Sventa li buchʼu tskʼele

XI MUYUBAJ cha kalbotkutik li ta revistaetik liʼe chlik avil ti oy xa kʼusitik jelemik chichʼ tale. Baʼyel chkalbotkutik li kʼusi koʼol-oe, mi laje jaʼ chkalbotkutik li kʼusitik chjele.

Li sbie jaʼo Li Jkʼel osil ta toyole. Yakal chalbe skʼoplal li Ajvalilal yuʼun Jeovae. Jech un chaʼa, Li Jkʼel osil ta toyole jaʼ me chichʼ-o ta mukʼ Jeova kʼuchaʼal li melel Diose xchiʼuk xtok ta stunes li achʼ aʼyejetik yuʼun Ajvalilal Dios sventa tspatbe yoʼonton li buchʼu tskʼelik revistae. Jech kʼuchaʼal li loʼiletik chtal ta pajina 5 kʼalal ta 9 li ta revista liʼe jaʼ chalbe smelolal kʼusi jaʼ li Ajvalilal yuʼun Diose xchiʼuk bakʼin chtal. Jech noxtok, Li Jkʼel osil ta toyole jech-o chakʼ ta ilel ti skʼan xkakʼtik xchʼunel koʼontontik ta stojolal li Jesucristoe, tspakbe skʼoplal li kʼusi melel ta Vivliae, xchiʼuk li albil kʼopetik ta Vivliae tstunes sventa chalbe smelolal li kʼusitik chkʼot ta pasel ta spʼejel Balumile, jech kʼuchaʼal spasoj xa onoʼox talel ta sjaylajunebal xa jabile.

¿Kʼusi ti chjel une chaʼa? Jkʼeltik jlom kʼusitik labalik sba achʼ chichʼ talel li revista chlokʼ ta ox-ox ue. *

Li ta revista sventa ox-oxtik ue chlokʼ junantik velta li jvokʼ bu chal «¿Mi anaʼoj xa?», xie, ti jaʼ chalbe skʼoplal kʼusi xuʼ tskoltaot sventa xavaʼibe smelolal junantik loʼiletik ta Vivliae. Li jvokʼ bu chal «Nopajan ta stojolal Dios» ti xie, chalbe smelolal junantik loʼiletik ta Vivlia ti chchanubtasutik ta sventa li Jeovae. Li jvokʼ bu chal «Li jkʼel vunetike tskʼan snaʼik» ti xie, jaʼ chakʼbe stakʼobiltak li kʼusitik tsjakʼilanik ta Vivlia epal krixchanoetike. Jech kʼuchaʼal li ta pajina 13 li ta revista liʼe te cha tabe stakʼobil li jtos kʼusi tsjakʼbe sbaik tajek epal krixchanoetike: «Li Ajvalilal yuʼun Diose, ¿mi te ichʼbil bal ta oʼontonal?».

Oy jvokʼ mantaletik xtoke pasbil sventa utsʼ-alaliletik. Li jvokʼ «Mantaletik sventa utsʼ-alaliletik», ti xie, chakʼ ta ilel tsatsal kʼopetik ti tsnuptanik li utsʼ-alaliletik avie xchiʼuk chakʼ ta ilel mantaletik ta Vivlia ti chkoltavan sventa xichʼ chapanel li kʼopetik taje. Li bu chal «Chanubtaso avalab anichʼnabik», ti xie, jaʼ jvokʼ sventa totil-meʼiletik ti skʼan skʼelik xchiʼuk yalab xnichʼnabike, xchiʼuk li jvokʼ «Sventa kerem-tsebetik» xie, pasbil sventa akʼo sabeik smelolal ta Vivlia li kerem-tsebetike.

Oy yantik loʼiletik chlokʼ junantik velta noʼox. Li jvokʼ loʼil «Jchanbetik li xchʼunel yoʼontone», ti xie, jaʼ tstij koʼontontik ta xchanbel li slekil talelal junuk krixchano ti ta jtabetik skʼoplal ta Vivliae. Li ta pajina 18 kʼalal ta 21 li ta revista liʼe, chalbe sloʼil xkuxlejal j-alkʼop Elías ti chkʼot ta koʼontontike, chakʼ kiltik kʼuxi xuʼ jchanbetik li xchʼunel yoʼontone. Li ta jvokʼ bu chal «Li skarta...», xie, te chal talel sloʼil xkuxlejal misioneroetik xchiʼuk yan yajtuneltak Dios ta yantik lumetik, jaʼ xa tsloʼilta stukik yaʼel. Xchiʼuk li jvokʼ ti bu chal «Chanubtaseletik yuʼun Jesús», ti xie, ta xal meleletik sventa Vivlia ti tsotsik skʼoplale pe ti kʼun noʼox chalbe smelolale.

Jnaʼojkutik ta melel, li krixchanoetik ti lek onoʼox xaʼiik skʼelel xchiʼuk ti chichʼik ta venta li Vivliae xchiʼuk ti tskʼan chojtikinik li kʼusi chchanubtasvan ta melele kʼupil-o me sba chilik li revista Li Jkʼel osil ta toyole. Ta jkʼankutik ti revista liʼe xchʼabes li takitiʼil avuʼun ta sventa li kʼusi melel ta Vivliae.

LI JTSʼIBAJOMETIKE

[Tsʼibetik ta yok vun]