¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

Li yajtsʼaklomtak Kristoe, ¿mi jaʼ van skʼan skʼoponik ta orasion li Jesuse?

Maʼuk. Li Jesuse maʼuk noʼox laj yal ti skʼan jkʼopontik li Diose, yuʼun jech la spas li stuk eke (Mateo 6:6-9; Juan 11:41; 16:23). Li baʼyel yajchankʼoptake jaʼ la skʼoponik li Jeova eke, maʼuk li Jesuse (Echos 4:24, 30; Kolosenses 1:3) (1/1, paj. 14).

¿Kʼu yelan xuʼ jchapan jbatik sventa li Snaʼobil slajel Kristoe?

Jaʼ ti ta jkʼeltik kʼusi la spas Jesus kʼalal skʼan toʼox xchame, ti mas ta jcholtik mantale, ti jpastik orasione xchiʼuk ti jnopbetik lek skʼoplal ti bu tskʼan chijkuxiutik ta jelavel li Diose (15/1, paj. 14-16).

¿Kʼusi kʼot ta pasel ta stojolal chaʼvoʼ j-ejipto viniketik ti laj yalbe xvayichik li Josee?

Li bankilal j-akʼyaʼlel tsʼusube albat yuʼun Jose ti ch-akʼbat yan velta li yabtele, yan li bankilal jpaspane albat ti chichʼ milel yuʼun li faraone, vaʼun chichʼ jokʼanel ta teʼ. Ta melel kʼot ta pasel li kʼusi laj yal Josee (Génesis 40:1-22) (1/2, paj. 12-14).

¿Kʼusi matanal la staik ti muʼyuk toʼox smalaojik li ermanoetik ta Japone?

Jaʼ jlik vun ti yichʼoj li Evanjelio yuʼun Mateoe, te laj yichʼ lokʼesel ta Traducción del Nuevo Mundo. Li ermanoetike tstunesik ta cholmantal xchiʼuk ep buchʼutik ti mu snaʼik mas ta sventa Vivliae xchʼamojik li vun taje (15/2, paj. 3).

¿Kʼusi koltavan ta baʼyel siglo sventa mas xpuk batel ta yan krixchanoetik li skʼop Diose?

Jaʼ koliyal ti jaʼo oy jun oʼontonal li ta yosilal Romae. Oy xaʼox lek be laj yichʼ meltsanel ta tonetik ti jaʼ te chanavik-o li yajtsʼaklomtak Kristoe. Ta skoj ti ta epal lumetik snaʼ xkʼopojik ta griego xtoke buchʼuuk xa noʼox xuʼ xcholbeik mantal te, la xcholbeik li judaetik ti te nakalik eke. Jech xtok, li yajtsʼaklomtak Kristoe la stunesik li mantaletik oy toʼox ta Roma sventa tspak skʼoplalik yoʼ xcholik-o batel li mantale (15/2, paj. 20-23).

¿Kʼu yuʼun muʼyuk tspasik kʼin Koltael o Domingo sventa chaʼkuxesel li melel yajtsʼaklomtak Kristoe?

Yuʼun li Jesuse muʼyuk laj yalbe yajtsʼaklomtak ti akʼo svules ta sjolik li xchaʼkuxesele, moʼoj, jaʼ noʼox laj yalanbe ti jaʼ akʼo svules ta sjolik li slajele (Lukas 22:19, 20) (1/3, paj. 8).

Li ta jvuntike ep toʼox velta chalbe skʼoplal kʼusitik xchiʼuk krixchanoetik ti jaʼ la skʼoplal junuk krixchanoe o ti oy la kʼusi skʼan xal ta mas jelavele. Pe ¿kʼu yuʼun jutuk xa chalbe skʼoplal avie?

Li ta Vivliae chal onoʼox ti junantik krixchanoetik ti chalbe skʼoplal li ta loʼiletike oy kʼusi skʼan xal ta mas jelavel. Jun skʼelobile jaʼ li Galatas 4:21 kʼalal ta 31. Pe mi muʼyuk chal Vivlia ti oy kʼusi skʼan xale, chʼabal srasonal kuʼuntik ti jech chkaltik eke. Li kʼusi mas lek stakʼ jpastik li ta jujun loʼil ti chal ta Vivliae, jaʼ ti jsaʼtik kʼusitik xuʼ jchantik sventa xkakʼ ta jkuxlejaltike (Romanos 15:4) (15/3, paj. 17, 18).

¿Kʼu yuʼun toj ep tajek sbalil li xtuchʼulil papiro ti laj yichʼ tael ta chʼayob kʼaʼep ta Ejiptoe?

Li ta 1920 laj yichʼ tael jtuchʼ papiro ti te tsʼibabil li kʼusi chal ta Evanjelio yuʼun Juane. Laj yichʼ tsʼibael ta sjaylajunebaluk noʼox jabil ta tsʼakal kʼalal la stsʼiba S-evanjelio li Juane. Li kʼusi chale chakʼ ta ilel ti lek tukʼ jelubtasbil li Vivliae xchiʼuk ti xuʼ jpat koʼontontik ta stojolale (1/4, paj. 10, 11).

¿Kʼu yuʼun jaʼ yakʼobil ta ilel kʼanelal kʼalal chichʼ lokʼesel ta tsobobbail li jpasmulil mi muʼyuk la sutes yoʼontone?

Li Vivliae chchanubtasvan ti chichʼ tabel sbalil mi chichʼ lokʼesel ta tsobobbail li jpasmulil mi muʼyuk la sutes yoʼontone (1 Korintios 5:11-13). Jaʼ sventa lekuk skʼoplal li Jeovae, ti lekuk sak li tsobobbaile xchiʼuk jaʼ sventa xuʼ xikta-o spasel kʼusi chopol li jpasmulile (15/4, paj. 29, 30).