Li Davide la stsʼiba ti «muʼyuc bu laj [yil] ti oy tscomtsanat stuc li bochʼo tucʼ yoʼntone; muʼyuc bu laj [yil] ti ch-ochic ta cʼan limosna li yalab xnichʼnabe». Jaʼ jech laj yakʼ ta ilel ta skoj li kʼusi kʼot ta pasel ta stojolal li Davide. Snaʼoj onoʼox lek ti ta onoʼox xchabivan li Diose (Sal. 37:25). Akʼo mi jech, li kʼusi laj yal Davide, maʼuk skʼan xal ti mi junuk yajtsʼaklom Cristo muʼyuk chil svokol ta viʼnale o ti mu junuk velta chil svokolike.

Bakʼintike toj tsotsik laj yil svokol li Davide. June jaʼo kʼalal jatav ta stojolal li Saule. Chlaj xaʼox sveʼelik li Davide jaʼ yuʼun la skʼan koltael sventa x-akʼbat sveʼelik (1 Sam. 21:1-6). Jaʼ yuʼun li Davide ‹och ta kʼan limosna›. Akʼo mi jech, kʼalal oy tsots svokole, li stuke snaʼoj ti muʼyuk bu chʼayem ta sjol li Jeovae. Li kʼusi melele, jaʼ ti muʼyuk bu ta jtatik ti xvokolet tskʼan sveʼel li David sventa xkuxie.

Li ta Mateo 6:33 te chalbutik Jesús ti Diose chakʼbe kʼusi chtun yuʼun li tukʼil yajtuneltak mi jaʼ baʼyel chakʼ ta xkuxlejalik li kʼusitik ta sventa Ajvalilal yuʼune. Li Jesuse laj yalbutik li kʼusi skʼan jpastike: «Tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane, jech chayacʼboxuc scotol li cʼusitic ta xtun avuʼunique [ti te tsakal skʼoplal li veʼlile, li kʼusi chkuchʼtike xchiʼuk jkʼuʼ jpokʼtike]». Pe akʼo mi jech, li Jesús xtoke laj yalbe skʼoplal ti ta skoj li nutsele, li ‹xchiʼiltake› xuʼ xilik viʼnal (Mat. 25:35, 37, 40). Jaʼ jech kʼot ta pasel ta stojolal li jtakbol Pabloe. Bakʼintike, laj yil viʼnal xchiʼuk takitiʼil (2 Cor. 11:27).

Li Jeovae chal ti oy jaytos ti kʼu yelan chkichʼtik nutsele. Li Jeovae xuʼ xakʼ ti akʼo xkil jvokoltik ta viʼnal o ta yan kʼusitike sventa xkakʼtik ta ilel ti mu meleluk li kʼusi chal Satanase (Job 2:3-5). Jech kʼuchaʼal liʼe, junantik kermanotaktik ti takatik batel ta tsatsal abtel kʼalal yakal li ajvalilal ta nazie, oy kʼusi xibal sba kʼot ta pasel ta xkuxlejalik ta skoj li nutsele. Li vokolil ta sventa li veʼlile jaʼ li kʼusi stunesoj Satanás sventa mu tukʼuk xakʼ sbaik ta stojolal Jeova li yajtuneltake. Li tukʼil stestigotak Jeovae la xchʼunbeik-o li smantaltake, jaʼ yuʼun, muʼyuk xchʼayatik-o ta yoʼonton. Laj yakʼ ti akʼo xilik li preva liʼe, jech kʼuchaʼal chakʼ ti akʼo yilik jaytosuk preva skotol li yajtsʼaklomtak Cristoe. Akʼo mi jech, jnaʼojtik ta melel ti tskolta Jeova skotol li buchʼutik chil svokolik ta skoj li sbie (1 Cor. 10:13). Xuʼ me teuk ta jnopbentik li kʼusi chal Filipenses 1:29: «Yuʼun li voʼoxuque laqʼuelanbatic xa li coltael ta sventa Cristoe. Maʼuc noʼox tscʼan acʼo achʼunic li Cristoe, jaʼ tscʼan noxtoc ti acʼo avichʼic vocol ta sventae».

Li Jeovae chal ti tskolta li yajtuneltake. Li Isaías 54:17 xi chalbutik ta melele: «Pero muʼyuc spasojic jchopuc abtejebal ti xuʼ chayulesot oe». Li kʼusi chal liʼe xchiʼuk li kʼusitik yane jaʼ me chakʼ ti junuk yoʼontonik li steklumal Diose. Akʼo mi jech xuʼ me xil svokolik ta jujuntal o xuʼ van xchamik li yajtsʼaklomtak Cristoe.