Li ta 1985, kʼalal lajuneb toʼox jabilale, vul junantik ololetik ti likemik talel ta Camboya ta jchanob vun ta Columbus (Ohio, Estados Unidos). Li jun olole snaʼ jaypʼeluk kʼop ta inglés. La stunes junantik lokʼoletik sventa xalbun ti kʼu yelan toj xibalik sba chichʼik majel, milel xchiʼuk ti kʼu yelan chjatavike. Li voʼone chi-okʼ ta akʼobaltik kʼalal ta jnop ta stojolal li ololetik taje. Ta jkʼan chkalbeik skʼoplal li Paraisoe xchiʼuk li chaʼkuxesele, pe mu xaʼibeikun li jkʼope. Akʼo mi ololun toʼox, kʼot ta nopel kuʼun ti ta jchan li camboyano kʼop sventa chkalbeik skʼoplal li Jeovae. Mu toʼox jnaʼ lek mi tsots skʼoplal kʼusi chkʼot ta jkuxlejal ta tsʼakal li kʼusi la jnop la jpase.

Mu toj kʼunuk laj kaʼi xchanel li camboyano kʼope. Chib to velta la jnop chkikta xchanel, pe li Jeovae la stunes jtot jmeʼ sventa spatbeikun koʼonton. Ta tsʼakale, li jchanubtasvanejetik xchiʼuk li jchiʼiltak ta chanune laj yalbeikun ti akʼo la jsaʼ lek kabtel ti lekuk tojbile. Pe li voʼone chi-och kaʼi ta prekursor, jaʼ yuʼun kʼalal ta preparatoria xaʼox xilokʼe la jnop ta jchan kʼusitik ti xuʼ skoltaun sventa ta jta kabtel ti junchib noʼox kʼakʼal chi-abtej sventa ta jta li kʼusi jnopoj onoʼox ta jpase. Kʼalal chilokʼ ta chanun jujun kʼakʼale ta jchiʼinan ta cholmantal prekursoretik. Jech xtok, likoltavan ta xchanubtasel jchanunetik ti yakal chchanik inglese, taje ep la skoltaun ta mas tsʼakal.

Kʼalal vaklajuneb xaʼox jabilale laj kaʼi ti oy xaʼox jun uni grupo ta camboyano kʼop ta Long Beach (California, Estados Unidos). Ay jvulaʼan xchiʼuk la jchan skʼelel li camboyano kʼope. Kʼalal laj kuʼun li chanune la jlikes li prekursorale xchiʼuk la jcholbe-o mantal li buchʼutik chkʼopojik ta camboyano ti te nopol oyik ti bu nakalune. Kʼalal vaxaklajuneb xaʼox jabilale yakal xaʼox ta jnop sventa te xibat ta naklej ta Camboya. Akʼo mi xibal onoʼox sba li lum taje, jnaʼoj ti jutuk tajek yaʼiojik lekil aʼyej ta sventa Ajvalilal yuʼun Dios li lajuneb miyon jnaklejetike. Li vaʼ kʼakʼale kʼajomal toʼox jun tsobobbail oy ta skotol lum ti kʼajomal oxlajunvoʼ jcholmantaletik oy tee. Kʼalal la jvulaʼan ta sba veltae balunlajuneb toʼox jabilal, pe chib jabil ta tsʼakale te libat ta naklej. La jta kabtel ti junchib noʼox kʼakʼal chi-abtej ta sjelubtasel vunetik xchiʼuk ti chichanubtasvan ta inglés sventa mu xkikta li cholmantale. Ta tsʼakale linupun xchiʼuk jun ermana ti koʼol ta jkʼan ta jpasbekutik yabtel li Jeovae. Jmoj jkoltaojkutik epal krixchanoetik ti chkʼopojik ta camboyano kʼop sventa xakʼ xkuxlejalik ta stojolal Jeovae.

Li Jeovae yakʼojbun «li cʼusi oy ta [k]oʼnton» ta jkʼanbee (Sal. 37:4). Jaʼ mas chakʼ muyubajel kʼalal ta jpastik ta yajtsʼaklom Cristo li krixchanoetike, jaʼ mu sta li lekil abtelal ti lek tojbile. Ti oy xa ta vaklajuneb jabil nakalun ta Camboyae, li uni grupo ti oxlajunvoʼ toʼox yajtuneltak Jeovae pasem xa ta lajcheb tsobobbail xchiʼuk chanib grupo ti nom oyike. (Jaʼ tsloʼilta Jason Blackwell.)