Kʼalal chcham li buchʼu jkʼanojtike ta xtʼom kokʼeltik ta skoj ti ta jnaʼtike. Akʼo mi skʼanoj tajek Lazaroe li Jesuse, pe maʼuk okʼ-o ta skoj ti chame, yuʼun jaʼ ta skoj ti kʼuxubaj ta yoʼonton li yutsʼ yalal xchiʼuk li yamigotak animae, jech kʼuchaʼal chal li stsʼak loʼile (Juan 11:36).

Kʼalal laj yaʼi Jesús ti ip chaʼi li Lazaroe muʼyuk bu xbat ta anil sventa xbat xpoxta. Xi chal li Vivliae: «Cʼalal laj yaʼay [Jesús] ti ip chaʼay li Lazaroe, te to ijalij chib cʼacʼal» (Juan 11:6). ¿Kʼu yuʼun jalij tajek li Jesuse? Yuʼun oy kʼusi snopoj tspas. Xi laj yalbe smelolal li Jesuse: «Li chamel ip chaʼye mu jaʼuc sventa ta xcham o. Jaʼ noʼox sventa acʼo ichʼatuc ta mucʼ li Diose, xchiʼuc acʼo ichʼatuc ta mucʼ ec li Xnichʼon Diose» (Juan 11:4). Yuʼun li kʼusi snopoj Jesús ta sventa ti cham li Lazaroe jaʼ sventa «acʼo ichʼatuc ta mucʼ li Diose». ¿Kʼuxi van? Yuʼun tspas jun labal sba skʼelobil juʼelal sventa chchaʼkuxes li yamigoe.

Li vaʼ kʼakʼale, kʼalal la xchiʼin ta loʼil yajtsʼaklomtak li Jesuse la skoʼoltas ta vayel li lajele. Jaʼ yuʼun xi laj yale: «Chbat jtij liquel» li Lazaroe (Juan 11:11). Li Jesuse mu toj tsotsuk chaʼi chchaʼkuxes, yuʼun xkoʼolaj kʼuchaʼal tstij likel xnichʼon li totile. Jaʼ yuʼun chʼabal srasonal sventa chopol chaʼi ti cham li Lazaroe.

Vaʼun chaʼa, ¿kʼu yuʼun okʼ li Jesuse? Jech kʼuchaʼal laj xa kaltike, te chal li ta stsʼak loʼile. Kʼalal laj yil li Mariae, li xchiʼil ta vokʼel Lazaroe, ti yakal ch-okʼ xchiʼuk li yan krixchanoetike, «ep laj yat yoʼnton ec; toj chopol laj yaʼay». Kʼalal laj yil ti solel kʼux chaʼiike «lic ocʼuc [ek] li Jesuse» (Juan 11:33, 35).

Li loʼil ta Vivlia liʼe chakʼ ta ilel ti oy sjuʼel Jesús sventa xchaʼkuxes xchiʼuk xpoxta kutsʼ kalaltik ta achʼ balumil ti toj nopol xae. Jech xtok, chakʼ ta ilel ti kʼux ta yoʼonton li buchʼutik ta xokʼita yutsʼ yalalike. Li yan kʼusi xuʼ jchantik xtoke jaʼ ti oyuk xkʼuxul koʼontontik ta stojolalik li buchʼutik chat yoʼontonik ta skoj ti oy buchʼu cham yuʼunike.

Li Jesuse snaʼoj ti chchaʼkuxes li Lazaroe. Akʼo mi jech, okʼ ta skoj ti skʼanojan tajek xchiʼuk ti kʼux ta yoʼonton li yamigotake. Jaʼ jech ek, kʼalal jech xa chkaʼitik kʼuchaʼal chaʼi sba li yantike jaʼ me tstij koʼontontik sventa xij-okʼ xchiʼuk «li bochʼo ch-oqʼuique» (Rom. 12:15). Kʼalal ch-okʼ li jun krixchanoe maʼuk skʼan xal ti muʼyuk xchʼunel yoʼonton ta sventa li chaʼkuxesele. Kʼalal tʼom yokʼel Jesús kʼalal cham li Lazaroe, akʼo mi snaʼoj ti chchaʼkuxese, toj lek ta chanbel stalelal sventa xkʼuxubaj ta koʼontontik li buchʼutik oy buchʼu chamem yuʼunike.