LI Bezaleel xchiʼuk Aholiabe snaʼik toʼox spasel xchiʼuk svaʼanel kʼusitik. Xuʼ van ep xa noʼox tajek xamit la spasik kʼalal jaʼo ochemik ta mosoil li ta Ejiptoe. Pe avie maʼuk xa mosoiletik. Laj yichʼik albel ti jaʼ tspasik li chʼulna pasbil ta nukule xchiʼuk chkʼotik ta j-abteletik ti lek tajek tspasik ti muʼyuk yan buchʼu jech tspase (Éxodo 31:1-11). Pe li kʼusie, jaʼ ti muʼyuk buchʼu chil li abtelal la spasike. ¿Mi chopol van laj yaʼi sbaik ta skoj ti muʼyuk chichʼ ilel li yabtelike? ¿Mi tsots van skʼoplal ti xilik yan krixchanoetik li yabtel tspasike? ¿Mi tsots skʼoplal chavaʼi ti xilik yantik li avabtele?

Junantik li kʼusitik oy ta chʼulna pasbil ta nukule lekik tajek meltsanbil, jech kʼuchaʼal li keruvinetik ti pasbil ta oro ti smakoj ta xikʼik li xkaxail smantal Diose. Li jtakbol Pabloe laj yal ti «jun yutsilik» li keruvinetike (Evreos 9:5). ¡Mu xnop kuʼuntik kʼu to yutsilik li kʼusitik pasbilik taje! (Éxodo 37:7-9.)

Ti oyuk buchʼu staoj ta jokʼel li kʼusitik la smeltsanik li Bezaleel xchiʼuk Aholiabe, ta van xichʼ akʼel ta junuk museo ti lek ojtikinbil ta spʼejel Balumile xchiʼuk ta smiyonal noʼox krixchanoetik tslabanbeik yutsil ti jechuke. Kʼalal tsuts xaʼox spasel li keruvinetike, ¿jayvoʼ krixchanoetik laj yilik ti toj alakʼik sba yichʼoj pasele? Ta melel muʼyuk buchʼu mas laj yil, yuʼun li keruvinetike te oy li ta yut Batsʼi Lekil Chʼul Kuartoe. Jaʼ noʼox li mero bankilal pale xuʼ x-och li ta chʼul kuarto taje xchiʼuk jkoj noʼox ta jabil xuʼ x-och xtok: jaʼ noʼox li ta Skʼakʼalil Chʼayob mulile (Evreos 9:6, 7).

Ti voʼotukot li Bezaleel xchiʼuk Aholiabe xchiʼuk ti voʼotukot la apas li labal sba abtelal taje, ¿kʼu van yelan la avaʼi aba jechuk ti mu epuk buchʼu laj yil li kʼusitik la apas akʼo mi ep tajek la avakʼ avipale? Li krixchanoetik avie, tskʼanik ti lekuk xichʼik ojtikinel ta stojolal yan krixchanoetik sventa xakʼik venta ti oy kʼusi lek la spasike xchiʼuk ti oy sbalil li kʼusi laj yakʼ yipalik spasele. Pe li yajtunelutik Jeovae mu jechuk ta jkʼantik. Li kʼusi noʼox ta jkʼantike jaʼ ti lekuk xilutik li Jeovae, jech kʼuchaʼal la spasik li Bezaleel xchiʼuk Aholiabe.

Li jfariseoetik ta skʼakʼalil Jesuse, tspasik orasion ta kayeetik sventa labal x-ilatik yuʼun li krixchanoetike.  Pe li Jesuse laj yal ti mu jechuk jpastik orasion sventa labal xa xilutik li yantike, yuʼun li kʼusi ta jkʼantike jaʼ ti xaʼibutik li Diose. Xi laj yal li Jesuse: «Vaʼun jaʼ tstojbot li Atot ti yiloj skotole» (Mateo 6:5, 6). Kʼuchaʼal chkiltike, li kʼusi mas tsots skʼoplale maʼuk ti kʼu yelan chil j-orasiontik li yantike, moʼoj, yuʼun jaʼ tsots skʼoplal ti kʼu yelan chil li Jeovae. Jaʼ jech ta sventa li kʼusitik ta jpastik ta yabtel Jeovae, li kʼusi mas leke maʼuk li kʼusi tsnop krixchanoetike, jaʼ li kʼusi tsnop Jeovae yuʼun yiloj onoʼox li kʼusitik ta jpastike.

Kʼalal tsuts smeltsanel «li chʼulna pasbil ta nucule ital pixatuc ta toc, jech inoj ta xojobal Mucʼul Dios li yut chʼulnae» (Éxodo 40:34). Taje jaʼ svinajeb ti lek laj yil Dios li kʼusi la spasike. ¿Kʼu van yelan laj yaʼi sbaik xanaʼ li Bezaleel xchiʼuk Aholiab kʼalal laj yilik jech kʼot ta pasel taje? Akʼo mi muʼyuk te tsakal sbiik li ta kʼusitik la spasike, xuʼ van jun tajek yoʼonton laj yaʼi sbaik kʼalal laj yakʼik venta ti lek laj yil li Jeovae (Proverbios 10:22). Xuʼ van mas muyubajik kʼalal laj yilik ti ep jabiletik laj yichʼ tunesel sventa yichʼobil ta mukʼ Dios li kʼusitik la spasike. ¿Mi xnop avuʼun kʼu to yepal chmuyubajik mi chaʼkuxiik kʼalal chaʼiik ti voʼob sien jabil laj yichʼ tunesel sventa xichʼ ichʼel ta mukʼ Jeova li ta chʼulna pasbil ta nukule?

Li ta jkʼakʼaliltike, li ta s-organisasion Diose oy jpas karikaturaetik, jbonlokʼoletik, jtijsonetik, jlokʼtavanejetik, jtsʼibajometik xchiʼuk jelubtasej kʼopetik. Chkaltike muʼyuk buchʼu xil li kʼusitik tspasike, yuʼun mu stakʼ naʼel buchʼutik tspasik li kʼusitik taje. Jaʼ jech xuʼ xkaltik ek ta sventa li jutuk mu skotoluk abtelaletik chichʼ pasel li ta mas ta 110 mil tsobobbailetik ti oy ta spʼejel Balumile. Jech kʼuchaʼal liʼe, ¿buchʼu xil skotol li kʼusitik tstsak ta vunetik li buchʼu sbainoj skʼelel li takʼin ta tsobobbail kʼalal tstsuts jujun ue? ¿Buchʼu chil li sekretario ta tsobobbail kʼalal chchap jayib ora la xchol mantal li tsobobbaile? ¿Buchʼu chil kʼalal oy junuk ermano o ermana ti oy kʼusi chbat smeltsan li ta Salon sventa Tsobobbaile?

Li Bezaleel xchiʼuk Aholiabe muʼyuk xichʼ smedayaik o strofeoik ta skoj ti lek tajek la spas li yabtelike. Oy kʼusi mas lek la staik: jaʼ ti lek ilatik yuʼun li Jeovae. Li Jeovae laj yil ti laj yakʼ tsots yipalik ta spasel li yabtelike. Jechuk bikʼit xkakʼ jbatik ek xchiʼuk lekuk jpas li kabteltik jech kʼuchaʼal la spasik li Bezaleel xchiʼuk Aholiabe.