Toj kʼupil sba laj yilik li pelikula ti mu xkaʼitik chkʼopojik ti jaʼ sbi A Trip Down Market Street (Xanbal ta kaye Market). Te chakʼ ta ilel ti kʼu toʼox yelan li kuxlejal ta San Francisco (Estados Unidos) ta slikebaltik siglo 20. Sventa la spasik li pelikulae la stunesik jun kamara ti skʼan joyoyinel kʼuchaʼal skʼob molinoe, vaʼun te laj yakʼik ta yeloval jkot karo ti te ch-echʼ ta kaye Market ti bu oy ep krixchanoetike. Te chvinaj karetaetik ti jochbil ta kaʼetike, ti kʼu toʼox yelan li karoetik ta voʼnee, jpukperiodiko xchiʼuk yan krixchanoetik ti chbatik ta manolajele o yan kʼusitik tspasik.

Jtos ti kʼu yuʼun chkʼot ta oʼontonal li pelikulae jaʼ ti yikʼaluk jaʼo laj yichʼ pasel ta avril ta 1906, ti jaʼo kʼalal jutuk xaʼox skʼan x-echʼ li tsatsal nikel xchiʼuk li kolemal kʼokʼ ta 18 yuʼun avrile. Ta smilal xa noʼox krixchanoetik cham xchiʼuk solel muʼyuk xa smelol kom ti bu la spasik li pelikulae. Xuʼ van jutuk xaʼox skʼan xcham jlom li krixchanoetik ti lokʼik ta pelikulae. Xi laj yal Scott Miles, jun yutsʼ yalal ti buchʼu la skolta sba ta spasel li pelikulae: «Kʼalal chkiltik li krixchanoetik ti mu snaʼik kʼusi chkʼot ta stojolalike, solel chkʼuxubaj ta koʼontontik».

Li voʼotik eke chkʼuxubaj ta koʼontontik li krixchanoetik ti oyik ta jpat jxokontike. Jaʼ batem ta yoʼontonik spasel li kʼusitik nopem xaʼiike, mu snaʼik li kʼusi chopol chkʼot ta stojolalik ti jutuk xa skʼan xtale: li slajeb li kʼusitik chopole xchiʼuk ti kʼuyelan li kuxlejal avie. Mu nabiluk kʼusi ora chtal maʼ nikele, pe xuʼ me jkolta li jchiʼiltaktik sventa xkalbetik yaʼiik ti poʼot xa xkʼot skʼakʼalil chchapanvan li Jeovae. Melel onoʼox ti jchʼakojbetik skʼakʼalil sventa chijlokʼ ta cholmantal ta naetik jujun xemanae, pe ¿mi xuʼ xkakʼtik persa mas sventa jpʼijubtastik li yantike?

Lek jamal xvinaj ti chcholbe mantal skotol krixchanoetik bu tsnup li Jesuse. Yuʼun la xchiʼin ta loʼil krixchanoetik ta buyuk noʼox, la xcholbe mantal kʼalal ta jtsobpatan xchiʼuk jun ants ti te laj yojtikin ta stsʼel poso kʼalal jaʼo la xkux yoʼonton ta oʼlol kʼakʼale (Luc. 19:1-5; Juan 4:5-10, 21-24). Akʼo mi snopoj xa ti chkux yoʼonton li Jesuse, ta sjunul yoʼonton tsjel li kʼusi snopoj xaʼox tspas sventa chchanubtas li krixchanoetike. Ta skoj ti kʼux ta yoʼonton li krixchanoetike, jaʼ tijbat-o yoʼonton sventa xcholbe mas mantal (Mar. 6:30-34). ¿Kʼuxi yakal chchanbeik stalelal Jesús ep ermanoetik ti yakʼojbeik yipal ta spʼijubtasel li krixchanoetike?

Lek chabibil ti bu nakal li Melikae. Jutuk mu skotoluk li slakʼnatake jaʼ jchanunetik ti likemik ta yan lume, chʼabal te tsakal sbiik xchiʼuk snumeroal stelefonoik li ta yochebal bu nakalike, jech xtok kʼajomal noʼox tstunesik selularetik ti mu xkilbetik snumeroal kʼalal chkʼopojike. Toj ep sbalil chaʼi ti chchiʼinan ta loʼil ta sventa mantal li slakʼnatak ta yochebal ti bu nakalike o li ta elevadore. Xi chal li Melikae: «Jaʼ xa yosilal bu ta jchol mantal chkil». Ta skoj ti chkuch batel vunetik ta yan kʼopetike, yakʼoj ep tratadoetik xchiʼuk revistaetik. Jech xtok, chakʼbe yil li jpajinatik ta Internet ta jw.org. Slikesoj xa jayibuk chanubtasel ta Vivlia li Melikae.

Li Sonia ti ch-abtej ta jun klinikae chakʼ persa ek ta xcholbel mantal skotol li krixchanoetik ti bu kʼalal xuʼ yuʼune. Laj yakʼ persa xcholbel mantal skotol li xchiʼiltak ta abtele. Baʼyel la xchʼakbe yorail sventa chojtikin lek li kʼusi tsvul-o yoʼontonike xchiʼuk li kʼusi mas oy ta yoʼontonik ta jujuntale. Laje bat xchiʼinan ta loʼil ta jujuntal kʼalal jaʼo yorail chveʼ sventa chcholbe mantale. Vaʼun la slikes chib chanubtasel ta Vivlia. Li avie tskʼan chcholbe mantal ti buchʼutik tsmalaik chkʼelatik yuʼun doktore, jaʼo chbat xcholbe mantal kʼalal chkux yoʼonton jlikeluke.

Jun ti buchʼu kuxul kom li ta tsatsal nikel echʼ ta 1906, laj yal ti «muʼyuk bu jech kʼotem ta pasel ta junuk lume». Poʼot xa me xichʼ lajesel «li bochʼotic mu xotquinic Diose», pe mi jutebuk xkoʼolaj xchiʼuk li kʼusitik tsots kʼotemik ta pasele (2 Tes. 1:8). Li Jeovae tskʼan ti akʼo sutes yoʼontonik li krixchanoetike xchiʼuk ti xchʼunik li mantal ta jcholbetike (2 Ped. 3:9; Apoc. 14:6, 7).

Jtaojtik jun matanal ta skoltael li krixchanoetik yoʼ xakʼik venta ti toj tsots xa li kuxlejal avie, ti xikta li kʼusi tskʼan stukike xchiʼuk ti jaʼ akʼo saʼik li Jeovae (Sof. 2:2, 3). ¿Mi xuʼ van jcholbetik mantal li jchiʼiltaktik ta abtele, li jlakʼnataktike xchiʼuk li yan krixchanoetik ta jtatik kʼalal jaʼo ta jpastik yan kʼusitike? ¿Mi chkakʼtik persa sventa jpʼijubtastik li yantike?