Kʼuxi chi jkʼot ta xnichʼon Dios

TEVAN 30 jabil ta mas tsʼakal kʼalal echʼ xaʼox li leto ta Coreae, li radio tee laj yal jtos kʼusi xuʼ xichʼ pasel sventa chichʼ koltael ta stael yutsʼ yalalik li krixchanoetik ti chʼayik kʼalal jaʼo lik li letoe. ¿Kʼusi kʼot ta pasel? Mas ta buluch mil krixchanoetik x-okʼoletik xa kʼalal la sta sbaik xchiʼuk yutsʼ yalalik, xjikʼlajetik ta okʼel xchiʼuk la smey sbaik. Li periodiko The Korea Times xi laj yale: «Ti kʼu sjalil li kuxlejale muʼyuk ilbil-o li ta slumal jcoreanoetik ti tsmalik —ti mu noʼox xaʼiik ti kʼuyelan ta xlokʼ yaʼlel satike— epal yaʼlel satil ta skoj li smuyubajelike».

Ta Brasil, jun uni neneʼ ti jaʼ sbi Cezare laj yichʼ akʼel ta tojol ilil. Kʼalaluk echʼ xaʼox lajuneb jabile la sta li sbatsʼi meʼe, xmuyubaj ta jyalel, jaʼ yuʼun laj yikta komel li jkʼulejetik ti buchʼu chʼiesate ti jaʼ toʼox la stotin smeʼine sventa chbat nakiuk xchiʼuk li smeʼe.

Li utsʼ-alaletik ti yichʼojik chʼakel ta stojolal stot smeʼike xmuyubajik tajek kʼalal chchaʼta sbaike. Li Vivliae chal kʼuxi chʼakal kom li krixchanoetik ta stojolal li yutsʼ yalal Diose, pe chal noxtok ti avi kʼakʼale oy jun muyubajel ta sventa ti chchaʼta sbaik yan veltae. ¿Kʼuxi chʼakal komik? Xchiʼuk li voʼote, ¿kʼuxi xuʼ xa ta li muyubajel taje?

Kʼuxi ichʼak li yutsʼ yalal Diose

Li jtsʼibajom yuʼun Salmoe xi laj yal ta sventa li Jpasvaneje, li Jeova Diose: «Voʼot te oy ta atojol li nioʼ sventa cuxlejale», xi (Salmo 36:9). Li Jeovae jaʼ Totil yuʼun li mukʼta utsʼ-alalil ta vinajel-balumile, ti jaʼik tukʼil pʼijil kuxlejaletike. Ti vaʼ utsʼ-alalil taje chaʼchopik: li june te ta vinajel, ti jaʼ skotol li anjeletike, ti jaʼ xnichʼnabtak ti mu xvinaj ta kʼelele. Li jchop xtoke te oy ta Balumil, jaʼ skotol li krixchanoetike, ti jaʼ chnakiik kʼuchaʼal xnichʼnabtak liʼ ta balumile.

Jech kʼuchaʼal laj yichʼ alel li ta mantal ti jaʼ sbi «Kʼuxi xuʼ xa spojot li slajel Jesuse» li sba nichʼon Diose, li Adane la stoy sba, jaʼ yuʼun kʼux ta alel, yuʼun li krixchanoetike laj yichʼik chʼakel ta stojolal li sTot ti lek yoʼonton xchiʼuk ti jaʼ Jpasvanej yuʼunike (Lucas 3:38). Ta skoj li stoyobbaile, li Adán xchiʼuk li snitilultake —akʼo mi skʼan to xvokʼ— mu xa xuʼ xkʼotik ta xnichʼnabtak Dios ti jaʼ jun mukʼta matanale. Ta stojolal li yajtunel Moisese, li Jeovae laj yakʼ ta ilel li kʼusi xuʼ chkʼot ta pasel ta skoj li toyobbail taje: «Jaʼ yolbaj stukik chopol kʼusi spasojik; maʼuk xnichʼnabtak, li xchopolalike jaʼ yuʼun stukik noʼox». Ti vaʼ «xchopolalike»,  o ti jech onoʼox jmulavile, la xchʼak li krixchanoetik ta stojolal Diose, ti buchʼu jaʼ chʼul xchiʼuk tukʼ ta skotolale (Deuteronomio 32:4, 5, NM; Isaías 6:3). Yaʼeluke, li krixchanoetike xkoʼolaj ti chʼayem xchiʼuk ti meʼon ikomike (Efesios 2:12).

Sventa chichʼ akʼel ta ilel ti kʼu to yelan namajem batel ta stojolal Dios li krixchanoetike, li Vivliae chalbe skʼoplal li buchʼutik maʼuk yutsʼ yalale ti jaʼik kʼuchaʼal xchiʼuk yajkontra Diose (Romanos 5:8, 10). Kʼalal chʼakalik ta stojolal Diose, li krixchanoetike yiloj ep svokolik ta skoj ti uʼninbilik yuʼun li Satanase, li mulil ti chi jlaj-o yuʼune xchiʼuk li chopolal kichʼojtike (Romanos 5:12; 1 Juan 5:19). Vaʼun chaʼa, ¿mi xuʼ van xkʼotik ta yutsʼ yalal Dios li jsaʼ mulil krixchanoetike? Li kʼusitik kuxajtik ti muʼyuk tukʼike, ¿mi xuʼ van xkʼotik ta melel ta sbatsʼi nichʼon Dios, jech kʼuchaʼal toʼox Adán xchiʼuk Eva kʼalal muʼyuk toʼox saʼoj smulike?

Ta xichʼ tsobel li nichʼnabiletik ti nom oyike

Ta skoj smukʼta kʼanel li Jeovae, oy kʼusi laj yakʼ sventa chichʼ koltael li jmulavil krixchanoetik ti skʼanojik li Jeovae (1 Corintios 2:9). Li jtakbol Pabloe xi ta xale: «Jaʼ ta sventa Cristo lic scoʼlajes yoʼnton xchiʼuc cristianoetic li Diose. Mu xa jaʼuc tstʼab ta yoʼnton li jmultic jsaʼojtic ta stojole» (2 Corintios 5:19). Li mantal ti jaʼ sbi: «Kʼuxi xuʼ xa spojot li slajel Jesuse», laj yichʼ alel ti Jeovae laj yakʼ Jesucristo kʼuchaʼal jpojobbailtik ta sventa li jmultike (Mateo 20:28; Juan 3:16). Li jtakbol Juane xi la stsʼiba ta skoj ti koliyal xie: «Aʼyo avaʼyic, toj ep la scʼanutic li Jtotic Diose, jech “jnichʼnabtac”», xi (1 Juan 3:1). Jech taje, laj yichʼ jamel jun tiʼna sventa li krixchanoetik ti jchʼunej mantaletike xuʼ chkʼotik ta yutsʼ yalal Jeova yan velta.

Akʼo mi jaʼ yutsʼ yalal Dios skotol li krixchanoetike ta skʼupinik ti tsobol ta xchabiatik yuʼun li sTotik ta vinajele, lek xichʼ akʼel venta ti ta Vivliae ta xal ti oy chaʼvokʼ ti jelajtike. Efesios 1:9, 10 xi ta xale: «Jaʼ li cʼusi chapal onoʼox yuʼun stuc chacʼ cʼotuc ta pasele. Jaʼ ti nopbil onoʼox chacʼbe sventain scotol cʼusitic oy li Xnichʼon cʼalal tsta yorail yuʼune. Jaʼ banquilal chcʼot yuʼun scotol cʼusitic oy ta vinajel xchiʼuc cʼusitic oy liʼ ta banamil[e]». ¿Kʼu yuʼun jech yakʼoj Dios taje?

Akʼo mi spasoj ta chaʼvokʼ xnichʼnabtak li Jeovae jaʼ me sventa oyuk lekilal ta melel li ta yutsʼ yalale, xchiʼuk muʼyuk bu tsots ta aʼiel kʼuchaʼal. Li yutsʼ yalal Diose toj echʼ noʼox mukʼ ti xuʼ xichʼ koʼoltasel ta jun lume. Ta jujun lume ta xichʼ tʼujel jayibuk krixchano ti oy noʼox spajebe sventa chkʼotik ta ajvalil, vaʼun li yantike jaʼ tstabeik sbalil li mantaletike. Xvinaj onoʼox ti mu junuk ajvalil liʼ ta balumil xuʼ xichʼ talel li melel lekilale, pe li Diose yakʼoj jun tukʼil ajvalil sventa li yutsʼ yalale. Li baʼyel jtsope, jaʼ li «scotol cʼusitic oy ta vinajel[e]», ti jaʼ skotol li xnichʼnabtak Dios ti jaʼ stʼujoj stuk sventa ch-ochik ta ajvalilal ta vinajele. Te ta vinajel «tspasic mantal ta banamil» (Apocalipsis 5:10).

Xnichʼnabtak Dios ta Balumil

Li Jeovae yakal ta stsob xtok li «cʼusitic oy liʼ ta banamil», jaʼ xkaltik, ta smiyonal noʼox krixchanoetik ta buyuk noʼox sventa chkʼotik ta xnichʼnabtak liʼ ta balumil ta tsʼakale. Jech kʼuchaʼal jun totil ti lek yoʼontone, ta xchanubtas jech kʼuchaʼal stalelale, jaʼ yuʼun chaʼa, akʼo mi ta yantik lumetik likemik talel, lek jmoj jun yoʼontonik tsobolik. Li takel ta ikʼel ti «coʼoluc me avoʼntonic xchiʼuc li Diose», ti xie, ta me xichʼ albel li krixchanoetik ti muʼyuk chchʼunbeik smantale xchiʼuk ti buchʼu naka letovajel tspasike, ti jaʼ noʼox oy ta yoʼonton sba stukike xchiʼuk ti toj chopolike (2 Corintios 5:20).

¿Kʼusi chkʼot ta pasel ta stojolalik xa naʼ li buchʼutik tspʼajik li takel ta ikʼel chakʼ Dios sventa lekuk xil sbaik yoʼ chkʼotik ta xnichʼnabe? Sventa chtal li lekilale xchiʼuk li muyubajel ta yutsʼ yalale, li Jeovae oy me kʼusi ta spas ta anil noʼox ta sventa li krixchanoetik taje. Oy «ta sta yorail ti chapanele, ti jaʼ o xa ta stsuts o scʼoplal ti buchʼutic toj chopolique» (2 Pedro 3:7, Ch). Li Diose ta me stupʼbe skʼoplal ta Balumil li jtoybaetike. Taje, ¡jaʼ sventa spatobil yoʼontonik li buchʼu la xchʼunik mantale! (Salmo 37:10, 11.)

Li avi une ta xkʼot yorail ti oy lekilal jmil jabile, ti vaʼ sjalil taje ti buchʼu ta xchʼamik li kʼanel yuʼun Diose ta me sta ta kʼunkʼun li tukʼil kuxlejal ti chʼay yuʼun Adane. Jech noxtok li buchʼutik  chamemike ta xchaʼkuxiik talel (Juan 5:28, 29; Apocalipsis 20:6; 21:3, 4). Li Diose chkʼot onoʼox ta pasel yuʼun ti kʼusi onoʼox yaloj ti «tsta yorail chcolic loqʼuel ta svocolic ec li cʼusitic [o krixchanoetik] spasoj Diose, jech mu xa xcʼaʼic, mu xa soquic, yuʼun coʼol tsta slequilal yutsilalic xchiʼuc li xnichʼnab Diose» (Romanos 8:21).

Kʼuxi koʼoluk koʼontonik xchiʼuk li Totile

Jech kʼuchaʼal Cézar xchiʼuk li ta smilal noʼox jcoreanoetik ti laj yichʼ alel ta slikebal li mantal liʼe oy kʼusi la spasik sventa chchaʼtsob sbaik xchiʼuk li yutsʼ yalalike. Li jcoreanoetik taje ochik ta jun programa ta television, li Cézar eke laj yikta komel li buchʼu chʼiesate ti jaʼ toʼox la stotin smeʼine. Jaʼ jech ek, li voʼote oy van kʼusi skʼan xa pas ta anil noʼox sventa lek chavil aba xchiʼuk li aTot ta vinajele, li Jeova Diose, xchiʼuk ti cha kʼot ta yutsʼ yalal eke. ¿Kʼusi skʼan xa pas?

Mi oy ta avoʼonton cha nopaj ta stojolal li Dios kʼuchaʼal Totile, skʼan xa chan li sKʼope, li Vivliae, sventa chchʼi li xchʼunel avoʼonton ta stojolale xchiʼuk li kʼusi yaloj ta spase. Chlik apat avoʼonton ta sventa li smantaltak Dios ti jaʼ sventa cha tabe sbalile. Xchiʼuk noxtok ta me xlik achʼam li mantale xchiʼuk li tukʼibtasel chakʼ Diose, yuʼun li Vivliae xi chalbe li jchʼunolajeletike: «yuʼun xnichʼnaboxuc ti Diose. ¿Mi oy nichʼonil xanaʼ ti mu stsitsat yuʼun ti stote?» (Hebreos 12:7, Ch).

Spasel taje ta me sjel ta jyalel ti kʼuyelan akuxlejale. Li Vivliae ta xi yalbutik ti «tscʼan ch-achʼub scotol li cʼusitic [ta jnoptik] ta [jol] ta [koʼontontike]» xchiʼuk ti jaʼ skʼan jlapbetik «stalel li achʼ cristiano ti pasbil jech chac cʼu chaʼal stuc li Diose, ti tuqʼue ti me jutuc muʼyuc smule» (Efesios 4:23, 24). Mi laje, skʼan pasel batel li mantal chakʼ li jtakbol Pedroe: «Jech chac cʼu chaʼal nichʼonil ti lec jchʼunej mantale. Mu me xapasic cʼusi tscʼan avoʼntonic jech chac cʼu chaʼal laj apasic ti cʼalal mu toʼox xavotquinic Diose» (1 Pedro 1:14).

Saʼo li melel avutsʼ avalale

Kʼalal la sta sbatsʼi meʼ li Cezare, xmuyubaj tajmek ti kʼalal laj snaʼ ti oy jun sbankil xchiʼuk jun xvixe. Jaʼ jech ek, kʼalal cha nopaj ta stojolal li aTot ta vinajele, chavakʼ venta ti oy ep avermanotak li ta tsobobbail yuʼun yajrextikotak Jeovae. Kʼalal yakal chavojtikinan batele, chavakʼ venta ti solel lek chavil abaike o xuʼ mas to kʼuchaʼal avutsʼ avalal (Hechos 28:14, 15; Hebreos 10:24, 25).

Chavichʼik takel ta ikʼel ti akʼo xa tsob abaik xchiʼuk li amelel Totike xchiʼuk li amelel vermanotakike. Li muyubajel ta xavaʼie toj echʼ noʼox ep jech kʼuchaʼal laj yaʼi li Cezare xchiʼuk li epal jcoreanoetik ti la xchaʼtsob sbaik xchiʼuk li yutsʼ yalalike.

[Lokʼol ta pajina 8]

Cézar kʼalal 19 xaʼox sjabilal ti te xchiʼuk smeʼe

[Lokʼol ta pajina 10]

Paso ti kʼusi skʼan xa pas sventa cha nopaj batel ta stojolal li Diose