¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Kʼusi ora laj yichʼ milel li chʼiom tot chij li ta 14 yuʼun nisán sventa li kʼin Koltaele?

Jech kʼuchaʼal chal junantik Vivliaetike, ta «smalel cʼacʼal» chichʼ milel li chʼiom tot chije, jaʼ xkaltik, kʼalal chʼayem xaʼox batel li Kʼakʼale, pe ti sak to osile (Éx. 12:6) (15/12, pajina 18, 19).

¿Kʼusi beiltaseletik ta ViVlia xuʼ xkoltaatik kerem tsebetik sventa lekuk li kʼusi chkʼot ta nopel yuʼunike?

Liʼ oy oxib beiltaseletike: 1) baʼyel saʼo li Ajvalilal yuʼun Diose xchiʼuk li stukʼilale (Mat. 6:19-34); 2) muyubajan chatun ta stojolal yantik (Hech. 20:35), xchiʼuk 3) kʼupino chatun ta stojolal Jeova ta akeremal o ta atsebal (Ecl. 12:1) (15/1, pajina 19, 20).

¿Kʼusi chankot kaʼetik yakal chanav ti lik onoʼox talel li ta 1914?

Li Jesuse, skajlebinoj sakil kaʼ, la sjip yalel tal ta Balumil li Satanase xchiʼuk li spukujtake. Li jkot tsajal kaʼe jaʼ skʼan xal li paskʼopetik liʼ ta Balumile. Li jkot ikʼal kaʼe jaʼ skʼan xal li viʼnale. Li jkot kaʼ ti sakvayan skʼanale jaʼ skʼan xal li tsatsal chamel ti ta smiyonal xa noʼox krixchanoetik la smile (Apoc. 6:2-8) (1/2, pajina 6, 7).

¿Bakʼin chnupun «li Chʼiom Chije»? (Apoc. 19:7.)

Li snupunel «Chʼiom Chije» jaʼ to chichʼ pasel mi kuch xaʼox yuʼun li paskʼope ti jaʼ li Ajvalil Jesucristoe, jaʼ xkaltik, mi laj xaʼox yichʼ lajesel li Mukʼta Babiloniae xchiʼuk li paskʼop ta Armagedone (15/2, pajina 10).

¿Kʼusitik srasonal oy yuʼunik judioetik ta baʼyel siglo ti «ta xloʼilaj yoʼntonic» ta sventa kʼusi ora chvul li Mesiase? (Luc. 3:15.)

Mu xuʼ xkaltik ta jamal ti laj yaʼibeik smelolal judioetik ta baʼyel siglo li albilkʼop laj yal Daniel ta sventa ti kʼusi ora chvul li Mesiase (Dan. 9:24-27). Akʼo mi jech, xuʼ van laj yaʼiik li aʼyej laj yalbe junantik jchabichijetik li anjele o li kʼusi laj yal li meʼj-alkʼop Ana kʼalaluk laj yil ta chʼulna li Jesuse. Jech xtok, li jkʼelkʼanaletike kʼotik xaʼox ta Jerusalén sventa tsaʼik ti buchʼu vokʼ sventa «xʼoch ta ajvalilal» yuʼunik li judioetike (Mat. 2:1, 2). Ta mas tsʼakale, li Juan J-akʼvanej ta voʼe laj yal ti mu jaluk skʼan xvul ta lokʼele (15/2, pajina 26, 27).

¿Kʼuxi xuʼ xkutik sventa jech chkʼot ta pasel kuʼuntik mi xuʼ xijchie? (2 Cor. 1:18.)

Skʼan me te oyuk ta joltik ti bakʼintike mu xkʼot ta pasel kuʼuntik ta skoj ti oy kʼusi chkʼot ta pasel ti mas to tsots skʼoplale. Pe mi laj yal jun yajtsʼaklom Cristo ti tspase o ti laj yakʼ yee skʼan me xakʼ persa spasel (15/3, pajina 32).

¿Kʼuxi xuʼ stsal avuʼun skʼelel li pornografiae?

Oxtos ti kʼusi xuʼ skoltaote: 1) joypʼino batel asat mi lokʼ talel kʼusi chopole; 2) skʼan xavichʼ apʼijil ta sventa li kʼusi chanope: jaʼ nopo li kʼusitik lekike xchiʼuk kʼopono ta orasion li Diose, xchiʼuk 3) skʼan xavichʼ apʼijil ta sventa li kʼusi chapase: mu xakʼel pelikulaetik o ta Internet ti te chvinaj pornografiae (1/4, pajina 10-12).

Mi laj yikta komel yutsʼ yalal sventa chbat ta yan lum yoʼ spas kanal takʼin li jun yajtsʼaklom Cristoe, ¿kʼusi xuʼ xkʼot ta pasel ti muʼyuk jech malabile?

Kʼalal muʼyuk bu te nakal xchiʼuk yalab xnichʼnabik li totil meʼiletike xuʼ me xil svokolik ta sventa ti kʼu yelan chaʼi sbaike xchiʼuk ti kʼu yelan chakʼ ta ilel stalelalike. Li ololetike xuʼ jipbil chaʼi sba ta stojolal li stot smeʼike. Ta sventa li totil meʼiletike, xuʼ me smukul sativan junuk li chiʼilil ta nupunele o xchaʼvoʼalik, o chchiʼin sbaik ta vayel ti xchiʼil noʼox sbaik ta antsil xchiʼuk xchiʼil noʼox sbaik ta vinikale o xchiʼinel ta vayel o yikʼel yutsʼ yalalik (15/4, pajina 19, 20).

¿Kʼu yuʼun tskʼasbeik yakan li jpas tsatsal muliletik ti tsjokʼanik ta jtel teʼe?

Li jromaetike tsjokʼanbeik sbekʼtal junantik ta jtel teʼ li jpas tsatsal mulile. Li judioetike la skʼanik ti xichʼ kʼasbel yakanik li buchʼutik te jmoj jokʼajtik xchiʼuk li Jesuse. Kʼalal jech tspasike jaʼ jech ta xcham ta anil ta skoj ti mu xa xichʼ ikʼe, vaʼun xuʼ jech xichʼ mukel kʼalal skʼan toʼox xchʼay batel li Kʼakʼale (Deut. 21:22, 23) (1/5, pajina 11).

¿Kʼusi chanib sjakʼobiltak skʼan teuk ta joltik kʼalal ta jchiʼintik ta loʼil krixchanoetik li ta cholmantale?

¿Buchʼutik li ta jchiʼinan ta loʼile? ¿Bu ta jchiʼinan ta loʼil li krixchanoetike? ¿Bakʼin ta jchiʼin ta loʼil li krixchanoetike? xchiʼuk ¿kʼuxi xuʼ xlik jchiʼin ta loʼil li krixchanoetike? (15/5, pajina 12-15.)

¿Jayib krixchanoetik chamemik ta skoj li sikʼolale?

Li echʼ sigloe la smil 100 miyon krixchanoetik. Li avie chchamik jutuk mu vakib miyon krixchanoetik jujun jabil (1/6, pajina 3).