¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Bakʼin «ay yalbe yaʼay chʼulelaletic yoʼ bu chucajtic» li Jesuse? (1 Ped. 3:19.)

Yaʼeluke jaʼo kʼalal oy toʼox kʼuk sjalil chaʼkuxiem li Jesuse, laj yalbe li chopol kuxlejaletik ti mu xvinaj ta kʼelel ti chkʼot yorail chichʼik lajesele (15/6, pajina 23).

¿Kʼusi oxtos vokolil xuʼ smak ti lekuk xbat anupunel ti chaʼnupunemot xae?

Jaʼ liʼe: jaʼ ti xavakʼ xlik-o kʼop ta anupunel ta skoj li baʼyel anupunele; ti lek xavil li voʼneal amigoiletik ti mu xojtikinik li anup achiʼil avie; ti mu xapat avoʼonton ta stojolal anup achiʼil ta skoj ti la smukul satiot li baʼyel anup achiʼile (1/7, pajina 9, 10).

¿Bakʼin chchapan krixchanoetik kʼuchaʼal chijetik xchiʼuk tentsunetik li Jesuse? (Mat. 25:32.)

Jaʼ to mi tal xchapan skotol jteklumetik Jesús li ta tsatsal vokolile, jaʼo kʼalal lajem xaʼox li jecheʼ relijione (15/7, pajina 6).

¿Bakʼin ch-okʼik xchiʼuk xkʼuxet yeik li chopol krixchanoetik ti albil skʼoplal li ta lokʼolkʼop sventa chopol jobele? (Mat. 13:36, 41, 42.)

Jaʼo kʼalal yakal li tsatsal vokolile, kʼalal mi laj yakʼik venta ti mu kʼu xut xkolike (15/7, pajina 13).

¿Bakʼin chkʼot ta pasel li kʼusi laj yal Jesús ta sventa li j-abtel ti tukʼ yoʼonton, ti lek pʼije? (Mat. 24:45-47.)

Muʼyuk te lik kʼotuk ta pasel ta Pentecostés ta sjabilal 33, moʼoj, jaʼ to kʼalal echʼem xaʼox li sjabilal 1914. Li ta 1919, laj yichʼ biiltasel sventa xchabi xchiʼiltak li j-abtele, ti te tsakal skʼoplalik skotol li yajtsʼaklomtak Cristo ti chichʼ akʼbel sveʼelik ta mantale (15/7, pajina 21-23).

¿Bakʼin ch-akʼbat sbain kʼusitik oy yuʼun Jesús li j-abtele?

Jaʼo chkʼot ta pasel kʼalal yakal li tsatsal vokolile, jaʼo kʼalal mi laj yichʼ smotonik ta vinajele (15/7, pajina 25).

¿Mi yuʼun van jaʼ ta skoj ti chopolik o ti muʼyuk tsots skʼoplal echʼik ti muʼyuk tsʼibabil kom ta Vivlia sbiik jlome?

Moʼoj. Li Vivliae muʼyuk chalbe sbi junantik krixchanoetik ti lek echʼike xchiʼuk li buchʼutik chopol echʼike (Rut 4:1-3; Mat. 26:18). Jaʼ noʼox chaʼvoʼ tukʼil anjeletik chalbe sbi li Vivliae (1/8, pajina 10).

¿Kʼusi to yan koltaatik, ti maʼuk noʼox sjuʼel Dios, li 230 stestigotak Jeova ti kuch yuʼunik kʼalal la spasik marcha li jchukeletik ta Sachsenhausene?

Akʼo mi kʼunib skotolik ta skoj viʼnal xchiʼuk chamel, la spatbe sba yoʼontonik sventa mu xlubtsajik (15/8, pajina 18).

¿Kʼu yuʼun tspat koʼontontik ti la xtuchʼik echʼel ukʼum Jordán sventa ch-ochik ta Albil Balumil li j-israeletike?

Manchuk mi nojem tajek li ukʼume, li Jeovae la spajesbe yok sventa x-echʼ li jteklume. Taje jaʼ van tsatsubtasbat-o yoʼontonik xchiʼuk la spat-o yoʼontonik ta stojolal li Jeovae xchiʼuk jaʼ tspat koʼontontik ek (15/9, pajina 16).

¿Kʼusi chakʼ kiltik ti nopoltik noʼox chalbe skʼoplal koloretik li Vivliae?

Chakʼ kiltik ti snaʼoj Dios ti oy kʼusi chkʼot ta koʼontontik yuʼun li kolore xchiʼuk chakʼ ti teuk-o ta joltik li kʼusitike (1/10, pajina 14-15).

¿Kʼuxi yakal chkʼot ta pasel li albilkʼop sventa li vukvoʼ bankilaletik xchiʼuk li vaxakvoʼ viniketik ti ichʼbil yeik ti chal ta Miqueas 5:5?

Li vukvoʼ bankilaletik xchiʼuk li vaxakvoʼ viniketik ti ichʼbil yeik ti chalbe skʼoplal Miqueas 5:5, jaʼ skʼoplal li moletik ta tsobobbailetike, ti stsatsubtasbeik yoʼonton steklumal Dios kʼalal mi laj yichʼik tsakel ta kʼope (15/11, pajina 20).

¿Kʼu yuʼun chtun kuʼuntik ta jkuxlejaltik li Diose?

Yuʼun chtun kuʼuntik lekil beiltasel xchiʼuk ti jnaʼtik kʼu yuʼun chkil jvokoltike, ti jaʼ noʼox Dios xuʼ chalbutike. Tskoltautik sventa lekuk xijkuxiutik xchiʼuk ti xijmuyubajutike. Sventa jechuk taje chkʼot ta pasel yuʼun li kʼusi yaloj ta Skʼope (1/12, pajina 4-6).