¿Bakʼin ta xtal li Ajvalilal yuʼun Diose?

«CAJVAL, ¿mi ista xa yora noxtoc ti liʼ xa noʼox chlocʼ preserente [o ajvalil] ta jlumaltique? ¿Mi voʼot xa chaʼoch?» (Hechos 1:6, SCʼop Riox, ta skʼop Zinacantán.) Kʼalal jech la sjakʼik li jtakboletike chakʼik ta ilel ti tskʼan xaʼox tsnaʼik bakʼin chlik spas mantal kʼuchaʼal Ajvalil li Jesuse. Tana un, ti jelav xa chaʼmil jabile, ep krixchanoetik solel tsjakʼilanbe sbaik: «¿Bakʼin ta xtal li Ajvalil yuʼun Diose?».

Ta skoj ti jaʼ la xcholbe skʼoplal Ajvalilal yuʼun Dios li Jesuse, xuʼ jchʼuntik ti tstakʼ li sjakʼobil taje. Jech ta melel, yuʼun ep jamal laj yalbe skʼoplal jvokʼ kʼakʼaletik ti la sbiiltas kʼuchaʼal li yorail kʼalal «liʼ xaʼox oy li xNichʼon krixchanoe» (Mateo 24:37, NM). Ti kʼalal liʼ xaʼox oye snitojbe sba skʼoplal xchiʼuk kʼalal lik ta abtel ta Ajvalilal yuʼun Mesiase. Jech oxal chaʼa, ¿kʼusi jaʼ ti liʼ xaʼox oy li Cristoe? Jkʼeltik chantos smelolal ta Vivlia ti chalbe skʼoplal kʼalal liʼ xaʼox oy li Cristoe.

1. Ti kʼalal jaʼ yorail ti liʼ xaʼox oy li Cristoe jaʼo ta xlik kʼalal jal xaʼox yorail slajele. Ta jun lokʼolkʼop, li Jesuse la skoʼoltas sba ta jun vinik ti «ibat ta nom ta yan banamil, yuʼun bat yichʼ tal yabtel, yuʼun ta xʼoch ta ajvalilal» (Lucas 19:12). ¿Kʼuxi ikʼot ta pasel li lokʼolkʼop ti jaʼ albil kʼop xtoke? Yuʼun kʼalal icham li Jesuse xchiʼuk ichaʼkuxesate, ibat ta «yan banamil», ti jaʼ skʼoplal li vinajele. Jech kʼuchaʼal laj yal ta yan lokʼolkʼop ti koʼoltik sba xtoke, «cʼalal ep xaʼox cʼacʼal sbatel[e]» ta sut talel jech xa kʼuchaʼal ajvalil (Mateo 25:19).

Kʼalal oy xaʼox jayibuk jabil ibat ta vinajel li Jesuse, li jtakbol Pabloe xi la stsʼibae: «[Li Jesuse] jun noʼox velta laj yacʼbe milbil matanal sventa sbatel osil li Diose; jaʼ sventa la xchʼaybutic o jmultic. Tsʼacal bat chotluc ta sbatsʼicʼob Dios. Te tsmala cʼalal to tsta yorail ch-acʼbat stecʼubin scotol li yajcontrae» (Hebreos 10:12, 13). Jech oxal kʼalal te xaʼox oy ta vinajel li Jesuse, jal to la smala. Li Jesuse tsuts smalael yuʼun kʼalal la xchotan xNichʼon ta Ajvalilal yuʼun Mesías li Jeova Diose, ti voʼne xa onoʼox  albil skʼoplale. Taje jaʼo te lik talel yorail ti liʼ xaʼox oy kʼuchaʼal Ajvalil li Cristoe. Pe li krixchanoetike, ¿mi chil van ta satik ta melel li kʼusi tsots skʼoplal chkʼot ta pasel taje?

2. Mu xvinaj ta satilal kʼalal liʼ xaʼox oy li Cristoe. Vuleso ta ajol ti Jesuse laj yalbe skʼoplal ti oy senyailtak ti kʼalal liʼ xaʼox oye (Mateo 24:3, NM). Nopo avaʼi: ti xvinajuk ta satilale, ¿mi mu jechuk ti mu persauk senyailtake? Kalbetik junuk skʼelobil. Nopo avaʼi ti cha bat ta paxyal sventa chavojtikin nabe. Yikʼaluk van ta bebetike cha ta senyailtak sventa be, pe kʼalal mi la kʼot xaʼox ta stiʼtiʼtake xchiʼuk te akʼeloj ta asat epal voʼ ti mu noʼox xpaj yileluke, ¿mi amalaoj cha ta jun svunal o senyail ti cha yalbot: «Liʼe jaʼ me li nabe», ti xie? ¡Moʼoj kʼuxi un! ¿Mi persa van chichʼ akʼbel senyail li kʼusi xuʼ xil jsatike?

Li Jesuse, ti laj yakʼbe senyailtak ti liʼ xaʼox oye, jaʼ skʼan xal ti mu xvinaj ta kʼelel ta satile. Ta melel, li senyaile jaʼ tskoltautik sventa jnaʼtik kʼusi chkʼot ta pasel ta vinajel. Jech oxal xi laj yale: «Cʼalal ta xvul ta loqʼuel ti ventainel yuʼun ti Diose, mu xvinaj ta qʼuelel», xi (Lucas 17:20). Jech un chaʼa, li senyailtake, ¿kʼuxi chakʼ ta ilel ti lik xa yorail ti liʼ xaʼox oy li Cristoe?

3. Kʼalal jaʼo yorail liʼ xaʼox oy li Jesuse naka chopol kʼusitik chkʼot ta pasel li ta Balumile. Li Jesuse laj yal ti kʼalal te xaʼox oy kʼuchaʼal Ajvalil ta vinajele, li ta Balumile puro pas kʼopetik oy, viʼnal, nikeletik, chameletik xchiʼuk jtoybaetik (Mateo 24:7-12; Lucas 21:10, 11). ¿Kʼu yuʼun jech li vokoliletik taje? Li Vivliae chal ti Satanase, «li banquilal jpasmantal liʼ ta banamile», xtiʼet tajek yoʼonton, yuʼun snaʼoj ti mu xa jaluk xuʼ ta x-abtej tana ti likem xa talel yorail ti liʼ xa oy kʼuchaʼal Ajvalil li Cristoe (Juan 12:31; Apocalipsis 12:9, 12). Jech ta melel, li ta jkʼakʼaliltike oy ep sprevailtak ti lek xvinaj li skʼakʼal yoʼonton Satanase xchiʼuk ti liʼ xa oy li Cristoe. Li sprevailtake vinajem ta spʼejel Balumil xchiʼuk ti muʼyuk-o bu jech vinajem talel leʼ ta 1914, jun jabil ti, ilbil yuʼun li j-al-loʼiletike, te ijel talel li balumile.

Xuʼ van cha nop ti chakʼ xiʼel skotol taje, pe maʼuk jech. Ta melel, skotol li kʼusitik yakal chkʼotan ta pasele chakʼ ta ilel ti yakal xa ta abtel ta vinajel li Ajvalilal yuʼun Mesiase. Mu xa jaluk skʼan ti chlik spas mantal ta sjunlejal li Balumile. Pe, li krixchanoetike, ¿kʼuxi xuʼ snaʼik ti melel oy li Ajvalilal taje xchiʼuk ti kʼusi skʼan spasik sventa xuʼ xventainatike?

4. Kʼalal liʼ xaʼox oy li Jesuse ta xichʼ cholel mantal ta spʼejel Balumil. Li Jesuse laj yal ti kʼalal liʼ xaʼox oye xkoʼolaj jech chkʼot ta pasel kʼuchaʼal kʼalal «yorail cuxul to ox ti Noee» (Mateo 24:37-39, Ch). * Li Noee maʼuk noʼox la spas li arkae, «laj yalbe scʼoplal [xtok] ti lequil tuqʼuil xcuxlejale» (2 Pedro 2:5, Ch). Kak laj yalbe  krixchanoetik ti poʼot xa chichʼ tal stojobil mulil li Diose. Jech ek, li Jesuse laj yal ti jech tspasik li yajchankʼoptak kʼalal liʼ xaʼox oye. Xi laj yal: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale» (Mateo 24:14, Ch).

Jech kʼuchaʼal laj kiltik li ta mantal naka to echʼe, li Ajvalilal yuʼun Diose ta xakʼbe slajeb skotol li ajvaliletik ta balumile. Li ta chol mantal ta sventa Ajvalilal yuʼun Diose li krixchanoetike chichʼik albel ti Ajvalilal taje, ti te oy ta vinajele, poʼot xa ta spas mantal ta sjunlejal li Balumile. Jech taje, li krixchanoetike xuʼ sta skolelik sventa mu xlajik xchiʼuk sventa xventainatik yuʼun li Ajvalilal yuʼun Diose. Tana un li sjakʼobile jaʼ: ¿kʼusi van cha pas li voʼote?

¿Mi ta van xa tabe sbalil li kʼusitik tspas li Ajvalilal yuʼun Diose?

Li aʼyej la xchol Jesuse laj yakʼ spatobil oʼontonal ti mu kʼusi xkoʼolaj-o jeche. Oy xa ta smilal jabile, kʼalal lik li toybail ta Edene, li Jeova Diose laj yal ti tsvaʼan jun ajvalilal ti jaʼ tspas li kʼusi onoʼox snopoj Dios ta slikebale. ¿Kʼusi ti yaloj tspas Diose? Jaʼ ti akʼo xnakiik ta jun paraiso ta Balumil li tukʼil krixchanoetike. ¿Mi mu xa muyubajuk yaʼel ti cha naʼ ti yakal xa tspas mantal ta vinajel li ajvalil taje, ti voʼne xa onoʼox albil skʼoplale? Jech ta melel, li Ajvalilal yuʼun Diose maʼuk jun kʼusi ti mu jtabetik ta aʼibel skʼoplale xchiʼuk ti nom to oye, moʼoj, jaʼ jun melel Ajvalilal.

Li Ajvalil ti stʼujoj Diose yakal xa ta spasel mantal ta stojolal li yajkontratake (Salmo 110:2). Manchuk mi jech, li Mesiase yakal ta spas li kʼusi oy ta yoʼonton sTote, jaʼ li saʼel skotol li buchʼutik tskʼan chojtikinik kʼuyelan ta melel li Diose xchiʼuk sventa «ta espiritu xchiʼuk ta melel» xlik yichʼik ta mukʼ (Juan 4:24, NM). Krixchanoetik ti buyuk lumal likemike, kʼusuk sjabilalik xchiʼuk mi jkʼulej o mi maʼuk, yakal chichʼik albel ti xuʼ xkuxiik sbatel osil kʼuchaʼal yajtunel li Ajvalilal yuʼun Diose (Hechos 10:34, 35). Cha kalbotkutik ti mu xa jalij xchʼamel li kʼusi labal sba liʼe. Jech, akʼbo yipal xchanel mas ta sventa li Ajvalilal yuʼun Diose, yuʼun jech taje xuʼ cha kuxi sbatel osil li ta tukʼil ventainel chichʼ talele (1 Juan 2:17).

[Tsʼibetik ta yok vun]

[Lokʼol ta pajina 8]

Li chopol aʼyejetik chkaʼitik jujun kʼakʼal avie jaʼ svinajeb ti poʼot xa xlekub li kuxlejale

[Lokʼol ta pajina 8]

Kanyon sventa syalesel avion: U.S. Army photo