Li sprevailtake chakʼ ta ilel ti jaʼik kuxlejaletik ti mu xvinaj ta kʼelele. ¿Kʼusi jaʼ li sprevailtak taje?

Xi chal li Génesis 6:2: «Li xnichʼnabtac Diose laj yilic ti toj cʼupilic sba li tsebetique. Jech te lic stʼujic ti bu junucal tscʼan chiqʼuique, jech te inupin xchiʼuquic».

Li ta Tsʼibetik ta Hebreo Kʼop ti chal «xnichʼnabtac Dios», xie, te chichʼ tael ta Génesis 6:2, 4; Job 1:6; 2:1; 38:7 xchiʼuk ta Salmo 89:6. * ¿Kʼusi chal li loʼiletik ta sventa li «xnichʼnabtac Diose»?

Li xnichʼnabtak melel Dios chal ta Job 1:6, jaʼik kuxlejaletik ti mu xvinaj ta kʼelel ti te tsobolik ta stojolal Diose. Taje te kapal skʼoplal li Satanase, ti ay xaʼox xan spʼejel Balumile (Job 1:7; 2:1, 2). Li ta Job 38:4-7 chal ti xnichʼnabtak Diose lik xtʼax skʼobik kʼalal la xchotan li «ton sventa yichʼum yip» li Balumile. Li nichʼnabiletik taje jaʼik anjeletik, yuʼun muʼyuk toʼox pasbil mi junuk krixchano. Ta slajebe, li xnichʼnab Dios chal ta Salmo 89:6, jaʼik ta melel anjeletik ti te xchiʼinojik Dios ta vinajele, ti maʼuk krixchanoetik ti pasbil ta bekʼet xchiʼuk ta bake.

Jaʼ yuʼun chaʼa, ¿buchʼutik jaʼik li «xnichʼnabtac Dios» chal ta Génesis 6:2, 4? Jech kʼuchaʼal laj xa jchanbetik skʼoplal ta Vivliae, xuʼ xkʼot ta nopel kuʼuntik ti jaʼik kuxlejaletik ti mu xvinaj ta kʼelel ti talik ta Balumile.

Jlome mu xchʼunik mi oy anjeletik ti tskʼan chchiʼinik ta vayel antsetike, yuʼun kʼuchaʼal laj yal Jesuse muʼyuk chiʼinejbail ta vayel mi jaʼuk nupunel li ta vinajele (Mat. 22:30). Akʼo mi jech, oy anjeletik ti la spas sbekʼtalik bakʼintike, jaʼ yuʼun jmoj veʼik, jmoj laj yuchʼik voʼ xchiʼuk li krixchanoetike (Gén. 18:1-8; 19:1-3). Jaʼ yuʼun chaʼa, oy srasonal ti chkaltik ti xuʼ xchiʼinik ta vayel antsetik kʼalal la spas sbekʼtalik li anjeletike.

Li Vivliae chalbe lek srasonal sventa jchʼuntik ti jech kʼot ta pasele. «Li yajʼalmantaltac [Dios] ti muc xichʼic ta mucʼ li yabtel acʼbilique, ti la scomtsanic li yavil acʼbilique» chichʼik koʼoltasel li ta jpasmuliletik ta Sodoma ti «solel laj yacʼ sbaic o ta spasel cʼusi tscʼan sbecʼtalic» jech kʼuchaʼal chal ta Judas 6, 7. «Solel laj yacʼ sbaic o ta spasel cʼusi tscʼan sbecʼtalic ti mu xa jechuc scʼoplal ta [pasel]» li anjeletik xchiʼuk li jnaklejetik ta Sodomae. Jun loʼil ti xkoʼolaj tajeke jaʼ li kʼusi chal 1 Pedro 3:19, 20, ti te tsakal skʼoplal xchiʼuk jtoyba anjeletik ti kʼalal kuxi li Noee (2 Ped. 2:4, 5). Jaʼ yuʼun chaʼa, li kʼusi la spasik li jtoyba anjeletik ta skʼakʼalil Noee koʼol xchiʼuk li mulil la spasik ta Sodoma xchiʼuk Gomorrae.

Xuʼ xkaltik ta jamal ti «xnichʼnabtac Dios» chal ta Génesis 6:2, 4 jaʼ anjeletik ti la spas sbekʼtalike, ti mulivajik xchiʼuk antsetike.

Li jtakbol Pedroe laj yalbe skʼoplal chʼulelaletik ti jaʼik «li jbajmantaletic ta voʼone ti cʼalal cuxul toʼox li Noee, ti imalaatic yuʼun Dios[e]» (1 Ped. 3:20). Jamal ta aʼyel ti jaʼik li anjeletik ti jmoj la stoy sbaik xchiʼuk Satanase. Li Judas eke laj yalbe skʼoplal li anjeletik «ti muc xichʼic ta mucʼ li yabtel acʼbilique, ti la scomtsanic li yavil acʼbilique» xchiʼuk chukatik yuʼun Dios «ta icʼ osil sbatel osil cʼalal to tsta yorail chichʼic chapanbel smulic» (Jud. 6).

¿Kʼuxi la stoy sbaik ta skʼakʼalil Noé li anjeletike? Kʼalal skʼan toʼox xtal li Nojelal ta voʼe la spas sbekʼtalik, pe mu jechuk akʼbilik yuʼun Dios (Gén. 6:2, 4). Maʼuk noʼox, yuʼun la xchiʼinik ta vayel antsetik, taje mu staleluk onoʼox jech pasbilik, yuʼun maʼuk sventa jech laj yichʼik pasel (Gén. 5:2). Ta me xichʼik lajesel mi kʼot yorail yuʼun Dios li jpʼajmantal anjeletik xchiʼuk ti chopolike. Jech kʼuchaʼal laj yal li Judase te oyik ta «icʼ osil» li avie, ti xkoʼolaj kʼuchaʼal oyik ta chukinabe.

¿Kʼuxi xchiʼuk bakʼin ti la xcholbe mantal «chʼulelaletic yoʼ bu chucajtic» li Jesuse? Li Pedroe chal ti jech kʼot ta pasel kʼalal chaʼkuxiem xaʼox, ti yichʼoj xaʼox «achʼ sbecʼtal ta sventa Espíritu» li Jesuse (1 Ped. 3:18, 19). Jech xtok, laj yal ti la xcholbe mantal chʼulelaletik li Jesuse. Li jpʼel kʼop taje chakʼ ta aʼyel ti yalojbe xaʼox mantal chʼulelaletik kʼalal la stsʼiba li sbaʼyel karta Pedroe. Vaʼun chaʼa, xkaʼitik ti kʼalal oy toʼox kʼuk sjalil chaʼkuxiem li Jesuse, laj yalbe ti staik-o xichʼik lajesel li chopol kuxlejaletik ti mu xvinaj ta kʼelele. Li aʼyej laj yalbee maʼuk sventa tspatbe-o yoʼontonik, moʼoj, yuʼun jaʼ sventa chichʼik chapanel (Jon. 1:1, 2). Ta skoj ti laj yakʼ ta ilel xchʼunel yoʼonton, stukʼil yoʼonton kʼalal to ti laj yichʼ milel li Jesuse xchiʼuk ti chaʼkuxie, te vinaj ti mu kʼusi xuʼ spasbat yuʼun li Diabloe, jaʼ yuʼun sta-o chbat yalbe ti chichʼik lajesele (Juan 14:30; 16:8-11).

Ta mas tsʼakale, li Jesuse ta xchuk xchiʼuk tsjip ochel ta xab li Satanás xchiʼuk li anjeletik ti muʼyuk tukʼ laj yakʼ sbaike (Luc. 8:30, 31; Apoc. 20:1-3). Yoʼ to mu xvul li kʼakʼal taje li chʼulelaletik o li kuxlejaletik ti mu xvinaj ta kʼelel ti muʼyuk bu xchʼunik mantale oyik ta batsʼi ikʼal osil, ta onoʼox xichʼik lajesel (Apoc. 20:7-10).