1. ¿Kʼusi spasojik jnitvanejetik ta relijion kʼalal jaʼo oy li paskʼope?

¿MI OY van ta yoʼonton Dios ti akʼo xbatik ta paskʼop xchiʼuk ti smilik krixchanoetik ta yantik lum li yajtsʼaklomtak Cristoe? Taje jaʼ li kʼusi ep jech spasojik li echʼ sien jabil ti yalojik ti jaʼik yajtsʼaklomtak Cristoe. Li capellan sbiik ti jaʼ jkatolikoetike yakʼojbeik bendision li soltaroetike xchiʼuk stukʼik sventa xbat smilik jkatolikoetik ta junuk lum ti jaʼ yajkontraike. Jech spasojik ek li capellan ti jaʼik protestanteetike. Jaʼ jun slekil kʼelobil li Xchibal Mukʼta Paskʼop ta spʼejel Balumil ti la skolta sbaik ti epal krixchanoetik chamike.

2, 3. 1) ¿Kʼusi la spasik li stestigotak Jeova li ta Xchibal Mukʼta Paskʼop ta spʼejel Balumile xchiʼuk kʼalal echʼ xaʼoxe? 2) ¿Kʼu yuʼun jech la spasik taje?

² ¿Kʼusi la spasik li stestigotak Jeova li ta Xchibal Mukʼta Paskʼop ta spʼejel Balumile? Li sloʼil xkuxlejal stestigotak Jeovae chakʼ ta ilel ti muʼyuk la stikʼ sbaik ta paskʼope. ¿Kʼu yuʼun ti jech la spasike? Jaʼ ta skoj li kʼusi laj yakʼ ta ilel xchiʼuk li chanubtasel laj yakʼ li Jesuse. Xi laj yale: «Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:35). Jech xtok, la tsakik ta venta li kʼusi la stsʼibabe batel Pablo li yajtsʼaklomtak Cristo ta Corintoe xchiʼuk laj yakʼ ta xkuxlejalik (kʼelo 2 Corintios 10:3, 4).

 ³ Ta skoj ti lek chanubtasbil sjol yoʼontonik ta Vivliae, li melel yajtsʼaklomtak Cristoe muʼyuk chchanik spasel paskʼop xchiʼuk muʼyuk chbatik ta paskʼop. Ta skoj ti tukʼ laj yakʼ sbaike, ta smilal xa noʼox ermanoetik xchiʼuk ermanaetik yichʼojik nutsel kʼusuk sjabilalik. Ep buchʼutik ti tikʼatik ta chukele xchiʼuk ti laj yichʼik takel batel ta spasel tsatsal abtelaletike. Jlome laj yichʼik milel li ta Alemania nazie. Akʼo mi ep laj yil svokolik, li stestigotak Jeova ta Europae muʼyuk onoʼox chʼay ta sjolik li abtelal akʼbilik ta xcholel li lekil aʼyej ta sventa li Ajvalilal yuʼun Jeovae. Jaʼ yuʼun tukʼ laj yakʼ sbaik kʼalal la xcholik mantal li ta chukinabetike, li ta tsatsal abtelaletike xchiʼuk ti bu laj yichʼik ikʼel batele. * Ta tsʼakale, li ta 1994 muʼyuk la stikʼ sbaik xtok ta paskʼop ta skoj ti jelel stsʼunbalik li ta Ruandae. Jech xtok, muʼyuk la stikʼ sbaik ta paskʼop ti la spasik li ta Balcanese, kʼalal la xchʼak sba li voʼneal Yugoslavia ti ep buchʼutik chamik tee.

4. ¿Kʼusi kʼotem ta nopel yuʼun epal krixchanoetik kʼalal chilik ti muʼyuk ta jtikʼ jbatik ta paskʼope?

⁴ Kʼalal chilik ti muʼyuk ta jtikʼ jbatik jsetʼuk ta paskʼope, ta smilal xa noʼox krixchanoetik ta spʼejel Balumil yakʼojik lek venta ti stestigotak Jeovae skʼanojik ta melel li Diose xchiʼuk li xchiʼiltakike, ti chkakʼtik ta ilel ta melel ti jaʼutik yajtsʼaklomtak Cristoe. ¿Kʼusitik van yan ti chakʼ vinajuk ti jaʼutik melel yajtsʼaklomtak Cristo ti kʼu yelan chkichʼtik ta mukʼ Dios sventa xakʼik venta li epal krixchanoetike?

5. ¿Kʼusi tsots laj yaʼiik spasel li baʼyel yajtsʼaklomtak Jesuse?

⁵ Kʼalal lik xchol mantal li Jesuse laj yal onoʼox ti tsots skʼoplal ti xichʼ alel batel li lekil aʼyej ta sventa li Ajvalilal yuʼun Diose. La stʼuj lajcheb yajtsʼaklomtak sventa slikesik spasel jun abtelal ti chkʼot ta pasel ta spʼejel Balumile, laje la xchanubtas li yan 70 yajtsʼaklomtake (Luc. 6:13; 10:1). La xchanubtasan sventa xchanubtasik li judioetike, pe ta tsʼakale oy kʼusi labal sba kʼot ta pasel: li yajtsʼaklomtak Cristoe skʼan xichʼik batel ta yantik lumetik li lekil aʼyeje. Taje tsots laj yaʼiik spasel li yajtsʼaklomtak Cristo ti jaʼik judioetike (Hech. 1:8).

6. ¿Kʼu yuʼun kʼot ta nopel yuʼun Pedro ti mu snaʼ xtʼujvan li Jeovae?

⁶ Li jtakbol Pedroe laj yichʼ takel batel ta sna Cornelio, jun vinik ti maʼuk judioe. Li Pedroe jaʼ te laj yakʼ venta ti Diose mu snaʼ stʼuj li krixchanoetike. Vaʼun laj yichʼik voʼ li Cornelioe xchiʼuk li yutsʼ yalale (Hech. 10:9-48). Kʼalal jech kʼot ta pasel taje, jaʼo epaj batel ta spʼejel Balumil li cholmantale: ti xuʼ xaʼiik xchiʼuk xchʼamik li krixchanoetik ta skotol li lumetike.

7, 8. ¿Kʼusi spasoj s-organisasion Jeova sventa mas xaʼiik epal krixchanoetik li aʼyej ta sventa li Ajvalilal yuʼun Diose? (Kʼelo li lokʼol ta slikebale.)

⁷ Li ta jkʼakʼaliltike, li ermanoetik ti oy ta sbaik skʼelel li abtelal tspasik li stestigotak Jeovae ta sjunul yoʼontonik tstij koʼontontik xcholel li mantale xchiʼuk li chanubtaseletik ta sventa li lekil aʼyej ta spʼejel Balumile. Li avie oy xa jutuk mu vaxakib miyon stestigotak Jeova ti chalik batel li aʼyej laj yal Cristo ta mas ta vakib sien jeltos kʼopetike, xchiʼuk ¡skʼan to mas yan kʼopetik! Lek ojtikinbilik ta skoj ti chcholik mantal ta jujun naetike xchiʼuk li ta kayeetike, bakʼintik xtoke te chvinaj kʼalal chakʼik ta uni mexaetik o ta uni karoetik li vunetike.

⁸ Mas ta 2,900 jelubtasej kʼopetik yichʼojik lek chapanel sventa sjelubtasik li Vivliae xchiʼuk li yan vunetike. Pe maʼuk noʼox tsjelubtasik li ta kʼopetik ti mas ojtikinbilike. Tsjelubtasik xtok ta sienal noʼox kʼopetik akʼo mi mu toj  masuk ojtikinbil ti chkʼopojik ta smiyonal noʼox li krixchanoetike. Jech kʼuchaʼal li ta Españae ta smiyonal xa noʼox krixchanoetik chkʼopojik ta catalán ti jaʼ skʼopik kʼalal chʼiik talele. Li avie jel tos xa kʼu yelan chkʼopojik yan velta li ta Andorrae, Alicante li ta islas Baleares xchiʼuk ta Valenciae. Li stestigotak Jeovae yakal xa tslokʼesik vunetik xchiʼuk chetʼesik tsobajeletik ta catalán, li kʼop taje jaʼ chkʼot ta yoʼontonik li buchʼutik chkʼopojik ta catalane.

9, 10. ¿Kʼuxi chakʼ ta ilel s-organisasion Jeova ti oy ta yoʼonton ti oyuk yuʼunik kʼusi ta mantal li krixchanoetike?

⁹ Ti kʼu yelan tsjelubtasik li jeltos kʼopetike xchiʼuk ti kʼu yelan chchanubtasvanike yakal chichʼ pasel ta jeltos stsʼunbal krixchanoetik. Li ta Mexicoe chkʼopojik ta español, pe oy yan krixchanoetik ti chkʼopojik ta yan batsʼikʼopetik xtoke. Jun li batsʼikʼop taje jaʼ li mayae. Li Betel ta Mexicoe la stak batel ta slumalik li buchʼutik tsjelubtasik ta maya kʼope sventa xkʼopojik xchiʼuk xaʼiik skotol kʼakʼal li skʼopike. Yan skʼelobil xtoke, jaʼ jun kʼop ti chkʼopojik li ta Nepale, ti mas ta 29 miyon jnaklejetike. Akʼo mi mas ta 120 jeltos kʼopetik oy, mas ta lajuneb miyon krixchanoetik chkʼopojik ta nepalés xchiʼuk epal krixchanoetik jaʼ li xchibal skʼopike. Yakal xa chichʼ lokʼesel vunetik li ta kʼop taje.

¹⁰ ¿Kʼu yuʼun ep tajek oy yuʼun jelubtasej kʼopetik li s-organisasion Jeovae? Yuʼun tsots skʼoplal chil ti skʼan cholel mantal li ta skotol lumetike. Li stestigotak Jeovae ta smiyonal xa noʼox tratadoetik, foyetoetik xchiʼuk revistaetik spukojik ta moton ta spʼejel Balumil. Ta skoj li matanal takʼin chakʼike jaʼ jech tstojik li kʼusitik tslokʼesike, yuʼun yakal chchʼunik li mantal laj yal Jesús liʼe: «Amotonic laj cacʼboxuc, jech ta matanal me xacoltavanic ec» (Mat. 10:8).

11, 12. ¿Kʼusi kʼotem ta pasel ta stojolal epal krixchanoetik li abtelal ta cholmantal ta spʼejel Balumil tspasik li stestigotak Jeovae?

¹¹ Li stestigotak Jeovae xmuyubaj noʼox chcholik mantal xchiʼuk chchanubtasvanik. Jpʼel yoʼonton snaʼojik lek ti laj xa staik li kʼusi melele, jaʼ yuʼun ep kʼusitik tspasik sventa xichʼbeik batel aʼyej li krixchanoetik ta yantik lumetike xchiʼuk li buchʼutik yan-o stsʼunbalike. Ep tajek li buchʼutik lek xa noʼox sba chichʼ batel xkuxlejalike, ti xchanojik yan kʼope xchiʼuk ti laj xa xchan xkuxiik xchiʼuk li buchʼutik jelel stalel xkuxlejalike. Li cholmantal chichʼ pasel  ta spʼejel Balumil taje xchiʼuk li chanubtasel chichʼ akʼele jaʼ xchʼunojik-o xtok epal krixchanoetik ti jaʼ melel yajtsʼaklomtak Jesús li stestigotak Jeovae.

¹² Li stestigoutik Jeovae ta jpastik bu kʼalal xuʼ kuʼuntik, yuʼun jnaʼojtik lek ti jtaojtik xa li kʼusi melele. Pe ¿kʼusi van mas yilojik epal krixchanoetik sventa xchʼunik ta melel ti staojik xa li kʼusi melel li stestigotak Jeovae? (Kʼelo Romanos 14:17, 18.)

13. ¿Kʼusi spasojik stestigotak Jeova sventa lekuk sak-o li ta stalelalike?

¹³ ¿Kʼu yuʼun lek xchʼunojik junantik tukʼil yajtsʼaklomtak Cristo ti staojik xa li melel avie? Jun yajtunel Jeova ti lek xa chaneme xi laj yal ti kʼu yelan chaʼi sbae: «Tsots chichʼ akʼel ipalil yoʼ sakuk-o ta sventa talelalil li s-organisasion Jeovae, mu ventauk mi oy buchʼu skʼan tukʼibtasel o mi chichʼ albel tsatsal mantal». ¿Kʼuxi tspas yuʼunik li tsatsal mantaletik ta sventa li talelale? Yuʼun skotol li stestigotak Jeovae chakʼik persa chakʼ ta xkuxlejalik li mantaletik chal ta Skʼop Diose xchiʼuk li kʼusi laj yakʼ komel ta ilel li Jesús xchiʼuk li yajtsʼaklomtake. Koliyal taje, jutuk tajek li buchʼutik yichʼojik lokʼesel ta tsobobbail ta skoj ti mu skʼan xchʼunik li mantaletik yakʼoj Diose. Li yepal stestigotak Jeovae sak chichʼ batel li xkuxlejalike xchiʼuk lek kʼusi chakʼik ta ilel, akʼo mi muʼyuk toʼox lek chil Dios ti kʼu toʼox yelan xkuxlejalik junantike (kʼelo 1 Corintios 6:9-11).

14. ¿Kʼusitik spasojik li buchʼutik lokʼesbilik ta tsobobbaile, xchiʼuk kʼusi kʼotem ta pasel ta skoj taje?

¹⁴ ¿Kʼusi xuʼ xkaltik ta stojolalik li buchʼutik yichʼojik lokʼesel ta tsobobbail jech kʼuchaʼal chal li mantaletik ta Vivliae? Ta smiyonal xa noʼox sutesoj xa yoʼontonik ta sventa li kʼusitik chopol tspasike, xchiʼuk lek chʼambilik yuʼun li tsobobbaile (kʼelo 2 Corintios 2:6-8). Ti jchʼuntik li mantaletik ta sventa li talelaletike jaʼ yakʼoj ti lekuk sak tsobobbail ti chakʼ jpat koʼontontike. Yuʼun mu xkoʼolaj xchiʼuk li epal relijionetike —ti chakʼ akʼo spasik kʼusitikuk li buchʼutik te tstsob sbaike—, li stestigotak Jeovae jpʼel yoʼonton tspakbeik skʼoplal li smantaltak Diose. Taje jaʼ jpʼel-o yoʼontonik epal krixchanoetik ti staojik xa kʼusi melel li slumal Jeovae.

15. ¿Kʼusi xchʼunoj-o jun ermano ti staoj li melele?

¹⁵ ¿Kʼu yuʼun jpʼel yoʼontonik ti staojik xa li kʼusi melel yan stestigotak Jeova ti lek xa chanemike? Jun ermano ti 54 xa sjabilale xi laj yale: «Kʼalal chex keremun toʼoxe, li xchʼunel koʼontone lek tsatsubem ta skoj oxtos li kʼusitik jchʼunoj ti tsotsik skʼoplale: 1) ti oy ta melel li Diose; 2) ti jaʼ laj yakʼ ta tsʼibael li Vivliae, xchiʼuk 3) ti yakal tstunes xchiʼuk chakʼbe bendision li stsobobbail stestigotak Jeovae. Skotol li jabiletik ti jchanoj tal li Vivliae, ta onoʼox xkakʼ ta preva li oxtos sventa xkil mi melele. Li sprevail ti jeche jaʼ ti mas xa ch-epajik  jujun jabile, taje jaʼ stsatsubtasoj li xchʼunel koʼontone xchiʼuk mas xa jchʼunoj ti oyutik li ta melele».

16. ¿Kʼuxi xchʼunoj-o jun ermana ti staoj xa li kʼusi melele?

¹⁶ Jun ermana ti nupunem xa ti te chtun li ta smukʼta nail tsʼibajom yuʼun stestigotak Jeova li ta Nueva Yorke, xi laj yal ta sventa li s-organisasion Jeovae: «Jaʼ noʼox stuk chal li biil Jeovae. [...] ¡Yuʼun li sbi Diose te van vukmil ta koj oy li ta Vivliae!». Jech xtok, li ermanae laj yal li kʼusi chal ta 2 Crónicas 16:9: «Yuʼun li Mucʼul Diose jaʼ sqʼueloj scotol li banamile, jech xuʼ chacʼ ta ilel svuʼel ta stojol li bochʼo scotol yoʼntonic tscʼanic coltael yuʼune». Xchiʼuk xi to laj yale: «Li kʼusi melele jaʼ xchanubtasojun ti ta sjunuluk koʼonton chitun ta stojolal sventa xakʼbun li kipe. Li kʼusi mas tsots skʼoplal chkile jaʼ ti lek xkil jba xchiʼuk li Diose. Xchiʼuk ta jtojbe ta vokol xtok ti jaʼ skoltaojutik Jesús sventa xkojtikintike. Jaʼ stsatsubtasojun-o li yojtikinel taje».

17. ¿Kʼu yuʼun lek xa xchʼunoj jun ermano ti mu toʼox xchʼun mi oy Dios ti staoj xa li kʼusi melele?

¹⁷ Jun ermano ti mu xchʼun toʼox mi oy Diose xi laj yakʼ ventae: «Kʼalal ta jkʼel li kʼusitik spasojan Diose, chkakʼ venta ti oy ta yoʼonton Dios ti akʼo jkʼupintik li jkuxlejaltike. Jech xtok, kʼalaluk mas xa tsok batel li balumile, li slumal Jeovae mas xa oy xchʼunel yoʼontonik, mas jun yoʼontonik xchiʼuk chkʼanvanik. Jaʼ noʼox xchʼul espiritu Jeova xuʼ spas yuʼun li skʼelobil juʼelal taje» (kʼelo 1 Pedro 4:1-4).

18. ¿Kʼusi chanop ta sventa li kʼusi laj yalik chaʼvoʼ ermanoetike?

¹⁸ Yan ermano ti ep xa jabil chtun ta stojolal Jeovae laj yalbe srasonaltak ti kʼu yuʼun xchʼunoj li kʼusi ta xkaltik batel ta cholmantale: «Li jabiletik echʼem talele, ti kʼusi xa jchanoj talele jaʼ jchʼunoj-o ti stestigotak Jeovae yakʼojbeik yipal spasel kʼuchaʼal li yajtsʼaklomtak Cristo ta baʼyel sigloe. Ayemun xa ta spʼejel Balumil xchiʼuk kiloj xa jtuk ti ojtikinbilik ti jmoj oyike. Li melel ta Vivliae jun koʼonton yuʼun xchiʼuk ximuyubaj». Kʼalal laj yichʼ jakʼbel jun ermano ti mas xa ta 60 sjabilal ti kʼu yuʼun jpʼel yoʼonton xchʼunoj ti jaʼ te oy li melel ta stojolal li stestigotak Jeovae, li stuke laj yal ti jaʼ stsʼakliojik ta melel li Jesuse. Xi laj yale: «Solel jchanojbekutik lek xkuxlejal xchiʼuk ti kʼu yelan la xchol mantal li Jesuse, xchiʼuk toj ep sbalil chkilkutik ti kʼusi laj yakʼ ta ilele. Jeloj kʼusitik ta jkuxlejalkutik sventa mas xinopajkutik ta stojolal Dios ti jaʼ koliyal li Jesuse. Kakʼojkutik venta ti matanal laj yakʼe jaʼ sventa xijkolutik. Xchiʼuk jnaʼojkutik ti laj yichʼ chaʼkuxesele, yuʼun oy buchʼutik laj yilik ti jech kʼot ta pasele» (kʼelo 1 Corintios 15:3-8).

19, 20. 1) ¿Kʼusi oy ta sbaik yajtsʼaklomtak Cristo ta Roma ti la svulesbe ta sjol li Pabloe? 2) ¿Kʼusi matanal jtaojtik li yajtsʼaklomutik Cristoe?

¹⁹ Ta skoj ti jkʼanojtik li jchiʼiltaktike, mu xuʼ jnakʼtik komel sventa jtuktik noʼox li yojtikinobil kʼusi melele. Li Pabloe xi laj yalbe li yermanotak ta tsobobbail ta Romae: «Yuʼun me chlocʼ ta ave ti jaʼ Avajval li Jesuse, xchiʼuc me chachʼun ta avoʼnton ti ichaʼcuxesat yuʼun Diose, chacol sbatel osil. Yuʼun ta coʼntontic tscʼan ta jchʼuntic ti jech xuʼ tucʼ coʼntontic chijyilutic Diose. Xchiʼuc tscʼan chlocʼ ta quetic ta jamal ti jech xuʼ chijcolutique» (Rom. 10:9, 10).

²⁰ Li stestigoutik Jeovae lek jnaʼojtik ti jtaojtik xa li kʼusi melele. Jnaʼojtik xtok ti jaʼ jun matanal ti xuʼ jchanubtastik yantik ta sventa li Ajvalilal yuʼun Diose. Kʼalal ta jcholbetik mantale, kakʼtik persa sventa xkʼotuk li ta yoʼontonike, maʼuk noʼox ta sventa li kʼusitik ta jchanubtastik ta Vivliae, yuʼun jaʼ ta skoj ti jpʼel koʼontontik lek jchʼunojtike.