Muʼyuk srasonal ti solel ta jvul-o koʼontontik ti bu skʼan xchoti ta Salon sventa Tsobobbail li buchʼu lokʼesbil ta tsobobbaile. Yakʼoj persa li revista liʼe sventa xalbe totil meʼil ti skʼan skoltaik ta mantal skerem o stsebik ti lokʼesbil ta tsobobbail ti te nakal ta snaike, ti akʼo jech spasik ti bu kʼalal xuʼ chilike. Jech kʼuchaʼal laj yal li revista La Atalaya ta 15 yuʼun noviembre ta 1988, pajina 19 xchiʼuk 20, xuʼ la xchanik Vivlia xchiʼuk skerem o stsebik ti lokʼesbil ta tsobobbail ti mu to tsta svaʼleje, ti te to xchiʼukik ta nakleje. Taje xuʼ me jaʼ xtijbat-o yoʼonton sventa sut tal ta stojolal Jeova li kerem o li tsebe.

Xuʼ van xchoti xchiʼuk stot smeʼ ta Salon sventa Tsobobbail li buchʼu lokʼesbil ta tsobobbail ti bikʼit toe, pe mu me yolbajuk xa chakʼ ta ilel. Ta skoj ti muʼyuk bu chichʼ sujel sventa xchotiik ta patil li buchʼu lokʼesbil ta tsobobbaile, xuʼ xbat chotluk ti bu chchoti stot smeʼ li jun kerem o tsebe. Skʼan me xchabi ta mantal skerem o stseb li totil meʼiletike, skʼan me xakʼik venta mi tstsʼetan xchikin ta yaʼiel li mantale xchiʼuk mi tstabe sbalil. Jaʼ yuʼun, lek me ti xchiʼinik ta chotleje.

Pe ¿kʼusi xuʼ spas li totil meʼil kʼalal muʼyuk xa te nakal ta snaik li skerem o stsebik ti lokʼesbil ta tsobobbail ti bikʼit toe? ¿Mi lek van ti xchiʼinik ta chotleje? Jamal lek yaloj revista ti kʼuyelan skʼan xil yutsʼ yalal ti lokʼesbil ta tsobobbail li jun yajtsʼaklom Cristo ti mu xa teuk xchiʼukik ta nakleje. * Pe kʼalal jmoj chchoti xchiʼuk skerem o stsebik ti lokʼesbil ta tsobobbaile, maʼuk me skʼan xal ti yuʼun xa tskʼan chchiʼinik ta loʼile. Mu me kʼusi chopol chkaʼitik mi ta xakʼbeik yipal ta xchʼunel kʼusi chal Vivlia li yan yutsʼ yalalik ta sventa li buchʼutik lokʼesbil ta tsobobbaile xchiʼuk mi oy noʼox smelol ti kʼuyelan tstsakik ta ventae (1 Cor. 5:11, 13; 2 Juan 11).

Jech kʼuchaʼal laj xa kiltike, skʼan me mu chopoluk xil tsobobbail mi chchiʼin ta chotlej yutsʼ yalal o mi yan-o bu chchoti li buchʼu lokʼesbil ta tsobobbaile, jaʼ noʼox ti kʼusie skʼan me lekuk spas sba. Kʼalal chichʼ alel ti oy noʼox bu xuʼ xchotiik li buchʼutik lokʼesbil ta tsobobbail li ta Salon sventa Tsobobbaile xuʼ me x-ayan-o vokolil. Vaʼun chaʼa, mi ta jchʼun jkotoltik li beiltaseletik ta Vivlia ta sventa ti kʼuyelan skʼan xkiltik li buchʼu lokʼesbil ta tsobobbaile xchiʼuk ti muʼyuk ta jmakbetik yok ta mantal li ermanoetike, mu me bu toj tsots skʼoplal ti bu skʼan xchoti li buchʼu lokʼesbil ta tsobobbaile. *