Li ta lum ti Kenia sbie ikʼatik ochel chaʼvoʼ prekursoretik ta jpʼej na, pe chʼayal to kʼot yoʼontonik kʼalal laj yilik jun kʼox vinik ti te oy ta steme. Toj echʼ xa noʼox kʼox sjunul yuni bekʼtal. Kʼalal laj yalbeik kʼusi yaloj tspas Dios ta sventa li kʼusi chal liʼe: «Li coxoetique xbitubajic noʼox liquel jech chac cʼu chaʼal teʼtical chij», solel toj lek laj yaʼi (Is. 35:6).

Li prekursoretike laj yaʼiik ti Onesmuse, ti jutuk xa mu 40 sjabilal avie, tsakbil xa onoʼox ta osteogénesis imperfecta vokʼ, ti jaʼ jtos chamel ti tskʼunibtas jbakiltike. Jaʼ yuʼun xuʼ skʼas ta anil akʼo mi jutuk noʼox li kʼusi tspase. Ta skoj ti chʼabal xpoxil li xchamele, snaʼoj xa onoʼox ti chil-o svokol ta skoj yipal li xchamele xchiʼuk ti ta silla de ruedas oy-o ta sjunul xkuxlejale.

Lik xchan Vivlia li Onesmuse. Akʼo mi jech, li smeʼe mu xakʼ ti akʼo xbat ta tsobajeletike, yuʼun yaloj mi mas chil-o svokol ta skoj yipal li xchamele xchiʼuk ta xiʼ mi oy kʼusi xuʼ xkʼot ta stojolal. Jaʼ yuʼun li ermanoetike tspasbeik batel gravar li kʼusitik ch-echʼ ta tsobajel sventa xaʼi ta snae. Pe kʼalal voʼob xaʼox u yakal xchanel li Vivliae, laj yal ti oy ta yoʼonton tskʼan chbat li ta tsobajeletike, akʼo mi snaʼoj li kʼusitik xuʼ xkʼot ta stojolale.

¿Mi mas van lik xkʼuxul xchamel kʼalal lik batuk ta tsobajeletike? Moʼoj. Xi chvul ta sjole: «Li kʼusi kʼux-ip chkaʼi ti xlik xkaj noʼoxe jaʼo te chpaj yaʼel kʼalal chibat ta tsobajeletike». La snop ti jaʼ ta skoj spatobil yoʼonton ti mas xa chpoxtaj laj yaʼie. Xmuyubaj tajek smeʼ kʼalal laj yil ti jun yoʼonton li skereme, jaʼ yuʼun lik xchan Vivlia ek. Xi chal li smeʼe: «Ti chtun ta stojolal Diose jaʼ xpoxil chaʼi».

Ta jelavel jutuke, li Onesmuse lik xchol mantal ti muʼyuk to yichʼoj voʼe. Vaʼun laj yichʼ voʼ, li avie chtun xa ta yajkoltaobba mol. Akʼo mi mu stakʼ xanav xchiʼuk ti mu stakʼ stunes li skʼobtake, oy tajek ta yoʼonton chtun ta stojolal Jeova ti bu kʼalal xuʼ yuʼune. Tskʼan ox ch-och ta prekursor auksiliar, pe ta xiʼ ta yakʼel li solisitude. ¿Kʼu yuʼun? Yuʼun snaʼoj ti skʼan oyuk buchʼu xujbat batel silla de ruedas kʼalal chbat ta cholmantale. Kʼalal laj yalbe ermanoetik ti kʼusi tsvul-o yoʼontone, albat ti chkoltaate. Koliyal ti koltavanik li ermanoetike, och onoʼox ta prekursor auksiliar.

Kʼalal tskʼan ox ch-och ta prekursor regulare, te xnaʼet xtok. Akʼo mi jech, jun kʼakʼale te la sta spatobil yoʼonton kʼalal la skʼel li teksto sventa jujun kʼakʼale. Li teksto la skʼele jaʼ li Salmo 34:8, ti xi chale: «Qʼuelavilic, pasic preva avaʼyic, toj lec li Mucʼul Diose». Kʼalal la snopbe skʼoplal li teksto taje, la slikes li prekursor regulare. Li avie chanib kʼakʼal chchol mantal ta xemana xchiʼuk oy jayvoʼ krixchanoetik chakʼbe chanubtasel ta Vivlia ti yakal chchʼiik ta mantale. Ay ta Chanob vun sventa Abtelal ta Prekursor ta 2010. Xmuyubaj tajek ti jaʼ chanubtasat yuʼun jun li ermano ti vulaʼanat ta sba veltae.

Cham xa li stot smeʼe, pe li ermanoetik ta stsobobbaile jaʼ chakʼbeik li kʼusitik chtun yuʼun jujun kʼakʼale. Solel tstoj ta vokol skotol li bendisionetik yakal tskʼupin avie xchiʼuk oy ta yoʼonton tsmala chkʼot skʼakʼalil ti «mu jbejuc ta na jech chal: “Toj ipun”» (Is. 33:24).