maʼuk noʼox chalik epal mantaletik ti skʼan pasele (kʼelo Hechos 15:28).  Jaʼ jech li ermanoetik taje lek kʼusi chakʼik ta chanel li ta jujun stsobobbailike (Efes. 4:11, 12).

14, 15. 1) ¿Kʼusitik abtelaletik yakal chichʼ pasel sventa xichʼ cholel batel mantal ta spʼejel Balumil? 2) ¿Kʼu yelan chavaʼi aba ti chakolta aba ta xcholel li mantale?

¹⁴ Jtos ti kʼusi mu xilik yantike jaʼ ti kʼuyelan chakʼik persa xchapanel li veʼlil ta mantale, li vunetik lokʼem ta Vivliae, li tsobajeletike xchiʼuk li mukʼta tsobajeletike. Ta smilal noʼox ermanoetik tsots ch-abtejik ti muʼyuk tojbilik ta sjelubtasel ta yan kʼopetik li veʼlil ta mantal ta mas ta vakib sien kʼopetik sventa jkotoltikuk «xcaʼitic ta jcʼoptic li cʼusitic toj labal sba tspas li Diose» (Hech. 2:7-11). Ermanoetik xchiʼuk ermanaetik ti kerem tsebetik toe tstunesik spasobil vunetik ti lek anil x-abteje xchiʼuk makinaetik sventa chichʼ pasel li jvuntike. Ta mas tsʼakal une chichʼ pukel batel ta namal lumetik.

¹⁵ Yakal chichʼ chapanel kʼutik yelan xuʼ mas jcholtik batel li lekil aʼyejetik ta jujun jtsobobbailtike. Jech kʼuchaʼal liʼe, ta smilal noʼox chkoltavanik ta svaʼanel Salonetik sventa Tsobobbail xchiʼuk Salonetik sventa Mukʼta Tsobajeletik. Li yantik xtoke chkoltavanik kʼalal mi oy bu laj yil svokolik ta nojelal ta voʼ o ta yan kʼusitik o kʼalal oy kʼusi tsots chkʼot ta pasel ta stojolalike xchiʼuk kʼalal jaʼo chichʼ chapanel li mukʼta tsobajeletik xchiʼuk li Chanobvunetik sventa Diose. Taje jaʼik jlom abtelaletik ti mu xkiltik kʼuyelan chichʼ pasele. Pe ¿kʼu yuʼun skʼan xichʼ pasel epal abtelaletik? Jaʼ sventa xichʼ cholel batel li lekil aʼyeje, sventa lekuk oyik ta mantal li jcholmantaletike xchiʼuk sventa x-epaj batel li melel yichʼel ta mukʼ Diose. ¿Mi jaʼ van yakʼoj ta yoʼonton spasel li kʼusi mas tsots skʼoplal li jvokʼ s-organisasion Jeova liʼ ta Balumile? ¡Jaʼ jech ta melel!

16. ¿Kʼusi van xuʼ jpastik ti xuʼ jtabetik sbalil xchiʼuk li kutsʼ kalaltike?

¹⁶ ¿Mi ta van jchʼakbetik yorail bakʼintik sventa jnoptik li kʼusitik yakal tspas li s-organisasion Jeovae? Jlom ermanoetike jaʼo tsabeik skʼoplal xchiʼuk tsnopbeik skʼoplal li ta yichʼel ta mukʼ Jeova ta yutsʼ yalalike o jaʼo kʼalal chchan Svivlia ta stukike. Toj labal sba ti jchanbetik skʼoplal li kʼusitik akʼbat yilik yuʼun Dios li Isaías, Ezequiel, Daniel xchiʼuk Juane. Li livro Los testigos de Jehová, proclamadores del Reino de Dios, li yan vunetik ti lokʼemik ta Vivlia xchiʼuk li pelikulaetik ti oy ta jkʼoptike, jaʼ tskoltautik sventa xkojtikinbetik lek li s-organisasion Jeovae.

17, 18. 1) ¿Kʼusi sbalil latabe li xchanobil liʼe? 2) ¿Kʼusitik skʼan jakʼbe jbatik?

¹⁷ Kʼalal ta jnopbetik skʼoplal li kʼusi tspas Jeova li ta s-organisasione ta me jtabetik sbalil. Ti kʼuyelan lek ch-abtej li s-organisasion Jeovae, jechuk me xkakʼ ta koʼontontik ek li kʼusi mas tsots skʼoplale. Jaʼ jech ta jchanbetik stalelal Pablo kʼalal xi la stsʼibae: «Mu xchibaj [koʼontontik] ta xcholel, yuʼun jaʼ cabtel laj [yakʼbutik] Dios ta sventa ti toj ep la [xkʼuxubinutike]» (2 Cor. 4:1). Xi la spatbe yoʼonton li xchiʼiltake: «Mu me xijlubtsajutic ta spasel li cʼusitic leque. Yuʼun tsta yorail chcʼot jcʼajbetic sat, me muc xchibaj coʼntontic ta spasele» (Gál. 6:9).

¹⁸ ¿Mi oy kʼusi skʼan jtukʼibtastik ta sventa li kʼusi nopem xkaʼitik spasel jujun kʼakʼal ti xuʼ van ta jtuktik o ta kutsʼ kalaltik, sventa jnaʼtik li kʼusi mas tsots skʼoplale? ¿Mi xuʼ lek noʼox jkuxlejaltik xchiʼuk ti mu masuk jchʼay koʼontontik sventa jcholtik mas mantal ti jaʼ mas tsots skʼoplale? Li ta yan xchanobil chtale te ta jkʼeltik batel voʼtos smelolal kʼusi xuʼ skoltautik sventa jmojuk xijxanav batel xchiʼuk li s-organisasion Jeovae.