Li ta Vivliae muʼyuk chal ti mu xuʼ xichʼ pasel taje.

Junantik loʼiletik ta Vivliae chakʼ ta ilel ti oy la xchikʼojik ta kʼokʼ sbekʼtal o sbakiltak krixchanoetik ti chamemik xaʼoxe (Jos. 7:25; 2 Crón. 34:4, 5). Kʼalal jech la spasik taje xuʼ van jaʼ skʼan xal ti mu staik-o ti xichʼik mukel li krixchanoetik taje. Pe mu skotoluk velta jech skʼan xal taje.

Jkʼeltik li kʼusi kʼot ta pasel kʼalal jaʼo cham li ajvalil Saúl xchiʼuk li oxvoʼ xnichʼnabtake. Li chanvoʼ krixchanoetike jaʼo chamik kʼalal jaʼo la spasik kʼop xchiʼuk li jfilistaetike. Jun li buchʼu taje jaʼ li Jonatán ti jaʼ slekil amigo Davide. Junantik j-israeletik ti lek tsots yoʼontonik ti nakalik ta Jabes te ta Galaade, kʼalal laj yaʼiik li kʼusi kʼot ta stojolal li krixchanoetik taje, ay sabeik tal sbekʼtal li chanvoʼ krixchanoetike, la xchikʼik xchiʼuk la smukbeik li sbakiltake. Ta mas tsʼakale, toj lek laj yil David li kʼusi la spasike (1 Sam. 31:2, 8-13; 2 Sam. 2:4-6).

Li spatobil koʼontontik chal Vivlia ta sventa li buchʼutik chamemike jaʼ li chaʼkuxesele, kʼalal chakʼbe yan velta xkuxlejal jun krixchano li Diose. Akʼo mi xichʼ chikʼel o mi muʼyuk li jbekʼtaltike, li Jeovae xuʼ yuʼun chchaʼkuxesutik ta achʼ bekʼtalil. Jnoptik ta stojolal li oxvoʼ tukʼil j-hebreoetik kʼalal jutuk xaʼox mu chamik ta skoj ti laj yichʼik tikʼel ochel ta jun orno ti tsanbil skʼakʼal ta sventa ti jech laj yal mantal li ajvalil Nabucodonosore. Li stukike muʼyuk srasonal yuʼunik ti lajuk svul yoʼontonik ti mu xa xuʼ xchaʼkuxesatik yuʼun Jeova ta skoj noʼox ti mi laj yichʼik chikʼele (Dan. 3:16-18). Jech xuʼ xichʼ alel ta stojolal li yajtsʼaklomtak Cristo ti tukʼ chamik ta stojolal li Jeovae xchiʼuk ti chikʼbil lajik li ta tsatsal abtel ta nazie. Oy tukʼil yajtuneltak Dios ti chamik ta skoj ti oy kʼusi tʼome o ta yan kʼusitik ti mu xa xvinaj li sbekʼtal komike. Pe akʼo mi jech ta onoʼox xichʼik chaʼkuxesel (Apoc. 20:13).

Sventa xchaʼkuxes jun krixchano li Jeovae mu persauk skʼan stsobbe sbakiltak o yan kʼusitik sventa xchaʼkuxes. Jun skʼelobil taje, jaʼ li xchaʼkuxesel yajtsʼaklomtak Cristo ti tʼujbil chbatik ta vinajele. Jech kʼuchaʼal li Jesuse ti «ichaʼcuxi xchiʼuc achʼ sbecʼtal ta sventa Espíritu», kʼalal chichʼik chaʼkuxesel li buchʼutik tʼujbil chbatik ta vinajele jaʼik onoʼox, pe ta espiritu xa li sbekʼtalike. Mi jsetʼuk sbekʼtalik chichʼik batel ta vinajel (1 Ped. 3:18; 1 Cor. 15:42-53; 1 Juan 3:2).

Li spatobil koʼontontik ta sventa li chaʼkuxesele, mu ventauk li kʼusi chichʼ pasbel li jbekʼtaltik ti mi lijchame. Moʼoj, li kʼusi skʼan oyuk kuʼuntike jaʼ ti mi oy xchʼunel koʼontontik ta stojolal Dios ti xuʼ yuʼune xchiʼuk ti tskʼan tspas li kʼusi oy ta yoʼontone (Hech. 24:15). Melel onoʼox ti xuʼ van mu xkaʼibetik lek smelolal kʼu yelan la spas Dios li skʼelobiltak juʼelal ta voʼne kʼalal la xchaʼkuxesan krixchanoetike o ti kʼu yelan ta spas li ta jelavele. Pe akʼo mi jech, jpatoj koʼontontik ta stojolal Jeova, ti jaʼ te laj yakʼ «ta ilel» kʼalal la xchaʼkuxes li Jesuse (Hech. 17:31; Luc. 24:2, 3).

Kʼalal chichʼ nopel kʼusi chichʼ pasel ta sventa sbekʼtal jun krixchano ti chamem xae, li yajtsʼaklomtak Cristoe skʼan stsakik ta venta li kʼusi nopem xaʼiik spasel li krixchanoetike, ti kʼu yelan chilik li krixchanoetik ti bu nakalike xchiʼuk li mantaletik yakʼoj ajvaliletike (2 Cor. 6:3, 4). Jaʼ yuʼun, snopel ta sventa mi chichʼ chikʼel jun animae maʼuk noʼox skʼan tsakel ta venta li kʼusi ta jkʼantike o li kʼusi tsnop li utsʼ alaliletike.