Mu xavakʼ spojbot amuyubajel li syayijesel oʼontonale

¿BUCHʼU muʼyuk yayijem yoʼonton junuk velta? Yuʼun kʼalal to ta jTotik Jeova Dios ta vinajel kʼot ta stojolal li kʼusi toj kʼux taje. Jech kʼuchaʼal liʼe, manchuk mi la spoj lokʼel ta mosoil ta Egipto li j-israeletike xchiʼuk laj yakʼbe epal bendisionetik, li Vivliae chal ti «la saʼbeic scʼacʼal yoʼnton yan velta noxto[ke]; laj yacʼbeic yat yoʼnton li Chʼul Dios yuʼun Israele» (Salmo 78:41). Akʼo mi jech, li Jeovae jaʼ onoʼox jun «Dios ti echʼem slequile», jaʼ xkaltik, ti xmuyubaje (1 Timoteo 1:11).

Jech onoʼox ti ep li kʼusitik tsyayijes koʼontontike. ¿Kʼusi xuʼ jpastik sventa mu spoj jmuyubajeltik? ¿Kʼusi xuʼ jchanbetik Dios ta sventa ti kʼusi spasoj kʼalal chyayijesbat yoʼontone?

Kʼusitik tsyayijes koʼontontik

«Li yorail xchiʼuk li kʼusitik muʼyuk malabil chkʼot ta pasele chkʼot ta [j]tojolal [jkotoltik]», xi chal ta melel li sKʼop Diose (Eclesiastés 9:11, NM). Ta jech noʼox ta skoj jun tsatsal mulil o ta jun kʼop, ta skoj chamel o ta skoj kʼusitik chopol chkʼot ta pasele xuʼ chakʼ ep vul oʼonton xchiʼuk tsyayijes oʼontonal. Xi chal noxtok li Vivliae: «Me mu jtatic ta ora li cʼusi ta jmalatique ta xloʼilaj coʼntontic», xi (Proverbios 13:12). Solel xi jmuyubaj tajmek kʼalal oy kʼusi lek jmalaojtik ta sjunul koʼontontike, pe mi mu xkʼot ta pasel ta orae, xuʼ van xi smilutik li at-oʼontonale. Kalbetik skʼoplal Duncan. * Li kʼusi mas oy sbalil chaʼi toʼoxe jaʼ ti ch-abtej ta misioneroale, pe kʼalal ep xaʼox jabil abtej jech taje, persa isut batel xchiʼuk yajnil li ta slumale. Xi chale: «Sba to velta chʼayemun laj kaʼi jba. Solel mu jnaʼ kʼusi ta jpas. Xchiʼuk muʼyuk xa kʼusi tsots skʼoplal chkaʼi», xi. Jech xtok, li xkʼuxul ta oʼontonale xuʼ ep chjalij, jech kʼuchaʼal kʼot ta stojolal Claire. «Svukubal xaʼox u jchiʼinoj kʼalal iyal li kuni ole —xi—. Taje oy xa jayibuk sjabilal. Akʼo mi jech, li avie, kʼalal chkil ch-echʼ yetʼes mantal jun uni kereme, xi chkal ta koʼontone: “Jech xa sjabilal jechuk li kuni kereme, xi chi”», xi.

Jech xtok, chkil jvokoltik kʼalal oy buchʼu tsyayijes koʼontontike, jech kʼuchaʼal kʼalal tsok skʼopik li buchʼutik yakal xojtikin sbaik sventa chikʼ sbaike, kʼalal tsok tajmek snupunel li buchʼutik nupunemike, kʼalal tstoy sba jun alab-nichʼnabile, kʼalal  muʼyuk tukʼ yoʼonton ta jtojolaltik jun jchiʼiltike o ti mu xkʼuxubin slekil koʼontontik jun kamigotike. Ta skoj ti jmulavil krixchanoutike xchiʼuk ti tsots kʼusitik chkʼot ta pasel li ta jkʼakʼaliltike, oy onoʼox me kʼusi chkʼot ta pasel ti tsyayijes koʼontontike.

Kʼalal oy kʼusitik mu xkʼot ta pasel kuʼuntike xuʼ jaʼ syayijes koʼontontik xtok. Jech kʼuchaʼal liʼe, xuʼ van mu xa kʼusi xi jtun-o chkaʼi jbatik kʼalal mu x-echʼ kuʼuntik jun eksamene, kʼalal mu jta kabteltike o kʼalal mu xuʼ kuʼuntik ti akʼo skʼanutik junuk krixchanoe. Jech xtok, xuʼ van yayijem koʼonton xkaʼi jbatik kʼalal chkʼunib ta mantal junuk krixchano ti jkʼanojtike. Jun meʼil ti Mary sbie, xi chale: «Yileluke lek noʼox oy li jtsebe. Kaloje lek laj jchanubtas ta jtalelal. Pe kʼalal la svalopatin komel li Jeova xchiʼuk li mantaletik oy ta kutsʼ kalalkutike, voʼon yaʼeluk li buchʼu muʼyuk lek kʼusi kʼot ta pasel kuʼune. Mi jtosuk li kʼusi juʼem lek kuʼun ta spasel ta jkuxlejale xuʼ xtoj yuʼun li kʼusi taje. ¡Toj lilijem tajmek koʼonton laj kaʼi jba!», xi.

¿Kʼusi xuʼ jpastik sventa xkuch kuʼuntik li kʼusitik taje? Sventa ta jtakʼtik li taje, jkʼeltik kʼusi tspas Jeova kʼalal chyayijesbat yoʼontone.

Akʼo ta avoʼonton kʼuyelan cha chapan

Akʼo mi la xchabi li baʼyel vinik xchiʼuk baʼyel ants li Jeovae, muʼyuk la stojbeik ta vokol, yuʼun la stoy sbaik ta stojolal (Génesis, kapitulo 2, 3). Ta tsʼakale, li Caine, li xnichʼone, la xchʼies xchopol talelal xchiʼuk ta skoj ti muʼyuk la xchʼun li smantaltak Diose, la smil li yitsʼine (Génesis 4:1-8). ¿Mi xnop avuʼun kʼu to yelan yayijem yoʼonton laj yaʼi sba li Jeovae?

Pe li syayijesel oʼontonal taje muʼyuk bu xpojbat smuyubajel li Diose. ¿Kʼu yuʼun ti muʼyuke? Yuʼun jaʼ laj yakʼ ta yoʼonton ti tskʼan tsnojes ta tukʼil krixchanoetik spʼejel li Balumile xchiʼuk abtej-o sventa chkʼot ta pasel yuʼun (Juan 5:17). Ta skoj taje, laj yakʼ li matanal pojelal yuʼun Cristoe xchiʼuk la svaʼan li Ajvalilal yuʼune (Mateo 6:9, 10; Romanos 5:18, 19). Li Jeovae maʼuk laj yakʼ ta yoʼonton li kʼope, moʼoj, jaʼ laj yakʼ ta yoʼonton ti kʼuyelan chchapane.

Li sKʼop Diose chalbutik ti akʼo xkakʼ ta koʼontontik li kʼusitik leke, ti mu jecheʼuk noʼox jyayijes jbatik tajmek ta snopel ti kʼusi van xuʼ kʼotuk ta pasele o ti kʼusi lajuk jpastike. Xi ta jkʼeltik tee: «Jaʼ me xanopic scotol li cʼusi melele, li cʼusi oy stue, li cʼusitic tuqʼue, li cʼusitic leque, li cʼusitic lec ilbile, xchiʼuc scotol li cʼusitic lec scʼoplale. Scotol li cusitic leque, ti stacʼ pasele, jaʼ noʼox me xanopic o», xi (Filipenses 4:8).

Kʼu yelan skʼan xkiltik li syayijesel oʼontonale

Oy ep kʼusitik ti xuʼ sjelbutik ta anil li jkuxlejaltike. Jech kʼuchaʼal liʼe, xuʼ ta anil noʼox muʼyuk jnup jchiʼiltik xi jkom, ta anil noʼox xchʼay kabteltik o li matanaletik jtaojtik ta tsobobbaile, ti xi j-ipaje, ti xchʼay jnatike o li kamigotaktike. ¿Kʼusi xuʼ jpastik mi jech ikʼot ta jtojolaltike?

Li jlome ep sbalil chilik ti jaʼuk chakʼ ta yoʼontonik li kʼusitik mas tsots skʼoplale. Duncan ti laj xa kalbetik skʼoplale, xi jpʼel chale: «Toj kʼux laj kaʼi ti laj kakʼkutik venta ti mu xa xuʼ xi abtejkutik yan velta ta misioneroale. Laj kakʼ ta koʼontonkutik spasel chaʼtos kʼusitik ti tsots skʼoplale: xchabiel li jmeʼniʼe xchiʼuk ti xkakʼbekutik-o yipal ta spasel li abtelal yuʼun Dios ta tsʼakal orae. Kʼalal oy kʼusi ta jnop ta jpaskutike, ta jkʼelkutik lek kʼuxi xuʼ mu smakunkutik ta spasel li chaʼtos kʼusitik tsots skʼoplal taje. Jaʼ jech muʼyuk mas vokol maʼ taje», xi.

Kʼalal chyayij koʼontontike jutuk mu jkotoltikuk mu xa noʼox x-echʼ ta koʼontontik yalilanel li kʼusitik muʼyuk lek kʼot ta pasele. Jech kʼuchaʼal liʼe, kʼalal chkakʼ ta koʼontontik xchiʼesel junuk kalab jnichʼnabtike, ta saʼel kabteltike o kʼalal ta jcholtik mantal tan yan lume, xuʼ van mu xkʼot ta pasel li kʼusi jmalaojtike. Xuʼ van xi ta jnoptike: «Mu kʼusi xi tun-o ta jyalel». Pe jech kʼuchaʼal ti muʼyuk laj yal ti muʼyuk xa kʼusi xtun-o chaʼi sba Dios ta skoj li xchopol likebal krixchanoetike, li voʼotik eke maʼuk skʼan xal ti mu xa kʼusi xi jtun-o  ta skoj noʼox ti muʼyuk lek chlokʼ kuʼuntik ta baʼyel velta li kʼusitike (Deuteronomio 32:4, 5).

Jech xtok, kʼalal syayijes koʼontontik li yantike toj kʼun ti chopol xa noʼox xkiltik skotol li kʼusitike. Pe mu jechuk tspas li Jeovae. Kʼalal imulivaj xchiʼuk jun ants li ajvalil Davide xchiʼuk la smilbe li smalale, ta melel la syayijesbe yoʼonton li Diose. Akʼo mi jech, li Jeovae laj yil ti la sutes yoʼonton ta melel li Davide xchiʼuk muʼyuk la snop ti maʼuk xa yajtunele. Jech ek li tukʼil ajvalil Josafate oy kʼusi jtos mu lekuk la spas, yuʼun la spas ta jmoj skʼop xchiʼuk li yajkontratak Diose. Jech oxal, xi albat yuʼun li yaj-alkʼop Jeovae: «Ta sventa ti jech laj apase, li Mucʼul Diose ilinem ta atojol. Pero oy to cʼusi lec apasoj», x-utat (2 Crónicas 19:2, 3). Ti jech jtos noʼox ti kʼusi muʼyuk lek la spas li Josafate, li Jeovae muʼyuk bu laj yal ti jaʼ xa jun jvalopatinvaneje. Jech ek li voʼotike, mu me bu ta jchʼay kamigotaktik mi mu jaʼuk batem ta koʼontontik yalel li kʼusitik muʼyuk lek kʼot ta pasel yuʼunike. Oy van la syayijes koʼontontik junuk velta li jun kamigotike, pe maʼuk skʼan xal ti yuʼun chʼabal xa lek stalelale (Colosenses 3:13).

Li syayijesel oʼontonale, stalel onoʼox ti ta jnuptantik ta jkuxlejaltike. Jech kʼuchaʼal liʼe, xuʼ van yayijem koʼonton chkaʼi jbatik kʼalal ta jpas jmultike. Akʼo mi jech, xuʼ jtam jbatik likel mi la jkʼeltik lek kʼusi xuʼ jpastik xchiʼuk mi mu xkikta jbatike. Kʼalal yayijem tajmek yoʼonton laj  yaʼi sba ta skoj smul stuk li ajvalil Davide, xi laj yalbe ta orasion li Jeovae: «Yantic noʼox chiʼalub batel laj caʼay, jaʼ ta scoj ti puru oqʼuel, ti puru jicʼ oʼnton ta jpase [...]. Jaʼ yuʼun laj calbot ta jamal li jmule [...]. Jech laj apasbun perdón, laj achʼaybun li jmule», xi (Salmo 32:3-5). Mi chkakʼtik venta ti muʼyuk jpasojtik li kʼusi tskʼanbutik li Diose, jkʼanbetik me perton, jel jtalelaltik xchiʼuk lik kakʼ ta koʼontontik ta xchʼunel-o batel li tojobtaseletik yuʼun Diose (1 Juan 2:1, 2).

Chapano aba ta sventa li syayijesel oʼontonal chtal ta tsʼakale

Ta melel, ta onoʼox me jnuptik ta be jtosuk syayijesel oʼontonal ta tsʼakal. ¿Kʼuxi xuʼ jchapan jbatik? Toj tsotsik skʼoplal li kʼusi chal Brunoe, jun yajtsʼaklom Cristo ti yij xae, ti yayij tajmek yoʼonton ti jel-o xkuxlejale. Xi chalbutike: «Li ta jtojolale, li kʼusi mas tsots skʼoplal sventa stsal kuʼun li syayijesel oʼontonale jaʼ ti la jpas-o li kʼusi yakalun xa onoʼox spasel sventa ta jtsatsubtas jba ta mantale. Jech xtok, jchanoj xa onoʼox kʼu yuʼun yakʼoj Dios ti akʼo to oyuk li mu chopol balumil liʼe, xchiʼuk ep jabil kakʼojbe yipal sventa lekuk xkil jba xchiʼuk li Jeovae. Ta jtoj ta vokol taje, yuʼun ti jnaʼoj ti chakʼ koltael li Jeovae jaʼ la skoltaun sventa xkuch batel kuʼun li tsatsal at-oʼontonale», xi.

Ta sventa li kʼusi chtal ta tsʼakale xuʼ jpat koʼontontik ta sventa liʼe: mi voʼotik noʼox ta jyayijes koʼontontik o mi yan krixchano tsyayijes koʼontontike, xuʼ jchʼuntik ti mu me bakʼinuk tsyayijes koʼontontik li Jeovae. Li stuke xi onoʼox yalojbe smelolal li sbie: «Vuʼun ti te onoʼox oyun oe», xi (Éxodo 3:14). Taje tspat koʼontontik ti xuʼ ta spas sba ta skotol li kʼusi skʼan to spas sventa chkʼot ta pasel yuʼun li kʼusitik yaloje. Yaloj ti ta stojolal li Ajvalilal yuʼune tspas li kʼusitik tskʼan yoʼonton «ta banamil jech chac cʼu chaʼal te ta vinajele». Jaʼ yuʼun xi la stsʼiba li jtakbol Pabloe: «Jʼechʼel jchʼunoj o ti muʼyuc cʼusi xuʼ tspajes ti jech mu xa xiscʼanutic li Diose, me jaʼuc li lajele, me jaʼuc li cuxlejale, me jaʼuc li jʼalmantaletique, me jaʼuc li jpasmantal[etike,] [...] muʼyuc cʼusi pasbil yuʼun Dios ti xuʼ tspajes ti jech mu xa xiscʼanutic o li Diose. Yuʼun jʼechʼel la scʼanutic o ta sventa li Cristo Jesuse», xi (Mateo 6:10; Romanos 8:38, 39).

Jech oxal chaʼa, xuʼ jpat koʼontontik ti chkʼot ta pasel li kʼusi xi laj yal Dios ta stojolal li j-alkʼop Isaiase: «Ta xcacʼ ayinuc achʼ vinajel banamil. Li pocoʼe muʼyuc xa bochʼo ta snaʼ o; muʼyuc xa bochʼo ta snopilan o», xi (Isaías 65:17). ¡Toj kʼupil sba ti ta jnaʼtik ti mu xa jaluk skʼan xtal skʼakʼalil ti kʼalal mu xa bu ta jvul-o koʼontontik ta skoj li syayijesel oʼontonal kilojtike!

[Tsʼib ta yok vun]

[Tsʼib ti mukʼtik sletraile ta pajina 15]

Maʼuk skʼan xal ti mu xa kʼusi xi jtun-o ta skoj noʼox ti muʼyuk lek chlokʼ kuʼuntik ta baʼyel velta li kʼusitike

[Tsʼib ti mukʼtik sletraile ta pajina 16]

Li sKʼop Diose chalbutik ti akʼo xkakʼ ta koʼontontik li kʼusitik leke, ti mu jecheʼuk noʼox jyayijes jbatik tajmek ta snopel ti kʼusi van xuʼ kʼotuk ta pasele

[Lokʼol ta pajina 17]

Li Diose xmuyubaj akʼo mi chyayijesbat yoʼonton, yuʼun snaʼoj ti ta onoʼox xkʼot ta pasel ta melel li kʼusi tskʼane

[Lokʼol ta pajina 18]

Yakʼel ta koʼontontik li kʼusitik mas tsots skʼoplale tskoltautik sventa xkuch batel kuʼuntik li syayijesel oʼontonale