Nopajan ta stojolal Dios

Jun jchabiej chij ti oyutik ta yoʼontone

Mateo 18:12-14

«¿MI OYUN van ta yoʼonton li Diose?» Mi oy ajakʼojbe aba junuk velta jech taje, naʼo ti mu atukuke. Kʼalal chkil jvokoltike, ep buchʼu ta jakʼbe jbatik mi xakʼ van venta li kʼusitik chkʼot ta pasel ti Buchʼu la spas li vinajel-balumile. Ta melel, ta jkʼan ta jnaʼtik mi oyutik ta yoʼonton ta jujuntal li Jeova Diose. Kʼalal liʼ toʼox oy ta Balumil li Jesuse —ti jaʼ buchʼu mas xojtikin Jeovae— laj yal jun lokʼolkʼop ti tstij oʼontonale xchiʼuk ti jaʼ chakʼ ta ilel li stakʼobile.

Li Jesuse laj yalbe skʼoplal li yabtel tspas jujun kʼakʼal jun jchabiej chije, xi laj yale: «¿Cʼusi chanopic? Me oy jun vinic chcʼot ta voʼvinic (100) ta cot xchije, pero me chchʼay jcotuque, ¿me mu teuc ta scomtsan li balunlajuneb yoʼvinic (99) ta cote, yuʼun jaʼ chbat stʼun tal li jcot ichʼaye? Cʼalal me la stae, melel chacalboxuc, toj echʼem xcuxet yoʼnton; jaʼ mu sta jech xcuxet yoʼnton yuʼun li balunlajuneb (99) yoʼvinic muʼyuc xchʼaye. Jaʼ jech ec li Jtotic te oy ta vinajele, mu scʼan me chchʼay junuc li ololetic liʼi», xi (Mateo 18:12-14). Li ta lokʼolkʼop taje, jkʼeltik kʼuyelan chakʼ ta ilel Jesús ti kʼux xchiʼuk oy ta yoʼonton Jeova li jujuntal yajtuneltake.

Li jchabiej chije oy ta sba chaʼi skʼelel o xchabiel li jujukot xchijtake. Mi ichʼay jkotuke, snaʼoj lek bu junukal. Yuʼun onoʼox xojtikinan li ta sbi ti yakʼojanbe jujukot li xchijtake (Juan 10:3). Li jchabiej chij ti lek yoʼontone mu xkux jaʼ to mi la sta li yuni chij ti chʼayeme xchiʼuk mi te xaʼox oy xchiʼuk li yantike. Pe jech noxtok, kʼalal chlokʼ saʼ li jkot yuni chije, muʼyuk bu chikta komel stuk li 99 ta kot xchijtake. Stalel onoʼox ti nopol jmoj tstsob sbaik li jchabiej chijetike xchiʼuk ti chakʼik akʼo skap sbaik li xchijike. * Ja jech un, kʼalal mi chbat saʼ junuk xchij ti chʼayem li jchabiej chije xuʼ xikta komel xchijtak xchiʼuk li yan jchabiej chijetike. Vaʼun li jchabiej chije, kʼalal muʼyuk kʼusi spasoj tsta li xchije, xmuyubaj-o tajmek. Tskajan batel ta snekeb li uni chij ti xiʼeme, chikʼ batel yoʼ bu oy li yantike, ti bu mu xil svokole (Lucas 15:5, 6).

Kʼalal laj yalbe smelolal li lokʼolkʼop taje, li Jesuse laj yal ti Diose mu skʼan ti xchʼay o xlaj «junuc li ololetic liʼi». Leʼ xa onoʼoxe, li Jesuse laj yalbe yajtsʼaklomtak ti kʼusi tstaik mi laj yakʼ spʼosi yokik junuk li ololetik taje ti xchʼunojik ta stojolale (Mateo 18:6). Jech un chaʼa, ¿kʼusi chalbutik ta sventa Jeova li lokʼolkʼop liʼe? Chalbutik ti Diose jaʼ jun Jchabiej chij ti oy tajmek ta yoʼonton ta jujuntal li yuni chijtake, manchuk mi «ololetic», ti muʼyuk sbalil ch-ilatik yuʼun li banumil liʼe. Jech ta melel, ta sat Diose, jujuntal li yajtuneltake stuk noʼox jech xchiʼuk oy ep sbalil chil.

Mi cha kʼan cha naʼ ta melel mi oyot ta yoʼonton li Diose, ¿kʼu yuʼun mu xlik avojtikin mas li Mukʼta Jchabiej chij Jeova Diose, xchiʼuk ti xa sabe mas smelolal kʼuxi xuʼ xa nopaj mas ta stojolale? Mi jech cha pase, jech me cha nop ek kʼuchaʼal li jtakbol Pedroe, ti ta melel laj yaʼibe ta ye stuk Jesús li lokʼolkʼop ta sventa li uni jchʼayel chije. Ta mas tsʼakale, li Pedroe xi jamal laj yale: «Acʼbeic sventain Dios scotol li sloʼil avoʼntonique, yuʼun oy ta yoʼnton tscʼan ta scoltaoxuc», xi (1 Pedro 5:7).

[Tsʼib ta yok vun]