Li ajvalil ta Siriae tskʼan ox tsmil yaʼi li Eliseo ti jaʼ li yaj-alkʼop Diose, jaʼ yuʼun la snuts batel kʼalal to ta Dotán, ti jaʼ jun lum ti oy lek smuroaltak xchiʼuk ti ta jol vits to oye. La stak batel epal kaʼ, karetaetik sventa paskʼop xchiʼuk epal soltaroetik ta Dotán li ajvalil ta Siriae. Vaʼun joybil ta soltaroetik sakub li jteklume (2 Rey. 6:13, 14).

Kʼalal lik xchiʼuk lokʼ ta pana li yajtunel Eliseoe, xiʼ tajek kʼalal laj yil li yajkontraike. Vaʼun xi tsots laj yale: «Jchanubtasvanej, ¿cʼusi ta jpastic xanaʼ?». Xi takʼbat yuʼun li yajvale: «Mu xaxiʼ, yuʼun jaʼ epic li bochʼotic liʼ jchiʼuctique; jaʼ muʼyuc ep xchiʼiltaquic li stuquique»; vaʼun xi lik skʼopon Jeovae: «Mucʼul Dios, ta jcʼanbot vocol ta atojol, jambo sat li jmozoe yuʼun acʼo yil». Xi to chal batel li Vivliae: «Li Mucʼul Diose la sjambe sat li mozoe. Jaʼ to laj yil oy epal soldadoetic ta vits cajajtic ta caʼ, xchiʼuc laj yil joyibtabil ta caretaetic li Eliseoe tsanal jech chac cʼu chaʼal cʼocʼ» (2 Rey. 6:15-17). ¿Kʼusi chakʼ jchantik li kʼusi kʼot ta xkuxlejal li Eliseoe?

Muʼyuk xiʼ Eliseo kʼalal laj yil li soltaroetike, yuʼun spatoj yoʼonton ta stojolal Jeova xchiʼuk laj yilbe sjuʼel ti chkoltaatike. Li avie muʼyuk jmalaojtik tspojutik Jeova ta skʼelobil juʼelal, pe chkiltik ti kʼuyelan tspoj li steklumale. Pe xuʼ xkaltik ti joybilutik ta «caʼetic xchiʼuc caretaetic» eke. ¿Mi xkiltik xa yilel ta skoj li xchʼunel koʼontontike xchiʼuk mi jpatoj lek koʼontontik ta stojolal li Jeovae? Mi jeche «jun coʼnton» kuxulutik xchiʼuk chakʼbutik sbendision (Sal. 4:8). Jkʼeltik kʼusi chakʼ jchantik li kʼusitik yan kʼot ta xkuxlejal li Eliseoe.

Kʼalal jaʼo tslok balumil li Eliseoe, te tal li j-alkʼop Elías ta stojolale, te kajanbat ta sba li skʼuʼ sventa j-alkʼope. Snaʼoj lek kʼusi skʼan xal Eliseo taje, jaʼ yuʼun la spas kʼin sventa tskʼopon komel li stot smeʼe, vaʼun bat tunuk ta stojolal Elías (1 Rey. 19:16, 19-21). Ta skoj ti oy ta yoʼonton chtun ta stojolal Dios li Eliseoe xchiʼuk ti lek baxbole, toj jtunel ilat yuʼun li Jeovae. Pe maʼuk noʼox, yuʼun ta  mas tsʼakale jaʼ och ta xkʼexol Elías sventa xtun ta j-alkʼop.

Te van vakibuk jabil abtej ta yajtunel Elías li Eliseoe. Ti kʼu sjalil taje laj yakʼbe voʼ ta skʼob sventa tspok (2 Rey. 3:11, TNM). ¿Kʼusi skʼan xal taje? Li vaʼ kʼakʼale ta skʼob tstsak sveʼelik kʼalal chveʼ li krixchanoetike, yuʼun muʼyuk toʼox tstunesik kuchara o yan xluchobil sveʼelik. Jech oxal chakʼbe voʼ sventa tspok skʼob mi laj yoʼonton ta veʼel li yajvale. Jech kʼuchaʼal chkiltike batsʼi kʼun ta pasel xchiʼuk muʼyuk tsots skʼoplal junantik yabtel li Eliseoe, akʼo mi jech, jaʼ jun matanal chaʼi.

Ep yajtsʼaklomtak Cristo li avie, ep ta tos tspasbeik yabtel Jeova ta tsʼakal ora, jaʼ ta skoj li xchʼunel yoʼontonike xchiʼuk ti oy tajek ta yoʼonton tspasbeik yabtel Jeova ti bu kʼalal xuʼ yuʼunike. Jlome nom oyik ta stojolal yutsʼ yalalik sventa chbat spasik li abtelal ch-akʼbatike: chtunik ta Betel o ta svaʼanel salonetik sventa tsobobbail o yan kʼusitik ti mu masuk tsots skʼoplal chil yantike. Pe parejo tsots skʼoplal maʼ taje xchiʼuk muʼyuk bu tstsulesbat skʼoplal li buchʼutik jech ch-abtejike. Ti kʼusi mas tsots skʼoplale jaʼ ti toj ep sbalil chil li Jeovae. ¿Mi mu jechuk van tsots skʼoplal skʼan xkiltik ek? (Heb. 6:10.)

Kʼalal skʼan toʼox jutuk «chicʼ muyel ta vinajel ta sutub icʼ» Elías li Diose, la stak batel ta Betel ti te lik batel ta Guilgale. Akʼo mi muʼyuk oy ta yoʼonton chikʼ batel Eliseo li j-alkʼope, xi laj yal li Eliseoe: «Muʼyuc ta jvocʼ jba ti bu chabate». Kʼalal yakalik batel ta xanbale chib to velta laj yal Elías ti muʼyuk chikʼ echʼele (2 Rey. 2:1-6). Pe muʼyuk bu xchʼun li Eliseoe. Batsʼi xkoʼolaj stukʼil yoʼonton xchiʼuk Rut ti muʼyuk bu xikta komel li Noemie (Rut 1:8, 16, 17). Ta melel, toj ep sbalil laj yil li matanal akʼbat yuʼun Dios ti chtun ta stojolal li j-alkʼop Eliase.

¿Kʼuxi xuʼ jchanbetik li slekil talelale? Jaʼ ti oyuk me sbalil xkiltik kʼalal kichʼtik akʼbel junuk jmotontik ta s-organisasion li Diose xchiʼuk mu me xchʼay xkaʼitik ti jaʼ jun mukʼta matanal ti chijtun ta stojolale (Sal. 65:4; 84:10).

Kʼalal yakalik ta xanbale, xi laj yalbe Eliseo li Eliase: «Albun li cʼusi chacʼan ta jpasbote». Muʼyuk la skʼan skʼulejal li Eliseo jech kʼuchaʼal la spas Salomone. Moʼoj, yuʼun solel la skʼan ti xjelav to yepal xichʼbe stsatsal Dios kʼuchaʼal li Eliase (1 Rey. 3:5, 9; 2 Rey. 2:9). ¿Kʼusi ti tskʼan ta melele? Yuʼun ti kʼalal chchʼakbe xrexto xnichʼnab li j-israeletike, jaʼ j-oʼlol to xjelav yepal chakʼbe li sbaʼyel nichʼone (Deut. 21:15-17). Ta melel, li kʼusi tskʼane jaʼ ti xkʼot ta xkʼexol Elías sventa xkʼot ta j-alkʼop li Eliseoe. Li kʼusi tskʼane jaʼ ti jechuk stsatsal yoʼonton kʼuchaʼal li Eliase, ti toj tsots abtej ta stojolal li Jeovae (1 Rey. 19:13, 14).

Xi takʼbat yuʼun li Eliase: «Toj tsots li cʼusi chacʼane, pero me chavil ti cʼalal chilocʼ batel ta atojole, xuʼ chata li cʼusi chacʼane. Pero me muc xavile, mu xata» (2 Rey. 2:10). Oy kʼusi chib skʼan xal yaʼeluk li kʼusi la stakʼe: baʼyuke jaʼ ti jaʼ noʼox xuʼ xakʼ Jeova li kʼusi la skʼane, li xchibale jaʼ ti skʼan jpʼeluk ta yoʼonton te xchiʼuk-o Eliase, ti mu ventauk kʼusi xkʼot ta pasele.

¿Mi akʼbat van yuʼun Dios li kʼusi la skʼan Eliseoe? Xi chal kaʼitik Vivlia li kʼusi kʼot ta pasele: «Cʼalal jaʼo te chloʼilajic batel ta bee, te laj yilic chanov jun careta xchiʼuc caʼetic, tsanal chac cʼu chaʼal cʼocʼ; jaʼ echʼ vocʼaticuc yuʼun. Jech li Eliase ta sutub icʼ imuy batel ta vinajel». Taje te skʼeloj li Eliseoe. * Ta melel, li Jeovae laj yakʼbe li kʼusi la skʼane, yuʼun laj yil Eliseo ti kʼalal la xchʼak sba muyel li Eliase, vaʼun xjelav to yepal laj yichʼbe sjuʼel li Diose xchiʼuk jaʼ xa kʼot ta j-alkʼop (2 Rey. 2:11-14).

Li Eliseoe la stsakbe skʼuʼ li Elías sventa j-alkʼope, vaʼun la slap. Taje jaʼ te laj yichʼ ilel ti jaʼ xa kom ta xkʼexol li Eliase. Lek laj yil ta melel li Jeovae, yuʼun ta tsʼakale ta skʼelobil juʼelal la xtuchʼ jelavel ukʼum Jordán li Eliseoe.

Ta melel, li kareta xchiʼuk li kaʼetik ti tsanajtik skʼakʼal sventa paskʼop laj yil Eliseo kʼalal laj yichʼ ikʼel muyel ta sutub-ikʼ li Eliase, labal sba laj yil, yuʼun mu skotoluk kʼakʼal jech chil. Taje jaʼ skʼan xal ti akʼbat yuʼun Jeova li kʼusi la skʼanbee. Li avie muʼyuk van chakʼ kiltik ta skʼelobil juʼelal li kʼusi ta jkʼanbetike, pe xuʼ xkakʼtik venta ti kʼusi tspas sventa xkʼot ta pasel li kʼusi tskʼan yoʼontone. Kʼalal chkiltik ti kʼuyelan chakʼbe bendision li s-organisasion ta  balumile, jaʼ tskoltautik sventa xkiltik ti kʼuyelan yakal batel ta xanbal li skareta Jeova te ta vinajele (Ezeq. 10:9-13).

Toj ep kʼusitik kʼot ta xkuxlejal li Eliseoe, jaʼ yuʼun te laj yakʼ venta ti toj ep sjuʼel li Jeovae. Laj onoʼox spas vaklajuneb skʼelobil juʼelal, ti j-oʼlol to xjelav kʼuchaʼal la spas li Eliase, taje jaʼ koliyal li s-espiritu Jeovae. * Li ta xchibal velta bu laj yil kaʼetik xchiʼuk karetaetik sventa paskʼop ti tsanajtik skʼakʼale jaʼo kʼalal oy kʼusi kʼot ta pasel ta Dotán, ti te laj yichʼ alel ta slikebal li mantal liʼe.

Muʼyuk bu xiʼ kʼalal laj yil ti joybilik yuʼun yajkontra ta Dotán li Eliseoe. ¿Kʼusi van koltaat? Jaʼ ti ayanem xaʼox lek xchʼunel yoʼonton ta stojolal Jeovae. Ta me xtun kuʼuntik ti jechuk oy lek xchʼunel koʼontontik eke. Jaʼ yuʼun, jkʼanbetik xchʼul espiritu Jeova sventa xkakʼ ta ilel xchʼunel koʼontontik xchiʼuk ti oyuk kuʼuntik li yan yabteltak chʼul espiritue (Luc. 11:13; Gál. 5:22, 23).

Li kʼusi kʼot ta xkuxlejal li Eliseo ta Dotane jaʼ la spat-o mas yoʼonton xtok ta stojolal li Jeovae xchiʼuk ta stojolal li yajsoltarotak chchabivan ti mu xkiltike. Li j-alkʼope laj yakʼ venta ti oy yaj-anjeltak Dios ti sjoyojik li jteklume xchiʼuk li jsaʼvanejetik ta kʼope. Vaʼun kol li Eliseo xchiʼuk li yajtunel kʼalal pasatik ta maʼsat yuʼun Jeova li jkontrainvanejetike (2 Rey. 6:17-23). Kʼalal jaʼo la snuptanik li tsatsal vokolil taje, laj yakʼ ta ilel li xchʼunel yoʼontone xchiʼuk la spat yoʼonton ta stojolal li Jeovae, jech kʼuchaʼal yakʼoj xa onoʼox ta ilele.

Jpat me koʼontontik ta stojolal Jeova jech kʼuchaʼal la spas li Eliseoe (Prov. 3:5, 6). Mi jech ta jpastike chkʼuxubinutik xchiʼuk chakʼbutik sbendision li Diose (Sal. 67:1). Akʼo mi muʼyuk chkiltik karetaetik xchiʼuk kaʼetik ti tsanajtik skʼakʼal li avie, ta onoʼox spoj steklumal li Jeovae xchiʼuk li ta jelavel kʼalal yakal li «tsots vocole» (Mat. 24:21; Apoc. 7:9, 14). Pe yoʼ to muʼyuk chkʼot ta pasele, jvules me ta joltik ti «jaʼ jpojubbailtic» li Jeovae (Sal. 62:8).