¡TOJ ep chakʼbutik muyubajel kʼalal ta jchantik ta stojolal Jeova li ta asambleaetike! Pe oy to kʼusi ti chakʼ muyubajel li ta j-asambleatike: jaʼ ti chvinaj kʼanelal ta stojolal kermanotaktik kʼalaluk koʼol ta xijveʼ xchiʼukike.

Li ta septiembre ta 1919, li Jchanolajeletik ta Vivliae la spasik jun asamblea ti jalik vaxakib kʼakʼal li ta Cedar Point (Estados Unidos). Laj yichʼ saʼel jayibuk oteletik sventa te xkom vayikuk xchiʼuk sventa te xveʼik li buchʼutik chkʼotik li ta asambleae. Pe ta skoj ti ep tajek kʼotike, jutuk mu skotoluk li meseroetike xiʼik batel ta skoj ti ch-epaj yabtelike, jaʼ yuʼun laj yalik ti muʼyuk xa ta x-abtejike. Jun li buchʼu sbainoj yakʼel veʼlile la sjakʼ mi oy kerem tsebetik ti xuʼ xkoltaate, ta skoj taje ep ermanoetik koltavanik, jun li buchʼu koltavane jaʼ li Sadie Green sbie. Ta mas jelavele xi laj yal li Sadie Greene: «Muʼyuk bu jech jpukoj-o veʼlil, pe toj echʼ noʼox la jkʼupin».

Li ta jabiletik echʼem tale, epal yajtsʼaklomtak Kristo ta sjunul yoʼonton koltavanemik ta spasel veʼlil ta sventa li buchʼutik chkʼotik li ta asambleae. Ta skotol li ermanoetik ti koltavanemike, ep tajek ti jaʼik kerem tsebetike. Ta skoj ti koʼol abtejik xchiʼuk yan ermanoetik li epal kerem tsebetike jaʼ koltaatik sventa snop kʼusi tskʼan tstaik li ta mantale. Taje jech kʼot ta stojolal li Gladys Bolton ti koltavan li ta asamblea ta 1937. Xi chvul ta sjole: «Laj kojtikinan ermanoetik ti likemik talel ta yan lumetike xchiʼuk oy kʼusitik la jchan ta sventa ti kʼu yelan tstsal li svokolike. Kʼalal jech laj kil taje la jnop chi-och ta prekursora».

Li ermana Beulah Covey xi laj yal ta stojolal li buchʼutik koltavanike: «Toj lek tajek tspas li yabtelike yuʼun xkoʼolajik jech kʼuchaʼal ch-abtej li jun reloje». Pe mu toj kʼunuk spasel xchiʼuk xlechanel li veʼlile. Jech kʼuchaʼal liʼe, kʼalal kʼot ta Estadio yuʼun Dodgers ta Los Ángeles (California) li Angelo Manerae jaʼ to te laj yaʼi ti laj yichʼ vaʼanel sventa jaʼ xbeiltasvan ta spasel xchiʼuk ta spukel li veʼlile. Xi chvul ta sjole: «Solel lixiʼ tajek». Li vaʼ asamblea ti echʼ ta 1969 laj yichʼ jokʼel chanib sien metro balumil sventa xichʼ mukel li stuvoaltak gas ti chtun ta kosinae.

Li ta asamblea ta 1982 ti echʼ ta Sierra Leonae laj yichʼ chʼubael osil kʼalal skʼan toʼox xichʼ akʼel li veʼebale, akʼo mi chʼabal mas yabtejebik sventa spasik taje. Li asamblea echʼ ta Frankfurt (Alemania) ta 1951 li ermanoetike  oy kʼusi toj labal sba la spasik: la slokʼik jun locomotora (sjol tren) sventa tstunesbeik xkʼixnal smotoral yoʼ staʼajesik veʼlil ta 40 pʼinetik. Koliyal taje laj yakʼik 30 mil veʼlil ta jun noʼox ora. Sventa xjutukaj yabtelik ta sukʼel platoetik li 576 ermanoetik ti koltavanike, li buchʼutik kʼotik ta asambleae laj yichʼ batel xkucharaik. Li ta Yangón (Myanmar) li jpasveʼliletike jutuk tajek laj yakʼbeik yichil li veʼlile, ta skoj li buchʼutik likemik talel ta yan lumetike.

Xi chvul ta sjol Annie Poggensee li kʼusi kʼot ta pasel ta 1950 ta jun asamblea ta Estados Unidos kʼalal jaʼo te stsʼikoj Kʼakʼal ti te xcholoj sba sventa sta li sveʼele: «Lek tajek la jtsʼetan jchikin kʼusi chal chaʼvoʼ ermanaetik ti likik talel ta Europa ti talik ta varkoe». Li ermanaetik taje jaʼ la yakal chalbeik skʼoplal ti kʼuxi koltaatik yuʼun Jeova sventa xvulik li ta asambleae. Xi to laj yal li Annie: «Muʼyuk chopol chaʼiik ti te xcholoj sbaik akʼo mi kʼux tajek Kʼakʼale. Solel xmuyubajik tajek».

¿Kʼusi la spasik li buchʼutik la sbainik spasel veʼlil sventa smakʼlinik epal krixchanoetik ti kʼotik ta asambleae? La xlichʼanik karpaetik xchiʼuk la xcholik toyol mexaetik sventa vaʼal xveʼik xchiʼuk ti xlokʼik noʼox batel ta anil mi laj yoʼontonike. Kʼalal jech tspasik taje jaʼ sventa xuʼ x-och veʼikuk li yantike. Xi labal sba laj yal jun krixchano ti maʼuk stestigo Jeovae: «¡Toj yan-o chkil li relijione! Yuʼun vaʼal chveʼik».

Li bankilal soltaroetik xchiʼuk li buchʼutik oy tsots yabtelike labal tajek laj yilik ti lek tajek chapalunkutike. Kʼalal tal skʼelik veʼebal li soltaroetik ta Estados Unidos ta jun asamblea ti echʼ ta Estadio yuʼun Yankees ta Nueva Yorke, laj yalbeik ti akʼo jech spas ta slumal li komandante yuʼun soltaroetik ti Faulkner sbi ti jaʼ oy ta sba li Departamento de Guerra ta Gran Bretañae. Li ta 1955, li komandante yuʼun soltaroetik xchiʼuk yajnile ayik ta Asamblea ti «Reino Triunfante» sbi ti te echʼ ta Twickenham (Inglaterra) xchiʼuk laj yal ti bu chichʼ pasel veʼlile lek xvinaj ti oy kʼanelale.

Oy xa ta sjayibaluk jabil, ti ta smilal xa noʼox ermanoetik xchapanojik xchiʼuk xlechanojik lekil veʼliletik, ti yalelik noʼox stojol sventa li buchʼutik chkʼotik ta asambleae. Pe li kʼusi mas toʼox vokole jaʼ ti ep tajek abtelal yichʼoje, ta skoj taje muʼyuk chaʼiik junantik mantaletik li buchʼutik tspasik veʼlile. Jaʼ yuʼun, li ta slajebaltik xa 1970 laj yichʼ jutukajesel li veʼlil chichʼ akʼel ta asambleaetike xchiʼuk li ta 1995 laj yichʼ alel ti akʼo xa xichʼ batel sveʼelik ta jujuntale. Ta skoj taje mas xa ep tstabeik sbalil li kʼusitik ch-echʼ ta asambleaetik li buchʼutik chkoltavanik toʼoxe xchiʼuk xuʼ xchiʼinik ta loʼil li ermanoetike. * (Kʼelo li tsʼib ta yok vune.)

Li Jeovae skʼanoj tajek li buchʼutik tsots abtejik sventa skolta li yermanotakike. Junantike solel tsnaʼik tajek li muyubajel la skʼupinik kʼalal laj toʼox spasik veʼlile. Pe oy kʼusi ti muʼyuk jelem-oe: jaʼ ti chvinaj-o kʼanelal li ta j-asambleatike (Juan 13:34, 35).