1. ¿Kʼusi organisasion kom ta xkʼexol li jvalopatinej mantal Israel ti jaʼ toʼox yichʼojbe sbi li Jeovae? (Kʼelo li lokʼol ta slikebale.)

LI Jeovae jaʼ la slikes li stsobobbail yajtsʼaklomtak Cristo li ta baʼyel sigloe xchiʼuk jaʼ la xchaʼlikes li melel yichʼel ta mukʼ ti achʼtik toe. Jech kʼuchaʼal laj yalbutik li ta yan xchanobil echʼe, li organisasion ti jaʼik li baʼyel yajtsʼaklomtak Cristoe jaʼ xkʼexol kom li jvalopatinej mantal Israel ti jaʼ toʼox li lum yichʼojbe sbi li Jeovae. Li achʼ organisasion ti lek ilbil yuʼun li Diose, kol komel kʼalal jaʼo laj yichʼ lajesel li Jerusalén ta sjabilal 70 ta jkʼakʼaltike (Luc. 21:20, 21). Li kʼusitik kʼot ta pasel li ta baʼyel sigloe jaʼ te lik talel li kʼusitik chkʼot ta pasel ta stojolal li yajtuneltak Jeova avi kʼakʼale. Li sbalumil Satanase jutuk xa skʼan xichʼ lajesel, pe jaʼuk li s-organisasion Diose kuxul chkom li ta slajebal kʼakʼale (2 Tim. 3:1). ¿Kʼuxi xuʼ jnaʼtik mi melel taje?

2. ¿Kʼusi laj yal Jesús ta sventa li tsatsal vokolile, xchiʼuk kʼuxi chlik?

² Ta sventa li svuleb ti mu xvinaj ta kʼelel xchiʼuk li slajeb li sbalumil Satanase xi laj yal li Jesuse: «Ta onoʼox xtal li tsots vocole. Muʼyuc onoʼox jech cʼalal ilic li banamile xchiʼuc cʼalal to tana. Muʼyuc ta xcʼot ta pasel jech yan velta noxtoc» (Mat. 24:3, 21). Li tsatsal vokolil taje jaʼo ta xlik mi laj yakʼbe slajeb li «mucʼta lum [Babiloniae]», ti jaʼ skotol li jecheʼ relijionetik ta Balumile.  Sventa tslajese jaʼ tstunes li ajvaliletik liʼ ta Balumile (Apoc. 17:3-5, 16). ¿Mi laje kʼusi chtal?

3. Mi laj xaʼox li jecheʼ relijione, ¿kʼusi tspasbeik yaʼiik li yajtuneltak Diose?

³ Kʼalal mi laj xaʼox yichʼ lajesel li jecheʼ relijione, li Satanás xchiʼuk li sbalumile ta stsakik ta kʼop li yajtuneltak Jeovae. Ta sventa «li Gog te ta yosilal Magoge» xi chal li Vivliae: «Jech chac cʼu chaʼal tsatsal icʼal voʼ. Icʼuben chcʼot avuʼun banamil jech chac cʼu chaʼal lumaltoc, yuʼun chacʼot achiʼuc scotol li avajsoldadotaque xchiʼuc scotol li epal lumetic chbat achiʼine». Ta skoj ti chʼabal yajsoltaroik xchiʼuk ti chilik ti mu snaʼ saʼik kʼop ch-ilatik li stestigotak Jeovae, toj kʼun ta tsakel ta kʼop chilik, pe ¡mu snaʼik buchʼu li tstsakik ta kʼope! (Ezeq. 38:1, 2, 9-12).

4, 5. ¿Kʼu van yelan chil Jeova ti tskʼan tslajesbat slumal yuʼun li Satanase?

⁴ ¿Kʼu van yelan chil Dios ti chakʼ persa Satanás ta slajesel li yajtuneltake? Li Jeovae ta spoj yajtuneltak, chakʼ ta ilel ti jaʼ Mukʼul Jpasmantal ta vinajelbalumile. Kʼalal chichʼ tsakel ta kʼop li slumale jaʼ xa chichʼ tsakel ta kʼop chaʼi li stuke (kʼelo Zacarías 2:8). Jaʼ yuʼun, li Jtotik ta vinajele tskoltautik ta anil noʼox sventa tspojutik. Kʼalal mi laj xaʼox kichʼtik pojele, ta xichʼ lajesel li sbalumil Satanás ta Armagedón li ta «mucʼta pleito ta scʼacʼalil yuʼun li Dios ti echʼem svuʼele» (Apoc. 16:14, 16).

⁵ Li Vivliae xi chal ta sventa li Armagedone: «Li Mucʼul Diose ta xchapanbe smul scotol li jujun mucʼtic lume. Jaʼ jchapanvanej yuʼun scotol li cristianoetique; ta xacʼ ta milel ta espada scotol li bochʼotic chopol yoʼntoniqueʼ, xi li Mucʼul Diose, uto[...], xiyutun. Jech chal li Mucʼul Dios ti tspas ta mantal scotol te ta vinajele: “Li tsots vocole xquechcun chcʼot ta pasel ta jujun mucʼtic lum, jun mucʼta tsatsal icʼal voʼ ta xlic cʼalal to ta jujujot stiʼil banamil”, xi. Toj ep bochʼo ta xcham yuʼun Mucʼul Dios cʼalal me la sta scʼacʼalile; buyuc noʼox quilajtic chcomic cʼalal ta jujujot stiʼil banamil. Muʼyuc bochʼo ta xocʼta, muʼyuc bochʼo ta stsob ta smuc; te noʼox tanpuc chcomic ta banamil jech chac cʼu chaʼal cʼaʼep» (Jer. 25:31-33). Li Armagedone jaʼ chakʼbe slajeb li slumal Satanase. Pe jaʼuk li s-organisasion Jeovae kuxul chkom.

6, 7. 1) ¿Bu chlokʼ talel li «epal cristianoeti[ke]»? 2) ¿Bu to kʼalal epajem li avie?

⁶ Li s-organisasion Diose kuxul chkom liʼ ta Balumile, yuʼun li buchʼutik te oyik li ta organisasion taje lek ilbilik yuʼun li Diose. Li Vivliae xi chale: «Yuʼun li Cajvaltique jaʼ te oy sat ta stojol li bochʼo tucʼ cʼusi tspasique; lec stucʼulanbe scʼop ti cʼalal chcʼopanate» (1 Ped. 3:12). Li «epal cristianoetic» ti kolem chkomik li ta tsatsal vokolile jaʼik li buchʼutik tukʼ laj yakʼ sbaik ta stojolal li Jeovae (Apoc. 7:9, 14). Li buchʼutik kuxul chkomike maʼuk noʼox junchib «cristianoetic». Yuʼun «epal cristianoetic» kuxul chkomik. ¿Mi te xa achiʼuk chavil ek li buchʼutik kuxul chkomik li ta tsatsal vokolile?

⁷ ¿Bu chlik talel li epal krixchanoetike? Yakal chichʼ tsobel ta skoj li kʼusi laj yal Jesús ti jaʼ senyail ti liʼ xa oye. Xi laj yale: «Persa baʼyuc ta xichʼ cholel ta sbejel banamil li Lequil Aʼyej ta jventae; jaʼ to ta xtal li slajebal cʼacʼale» (Mat. 24:14). Taje jaʼ li abtelal skʼan spas li s-organisasion Dios ta slajebal kʼakʼale. Ta skoj ti chcholik mantal xchiʼuk ti chchanubtasvanik li stestigotak Jeovae, epal miyon krixchanoetik xchanojik yichʼel ta mukʼ ta «scotol yoʼnton[ik]» li Diose (Juan 4:23, 24). Jech kʼuchaʼal liʼe, li ta septiembre yuʼun 2003 kʼalal ta agosto yuʼun  2012, mas ta 2,707,000 krixchanoetik laj yichʼik voʼ sventa xakʼik ta ilel ti laj xa yakʼ sbaik ta stojolal li Jeovae, taje kʼajomal noʼox echʼem lajuneb jabil. Li ta spʼejel Balumile oy mas ta 7,900,000 stestigotak Jeova xchiʼuk ta smiyonal xa noʼox tstsob sbaik tal yan krixchanoetik xtok, mas to kʼalal jaʼo yorail Snaʼobil slajel Cristoe. Maʼuk ta jtoy-o jbatik ti kʼu kepaltike yuʼun jnaʼojtik ti «bochʼo laj yacʼ chʼiuque, jaʼ li Diose» (1 Cor. 3:5-7). Akʼo mi jech, lek xvinaj ti yakal chchʼi li epal krixchanoetike xchiʼuk mas xa ch-epajik jujun jabil.

8. ¿Kʼu yuʼun epaj li s-organisasion Jeova avie?

⁸ Epajem xa tajek li yajtuneltak Diose, yuʼun koltabilik yuʼun Jeova li stestigotake (kʼelo Isaías 43:10-12). Ti kʼu yepal epajeme yichʼoj xa onoʼox alel li ta albilkʼop liʼe, «acʼo me toj jutebic, pero chcʼot cʼalal ta jmil; acʼo me solel muʼyuc epic, pero chcʼot ta jun mucʼta lum. Vuʼun li Mucʼul Diosune, ta xcacʼ cʼotuc ta pasel ta ora noʼox cʼalal me la sta scʼacʼalile» (Is. 60:22). Li buchʼutik «toj jutebic» toʼox li vaʼ kʼakʼal taje jaʼik li buchʼutik tʼujbil chbatik ta vinajele, pe epajik ta skoj ti ochik yan krixchanoetik li ta s-organisasion Diose (Gal. 6:16). Koliyal ti yakʼojbe tal bendision li jabiletik xtal li Jeovae, yakal-o ta chʼiel li epal krixchanoetike.

9. ¿Kʼusi skʼan jpastik mi ta jkʼan ta jkʼeltik li kuxlejal ti labal sba yaloj chakʼ Diose?

⁹ Akʼo mi tʼujbil chijbat ta vinajel o mi jaʼutik li epal krixchanoutike, xuʼ xkiltik li kuxlejal ti labal sba yaloj chakʼ Diose. Pe akʼo mi jech, sventa jkʼupintik taje, skʼan jchʼuntik li mantaletik yakʼoj Jeovae (Is. 48:17, 18). Li j-israeletike skʼan xchʼunik li Smantaltak Moisese. Jtos ti kʼu yuʼun skʼan jech spasike jaʼ ta skoj ti chichʼik chabiel ta sventa li chiʼinejbail ta vayele, ta sventa li pʼolmale, li xchabiel alab nichʼnabiletike, ti kʼuxi ta akʼel ta ilel kʼanel ta stojolal li yantike o ta sventa yan kʼusitik (Éx. 20:14; Lev. 19:18, 35-37; Deut. 6:6-9). Mi la jchʼuntik avi li mantaletik yakʼoj Diose, ta me jtabetik sbalil ek xchiʼuk maʼuk ikatsil chkaʼitik spasel li kʼusi tskʼan yoʼontone (kʼelo 1 Juan 5:3). Jech kʼuchaʼal ti pojatik li mantaletik akʼbatik li j-israeletike, jaʼ jech ek mi la jchʼuntik li smantaltak Jeovae maʼuk noʼox tspojutik, moʼoj, yuʼun «jech jʼechʼel acʼo [jchʼuntik-o] li cʼusi melele» (Tito 1:13).

10. ¿Kʼu yuʼun skʼan jchʼakbetik yorail sventa jchan Jvivliatik xchiʼuk sventa jpastik li Yichʼel ta Mukʼ Jeova ta Kutsʼ Kalaltike?

¹⁰ Li jvokʼ s-organisasion Jeova ta Balumile ta anil xa noʼox chanav batel. Jech kʼuchaʼal liʼe, ti yojtikinobil kuʼuntik ta sventa Vivliae mas xa chkaʼibetik smelolal. Taje jech onoʼox malabil, yuʼun «li sbe bochʼotic tucʼ yoʼntonique lec sac jaman jech chac cʼu chaʼal chvocʼ tal yibel vinajel ta jujun sobe, jech ta cʼuncʼun tsacub batel jaʼ to cʼalal sac xa o lec li osile» (Prov. 4:18). Pe xuʼ xi jakʼbe jbatike: «¿Mi ta van jchan batel li achʼik yaʼiobil chichʼ alel ta sventa li meleletik ta Vivliae? ¿Mi ta van jkʼel jujun kʼakʼal li Vivliae? ¿Mi ta van jkʼel skotol li vunetik chlokʼe? ¿Mi jujun xemana ch-echʼ kuʼun li Akʼobal sventa Yichʼel ta Mukʼ Jeova ta Kutsʼ Kalaltike?». Jutuk mu jkotoltikuk chkaltik ti muʼyuk tsots ta pasel skotol taje. Yuʼun jaʼ noʼox skʼan jchʼakbetik yorail sventa jpastik. Toj tsots me skʼoplal ti x-epaj batel kuʼuntik li yojtikinobil ta sventa li Vivliae, ti xkakʼ ta jkuxlejaltike, xchiʼuk ti xijchʼi li ta mantale, ¡mas to avi ti jutuk xa skʼan xtal li tsatsal vokolile!

11. ¿Kʼuxi la stabeik sbalil li kʼinetik jujun jabil la spasik ta voʼne, jech kʼuchaʼal li jtsobajeltik xchiʼuk li mukʼtik tsobajeletik avie?

¹¹ Li s-organisasion Jeovae chakʼ ta ilel ti lek chil kʼalal chalbutik ti skʼan jchʼuntik li tojobtasel laj yakʼ jtakbol Pabloe: «Acʼo jnoptic cʼu xʼelan tscʼan chcalbe jbatic,  yuʼun jech coʼol acʼo cʼuxubinvancutic xchiʼuc coʼol acʼo jpastic cʼusitic lec. Mu me xijpaj ti ta jtsobilan jbatic ta yaʼyel scʼop Diose. Mu me jchantic jech chac cʼu chaʼal ti oy jayibuc nopen xa xaʼyic jeche. Tscʼan acʼo jtsatsubtasbe jba coʼntontic, acʼo cacʼtic persa, yuʼun poʼot xa chchaʼtal li Cajvaltique» (Heb. 10:24, 25). Li kʼinetik jujun jabil xchiʼuk li yantik tsobajeletik tspasik sventa koʼol xichʼik ta mukʼ Dios li j-israeletike jaʼ tsatsubtasatik-o ta mantal. Jech kʼuchaʼal li kʼin Yaxnaetik tspasik ta skʼakʼalil Nehemiase jaʼ sventa oyuk muyubajel (Éx. 23:15, 16; Neh. 8:9-18). Ta me jtabetik sbalil ek li jtsobajeltike xchiʼuk li mukʼta tsobajeletike. Kakʼtik persa jtabetik sbalil li tsobajeletik taje, sventa lekuk oyutikuk ta mantal xchiʼuk ti xijmuyubaje (Tito 2:2).

12. ¿Kʼu van yelan skʼan xkiltik li cholmantale?

¹² Ta skoj ti te kapalutik xchiʼuk li s-organisasion Diose, xijmuyubaj chkaltik batel «li Lequil Aʼyej yuʼun Diose» (Rom. 15:16). Yalel batel «li Lequil Aʼyej yuʼun Diose» jaʼ skʼan xal ti ta jchiʼintik ta abtel li Jeovae (1 Cor. 3:9; 1 Ped. 1:15). Xcholel li lekil aʼyeje jaʼ sventa xichʼ chʼultajesbel li sbi Jeovae. Jaʼ jun matanal li abtelal akʼbilutik ta yalel batel «li Lequil Aʼyej ti toj jun yutsile» (1 Tim. 1:11).

13. ¿Kʼusi skʼan jpastik sventa lekuk oyutik li ta mantale?

¹³ Li Diose oy ta yoʼonton ti lekuk oyutik li ta mantale, ti teuk oyutik-o ta stojolale xchiʼuk ti jkoltatik li s-organisasion ta spasel li epal abtelaletike. Xi laj yalbe Moisés li j-israeletike: «Li cʼacʼal liʼi, ta jvaʼan ta testigo ta atojolic li vinajel xchiʼuc li banamile yuʼun laj xa cacʼboxuc atʼujic li cʼusi chacʼanique: ¿Me jaʼ chacʼanic li cuxlejale, o me jaʼ chacʼanic li lajele? ¿Me jaʼ chacʼanic li bendicione, o me jaʼ chacʼanic li stojol mulile? Jaʼ lec jaʼ cʼanic li cuxlejale yuʼun jech chacuxiic li voʼoxuque xchiʼuc li anichʼnabique xchiʼuc li amomnichʼnabique. Jaʼ me cʼanic li Mucʼul Dios avuʼunique. Chʼunbeic li cʼusi chayalboxuque, xchiʼuc junuc avoʼntonic o ta stojol yuʼun jaʼ te oy li acuxlejalique, xchiʼuc jaʼ ta sventa xuʼ chacuxiic ep jabil te ta banamil ti yalojbe onoʼox ta jamal amoltotaquic ta voʼonee, jaʼ li Abrahame, li Isaaque xchiʼuc li Jacobe» (Deut. 30:19, 20). Jaʼuk me jtʼujtik spasbel kʼusi tskʼan yoʼonton li Jeovae, ti jkʼantike, ti jchʼunbetik smantale xchiʼuk ti teuk oyutik-o ta stojolale.

14. ¿Kʼu yelan laj yaʼi sba jun ermano ta sventa li s-organisasion Jeova ti xvinaj ta kʼelele?

¹⁴ Li ermano Pryce Hughes, ti tukʼ laj yakʼ sba ta stojolal li Diose xchiʼuk li ta s-organisasione, xi la stsʼibae: «Solel ta jtoj ta vokol ti laj kojtikin li kʼusi oy ta yoʼonton tspas Dios ti skʼan toʼox jutuk ta 1914 [...]. Li kʼusi mas tsots skʼoplal chkaʼie, jaʼ ti nopol oyun ta stojolal li s-organisasion Jeova ti xvinaj ta kʼelele. Ti kʼu xa sjalil kuxulun talele kakʼoj venta ti muʼyuk sbalil mi jaʼ ta jpat koʼontontik ta spʼijil li krixchanoetike. Kʼalal laj xaʼox kaʼibe smelolal taje, jpʼel koʼonton tukʼ laj kakʼ jba ta stojolal li organisasione. Yuʼun jaʼ noʼox jech xuʼ jtabetik sbendision xchiʼuk ti lek xilutik li Jeovae».

15. Alo junuk skʼelobil ta Vivlia ti chakʼ ta ilel kʼu yelan skʼan xkiltik li kʼusitik achʼik chichʼ aʼibel smelolal ta sventa li Vivliae.

¹⁵ Mi ta jkʼantik ti lek xilutik li Diose xchiʼuk ti xakʼbutik sbendision ta jujuntale, skʼan jkoltatik li s-organisasion Diose xchiʼuk jchʼamtik li kʼusitik achʼik chichʼ aʼibel smelolal ta sventa li Vivliae. Jech kʼuchaʼal liʼe, kʼalal cham xaʼox li Jesuse, ta smilal xa noʼox judioetik ti xchʼunojik toʼox li Smantaltak Moisese vokol laj yaʼiik yiktael (Hech. 21:17-20). Pe akʼo mi jech, koliyal li karta la stsʼibabe batel Pablo sventa  j-hebreoetike, jaʼ koltaatik sventa xchʼamik ti jaʼ koliyal ti «jʼechʼel ivuʼ o yuʼun ta sventa ti laj yacʼ ta smoton Dios sbecʼtal li Jesucristoe. Jun noʼox velta la spas o sventa sbatel osil» ti pasbatik ta perton li smulike, ti maʼuk ta skoj li matanal laj yichʼ akʼel kʼuchaʼal «chal li mantaletique» (Heb. 10:5-10). Ta melel, jutuk mu skotoluk li yajtsʼaklomtak Cristo ti jaʼik snitilulal judioetike la sjel li snopbenike xchiʼuk chʼiik-o batel ta mantal. Li voʼotik eke skʼan jchantik lek li Vivliae xchiʼuk ti jchʼamtik li kʼusitik achʼ chichʼ aʼibel batel smelolal ta sventa li Skʼop Diose o ta sventa li cholmantale.

16. 1) ¿Kʼusi bendisionetik ta jkʼupintik ta achʼ balumil ti toj labal sbae? 2) ¿Kʼusi chakʼan chapas li ta achʼ balumile?

¹⁶ Skotol li buchʼutik tukʼ chakʼ sbaik ta stojolal li Jeovae xchiʼuk li s-organisasione ch-akʼbatik bendision. Li buchʼutik tʼujbil chbatik ta vinajel ti tukʼ yakʼoj sbaike ta xichʼik mukʼta matanal ti koʼol ch-ajvalilajik xchiʼuk Cristo ta vinajele (Rom. 8:16, 17). Mi jpatoj koʼontontik chijkuxi liʼ ta Balumile, jnoptik noʼox ti solel labal sba ti chijkuxi ta Paraisoe. Skotol li yajtuneltak Jeova liʼ ta Balumile xijmuyubaj chkalbetik yantik ta sventa li achʼ balumil yaloj chakʼ Diose (2 Ped. 3:13). Li Salmo 37:11 xi chale: «Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o». Li krixchanoetike «chlic spas lec snaic, chlic naquiicuc stuquic» xchiʼuk tskʼupinik «li yabtel yoc scʼobique» (Is. 65:21, 22). Muʼyuk xa buchʼu chutilan xchiʼil, chlaj skʼoplal povreal xchiʼuk viʼnal (Sal. 72:13-16). Li Mukʼta Babiloniae muʼyuk xa buchʼu ta sloʼla, yuʼun chlaj skʼoplal (Apoc. 18:8, 21). Li buchʼutik chamemike ta xchaʼkuxiik sventa skʼupinik kuxlejal sbatel osil (Is. 25:8; Hech. 24:15). ¡Toj labal sba li kuxlejal tskʼupinik ta smiyonal noʼox krixchanoetik ta jelavel ti yakʼoj xa xkuxlejalik ta stojolal li Jeovae! Sventa jkʼupintik li kʼusi chal Vivliae, skʼan xijchʼi batel ta mantal, koʼol chijxanav batel xchiʼuk li s-organisasion Diose.

17. ¿Kʼu van yelan skʼan xkiltik li yichʼel ta mukʼ Jeovae xchiʼuk li s-organisasione?

¹⁷ Ta skoj ti jutuk xa skʼan xlaj li sbalumil Satanase, tukʼuk li xchʼunel koʼontontike xchiʼuk kakʼtik ta ilel ti ta jtojtik ta vokol li kʼusi spasoj Dios sventa xkichʼtik ta mukʼe. Taje, jaʼ jech laj yil ek li Davide, ti xi kʼejine: «Jun noʼox li cʼusi jcʼanojbe o li Mucʼul Diose, jun noʼox li cʼusi oy ta coʼnton oe; jaʼ ti te chicom o ta xchʼulna ti jayib cʼacʼal cuxulune. Te chcaʼay cʼu yutsil stuc li Mucʼul Diose; te chquichʼ o ta mucʼ ta xchʼulna» (Sal. 27:4). Kakʼ jbatik ta stojolal Dios xchiʼuk xanavkutik batel xchiʼuk li s-organisasion Jeovae.