LI BUCHʼUTIK chtunik ta Jtsop Jbeiltasvaneje chʼakalik ta vakib komiteetik. * Li ta 1992 lik stʼujik moletik ti lek yijik ta mantal sventa xuʼ xkoltavanik ta spasel li abtelaletik ta jujun komitee. Skotol li buchʼutik te chkoltavanik avi li ta jujun komite taje, muʼyuk chbatik ta vinajel, yuʼun jaʼik ‹yan chijetik› (Juan 10:16). Kʼalal tstsob sba jujun xemana li komite bu chtunike, chalbeik skʼoplal li kʼusitik chtun yuʼun li Jtsop Jbeiltasvaneje xchiʼuk chalik kʼusitik stakʼ pasel. Vaʼun li buchʼutik chtunik ta Jtsop Jbeiltasvaneje jaʼ xa chalik mi chichʼ pasel o mi moʼoj; li yajkoltavanejik une jaʼ xa tskʼelik ti akʼo xichʼ pasel ti kʼuchaʼal laj yichʼ alele. Li jkoltavanejetike ta sjunul yoʼonton tspasik skotol li kʼusitik abtelal ch-akʼbatike. Jech xtok, kʼalal chbat ta junuk asamblea internasional jun li buchʼu chtun ta Jtsop Jbeiltasvaneje o ta junuk asamblea ti tsots skʼoplale te chbat li jkoltavanej eke. Bakʼintik xtoke, jaʼ chichʼik takel batel sventa svulaʼanik li Beteletike, chkʼotik kʼuchaʼal yajkʼopojel li smeʼ nail abtelale.

Jun ermano ti lik tunuk talel ta jkoltavanej ta 1992 chal ti kʼalal lek tspas li yabtele, xuʼ jaʼ mas xakʼ ta yoʼontonik spasel ek li yabtel akʼbilik yuʼun Dios li Jtsop Jbeiltasvaneje. Yan ermano ti jtob xa jabil chkoltavane, chal ti muʼyuk bu la snop ti jech tsta li mukʼta matanal taje.

Li vaʼ ermanoetik ti tukʼ yakʼoj sbaike, ep tajek kʼusitik akʼbil sbainik yuʼun li Jtsop Jbeiltasvaneje xchiʼuk ep tajek sbalil ta x-ilbat li yabtelike. Ta melel, jkotoltik skʼan ‹jechuk-o me jkʼuxubintik li viniketik taje› (Filipenses 2:29).