Kʼuxi xuʼ xkakʼbetik kʼusitik chtun yuʼunik li yantike

«KʼALAL laj xaʼox spasik votar sventa tstʼujik li buchʼu ch-och ta ajvalile toj tsots lik kʼop, jaʼ yuʼun ta smilal xa noʼox stestigotak Jeova laj yikta komel snaik —xi laj yal François, jun mol ta tsobobbail ta jun lum ti povre noʼoxe—. Solel muʼyuk xa bu ta tael lek veʼlil, poxil xchiʼuk mi oy to bu laj yichʼ taele toj toyol. La smakik li vankoetike xchiʼuk chʼabal xa takʼin li ta kajero automatikoe o mu xa xtun.»

Ta anil noʼox la stakik batel takʼin li ermanoetik ta Betele xchiʼuk li kʼusi mas chtun yuʼunik li stestigotak Jeova ti laj yikta snaike xchiʼuk ti te xa stsoboj sbaik li ta Salonetik sventa Tsobobbailetik ti oy ta sjunlej lume. Li chaʼvokʼ krixchanoetik ti oyik ta paskʼope la smakik be, pe ta skoj ti snaʼojik ti mu snaʼ stikʼ sbaik ta kʼop li stestigotak Jeovae, jutuk mu skotoluk li karoetik ta Betele laj yakʼik jelavuk.

Xi chal li Françoise: «Kʼalal jaʼo chibatkutik ta jun Salon sventa Tsobobbaile, li buchʼutik oy stukʼike laj yakʼbeik bala li jkarokutike, solel jutuk xa tajek mu la staunkutik. Kʼalal laj kilkutik jun soltaro ti stsakoj stukʼ ti anil tal skʼelunkutike, solel valopat lisutkutik ta ora xchiʼuk anil xa tajek la jtsʼot batel jkarokutik sventa xisutkutik batel ta Betel. La jtojbekutik tajek ta vokol Jeova ti kuxulunkutike. Li ta yokʼomale, li 130 ermanoetik ti te toʼox nakʼajtik ta Salon sventa Tsobobbaile, bat saʼ yan yavilik ti bu mu xa masuk xiʼele. Te kʼotik ta Betel jlom ermanoetik, te laj kakʼbekutik li kʼusitik ta sventa mantale xchiʼuk li kʼusitik chtun yuʼunike, jaʼ to ti kʼuxi paj li kʼope».

Xi to chal li Françoise: «Ta jelavele, toj ep kʼot karta ta Betel ti la stsʼibaik talel ermanoetik li ta lum ti laj yil svokolike sventa tstojik ta vokol li koltael laj yichʼike. Kʼalal laj yilik kʼuxi koltaatik yuʼun ermanoetik ta yantik lumetike jaʼ la spat-o mas yoʼontonik ta stojolal li Jeovae».

Kʼalal oy bu ch-echʼ vokolil ta skoj li kʼusitik tspas li krixchanoetike o ta skoj nikel, nojelal ta voʼ o yan kʼusitik, mu xiuk chkalbetik li kermanotaktik ti chil svokolike: «Junuc avoʼnton batan; mu me xalaj ta sic, xchiʼuc te bu chata batel aveʼel» (Sant. 2:15, 16). Moʼoj, yuʼun chkakʼtik persa yakʼbel kʼusitik chtun yuʼunik, jech kʼuchaʼal la spasik li yajtsʼaklomtak Cristo ta baʼyel sigloe. Kʼalal laj yaʼiik ti chtal viʼnale, «la snopic ti ta stacbeic batel coltael li jchʼunolajeletic ta Judea banamile, jaʼ ti cʼu yepal xuʼ yuʼunic jujunique» (Hech. 11:28-30).

Li yajtunelutik Jeovae oy ta koʼontontik skoltael li buchʼutik chʼabal kʼusi oy yuʼunike, pe jnaʼojtik ti chtun yuʼunik xtok li kʼusitik ta sventa mantale (Mat. 5:3, TNM). Sventa xakʼik venta ti chtun yuʼunik kʼusitik ta sventa mantal li krixchanoetike, laj yal Jesús ti akʼo jchanubtastike (Mat. 28:19, 20). Chkakʼtik kʼusi x-ayan kuʼuntik, kiptik xchiʼuk jkʼakʼaltik ta spasel li abtelal taje. Li s-organisasion Jeovae ta stunes jlomuk li matanal takʼin sventa xichʼ akʼbel kʼusi chtun yuʼunik li buchʼutik skʼanik koltael ta melele, pe li bu mas chichʼ tunesel li takʼine jaʼ ta sventa li kʼusitik chtun ta mantale xchiʼuk li ta xcholel lekil aʼyeje. Jaʼ jech chkakʼtik ta ilel ti jkʼanojtik li Diose xchiʼuk li jchiʼiltaktike (Mat. 22:37-39).

Li buchʼutik chkoltavanik ta sventa li abtelal ta spʼejel Balumil yuʼun stestigotak Jeovae xuʼ spat yoʼontonik ti lek chichʼ tunesel li matanal takʼin chakʼike. ¿Mi xuʼ xakolta avermanotak ti chil svokolike? ¿Mi chakʼan chakoltavan ta spasel ta yajtsʼaklomtak Cristo li krixchanoetike? Mi jeche, tsako ta venta li beiltasel ta Proverbios 3:27: «Mu me xajalan aba ta spasel cʼusi lec ta stojol li bochʼo oy svocole; paso me ti cʼalal xuʼ avuʼun spasele».

[Lokʼol ta pajina 8]

 [Rekuadro ta pajina 9]

EP KʼUTIK YELAN XUʼ XKOLTAVANIK JLOM KRIXCHANOETIK TA SVENTA LI ABTELAL TA SPʼEJEL BALUMILE

Jech kʼuchaʼal ta skʼakʼalil jtakbol Pabloe, li avie ep buchʼutik «[tsvokʼik] cʼuuc yepal» stakʼinik sventa tstikʼik ta kaxa ta tsobobbail ti bu chal: «Abtelal ta spʼejel Balumil», ti xie (1 Cor. 16:2). Li takʼin tstsob li tsobobbailetike tstakik batel jujun u ta Betel ti jaʼ chkʼelbat yabtelik ta cholmantal li ta slumalike. Li matanal takʼine xuʼ te xichʼ takel batel ta sbi ti kʼu yelan ojtikinbil ta stojolal ajvalil ti tstunes li stestigotak Jeovae. Mi chakʼan chanaʼ lek bu jotukal xkome, kʼopojan batel ta Betel ti jaʼ sventainoj li atsobobbail ti bu alumale. Sventa xanaʼe, xuʼ xasaʼ ta Internet ta www.pr418.com. Li kʼusitik chkalbetik skʼoplal liʼe chal ti kʼu yelan xuʼ xatak batel li matanal takʼine:

DONACIONES INCONDICIONALES

• Xuʼ xavakʼ matanal takʼin, natsʼiletik o yan kʼusitik ti ep sbalile.

• Mi jech chichʼ akʼele skʼan me xichʼ alel batel ta jlik karta ti jaʼ donación incondicional.

DONACIONES CONDICIONALES

• Taje jaʼ smelolal ti xuʼ xichʼ akʼel takʼin ti xuʼ skʼan sutel mi chtun yuʼun li yajvale.

• Mi jech chichʼ akʼele skʼan me xichʼ alel batel ta jlik karta ti jaʼ donación condicional.

DONACIONES PLANIFICADAS

Maʼuk noʼox xuʼ chkakʼ li kuni takʼintik xchiʼuk yan kʼusitik ti oy sbalile, chkalbetik batel skʼoplal ti oy to kʼuxi xuʼ jkolta jbatik ta spasel li abtelal ta spʼejel Balumil ta sventa li Ajvalilal yuʼun Diose. Mi chakʼan chatunes jtosuke, baʼyel kʼopojan batel ta Betel ti jaʼ sventainoj li alumal bu nakalote, sventa xanaʼ bu jotukal chichʼ akʼel. Ta skoj ti jelajtik li mantaletik yuʼun ajvalile xchiʼuk ti jelajtik ta sventa li patane, skʼan me xasaʼ koltael ta stojolal li buchʼu chanunajem lek ta sventa li mantaletik xchiʼuk li patanetik yuʼun ajvalile, sventa jaʼ xatunes ti bu mas lek chavaʼie.

Seguros. Xuʼ jaʼ xkom ta sbi ti kʼu yelan ojtikinbil ta stojolal ajvalil ti tstunes stestigotak Jeova ta sventa li seguro de vida chij-akʼbate o li koltael chkichʼtik kʼalal mi la jpastik juvilare.

Cuentas bancarias. Li certificado de depósito, cuentas bancarias xchiʼuk cuentas personales de jubilación, xuʼ xichʼ akʼbel ta fideicomiso ti ojtikinbil ta stojolal ajvalil ti tstunes stestigotak Jeovae, o mi moʼoje, jaʼ akʼo xichʼ li jtakʼintik kʼalal mi lijchame jaʼ ti kʼu yelan li mantaletik ta vanko ti bu jlumaltike.

Acciones xchiʼuk bonos. Xuʼ xichʼ akʼbel ta sbi ti kʼu yelan ojtikinbil ta stojolal ajvalil ti tstunes stestigotak Jeova ti muʼyuk chichʼ kʼanel sutele. Jech xtok, xuʼ xkom kʼuchaʼal beneficiario mi oy buchʼu chame.

Inmuebles. Xuʼ xichʼ akʼel osil o na ti stakʼ chonele, xuʼ xichʼ akʼel ta donación incondicional, o mi oy to buchʼu te nakale, jaʼ to yuʼun li dominio vitalicio ta sventa li yosil o sna ti buchʼu laj yakʼe, jaʼ xkaltik, ti xuʼ to te xnaki ti kʼu sjalil kuxule.

Testamentos xchiʼuk fideicomisos. Xuʼ xkakʼbe kosiltik, jnatik o jtakʼintik ta sbi ti kʼu yelan ojtikinbil ta stojolal ajvalil ti tstunes stestigotak Jeova mi bat jpasbetik lek svunal o stestamentoal ta jun notario o ti ta xkaltik ti jaʼ tstabe sbalil li ta fideicomiso la jpastike.

Jech kʼuchaʼal li «donaciones planificadas» ti xie, jaʼ skʼan xal ti skʼan xchapanbe lek skʼoplal li buchʼu chakʼ matanale. Koliyal ti oy ep kʼutik yelan xuʼ xakʼik li matanal takʼine, ep krixchanoetik skoltaoj sbaik li ta abtelal sventa relijion xchiʼuk ta sventa li skoltael krixchanoetik ti yakal ta jpastik ta spʼejel Balumile.

Mi chakʼan to chanabe mas skʼoplale, kʼopojan batel ta Betel ti sventainoj alumale.