LI TA xchanibal slivroal Vivlia ti bu chalbe skʼoplal xkuxlejal li Jesuse, li Marcose jaʼ la stsʼiba li bu mas komkom noʼoxe xchiʼuk li bu kʼun noʼox ta kʼelele. Pe, ¿buchʼu jaʼ li Marcose? ¿Mi laj van yojtikinik Jesús xa naʼ? *... Jkʼeltik kʼusitik vokoliletik la sta xchiʼuk kʼu yuʼun muʼyuk bu laj yiktabe li yabtel Diose.

Li sbi Marcose chichʼ alel ta sbaʼyel velta ta Vivlia kʼalal echʼ xaʼox skʼakʼalil ti la stikʼ ta chukel jtakbol Pedro li ajvalilal Herodes Agripae. Ta jun akʼobale, jun anjel la slokʼes ta chukinab li Pedroe, vaʼun bat ta anil ta sna smeʼ Marcos, ti jaʼ sbi María ti te toʼox nakal ta Jerusalene. Taje kʼot ta pasel kʼalal lajuneb xaʼox jabil yechʼel ti la smilik li Jesuse, ti jaʼo yorail kʼin Koltael ta sjabilal 33 ta jkʼakʼaliltike (Hechos 12:1-5, 11-17).

¿Mi xa naʼ kʼu yuʼun ibat Pedro ta sna li Mariae?... Yuʼun van xojtikinbe li yutsʼ yalale xchiʼuk snaʼoj ti te onoʼox tstsob sbaik li yajtsʼaklomtak Jesuse. Bernabé, sprimo li Marcose, jaʼ xa onoʼox yajtsʼaklom Cristo ta voʼne, tetik xa onoʼox van ilik ta Pentecostés ta sjabilal 33. Li ta Vivliae chichʼ alel ti laj yakʼ ta ilel slekil yoʼonton ta stojolalik li achʼ yajtsʼaklomtak Cristoe. Jaʼ yuʼun xuʼ xkaltik ti yikʼaluk van li Jesuse xojtikin li Bernabee, li sjunmeʼe, ti jaʼ li Mariae, xchiʼuk li skerem María ti jaʼ li Marcose (Hechos 4:36, 37; Colosenses 4:10).

Li ta Evanjelio yuʼune, li Marcose chalbe smelolal ti kʼalal yichʼ chukel batel ta yajkontratak li Jesuse. Chalbe skʼoplal xtok jun kerem ti «muʼyuc scʼuʼ[e]» xchiʼuk ti jatav kʼalal yichʼ tsakel batel li Jesuse. ¿Buchʼu van jaʼ xa naʼ li kerem taje?... Yikʼaluk van jaʼ li Marcose. Yaʼeluke, kʼalal laj yil ti ta akʼobaltik ilokʼik li Jesús xchiʼuk li yajtakboltake, la slap skʼuʼ ta anil, vaʼun la stsʼaklian batel (Marcos 14:51, 52).

Li Marcose ta skeremal onoʼox laj yojtikin talel li mantale. Yikʼaluk van te oy ek kʼalal laj yakʼ tal xchʼul espiritu Dios li ta Pentecostés ta sjabilal 33. Xchiʼuk noxtok laj yamigoin tukʼil yajtuneltak Dios, jech kʼuchaʼal li Pedroe, xchiʼuk noxtok la xchiʼin ta chol mantal li sprimoe, li Bernabee. Oxibtik jabil ta tsʼakal kʼalal laj yil Jesús ta xchʼulel li Sauloe li Bernabee bat saʼ li Sauloe vaʼun la skolta kʼalal laj yakʼbe yojtikin li jtakbol Pedroe. Echʼ xaʼox jayibuk jabil ta tsʼakal, li Bernabee laj yichʼ takel batel ta Tarso sventa tsta sba xchiʼuk li Sauloe (Hechos 9:1-15, 27; 11:22-26; 12:25; Gálatas 1:18, 19).

 Ta sjabilal 47 yichʼ tʼujel Bernabé xchiʼuk Saulo sventa chbatik ta misioneroal. Laj yikʼik batel li Marcose, pe mu nabiluk kʼusi srasonal, li Marcose laj yiktaan komel li xchiʼiltake xchiʼuk isut batel ta Jerusalén. Li Sauloe —ti ojtikinbil xaʼox kʼuchaʼal Pablo, ti jaʼ Roma biile— ilin tajmek, xchiʼuk muʼyuk bu te noʼox echʼ yuʼun li stsatsal mul laj yil la spas Marcose (Hechos 13:1-3, 9, 13).

Kʼalal sutik tal ta misioneroale, li Pablo xchiʼuk Bernabee laj yalbeik skʼoplal ti toj lek echʼ yuʼunik li chol mantale (Hechos 14:24-28). Ta jayibuk u ta mas tsʼakale, la xchapan sbaik sventa tsvulaʼanik li achʼ yajtsʼaklomtak Cristo bu echʼ xcholik mantale. Li Bernabee tskʼan ox chikʼ batel li Marcose, pe, ¿mi xa naʼ kʼusi laj yal li Pabloe?... Li stuke muʼyuk lek laj yaʼi jech taje, yuʼun li Marcose laj yiktaan komel xchiʼuk isut batel ta sna li ta baʼyel veltae. Vaʼun oy kʼusi kʼot ta pasel ti jaʼ laj yat-o van yoʼonton tajmek li Marcose.

Tsatsaj batel tajmek li kʼop yuʼunike, vaʼun «tsots laj yut sbai[k]» li Pablo xchiʼuk Bernabee, jech oxal ta jujujot la stsak batel sbeik. Li Bernabee laj yikʼ batel ta chol mantal ta Chipre li Marcose, li Pabloe jaʼ la stʼuj Silas sventa chchaʼvulaʼanik li achʼ jchol mantaletike, jech kʼuchaʼal snopojik xa onoʼoxe. Jech ta melel, li Marcose toj chopol van laj yaʼi sba ti jaʼ ta skoj sok skʼopik li Pablo xchiʼuk Bernabee (Hechos 15:36-41).

Mu jnaʼtik kʼu yuʼun sut batel ta sna li Marcose, pe yuʼun van oy kʼusi tsots skʼoplal laj yaʼi bat spas. Kʼusuk noʼox s-elan, li Bernabee snaʼoj lek ti muʼyuk xa bu jech tspas yan veltae. Jaʼ jech ikʼot ta pasel, li Marcose muʼyuk xa bu jech spas. Ta mas tsʼakale la xchiʼin batel xtok li Pedro ta namal balumil ta Babiloniae. Te to la stsʼiba talel jun karta li Pedroe, ti bu  chabanukoxuk xie xchiʼuk laj yal «chabanucoxuc la xal ec li Marcos ti xcoʼlaj xchiʼuc jnichʼone», xi (1 Pedro 5:13).

Jamal ta aʼiel chaʼa ti Pedro xchiʼuk Marcose laj yamigoin sbaik tajmek kʼalal jmoj itunik ta stojolal Jeovae. Li taj eke te chvinaj li ta Evanjelio yuʼun Marcose. Li ta loʼil liʼe, li Marcose te laj yal ep kʼusitik ti jaʼ laj yil stuk li Pedroe. Jkʼelbetik junuk skʼelobil ti jelelik loʼiltabil ta sventa jun chaukil voʼ ti te ilik ta nab Galileae. Li Marcose chalbe mas smelolaltak: chal bu jotukal ta barko vayal li Jesuse xchiʼuk kʼusi xon sjol, jtos ti kʼusi yikʼaluk van mu xakʼ venta li buchʼu jaʼ xa onoʼox jtsak choy jech kʼuchaʼal li Pedroe. Ta jkʼeltik mi jech kʼalal ta jkoʼoltajestik ta Mateo 8:24, Marcos 4:37, 38 xchiʼuk Lucas 8:23.

Li jtakbol Pablo eke, ti kʼalal te toʼox chukul ta Romae la skʼupil kʼopta Marcos ta skoj ti lek chkoltavane (Colosenses 4:10, 11). Xchiʼuk kʼalal te chukul ta xchibal xaʼox velta li ta lum taje, li Pabloe la stsʼibabe li Timoteoe xchiʼuk laj yalbe ti akʼo yikʼ talel li Marcose, yuʼun xi laj yalbe skʼoplale: «ta xtun cuʼun sventa chiscoltaun ta abtel», xi (2 Timoteo 4:11). Mu ta naʼeteluk ti Marcose toj ep matanal abtel la skʼupin li ta chol mantale, ti jaʼ noʼox ta skoj ti muʼyuk bu xikta sba ta spasbel yabtel li Diose.