¿Kʼusi jaʼ li Ajvalilal yuʼun Diose?

¿KʼUSI loʼilal ti mas laj yalbe skʼoplal li Jesuse? Laj yal stuk ti jaʼ laj yakʼ ta chanel li Ventainel o Ajvalilal yuʼun Diose (Lucas 4:43). Li buchʼu laj yaʼibeike, laj onoʼox van xchikintaik ti ep ta velta laj yalbe skʼoplal li Ajvalilal taje. ¿Mi mu van laj yaʼibeik lek smelolal o xchibet to yoʼonton ikomik? ¿Mi la sjakʼbeik kʼusi jaʼ li Ajvalilal taje? Muʼyuk. Li ta Evanjelioetike muʼyuk junuk sjakʼobil jech ta xvinaj. Jech oxal un chaʼa, li krixchanoetik taje, ¿mi snaʼik kʼusi jaʼ li Ajvalilal yuʼun Diose?

Li kʼusi melele, li voʼneal Tsʼibetik, ti stsakojik ta mukʼ kʼuchaʼal chʼul tsʼibetik li judioetike te xa onoʼox chalbe skʼoplal li Ajvalilal taje. Lek xa onoʼox jamal chalbe skʼoplal kʼusi jaʼ xchiʼuk li kʼusi tspase. Li avi eke mas to xuʼ jnaʼtik ta sventa li Ajvalilal yuʼun Diose, jech skʼan jpastik kʼuchaʼal la spasik ta voʼnee: skʼan jsaʼtik ta Vivlia. Jkʼeltik vuktos kʼusitik chal Vivlia ta sventa li Ajvalilal yuʼun Diose. Li baʼyel oxibe mu nakʼbiluk oy ta stojolal li judioetik ta skʼakʼalil Jesuse, mi jaʼuk li ta mas voʼnee. Li yan oxibe jaʼ laj yakʼik ta ojtikinel Cristo o yajchankʼoptak li ta baʼyel sigloe. Li svukubal o slajebale vinajem li ta jkʼakʼaliltike.

1. Li Ajvalilal yuʼun Diose jaʼ jun melel ajvalil ti te oy-o sbatel osile. Li baʼyel albil kʼop ta Vivliae chal ti Diose oy la buchʼu tstak talel sventa tspoj li tukʼil krixchanoetike. Li jpojvanej taje «snitilul» ants xi albat skʼoplal, xchiʼuk laj yichʼ alel ti ta stupʼ ta sbatel osil li kʼusitik chopol kʼot ta pasel ta skoj li stoyobbail Satanase xchiʼuk li stoyobbail Adán xchiʼuk Evae (Génesis 3:15, Ch). Ta mas to tsʼakale, li tukʼil ajvalil Davide oy kʼusi labal sba laj yichʼ albel ta sventa li nitilulal, o Mesías taje: ta la spas mantal ta jun Ajvalilal, ta jun ajvalilal ti mu xkoʼolaj li ta yantike, yuʼun muʼyuk la ta xlaj skʼoplal (2 Samuel 7:12-14, Ch).

2. Li Ajvalilal yuʼun Diose ta xakʼbe slajeb skotol li ajvaliletik ta balumile. Li j-alkʼop Daniele akʼbat yil ta xchʼulel jayibuk mukʼta tsatsal lumetik ti jech ta xjelolanik batel ti voʼne xa lik talel skʼoplale xchiʼuk ti vulem kʼalal to ta jkʼakʼaliltike. Kʼelo avil kʼuyelan ta stsuts li kʼusi akʼbat yil ta xchʼulele: «Cʼalal jaʼo ochemic ta ajvalilal li [slajeb] ajvaliletic [ta balumil] leʼe, li Dios te oy ta vinajele ta sliques jun ajvalil; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil». Jaʼ jech li ajvaliletik ta balumile —xchiʼuk li pas kʼop yuʼunike, li sokemal sjolike xchiʼuk ti  muʼyuk stukʼilike—, chichʼik lajesbel skʼoplal ta sbatel osil. Jech kʼuchaʼal chal li albil kʼop yuʼun Daniele, li Ajvalilal yuʼun Diose poʼot xa chlik ajvalilajuk ta spʼejel Balumil (Daniel 2:44, 45). Pe maʼuk noʼox jaʼ jun melel ajvalil, yuʼun jaʼ noʼox stuk ta spas mantal ta spʼejel Balumil xtok. *

3. Li Ajvalilal yuʼun Diose ta xakʼbe slajeb li pas kʼopetike, li chameletike, li viʼnale xchiʼuk li lajelal xtoke. Li Vivliae yichʼoj talel albil kʼopetik ti chkʼot ta oʼontonal ti chakʼ ta ilel kʼusi tspas ta Balumil li Ajvalilal yuʼun Diose. Li ajvalilal taje jaʼ tspas yuʼun li kʼusi mi junuk organisasion ta balumil pasem yuʼune xchiʼuk ti muʼyuk-o bu tspas yuʼunike. Nopo noʼox avaʼi: ¡skotol li kʼusi chtun sventa milbaile ta xichʼ lajesel sbatel osil! Li Vivliae xi chale: «[Li Diose] jaʼ tspajes scotol li pleito cʼalal to ta jujujot stiʼ banamile» (Salmo 46:9). Mu xa bu chtun jpoxtavanejetik mi jaʼuk ospitaletik, yuʼun muʼyuk xa jtosuk chamel. «Mu jbejuc ta na jech chal: “Toj ipun”.» (Isaías 33:24.) Muʼyuk buchʼu ta xcham ta viʼnal, yuʼun chakʼ «acʼo oyuc ep trigo [o veʼlil] liʼ ta banamil[e]» (Salmo 72:16). Muʼyuk xa li smukel animaetike, li bu chokʼitaik animae, li mukinaletike, ti bu tskʼejik animaetike xchiʼuk mi jaʼuk xa buchʼu lilijem chkom yoʼontonik ta skoj jun anima. Li lajelale, li jmukʼta kontratike, jaʼ to te chlaj-o skʼoplal. Li Jpasvaneje «jʼechʼel ta slajesbe o scʼoplal li lajele; ta scusbe loqʼuel yaʼlel sat scotolic» (Isaías 25:8).

4. Li Ajvalil ta Ajvalilal yuʼun Diose jaʼ stʼujoj stuk li Diose. Li Mesiase mu jaʼuk la stʼuj sba stuk, mi jaʼuk laj yichʼ tʼujel yuʼun jmulavil krixchanoetik ta balumil. Moʼoj, jaʼ la stʼuj stuk li Jeova Diose. Jaʼ jech chakʼ ta aʼiel li biil Mesías xchiʼuk Cristoe, ti jaʼ skʼan xal «Tʼujbil». Jech oxal un chaʼa jaʼ Jeova ti buchʼu stʼujoj, o svaʼanoj, sventa tsta jun yabtel ti tsots skʼoplal li Jesuse. Xi chal stuk li Diose: «Qʼuelavilic li cajtunele, vuʼun oy ta jcʼob, vuʼun la jtʼuj; toj xcuxet coʼnton yuʼun, laj xa cacʼbe li espíritu cuʼune. Jaʼ chtal xchapan li jujun lume», xi (Isaías 42:1; Mateo 12:17, 18). ¿Buchʼu xa noʼox yan xuʼ snaʼ kʼusi jtosukal ajvalilal chtun kuʼuntik mi maʼuk li Diose?

5. Li Ajvalil ta Ajvalilal yuʼun Diose yakʼoj xa ta ilel ta stojolal skotol krixchanoetik ti jaʼ staʼo li abtelal taje. Li Jesús ta Nazarete ta melel jaʼ li Mesías albil xa onoʼox skʼoplale. Lik talel li ta snitilulal ti yaloj onoʼox Diose (Génesis 22:17, 18, Ch; 1 Crónicas 17:11; Mateo 1:1). Kʼalal liʼ toʼox oy ta Balumile, ep albil kʼopetik ikʼot ta pasel ta stojolal ti oy xaʼox ta sienaltak jabil laj yichʼ tsʼibaele. Jech noxtok, ta vinajel xa onoʼox laj yichʼ ojtikinel kʼuchaʼal Mesías. ¿Kʼuxi? Yuʼun jaʼ stuk Dios ikʼopoj ta vinajel xchiʼuk laj yal stuk ti jaʼ xnichʼone, xchiʼuk xtok li anjeletike laj yalik ti jaʼ li tʼujbil Mesiase. Ta yan xtoke, li Jesuse la spas skʼelobiltak juʼelal ti jaʼ slekil kʼelobil sjuʼel li Diose, xchiʼuk ti laj yakʼilan ta ilel ta yepal mil krixchanoetike. * Li Jesucristoe laj yakʼilan ta ilel kʼuyelan stalelal kʼalal mi kʼot yorail ta spas mantale. Maʼuk noʼox oy sjuʼel sventa tskolta li krixchanoetike, moʼoj, yuʼun oy ta yoʼonton jech spasel xtok (Mateo 8:1-3). Lek yoʼonton, oy xkʼuxul yoʼonton, tsots yoʼonton xchiʼuk bikʼit laj yakʼ sba. Li sloʼil xkuxlejal ta Balumile jkotoltik xuʼ xkojtikintik, te oy li ta Vivliae.

6. Li ta Ajvalilal yuʼun Diose, oy 144,000 buchʼutik tʼujbilik sventa ch-ajvalilajik xchiʼuk li Cristoe. Li Jesuse laj yal ti oy yan krixchanoetike, jech kʼuchaʼal yajtakboltak ti koʼol ta x-ajvalilajik te ta vinajele. Xi laj yalbe skʼoplale: «Uni juteboxuc cuni chijtac», xi (Lucas 12:32, Ch). Ta mas tsʼakale li jtakbol Juane albat ti juteb uni chijetike jaʼ 144,000 yajtuneltak Dios. Li alakʼ sba yabtelike jaʼ ti koʼol tspasik mantal xchiʼuk Cristo kʼuchaʼal ajvaliletik xchiʼuk chtunik kʼuchaʼal paleetik (Apocalipsis 5:9, 10; 14:1, 3).

7. Li Ajvalilal yuʼun Diose yakal xa tspas mantal ta vinajel, chapal xa sventa tspas mantal ta spʼejel Balumil. Li slajebal kʼusi laj  kaltik liʼe jaʼ li mas chkʼot ta oʼontonale. Li ta Vivliae ep srasonal chakʼ ta ilel ti akʼbat xa yabtel kʼuchaʼal jpas mantal Ajvalil ta vinajel li Jesuse. Te xa ch-ajvalilaj li avie, xchiʼuk mu xa jaluk skʼan sventa spas ta mantal skotol li balumile xchiʼuk chakʼ kʼotuk ta pasel li labalik sba albil kʼopetik ti laj xa kalbetik skʼoplale. Pe, ¿kʼuxi xuʼ jnaʼtik lek ti yakal xa tspas mantal li Ajvalilal yuʼun Diose? Xchiʼuk, ¿bakʼin ta xlik spas ta mantal li Balumile?

[Tsʼibetik ta yok vun]