1, 2. 1) ¿Kʼusi loʼiletik la xchapbe yamigotak li Jesuse? (Kʼelo li lokʼol ta slikebale.) 2) Li ta loʼil sventa chijetik xchiʼuk tentsunetike, ¿kʼusi tsots skʼoplal skʼan jnaʼtik?

JUN veltae oy kʼusi tsots skʼoplal tsloʼiltabe yamigotak li Jesuse. Li yamigotak taje jaʼik li Pedro, Andrés, Santiago xchiʼuk Juane. La xchapbe skʼoplal li sloʼilal j-abtel ti tukʼ yoʼontone, li sloʼilal lajuneb tojol tsebetike xchiʼuk li talentoetike. Pe ta tsʼakale lik xchapbe skʼoplal yan loʼil sventa li «Xnichʼon cristiano» sbie xchiʼuk kʼalal chtal xchapan li krixchanoetike. Kʼalal la xchap li loʼile laj yal ti ‹Xnichʼon krixchanoe› chlik spas ta chaʼvokʼ «scotol li cristianoetic ta sbejel banamile». Li ta jvokʼe ‹chijetik› sbi yuʼun li Jesuse, li yane ‹tentsunetik› tsbiin yuʼun. Li ta loʼil taje oy to jvokʼ krixchanoetik ti tsots skʼoplale: jaʼ li ‹xchiʼiltak› ‹mukʼta Ajvalile› (kʼelo Mateo 25:31-46).

² Tsots skʼoplal chkiltik ek li loʼil taje. ¿Kʼu yuʼun? Yuʼun li Jesuse laj yal ti junantik krixchanoetike chichʼik akʼbel kuxlejal sbatel osil, pe li yane chichʼik lajesel. Jaʼ yuʼun tsots skʼoplal ti jnaʼtik kʼusi smelolal li loʼil taje xchiʼuk kʼusi skʼan jpastik sventa jtatik li kuxlejal sbatel osile. Jech xtok, skʼan jnabetik li stakʼobiltak liʼe: ¿Kʼuxi skoltaojutik tal Jeova sventa xkaʼibetik smelolal li loʼil taje? ¿Kʼuxi xuʼ jnaʼtik ti te tsakal skʼoplal xchiʼuk  cholmantal li loʼil taje? ¿Buchʼutik skʼan xcholik mantal? ¿Kʼu yuʼun tsots skʼoplal skʼan tukʼ xkakʼ jbatik xchiʼuk ti jkoltatik li mukʼta Ajvalil xchiʼuk xchiʼiltake?

3, 4. 1) ¿Kʼusi oxtos skʼan jnaʼtik yoʼ xkaʼibetik smelolal li loʼil sventa chijetik xchiʼuk tentsunetike? 2) ¿Kʼu yelan la xchapbe smelolal ta 1881 li loʼil sventa chijetik xchiʼuk tentsunetik li revista liʼe?

³ Skʼan jnaʼtik oxtos kʼusitik yoʼ xkaʼibetik smelolal li loʼil sventa chijetik xchiʼuk tentsunetike. Baʼyel, ¿buchʼu jaʼ skʼoplal li ‹Xnichʼon krixchanoe›, li mukʼta Ajvalile, li xchiʼiltak Ajvalile, li chijetik xchiʼuk li tentsunetike? Xchibal, ¿bakʼin chal buchʼu jaʼ chij o tentsun li ‹Xnichʼon krixchanoe›? Yoxibal, ¿kʼusi tstsak ta venta jchabichij yoʼ chal mi jaʼ chij o tentsun li jun krixchanoe?

⁴ Li revista Zionʼs Watch Tower ta 1881 laj yal ti «Xnichʼon cristiano» xchiʼuk li mukʼta Ajvalile jaʼ skʼoplal li Jesuse. ¿Buchʼu jaʼ skʼoplalik laj yichʼ toʼox alel li xchiʼiltak mukʼta Ajvalile? Li ta revistae laj yichʼ alel ti jaʼ skʼoplalik li buchʼutik tspasik mantal xchiʼuk Jesús ta vinajele xchiʼuk jaʼ skʼoplalik li krixchanoetik ti chnakiik ta Balumil kʼalal maʼuk xaʼox jpasmuliletike. Li revista taje, ¿bakʼin la chal buchʼu jaʼ chij o tentsun li Jesuse? Jaʼo la kʼalal tspas mantal jmil jabil li Cristoe. ¿Kʼusi la tstsak ta venta Jesús sventa chal mi chij o mi tentsun li jun krixchanoe? Jaʼ la ti ta skotol xkuxlejalik la xchanbeik kʼu yelan chkʼanvan li Diose.

5. ¿Kʼu yelan la xchapbe smelolal ta 1923 li loʼil sventa chijetik xchiʼuk tentsunetik li revista liʼe?

⁵ Kʼalal echʼ jayibuk jabile, li Jeovae la skolta yajtuneltak sventa mas xa lek xaʼibeik smelolal li loʼil taje. Li ta revista The Watch Tower 15 yuʼun oktuvre ta 1923 laj yalbe skʼoplal yan versikuloetik sventa xjel ti kʼu toʼox yelan chichʼ aʼibel smelolal li loʼil taje. ¿Buchʼu jaʼ laj yichʼ albel skʼoplal ti jaʼ li ‹Xnichʼon krixchanoe›? Jaʼ li Jesuse. ¿Buchʼu jaʼ laj yichʼ albel skʼoplal li xchiʼiltak mukʼta Ajvalile? Jaʼ li buchʼutik ch-ochik ta ajvalilal ta vinajel xchiʼuk li Jesuse. ¿Buchʼu jaʼ skʼoplalik li chijetike? Laj yichʼ alel ti jaʼ li krixchanoetik ti liʼ chnakiik ta Balumil ti chventainatik yuʼun li Ajvalilal taje. ¿Bakʼin chichʼ alel ti xkoʼolajik ta chijetik li krixchanoetik taje? Jaʼo kʼalal liʼ to oyik ta Balumil li xchiʼiltak mukʼta Ajvalile, ti kʼalal skʼan toʼox spas mantal jmil jabil li Jesuse. ¿Kʼu yuʼun? Yuʼun li ta loʼile chal ti krixchanoetik ti liʼ chnakiik ta Balumile skʼan skoltaik li xchiʼiltak mukʼta Ajvalile. Taje jaʼ noʼox xuʼ xkʼot ta pasel kʼalal liʼ to oyik ta Balumil li xchiʼiltak mukʼta Ajvalile. ¿Kʼusi chichʼ tsakel ta venta yoʼ chichʼ alel ti jaʼik chijetike? Li revistae laj yal ti jaʼ ta skoj ti chchʼunik li Jesuse xchiʼuk ti tslekubtas jkuxlejaltik li Ajvalilal yuʼune.

6. ¿Kʼu xa yelan laj yichʼ chapbel smelolal ta 1995 li loʼil taje?

⁶ Oy jayib jabil ti laj toʼox jnoptik mi chchʼam Skʼop Dios avi li jun krixchanoe jaʼ chij, ti mi muʼyuke jaʼ tentsun. Pe li ta 1995 la jeltik ti kʼu yelan ta jchapbetik skʼoplal xtok li loʼil liʼe. Li revista liʼe la skoʼoltas Mateo 24:29 kʼalal ta 31 xchiʼuk Mateo 25:31 xchiʼuk 32 (kʼelo). Li revista taje laj yal ti Jesuse jaʼ to chal buchʼu jaʼ chij o tentsun ‹kʼalal mi tal xchiʼuk xojobale›, taje jaʼo kʼalal yakal li mukʼta tsatsal vokolile. * (Kʼelo li tsʼib ta yok vune.)

7. ¿Kʼu xa yelan chkaʼibetik smelolal avi li loʼil ta sventa chijetik xchiʼuk tentsunetike?

⁷ Mas xa jamal chkaʼibetik smelolal avi  li loʼil taje. ¿Buchʼu jaʼ skʼoplal li ‹Xnichʼon krixchanoe› xchiʼuk li mukʼta Ajvalile? Jaʼ li Jesuse. ¿Buchʼu jaʼ skʼoplal li xchiʼiltak mukʼta Ajvalile? Jaʼ li buchʼutik la stʼuj Jeova ta xchʼul espiritue. Li buchʼutik taje koʼol tspasik mantal ta vinajel xchiʼuk li Jesuse (Romanos 8:16, 17). ¿Buchʼu jaʼ skʼoplal li chijetik xchiʼuk tentsunetike? Jaʼ li krixchanoetik ta skotol lumetike. ¿Bakʼin chal buchʼu jaʼ chij o tentsun? Jaʼ to ta slajebaltik mukʼta tsatsal vokolil ti poʼot xa chtale. ¿Kʼusi chichʼ tsakel ta venta yoʼ chichʼ alel mi jaʼ chij o tentsun li jun krixchanoe? Sventa xal Jesús buchʼu jaʼ chij o tentsune jaʼ ta skʼel kʼu yelan ta jtsaktik ta venta li buchʼutik tʼujbil chbatik ta vinajel ti liʼ to oyik ta Balumile. Ta jtojbetik ta vokol Jeova ti lek xa jamal chkaʼibetik smelolal li loʼil taje xchiʼuk li yan loʼiletik chal ta Mateo 24 xchiʼuk 25.

8, 9. Li chijetike, ¿kʼu yuʼun laj yal Jesús ti xkoʼolajik ta «jun vinic ti tucʼ yoʼntone»?

⁸ Kʼalal la xchapbe skʼoplal li loʼil ta sventa chijetik xchiʼuk tentsunetik li Jesuse muʼyuk te la yalbe skʼoplal cholmantal. Akʼo mi jech, li loʼil taje chakʼ ta ilel ti tsots skʼoplale. ¿Kʼuxi ta jnaʼtik taje?

⁹ Baʼyel skʼan jvules ta joltik ti jaʼ noʼox jun skʼelobil li loʼile. Yuʼun maʼuk yakal chalbe skʼoplal batsʼi chijetik o batsʼi tentsunetik li Jesuse. Jaʼ yuʼun sventa xilutik kʼuchaʼal chij li Jesuse, maʼuk skʼan xal ek ti batsʼi skʼan xkakʼbetik skʼuʼik o xkichʼbetik batel sveʼelik li buchʼutik tʼujbil chbatik ta vinajele, ti skʼan xbat jchabitik kʼalal ch-ipajike o ti chbat jvulaʼantik kʼalal oyik ta chukele. ¿Kʼusi skʼan xal un chaʼa? Jaʼ ti sventa xilutik kʼuchaʼal chij li Jesuse skʼan jchʼuntik ti oy jtsop yajtsʼaklomtak ta Balumil ti chbatik ta vinajele xchiʼuk ti jkoltatik avi li ta slajebal kʼakʼale. Jaʼ yuʼun, li buchʼutik jech tspasik taje chichʼ albel skʼoplalik yuʼun Jesús ti xkoʼolajik ta «jun vinic ti tucʼ yoʼntone» (Mateo 10:40-42; 25:40, 46; 2 Timoteo 3:1-5).

10. Li yan chijetike, ¿kʼuxi xuʼ skoltaik li xchiʼiltak Cristoe?

¹⁰ Pe ¿kʼu yuʼun tskʼanik koltael li xchiʼiltak Cristoe? Jkʼeltikik. Kʼalal skʼan toʼox xalbe yajtsʼaklomtak li loʼil ta sventa chijetik xchiʼuk tentsunetike, li Jesuse jaʼ chalbe skʼoplal li kʼusitik chkʼot ta pasel ta «slajebal cʼacʼale» (Mateo 24:3). Laj yalanbe ti skʼan xichʼ cholbel skʼoplal Ajvalilal yuʼun Dios ta spʼejel Balumil li vaʼ kʼakʼale (Mateo 24:14). Laj xaʼox xchapbe xtok li sloʼilal talentoetike. Li ta loʼil taje laj yakʼbe xchan buchʼutik chbatik ta vinajel ti akʼo yakʼik tajek persa xcholel li mantale. Ta skoj ti jutuk xa liʼ oyik ta Balumil li buchʼutik chbatik ta vinajele, ¿kʼuxi van xuʼ xcholik mantal ta spʼejel Balumil kʼalal skʼan to xtal li slajebal kʼakʼale? Kʼalal la xchapbe skʼoplal li loʼil ta sventa chijetik xchiʼuk tentsunetike, li Jesuse laj yal ti yan chijetike tskoltaik li buchʼutik tʼujbil chbatik ta vinajele. ¿Kʼuxi chkoltavanik? Jun ti bu mas chkoltavanike jaʼ li ta cholmantale. Pe ¿mi jaʼ noʼox van bal ti tspatik oʼontonal xchiʼuk ti chakʼik matanal takʼin sventa li cholmantale?

11. ¿Kʼusi van xuʼ xlik jakʼbe jbatik?

¹¹ Li avie oy xa vaxakib miyon yajtsʼaklomtak Jesús. Jutuk mu skotolikuk taje muʼyuk tʼujbil chbatik ta vinajel. Li Jesuse maʼuk laj yakʼbe komel ta sba yan chijetik li talentoetike, jaʼ xkaltik li xcholel mantale. Yuʼun jaʼ noʼox laj yakʼbe komel li buchʼutik tʼujbil chbatik ta vinajele (Mateo 25:14-18). Jaʼ yuʼun, xuʼ van xi xlik jakʼbe jbatike: «Mi jaʼ laj yakʼbe komel talentoetik li buchʼutik tʼujbil chbatik ta vinajel li Jesuse, ¿mi skʼan van xcholik mantal li yan chijetike?». Skʼan. Jkʼeltik chanib srasonal ti kʼu yuʼun skʼan jech xichʼ pasele.

12. ¿Kʼusi chakʼ jchantik Jesús li kʼusi laj yal ta Mateo 28:19 xchiʼuk 20?

¹² Baʼyel, li Jesuse laj yalbe mantal ti akʼo xbat xcholik mantal skotol li yajtsʼaklomtake. Kʼalal chaʼkuxiem xaʼoxe, li Jesuse laj yalbe yajtsʼaklomtak ti akʼo xcholik mantale xchiʼuk ti xbat xchanubtasik yantik kʼuxi ‹lek ta chʼunel skotol li smantaltak akʼbatike›. Jaʼ yuʼun skʼan xcholik mantal ek li buchʼutik jaʼik xa yajtsʼaklomtak Cristoe (kʼelo Mateo 28:19, 20). ¿Kʼusi chakʼ jchantik taje? Jaʼ ti jkotoltik skʼan jcholtik mantale, akʼo mi tʼujbil chijbat ta vinajel o mi maʼuk (Hechos 10:42).

13. ¿Kʼusi chakʼ jchantik li slivroal Apocalipsise?

¹³ Xchibal, li slivroal Apocalipsise chal ti maʼuk noʼox chcholik mantal li buchʼutik tʼujbil chbatik ta vinajele. Li jtakbol Juane akʼbat yil yuʼun Dios ti «yajnil Chʼium Chije» tstakʼ ta ikʼel krixchanoetik sventa xuchʼik «li voʼ sventa cuxlejale». Li yajnil chʼiom chije jaʼ skʼoplal li 144 mil ti tʼujbilik sventa ch-ajvalilajik xchiʼuk Jesús ta vinajele (Apocalipsis 14:1, 3; 22:17). Li voʼe jaʼ skʼoplal li matanal laj yakʼ Jesuse, ti tspoj lokʼel ta mulil xchiʼuk ta lajelal li krixchanoetike (Mateo 20:28; Juan 3:16; 1 Juan 4:9, 10). Li buchʼutik tʼujbil chbatik ta vinajele ta xchanubtasik krixchanoetik kʼuxi xuʼ stabeik sbalil li pojelal taje (1 Corintios 1:23). Pe li kʼusi akʼbat yil yuʼun Dios li Juan xtoke oy yan jvokʼ krixchanoetik ti maʼuk li buchʼutik tʼujbil chbatik ta vinajele, ti smalaoj chkuxiik ta Balumile. Li jvokʼ krixchanoetik taje ch-albatik ek ti akʼo xalbeik yan krixchanoetik ti akʼo xtal xuchʼik «li voʼ sventa cuxlejale». ¿Kʼuxi tspasik taje? Jaʼo kʼalal ta xcholik mantale. Jech kʼuchaʼal chakʼ kiltik li kʼusi akʼbat yil yuʼun Dios li Juane jaʼ ti skotol li buchʼutik  ta xchʼamik li mantale, skʼan xcholik mantal.

14. ¿Kʼusi skʼan jpastik sventa jchʼunbetik «smantal li Cristoe»?

¹⁴ Yoxibal, skʼan xcholik mantal skotol li buchʼutik ta xchʼunbeik «smantal li Cristoe» (Gálatas 6:2). Li Jeovae oy ta yoʼonton ti skotoluk li buchʼutik chichʼik ta mukʼe skʼan xchʼunik li mantaletik taje. Li ta voʼnee, li Jeovae jech onoʼox oy ta yoʼonton ti akʼo xchʼunik li mantaletik yakʼojbe li j-israeletik xchiʼuk li jyanlumetik ti te nakalik eke (Éxodo 12:49; Levítico 24:22). Melel onoʼox ti muʼyuk xa ta jchʼuntik li mantaletik akʼbatik yuʼun Jeova li j-israeletike. Pe skʼan onoʼox jchʼunbetik «smantal li Cristoe», akʼo mi tʼujbil chijbat ta vinajel o mi maʼuk. Li mantal mas tsots skʼoplal la xchanubtasutik Jesuse jaʼ ta sventa li kʼanelale (Juan 13:35; Santiago 2:8). Skʼan jkʼantik li Jeovae, li Jesuse xchiʼuk li krixchanoetike. Jtos ti kʼu yelan xuʼ xkakʼtik ta ilele jaʼo kʼalal chkalbetik krixchanoetik ta sventa li Ajvalilal yuʼun Diose (Juan 15:10; Hechos 1:8).

15. ¿Kʼuxi jnaʼojtik ti tskʼan Jesús akʼo xcholik mantal skotol li yajtsʼaklomtake?

¹⁵ Xchanibal, junantik li kʼusitik laj yal li Jesuse juteb noʼox yajtsʼaklomtak jaʼo te oyik, pe tskʼan ti akʼo jech spasik li yantik eke. Jech kʼuchaʼal liʼe, li Jesuse la spas trato xchiʼuk buluchib yajtsʼaklomtak sventa koʼol x-ajvalilajik ta vinajel. Pe ta skotolal li buchʼutik koʼol ch-ajvalilaj xchiʼuke jaʼ 144 mil (Lucas 22:29, 30; Apocalipsis 5:10; 7:4-8). Kʼalal chaʼkuxiem xaʼoxe, li Jesuse juteb noʼox yajtsʼaklomtak ti laj yalbe ti akʼo xcholik mantale (Hechos 10:40-42; 1 Corintios 15:6). Pe laj onoʼox xcholik mantal skotol li yajtsʼaklomtak Cristo ta baʼyel sigloe (Hechos 8:4; 1 Pedro 1:8). Jaʼ yuʼun skʼan jcholtik mantal ek, akʼo mi chʼabal toʼox te oyutik kʼalal laj yal Jesús ti skʼan cholel mantale. Li avie oyutik vaxakib miyon stestigoutik Jeova ti ta jcholtik mantale, taje jaʼ jech chkakʼtik ta ilel ti oy xchʼunel koʼontontik ta stojolale (Santiago 2:18).

16-18. ¿Kʼuxitik xuʼ jkoltatik li buchʼutik tʼujbil chbatik ta vinajele, xchiʼuk kʼu yuʼun skʼan jkoltatik li avie?

¹⁶ Li Satanase mas xa chakʼ yip ta skontrainel li buchʼutik chbatik ta vinajel ti liʼ to oyik ta Balumile. Jech xtok, snaʼoj ti mu xa jaluk ch-abteje (Apocalipsis 12:9, 12, 17). Pe muʼyuk kʼusi xuʼ spas sventa spajtsan li buchʼutik tʼujbil chbatik ta vinajel ti jaʼ oy ta sbaik skʼelel li abtelal ta cholmantale. Yuʼun li avie muʼyuk jech ilbil-o li cholmantal chichʼ pasele. Lek xvinaj ti yakal chbeiltasatik xchiʼuk chkoltaatik yuʼun Jesús li buchʼutik tʼujbil chbatik ta vinajele (Mateo 28:20).

¹⁷ Jaʼ jun mukʼta ta matanal ti ta jkoltatik ta xcholel mantal li buchʼutik tʼujbil chbatik ta vinajele. Pe ¿kʼuxitik van yan xuʼ jkoltatik? Xuʼ jkoltatik kʼalal chkakʼtik li matanal takʼine xchiʼuk kʼalal chij-abtej ta smeltsanel Salonetik sventa Tsobobbail xchiʼuk Beteletike. Yan ti kʼu yelan xuʼ jkoltatik xtoke, jaʼo kʼalal ta jchʼunbetik smantal li moletike xchiʼuk li yan ermanoetik ti akʼbil yabtelik yuʼun li «jʼabtel ti jun [«tukʼ», TNM] yoʼnton [...], ti lec bije» (Mateo 24:45-47; Hebreos 13:17).

¹⁸ Jutuk xa tajek skʼan xichʼ seyoalik ti chakʼ ta naʼel ti ta melel chbatik ta vinajel li buchʼutik tʼujbilike. Mi laje ta xlik li mukʼta tsatsal vokolile (Apocalipsis 7:1-3). Kʼalal jutuk xaʼox tajek skʼan xlik li Armagedone, li Jesuse ta xikʼ batel ta vinajel li buchʼutik tʼujbilike (Mateo 13:41-43). Jaʼ yuʼun, mi ta jkʼan ti xilutik kʼuchaʼal chij li Jesuse, skʼan me jkoltatik avi li xchiʼiltake.