Li sjakʼobil taje tsots skʼoplal, mas to tsots skʼoplal chilik li buchʼutik chamem xchiʼilik ta nupunele. Li krixchanoetik taje xuʼ van tskʼan chikʼ sbaik yan velta xchiʼuk xchiʼilik ta nupunel li ta achʼ balumile. Jun meʼon vinik xi laj yale: «Li kajnil xchiʼuk li voʼone muʼyuk la jnop chkikta jbakutik. Oy onoʼox ta koʼontonkutik ti jmoj oyunkutik li ta yichʼel ta mukʼ Dios kʼuchaʼal nupultsʼakalunkutik ta sbatel osile. Taje muʼyuk jelem-o li kʼusi oy ta koʼontone». ¿Mi oy van srasonal ti xuʼ xnupunik yan velta li buchʼutik chchaʼkuxiike? Ta jpʼel chaʼpʼel noʼoxe, jaʼ ti mu xuʼ xkaltik mi jech chkʼot ta pasele.

Ta epal xa jabiletik, li jvuntike yaloj onoʼox li kʼusi laj yal Jesús ta sventa li chaʼkuxesele xchiʼuk ta sventa li nupunel ti xuʼ van jaʼ skʼan xal li chaʼkuxesel liʼ ta Balumile, pe jech kʼuchaʼal chale muʼyuk xa nupunel (Mat. 22:29, 30; Mar. 12:24, 25; Luc. 20:34-36). * Akʼo mi mu jkʼantik mu me stakʼ ti jpʼel xa noʼox li kʼusi chkaltike. ¿Mi jaʼ van skʼan xal Jesús li chaʼkuxesel ta vinajele? Jkʼeltik li kʼusi laj yal Jesuse.

Jkʼeltik batel li stsʼak loʼile (kʼelo Lucas 20:27-33). Li jsaduseoetike muʼyuk xchʼunojik li chaʼkuxesele, jaʼ yuʼun tskʼanik ox ti mu xtakʼ yuʼun Jesús li kʼusi tsjakʼik ta sventa li chaʼkuxesele xchiʼuk ta sventa ti chikʼ noʼox li smuʼike. * Xi la stakʼ li Jesuse: «Cʼalal liʼ to oyic ta banamil li cristianoetique, ta to xicʼ sbaic li vinic xchiʼuc antsetique. Pero li bochʼotic tʼujbilic sventa chchaʼuxiic loqʼuel ta smuquinalic sventa chcuxiic sbatel osile, muʼyuc xa nupinel, muʼyuc xa icʼbail. Yuʼun mu xa xchamic o, coʼolic xa jech chac cʼu chaʼal yajʼalmantal Dios. Xnichʼnab xa Dios chcʼotic o, yuʼun ichaʼcuxiic xa» (Luc. 20:34-36).

¿Kʼu yuʼun yaloj jvuntik ti xuʼ van jaʼ laj yalbe skʼoplal Jesús li krixchanoetik kʼalal mi chaʼkuxiik liʼ ta Balumile? Taje oy chib srasonal ti jech laj yichʼ alel taje. Li baʼyel srasonale, jaʼ ti jsaduseoetike xuʼ van jaʼ te oy ta sjolik li chaʼkuxesel ta Balumile xchiʼuk li Jesuse jaʼ li kʼusi la stakʼbee. Li xchibal srasonale, kʼalal laj xaʼox yal Jesuse laj yalbe skʼoplal li tukʼil jmoltotik Abraham, Isaac xchiʼuk Jacob ti chchaʼkuxiik liʼ ta Balumile (Luc. 20:37, 38).

Pe akʼo mi jech, yaʼeluke jaʼ te oy ta yoʼonton Jesús li buchʼu chchaʼkuxiik ti chbatik ta vinajele. ¿Kʼu van yuʼun xuʼ jech chichʼ nopel taje? Jkʼeltik chaʼtos kʼusitik ti tsots skʼoplale.

«Li bochʼotic tʼujbilic sventa [chchaʼuxiike]». Li buchʼutik tʼujbil chbatik ta vinajel ti tukʼ chakʼ sbaike jaʼik li buchʼutik «[ventainbilik] yuʼun Dios[e]» (2 Tes. 1:5, 11). Li stukike chʼabal smul ta x-ilatik koliyal li matanal laj yichʼ akʼele, ta skoj taje muʼyuk chchamik ta sventa ti jaʼ jpasmuliletike (Rom. 5:1, 18; 8:1). Taje chichʼ alel ta stojolalik ti «xcuxet noʼox yoʼnton[ike]» xchiʼuk staik-o ti xichʼik chaʼkuxesel ta vinajele (Apoc. 20:5, 6). Li sjelbenale, li buchʼutik chchaʼkuxiik ta  Balumile ta xkuxiik talel ek «li bochʼotic chopolique» (Hech. 24:15). ¿Mi xuʼ van jaʼ skʼoplalik li «bochʼotic tʼujbilic» ta sventa chaʼkuxesel «li bochʼotic chopolique»?

«Mu xa xchamic o». Yan Vivliaetike tsjelubtasik kʼuchaʼal «mu xa xchamic o» o «muʼyuk xa ventainbilik yuʼun li lajelale». Li buchʼutik tʼujbil chbatik ta vinajel ti tukʼ laj yakʼ sbaik kʼalal to slajebe ta xichʼik ikʼel batel ta vinajel xchiʼuk ch-akʼbat xkuxlejalik ti mu snaʼ xlaje (1 Cor. 15:53, 54). Li lajelale mu xa kʼusi xuʼ spasbatik li buchʼutik chbatik ta vinajele. *

Jech kʼuchaʼal laj xa kiltike, ¿kʼusi chakʼ jnoptik ta sventa taje? Xuʼ van li kʼusi laj yal Jesús ta sventa li nupunele, jaʼ van laj yalbe skʼoplal li buchʼutik chbatik ta vinajele. Mi jaʼ jeche, ep van kʼusitik chalbutik ta sventa li buchʼutik chichʼik ikʼel batel ta vinajele: muʼyuk chnupunik, muʼyuk xa chchamik, jech xa chkʼotik kʼuchaʼal li anjeletike, kuxlejaletik ti te oyik ta vinajele. Ta skoj li kʼusi laj yichʼ alele, chichʼ jakʼel yan sjakʼobiltak.

Li baʼyele, ¿kʼu yuʼun jaʼ laj yalbe skʼoplal Jesús li buchʼutik chbatik ta vinajel kʼalal la stakʼbe li jsaduseoetike, ti jaʼ oy ox ta snopbenik ta sventa li buchʼutik chkuxiik liʼ ta Balumile? Li Jesuse maʼuk onoʼox tstsakbe ta venta kʼusi tsnopik kʼalaluk ta onoʼox stakʼbe li yajkontratake. Jech kʼuchaʼal liʼe, ta sventa li judioetik ti tskʼanik jun senyaile, xi laj yal li Jesuse: «Vuqʼuesic li chʼulna liʼi, ta oxib cʼacʼal ta jchaʼvaʼan». Li Jesuse snaʼoj van ti jaʼ la snopik ta sventa li chʼulnae, pe «jaʼ scʼoplal sbecʼtal stuc» laj yal li Jesuse (Juan 2:18-21). Li Jesuse mu van persauk ta stakʼbe laj yil li jsaduseoetik ti mu ta sjunul yoʼonton tskʼan tsnaʼike (Prov. 23:9; Mat. 7:6; Hech. 23:8). Moʼoj, yuʼun li kʼusi la skʼan laj yakʼ ta naʼele, jaʼ li sbalil tstabeik ti chbatik ta vinajel li yajtsʼaklomtak ti oy ta yoʼontonik ta snaʼel ta melel ta sventa li chaʼkuxesele, ti chchaʼkuxiik ta tsʼakale.

Xchibale, ¿kʼu yuʼun laj yal Jesús ta slajeb sloʼil kʼalal laj yalbe skʼoplal li Abraham, Isaac xchiʼuk Jacob ti buchʼutik ta xchaʼkuxiik liʼ ta Balumile? (Kʼelo Mateo 22:31, 32.) Jech kʼuchaʼal chkiltike li Jesuse jaʼ lik yal ta sventa li jmoltotik «ta sventa li chaʼcuxesele». Laje jaʼ laj yalbe skʼoplal li kʼusi la stsʼiba Moisese, ti xchʼamojik li jsaduseoetike, li Jesuse jaʼ laj yal li kʼusi albat yuʼun Jeova li Moisés ta jpets chʼix ti oy skʼakʼale, taje jaʼ sventa chakʼ ta ilel ti oy li chaʼkuxesel li ta Balumile xchiʼuk jaʼ li kʼusi yaloj tspas li Diose (Éx. 3:1-6).

Yoxibale, li kʼusi laj yal Jesuse mi jaʼ ta sventa laj yal li nupunel ta sventa li buchʼutik chbatik ta vinajele, ¿mi jaʼ van skʼan xal ti xuʼ xchaʼnupunik li buchʼutik chkuxiik liʼ ta Balumile? Li Skʼop Diose muʼyuk chakʼbutik lek stakʼobil li sjakʼobil taje. Mi jaʼ chalbe skʼoplal ta melel Jesús ta sventa li buchʼutik chbatik ta vinajele, muʼyuk chichʼ alel mi xuʼ xnupunik ta achʼ balumil li buchʼutik chchaʼkuxiik ta Balumile.

Yoʼ to jeche, li Skʼop Diose chal ta melel ti lajelale jaʼ te chlaj skʼoplal ek li nupunele. Jaʼ yuʼun, mi nupun yan velta jun meʼon ants o jun meʼon vinike mu me toj chopoluk chaʼi sba ta skoj taje. Taje ta jujuntal me ta jnop jtuktik, xchiʼuk mu me chopoluk xijkʼopoj ta stojolal ta skoj ti la saʼ yan yajnil o smalal sventa mu stukuk xaʼi sba li jun meʼon ants o jun meʼon vinike (Rom. 7:2, 3; 1 Cor. 7:39).

Ta melel, xuʼ van toj ep kʼusitik ta jakʼtik ta sventa li kuxlejal ta achʼ balumile. Pe sventa mu jecheʼuk noʼox jnoptik li sjakʼobiltake, jaʼ me lek ti jmalatik xchiʼuk jkʼeltik li kʼusi chkʼot ta pasele. Pe xuʼ jpat koʼontontik ta sventa liʼe: li krixchanoetik ti lek xchʼunik mantale ta me xmuyubajik, yuʼun li Jeovae jaʼ chakʼbe skotol li kʼusitik chtun yuʼunike xchiʼuk li kʼusi oy ta yoʼontonike (Sal. 145:16).