Epal lumetik ta voʼnee, tsjokʼanik ta jtel teʼ jlom jpas tsatsal muliletik. Jaʼ jech tspasik toʼox li jromaetike, chchukik ta jtel teʼ o tsbajik ta laux, te jokʼol jayibuk kʼakʼal jaʼ to mi cham ta skoj li kʼusitik kʼux chaʼie, li takitiʼile, li viʼnale xchiʼuk ta skoj yan kʼusitik. Toj echʼ xa noʼox kʼexlal sba ti vaʼ yelan chlajik ta milele, jaʼ yuʼun jaʼ noʼox jech chichʼik milel li jpas tsatsal mulil ti toj chopolik ta bu kʼalale.

Pe ¿mi jech tsmilik li jpas tsatsal mulil li ta voʼneal Israele? Xi chal li Smantal Moisese: «Me oy jun vinic la sta tsots smul ti chapanbil xa ti [chichʼ milele]» skʼan me «mu me teuc jocʼol chcom sjunul acʼubal [li sbekʼtale]. Acʼo yichʼ muquel ta scʼacʼalil noʼox» (Deut. 21:22, 23). Jamal xvinaj chaʼa, kʼalal maʼuk toʼox jkʼakʼaliltike baʼyel chichʼ milel li jpas tsatsal mulile, vaʼun ta tsʼakale chichʼ jokʼanel ta jtel teʼ o ta jtekʼ teʼ.

Xi chal li Levítico 20:2 ta sventa taje: «Bochʼouc noʼox, me israel, o me yanlum ti te nacal ta Israele, me ta xacʼ xnichʼon ta smoton li dios Moloque, acʼo yichʼ milel ta ton yuʼun li achiʼiltaquic te ta avosilalique». Li buchʼutik «xchanoj icʼchʼulelale xchiʼuc ti chchan xa tʼunule» skʼan jech xichʼik chapanel ek, jaʼ xkaltik, ti skʼan xichʼik akʼbel ton jaʼ to mi chamike (Lev. 20:27).

Jech noxtok, xi chal li Deuteronomio 22:23, 24: «Me oy jun tojol tseb ti chapal xa chicʼ sbaic xchiʼuc jun vinique, pero me icʼopanat yuʼun yan vinic te ta lume, me la xchiʼin sba ta vayel xchiʼuque, xchibalic acʼo yichʼic iqʼuel batel ta stojol li banquilaletic te ta lum yoʼ bu xuʼ chchapaj ti acʼo yichʼic milel ta ton xchibalique. Li tsebe jaʼ smul chcʼot ti muc xʼavan, ti muc scʼan coltael yuʼun li bochʼotic te oyic ta lume. Yan li vinique jaʼ smul ti laj yutsʼintabe yajnil li xchiʼile. Jech ta xʼul o li cʼusi chopol te ta atojolique». Jech kʼuchaʼal chkiltike, li buchʼutik tsots chtabat smulik ta Israel ta skoj ti tspʼajik mantale, chichʼik akʼbel ton. *

Xi chal li Deuteronomio 21:23, ta Xchʼul Cʼop ti Jtotic Diose, ta skʼop Chamula: «Ta xʼalbat ti bisbil xa ta cotol chaval yuʼun ti Dios ti buchʼu jocʼol» ta jtel teʼe. Jaʼ yuʼun, li buchʼutik chilik ti jokʼol ta jtel teʼ o ta jtekʼ teʼ sbekʼtal li chopol krixchanoe, «bisbil xa ta cotol chaval yuʼun ti [Diose]». Taje jaʼ sventa mu spasik-o choplejal li j-israeletike.