«Jech me xapasilanic o sventa chanaʼilanicun»
«La stojbe ta vocol Dios, lic svocʼ li pane, jech laj yal: “Liʼi jaʼ jbecʼtal ti acʼbil ta aventaique. Jech me xapasilanic o sventa chanaʼilanicun”.» (1 COR. 11:24)
1, 2. ¿Kʼusi van xuʼ la snopik li jtakboletik kʼalal yakal chbatik ta Jerusalene?
«SAKJAMAN tajek xvinaj li vinajele xchiʼuk xvinaj xa jutuk li Ue. Li jchabivanejetike laj van yilik samel ti oy xa jxetʼ U ta sba li Jerusalene. Kʼalal laj yaʼi li Sanedrine laj yal ti jaʼ xa slikeb li achʼ ue, li nisane. Vaʼun li j-al-aʼyejetike la spukik batel xchiʼuk liʼ to kʼalal vule. Li Jesuse skʼan xlokʼ xa noʼox batel mi tskʼan chkʼot ta Jerusalén kʼalal skʼan toʼox li kʼin Koltaele.»
2 Xuʼ van jech la snopik li jtakboletik ti te xchiʼinojik Jesús ta Pereae (ta jot ukʼum Jordán), ti slajeb xa velta chbat ta Jerusalene (Mat. 19:1; 20:17, 29; Mar. 10:1, 32, 46). Kʼalal laj xa yichʼ alel ti lik li baʼyel kʼakʼal yuʼun nisane, oxlajuneb kʼakʼal ch-echʼ sventa chichʼ pasel li kʼin Koltaele, kʼalal chʼayem xaʼox batel li Kʼakʼale, vaʼun jaʼo chlik li 14 yuʼun nisane.
3. ¿Kʼu yuʼun lek ti jech oy ta yoʼontonik snabel skʼakʼalil kʼin Koltael li yajtsʼaklomtak Cristoe?
3 Li Veʼlil ta bat kʼakʼal yuʼun Kajvaltik ti jmoj skʼakʼalil chkʼot xchiʼuk li kʼin Koltaele, li jabil liʼe chkʼot ta pasel ta 14 yuʼun avril kʼalal chʼayem xaʼox batel li Kʼakʼale. Li kʼakʼal taje, toj tsots skʼoplal chaʼiik li melel yajtsʼaklomtak Cristoe xchiʼuk li buchʼutik oy ta yoʼontonik mantale. ¿Kʼu yuʼun? Jaʼ ta skoj li mantal ta jtatik ta 1 Corintios 11:23-25 ti xie: «Li Cajvaltic Jesuse, la stsac jun pan; la stojbe ta vocol Dios, lic svocʼ li pane, jech laj yal: “Liʼi jaʼ jbecʼtal ti acʼbil ta aventaique. Jech me xapasilanic o sventa chanaʼilanicun”, xi. Cʼalal ilaj yoʼntonic ta veʼele, la stsac noxtoc jun vaso. Jaʼ coʼol la spas jech chac cʼu chaʼal la spas ta sventa li pane».
4. 1) ¿Kʼusitik van xuʼ jakʼbe jbatik ta sventa li Snaʼobil slajel Cristoe? 2) ¿Kʼuxi chichʼ naʼel bakʼin chichʼ pasel li Snaʼobil slajel Cristo jujun jabile? (Kʼelo li rekuadro «Snaʼobil slajel Cristo ta 2014».)
4 Ta melel, ta van xakʼan chabat li ta Snaʼobil slajel Cristo ti laj yal Jesús ti skʼan pasel jujun jabile. Jaʼ yuʼun skʼan xi xa noʼox xajakʼbe abae: «¿Kʼu van yelan skʼan jchapan jba sventa li bat kʼakʼal taje? ¿Kʼusitik van chichʼ tunesel sventa chichʼ pasel? ¿Kʼu van yelan chichʼ pasel? ¿Kʼusi van sbalil xuʼ jtabe li kʼusi tsots skʼoplal chichʼ pasel xchiʼuk li kʼusi skʼan xal li pan xchiʼuk vinoe?».
LI PAN XCHIʼUK VINOE
5. ¿Kʼusi laj yal Jesús ti akʼo xchapanik li yajtakboltak sventa spasik li slajeb kʼin Koltaele?
5 Kʼalal la stak batel yajtakboltak Jesús sventa xbat xchapanik bu tspasik li kʼin Koltaele, muʼyuk laj yal ti akʼo yakʼbeik ep xnichimaltake, moʼoj, li kʼusi noʼox tskʼane jaʼ ti lekuk chʼubabile xchiʼuk ti lekuk jamal sventa li buchʼutik takbilik ta ikʼele (kʼelo Marcos 14:12-16). Skʼan oyuk yuʼunik li kʼusitik chtun ta veʼele, jech kʼuchaʼal pan ti muʼyuk yichʼoj svolesobil xchʼute xchiʼuk li yaʼlel tsʼusub o tsajal vinoe. Kʼalal laj xaʼox spasik li kʼin Koltaele, li Jesuse laj yakʼ ta yoʼonton li skʼelobiltak taje.
6. 1) ¿Kʼusi laj yal Jesús ta sventa li pan kʼalal laj yoʼontonik ta spasel li kʼin Koltaele? 2) ¿Kʼusi panil chichʼ tunesel li ta Snaʼobil slajel Cristoe?
6 Li jtakbol Mateo ti te oy ek li vaʼ kʼakʼale, xi la stsʼiba ta mas tsʼakale: «La stsac jun pan li Jesuse, la stojbe ta vocol Dios; la svocʼ li pane, laj yacʼbe li yajchancʼoptaque: “Ilo, veʼanic”», xut (Mat. 26:26). Muʼyuk yichʼoj svolesobil xchʼut li «pan» taje, jech kʼuchaʼal chichʼ toʼox tunesel ta kʼin Koltaele (Éx. 12:8; Deut. 16:3). Pasbil ta juchʼbil trigo xchiʼuk yoxoʼ li pane, muʼyuk svolesobil xchʼut xchiʼuk muʼyuk bu yichʼoj atsʼam o kʼusitik yan. Ta skoj ti muʼyuk svolesobil xchʼute, pechpech pan, kʼoxoxtik noʼox, takin xchiʼuk kʼun noʼox ta vokʼel. Li avie, li moletik ta tsobobbaile xuʼ van oy buchʼu chalbeik ti akʼo spas li pan ti pasbil ta juchʼbil trigo xchiʼuk yoxoʼe, ti bakubtasbil ta junuk xaltem ti bonbil jutuk ta aseitee. (Mi muʼyuk bu xuʼ xichʼ tael juchʼbil trigoe, xuʼ xichʼ pasel ta juchʼbil aros, sevada, ixim o yan kʼusi sbekʼ ti xkoʼolaje.)
7. ¿Kʼusi vinoal la stunes li Jesuse xchiʼuk kʼusi van vinoal skʼan tunesel li ta Snaʼobil slajel Cristo avie?
7 Xi to laj yal li Mateoe: «La stsac noxtoc jun vaso yaʼlel tsʼusub; la stojbe ta vocol Dios, laj yacʼbe li yajchancʼoptaque, jech laj yal: “Uchʼan acotolic”» (Mat. 26:27, 28). Li kʼusi la stsak li Jesuse jaʼ jun vaso ti noj ta tsajal vinoe (mu xuʼ jaʼuk yaʼlel tsʼusub ti muʼyuk pajubtasbile, yuʼun oy xaʼox ta sjayibaluk u echʼem stsobel li tsʼusube). Akʼo mi muʼyuk laj yichʼ tunesel vino li ta baʼyel velta laj yichʼ pasel li kʼin Koltael ta Egiptoe, li Jesuse muʼyuk bu xal mi mu stakʼ uchʼel li ta kʼin Koltaele. Moʼoj, yuʼun la stunes li ta Veʼlil ta bat kʼakʼal yuʼun Kajvaltike. Jaʼ yuʼun li yajtuneltak Diose tstunesik li ta Snaʼobil slajel Cristoe. Pe ¿kʼusi vinoal lek ta tunesel? Ta skoj ti muʼyuk skap li xchʼichʼel Jesuse, li vino chichʼ tunesele mu stakʼ kapel ta yan pox o yan kʼusitik. Xuʼ xichʼ tunesel kʼusuk tsajal vinoal ti chchonik ta tiendae o ti pasbil ta nae, jaʼ noʼoxe skʼan me ti muʼyuk skape.
¿KʼUSI SMELOLAL LI PAN XCHIʼUK VINOE?
8. ¿Kʼu yuʼun tsots skʼoplal chkaʼitik kʼusi smelolal li pan xchiʼuk vinoe?
8 Li jtakbol Pabloe laj yal ti skotol yajtsʼaklomtak Cristo skʼan spasik li Veʼlil ta bat kʼakʼal yuʼun Kajvaltike, ti maʼuk noʼox li jtakboletike. Xi la stsʼibabe batel li jchʼunolajeletik ta Corintoe: «Yuʼun ti cʼu xʼelan la jchanubtasoxuque, jaʼ jech la xchanubtasun ec li Cajvaltique. [...] La stsac jun pan; la stojbe ta vocol Dios, lic svocʼ li pane, jech laj yal: “Liʼi jaʼ [«senyail ti», Ch] jbecʼtal ti acʼbil ta aventaique. Jech me xapasilanic o sventa chanaʼilanicun”» (1 Cor. 11:23, 24). Jaʼ yuʼun li yajtsʼaklomtak Cristoe ta jpastik jujun jabil li Veʼlil ta bat kʼakʼal yuʼun Kajvaltike xchiʼuk oy ta koʼontontik kʼusi smelolal li pan xchiʼuk vinoe.
9. ¿Kʼusi xchʼunojik li krixchanoetik ta sventa li pan la stunes Jesuse, pe ti mu meleluke?
9 Epal krixchanoetik ti oy srelijionike chalik ti xi la laj yal li Jesuse «Liʼe jaʼ jbekʼtal», ti jech jelubtasbil ta junantik Vivliaetike. Ta skoj taje xchʼunojik ti chkʼataj la ta sbekʼtal Jesús li pane. Akʼo mi jech, taje mu jechuk chakʼ ta ilel li kʼusi kʼot ta pasele. * Li sbekʼtal Jesuse te oy ta stojolal li tukʼil jtakboletike, jech kʼuchaʼal te oy li pan ti muʼyuk svolesobil xchʼut ti tsveʼike. Jamal ta ilel ti ta lokʼolkʼop li kʼusi laj yal Jesuse, jech kʼuchaʼal ep ta velta la spase (Juan 2:19-21; 4:13, 14; 10:7; 15:1).
10. ¿Kʼusi smelolal li pan ti chichʼ tunesel ta Snaʼobil slajel Cristoe?
10 Li pan ti te skʼelojik li jtakboletike xchiʼuk ti ta xa sveʼike jaʼ smelolal li sbekʼtal Jesuse. ¿Kʼusi bekʼtalil? Te van kʼuk sjaliluke li melel yajtuneltak Diose la xchʼunik ti ta skoj ti jaʼ la svokʼ pan li Jesuse, pe ti muʼyuk bu la skʼasbeik mi junuk sbakile, li pane jaʼ la skʼoplal li stsobobbail buchʼutik tʼujbil chbatik ta vinajele, ti chichʼ albel skʼoplal ta Vivlia ti jaʼ «sbecʼtal li Cristoe» (Efes. 4:12; Rom. 12:4, 5; 1 Cor. 10:16, 17; 12:27). Akʼo mi jech, ta tsʼakale laj yaʼibeik smelolal ti oy srasonal xchiʼuk ti jaʼ jech chal Vivlia ti jaʼ smelolal sbekʼtal Jesús li pane, li sbekʼtal ti laj yichʼ akʼbel kʼuchaʼal krixchanoe. «Laj yichʼ vocol li Cristoe», yuʼun jokʼanat ta jtel teʼ. Jaʼ yuʼun chaʼa, li ta Veʼlil ta bat kʼakʼal yuʼun Kajvaltike li pane jaʼ smelolal li sbekʼtal ta melel li Jesuse ti «la xcuch ta sbecʼtal li [jmultike]» (1 Ped. 2:21-24; 4:1; Juan 19:33-36; Heb. 10:5-7).
11, 12. 1) ¿Kʼusi laj yal Jesús ta sventa li vinoe? 2) ¿Kʼusi smelolal li vino chichʼ tunesel ta Veʼlil ta bat kʼakʼal yuʼun Kajvaltike?
11 Mi jnaʼojbetik xa smelolal li pane jaʼ tskoltautik sventa xkaʼibetik smelolal li kʼusi laj yal Jesús ta sventa li vinoe. Xi chal li Vivliae: «Cʼalal ilaj yoʼntonic ta veʼele, la stsac noxtoc jun vaso. Jaʼ coʼol la spas jech chac cʼu chaʼal la spas ta sventa li pane. Jech laj yal: “Li sbel vaso liʼi jaʼ sventa li cʼusi achʼ chapanbil ti ta sventa jchʼichʼal chcʼot ta pasele”» (1 Cor. 11:25). ¿Mi jaʼ van skʼoplal ta melel achʼ trato li sbel vasoe? Moʼoj. Kʼalal laj yal «sbel vaso» li Jesuse, jaʼ laj yalbe skʼoplal li vinoe. ¿Kʼusi la smelolal o skʼelobil li vino laj yal Jesuse? Jaʼ li xchʼichʼel ti chmale.
12 Li ta Evanjelio la stsʼiba Marcose xi laj yal li Jesuse: «Liʼi jaʼ jchʼichʼal, jaʼ senyail ti mu xlaj scʼoplal li cʼusi achʼ la xchapan Jtot sventa chacolic oe» (Mar. 14:24, Ch). Li xchʼichʼel Jesuse «ta xmal ta sventa ep cristianoetic, jech ep bochʼo tsta perdón yuʼun smulic» (Mat. 26:28). Jaʼ yuʼun li tsajal vinoe jaʼ smelolal li xchʼichʼel Jesús ta melele. Ta skoj taje xuʼ xkichʼtik pojel, yuʼun jaʼ ta jtatik-o «perdón yuʼun li jmultique» (kʼelo Efesios 1:7).
LI SNAʼOBIL SLAJEL CRISTOE
13. Alo kʼu yelan chichʼ pasel jujun jabil li Snaʼobil slajel Cristoe.
13 Mi labat ta sba velta xchiʼuk li stestigotak Jeova kʼalal tspasik li Snaʼobil slajel Cristoe, ¿kʼusi van chavil te? Xuʼ van jaʼ chavil ti lek chʼubabile xchiʼuk ti bu jun yoʼonton chaʼi sbaike. Xuʼ van chavil xtok ti oy jutuk xnichimale, pe muʼyuk ti yan xa sba ta kʼelele o ti kʼin xa yilele. Jun mol ti lek chapale lek noʼox sba chchapbe smelolal kʼusi chal Vivlia ta sventa li kʼusi chichʼ pasel li vaʼ kʼakʼale. Tskolta skotolik sventa xaʼibeik smelolal xchiʼuk xakʼik venta ti oy sbalil li kʼusi la spas Cristoe: ti cham sventa tspojutik yoʼ xuʼ xijkuxiutike (kʼelo Romanos 5:8-10). Li buchʼu chal mantale chalbe skʼoplal li chib spatobil oʼontonal chal Vivlia sventa li yajtsʼaklomtak Cristoe.
14. ¿Kʼusi chib spatobil oʼontonal chichʼ albel skʼoplal li ta mantal sventa Snaʼobil slajel Cristoe?
14 Jun li spatobil oʼontonal taje, jaʼ ti ch-ajvalilajik xchiʼuk Cristo ta vinajele, ti jaʼ noʼox tstaik uni jtsop yajtsʼaklomtak Cristoe, taje te tsakal skʼoplal li tukʼil jtakboletike (Luc. 12:32; 22:19, 20; Apoc. 14:1). Li yane jaʼ li kʼusi spatoj-o yoʼontonik jutuk mu skotoluk li tukʼil yajtsʼaklomtak Cristo avie: skʼupinel kuxlejal ta sbatel osil liʼ ta Balumil ti pasem xaʼox ta paraisoe. Vaʼun chkʼot ta pasel li kʼusi tskʼan yoʼonton Dios ta Balumil jech kʼuchaʼal ta vinajele, ti voʼne xa onoʼox lik skʼanik tal ta orasion li yajtsʼaklomtak Cristoe (Mat. 6:10). Li Vivliae chal ti toj kʼupil sba chkuxiik sbatel osile (Is. 11:6-9; 35:5, 6; 65:21-23).
15, 16. ¿Kʼusi chutik li pan li ta Veʼlil ta bat kʼakʼal yuʼun Kajvaltike?
15 Kʼalal mi lajebal xaʼox li mantale, li buchʼu chal mantale chal ti ta xa xichʼ pasel li kʼusi laj yalbe yajtakboltak Jesús ti skʼan spasike. Jech kʼuchaʼal laj kaltike, oy kʼusi chib chichʼ tunesel: pan ti muʼyuk svolesobil xchʼute xchiʼuk tsajal vino. Taje te van tskajanik ta mexa ti nopol yiloj li buchʼu chal mantale. Tskʼel ta Vivlia li kʼusi laj yal xchiʼuk li kʼusi la spas Jesús kʼalal la slikes li Snaʼobil slajele. Jech kʼuchaʼal chal Mateoe: «La stsac jun pan li Jesuse, la stojbe ta vocol Dios; la svocʼ li pane, laj yacʼbe li yajchancʼoptaque: “Ilo, veʼanic. Liʼi jaʼ jbecʼtal”», xut (Mat. 26:26). Li Jesuse la svokʼ li pane, vaʼun laj yakʼanbe batel li yajtakboltak ti te oy ta jujujot xokone. Jaʼ jech li ta 14 yuʼun avrile, te chavil ti chichʼ akʼel pan ta jun plato xchiʼuk ti vokʼilanbil xae.
16 Chichʼ tunesel platoetik ti kʼu yepal chtune sventa mu toj jaluk yorail ch-echʼ. Muʼyuk kʼusi chichʼ pasel ti labalik xa sba ta kʼelele. Chichʼ pasel orasion ta jaypʼeluk noʼox kʼop, vaʼun lek xcholet chichʼ etʼesel li platoetike jaʼ ti kʼu yelan mas lek chilike. Jayvoʼ noʼox o xuʼ van mi junuk buchʼu tsveʼ li pane, jech kʼuchaʼal kʼot ta pasel li ta Snaʼobil slajel Cristo ta 2013.
17. ¿Kʼuxi chichʼ pasel ta Snaʼobil lajel Cristo li kʼusi laj yal Jesús ta sventa li vinoe?
17 Vaʼun chichʼ kʼelel li kʼusi laj yal Mateoe: «La stsac noxtoc jun vaso yaʼlel tsʼusub; la stojbe ta vocol Dios, laj yacʼbe li yajchancʼoptaque, jech laj yal: “Uchʼan acotolic. Liʼi jaʼ jchʼichʼal sventa chcʼot ta pasel li cʼusi chapanbil onoʼoxe. Yuʼun ta xmal ta sventa ep cristianoetic, jech ep bochʼo tsta perdón yuʼun smulic”» (Mat. 26:27, 28). Jaʼ noʼox jech chichʼ pasel xtok ta sventa li vinoe, chichʼ pasel yan orasion, vaʼun chichʼ etʼesbel li buchʼutik te oyike.
18. ¿Kʼu yuʼun toj tsots skʼoplal ti xijbat li ta snaʼobil slajel Cristoe, akʼo mi jayvoʼ noʼox o xuʼ van mi junuk buchʼu tsveʼ li pan xchiʼuk chuchʼ li vinoe?
18 Jech kʼuchaʼal laj yal Jesuse, jaʼ noʼox xuʼ sveʼik pan xchiʼuk xuʼ xuchʼik vino li buchʼutik jmoj ch-ajvalilajik xchiʼuk Jesús kʼalal chichʼ etʼesele (kʼelo Lucas 22:28-30; 2 Tim. 4:18). Taje jaʼ skʼan xal ti jutuk mu skotoluk li buchʼutik te chkʼotike, jaʼ noʼox tskʼelik li kʼusi chichʼ pasele. Akʼo mi jech, ti chbatik li ta Veʼlil ta bat kʼakʼal yuʼun Kajvaltike toj tsots skʼoplal chilik, yuʼun jaʼ jech chakʼik ta ilel ti toj ep sbalil chilik ti laj yakʼ ta matanal xkuxlejal li Jesuse. Kʼalal yakal chichʼ pasel li Snaʼobil slajel Cristoe xuʼ snopbeik skʼoplal ta sventa li bendisionetik xuʼ chichʼik ta skoj ti laj yakʼ xkuxlejal li Cristoe. Spatoj yoʼontonik ti te kapal skʼoplalik li ta «epal cristianoetic» ti kuxul chkomik mi tal li «tsots svocolique». Li vaʼ kʼakʼale jaʼik xa yajtuneltak Jeova ti «laj [xa] yaqʼuic ta chuqʼuel ti scʼuʼique, xchiʼuc laj yaqʼuic ta sacubtasel ta sventa xchʼichʼel ti jcot ta Uni Chije» (Apoc. 7:9; 7:14-17, Ch).
19. ¿Kʼuxi xuʼ jchapan jbatik ta sventa li Veʼlil ta bat kʼakʼal yuʼun Kajvaltike xchiʼuk kʼuxi xuʼ jtabetik sbalil?
19 ¿Kʼu yelan xuʼ jchapan jbatik ta sventa li tsobajel ti stuk noʼox jech tspasik li stestigotak Jeova ta spʼejel Balumile? Kʼalal skʼan toʼox jayibuk xemanae ta jtaktik ta ikʼel krixchanoetik ti kʼu yepal xuʼ kuʼuntike. Jech noxtok, kʼalal skʼan toʼox junchibuk kʼakʼale ta jkʼeltik ta Vivlia li kʼusitik la spas Jesuse xchiʼuk li kʼusitik kʼot ta pasel ta sjabilal 33. Ta jchapan jbatik lek sventa xijkʼot. Ta jpastik persa ti skʼanuk toʼox xlik kʼejimol xchiʼuk ti skʼanuk toʼox xichʼ pasel orasion xijkʼote, yuʼun jaʼ jech ta jchiʼintik ta loʼil li buchʼutik sba to velta chkʼotike xchiʼuk ti xkiltik xchiʼuk xkaʼitik skotol li kʼusitik ch-echʼ tee. Jkotoltik ta jtabetik sbalil akʼo mi chijkʼotilan xa onoʼox ta tsobajel o mi sba to velta chijbat mi ta jkʼeltik li tekstoetik chichʼ alel tee. Pe li kʼusi mas tsots skʼoplal ti chijbate jaʼ ti chkakʼtik ta ilel ti toj tsots skʼoplal chkiltik ti laj yakʼ xkuxlejal li Jesuse xchiʼuk ti ta jchʼuntik li mantal liʼe: «Jech me xapasilanic o sventa chanaʼilanicun» (1 Cor. 11:24).
^ Xi chal jun jchanubtasvanej ti Heinrich Meyer sbi ti likem ta Alemaniae: «Ta skoj ti chilik ti te oy sjunul sbekʼtal li Jesuse (ti kuxule) xchiʼuk ti muʼyuk toʼox bu malem li xchʼichʼele, mi junuk li buchʼutik takbilik ta ikʼele [li jtakboletike] mi jsetʼuk la snopik [...] ti jaʼ yakal stibeik sbekʼtal xchiʼuk chuchʼbeik ta melel xchʼichʼel li Kajvaltike. [Jaʼ yuʼun,] li kʼusi laj yal Jesuse mu xuʼ xichʼ akʼbel yan smelolal ti maʼuk jeche».
