Ta xichʼ vaʼanel sventa skʼupil kʼoptael Jeova

«Mu jchʼun li kʼusi chkile. Mi jaʼuk oy la jnop mi oy junuk kʼakʼal ta xkil ti bu xuʼ jtsob jbakutike xchiʼuk ti bu ta jkʼupil kʼoptakutik li Jeovae. ¡Li muyubajel ta xkaʼie muʼyuk kʼusi xuʼ xichʼ manel-o!»—MARÍA (MÉXICO).

LI YAJREXTIKOTAK JEOVAE toj lek xaʼiik ta stsob sbaik sventa chchanik li sKʼop Diose, li Vivliae (Salmo 27:4; Hebreos 10:23-25). Xchiʼuk jaʼ toj lek chaʼiik spasel ti bu lek ta kʼelele. Li jabiletik echʼemik xa talele yichʼoj vaʼanel ta smilal xa noʼox ti bu xuʼ ta stsob sbaike, ti jaʼ sbi Salon sventa Tsobobbail.

¿Kʼu yuʼun jech yichʼoj vaʼanel skotol taje? ¿Buchʼutik tspasik li abtelale? Xchiʼuk ¿kʼuyelan ta xaʼi sbaik li buchʼutik te ch-abtejike? Sventa chichʼ takʼel taje, jkʼeltik li kʼusitik yichʼoj pasel ta México xchiʼuk ta Belice.

Chtun to mas ta smilal noʼox Salonetik sventa Tsobobbail

Li ta voʼnee, li yajrextikotak Jeova ta Mexicoe ta stsob sbaik sventa chichʼik ta mukʼ li Diose ti buyuk noʼox xokole, jech kʼuchaʼal ta: amakʼ, sna yajrextikotak Jeova, bodegaetik, skʼejobil karoetik o ta chʼom naetik. Li tukʼil Rextikoetike ta snopilanik xa onoʼox ti jaʼ lek ti oyuk Salon sventa Tsobobbail yuʼun stukik ti bu xuʼ stsob sbaike.

Li ta sjabilal 1994 oy xaʼox 388,000 Rextikoetik li ta Mexicoe. Kʼalal laj yichʼ jakʼbel yajrextikotak Jeova li jabil taje te laj yichʼ ilel ti ta skʼanik ti oyuk jun yavil ti bu xuʼ ta xichʼik ta mukʼ li Diose, ti kʼu yepal skʼan xichʼ vaʼanele jaʼ 3,300 salonetik. ¡Jaʼ jun epal abtel!

Ti jabil taje, jlom tsobobbailetike te la svaʼan stukik li Salon sventa Tsobobbail ti xtoj noʼox yuʼunike. Kʼalal echʼ xa tal voʼob jabile lek laj yichʼ ilel ti skʼan vaʼanel mas epal salonetike xchiʼuk ti aniluk noʼox xichʼ vaʼanel sventa xichʼ tael li kʼuyepal chichʼ kʼanele. ¿Kʼusi yakal chichʼ pasel sventa xichʼ tael ti kʼuyepal salonetik skʼan to xichʼ vaʼanele?

Ep ta tsop jtuneletik ti lek chanemik ti buyuk noʼox ta xbatike

Ta sjabilal 1999 te lik yichʼ chapanel svaʼanel Salonetik sventa Tsobobbail ta México. Ta sjunul li yosilal Mexicoe laj yichʼ vaʼanel jaytsopuk yajrextikotak Jeova —oy jlome snaʼojik xa onoʼox svaʼanel naetik— ti laj yalik ti ta skʼan ch-abtejik li ta yan sba yutsil abtel taje. Li avi kʼakʼale, li ta Mexicoe oy 35 ta tsop, xchiʼuk oy jun ta Belice.

Li ta jujuTsop Jtuneletik ta Svaʼanel Salonetik sventa Tsobobbaile (Grupos de Construcción de Salones del Reino) oy vaxakvoʼik —viniketik xchiʼuk antsetik— ti ch-abtejik ta tsʼakal yoraile. Akʼo mi muʼyuk ta xichʼ stojolik, xmuyubajik ta spasel li abtelale. Li jujutsop taje ta buyuk noʼox jotukal chbatik li ta yosilal México sventa chbat sbeiltasik li abtelale. Li buchʼutik ta moton ch-abtejik taje vaxakib ora ta x-abtejik ta lunes kʼalal to ta viernes, xchiʼuk jun sabado ta x-abtejik li june  moʼoj. Li abtel yuʼunike ta xlik ta vukub ora ta sob baʼyel ta xchanbeik skʼoplal jun teksto ta Vivliae, mi laje ch-ochik ta veʼel. Skotolik chapalik ta spasel kʼusiuk abtelal ti xuʼ xkʼanbatike. Jech kʼuchaʼal, li antsetike, ta spasik abtelal kʼuchaʼal li viniketike, ta xchʼulik pakʼbal na, ta spakʼik losetaetik, tsbonik, xchiʼuk yantik to.

Li tsobobbailetike ta skolta sbaik ek, ta xakʼik vayebaletik, chchukʼik kʼuʼiletik xchiʼuk ta spasbeik sveʼel li buchʼutik ta moton ta x-abtejike. Pe maʼuk noʼox ta skolta sbaik li ta svaʼanel salonetike, li buchʼutik ta moton ta x-abtejik xchiʼuk li Rextikoetik te ta tsobobbaile ta skʼupinik ti jmoj te oyik li ta tsobajeletike xchiʼuk li ta xcholel mantal ta naetike.

Li bendisionetik chichʼ tael ta spasel li matanal abtelale

¿Kʼusi ta xalik li buchʼutik lokʼem ta yoʼontonik spasel li abtelal taje? Daniel, ti oy xa ta yoxibal jabil ch-abtej ta matanal abtele, xi ta xale: «Jech onoʼox ti ta xi kʼakʼkutik ta kʼakʼale xchiʼuk chkaʼikutik sike, ta jlajeskutik veʼlil ti muʼyuk bu nopemunkutik slajesele, ta jelilan kavilkutik, nom oyunkutik li ta kutsʼ kalalkutike xchiʼuk muʼyuk kuʼunkutik li kʼusitik achʼik ta xlokʼanuke. Pe manchuk mi jech li vokoliletik ta xkilkutike muʼyuk kʼusi xkoʼolaj-o xchiʼuk li bendisionetik ta xkichʼkutike».

¿Kʼusitik jlomuk li bendisionetik taje? Ep li buchʼutik ta moton ta x-abtejike chchanik yan abtelaletik li ta svaʼanel salone. Pe jech kʼuchaʼal ta xal Carlos, ti jaʼ oy ta sba skʼelel li bu mas mukʼ jtsop j-abteletike, oy to yan ep sbalil ta xichʼ tael: «Ti jtobunkutik ta voʼe, koʼoluk xa kʼuchaʼal kutsʼ kalal jbakutik yaʼel, —xi chale—. Chi veʼkutik, chi abtejkutik, chi chanunajkutik xchiʼuk jmoj ta jpaskutik orasion. Toj echʼ noʼox lek kamigo jbakutik».

Li jaytsopuk jtuneletik ta svaʼanel salonetike, ti bu chbat skoltaik li tsobobbail ta svaʼanel li salone lek yamigo sbaik ta xkomik. José, ti buchʼu abtejem ta svaʼanel mas xa ta sien salonetike, xi ta xale: «Toj yan sba yutsil ta kʼelel ti chlokʼ yaʼlel satik ta muyubajel xchiʼuk ti stseʼetik xa kʼalal ta xilik ti tsutsem xa li Salon sventa Tsobobbail kʼuchaʼal onoʼox smalaojike». Xi to ta xale: «Jaʼ toj echʼ noʼox xkuxet koʼontonkutik ta jyalel ti ta xkilkutik ta xchʼi li xchʼunel yoʼonton li ermanoetik ta skoj li uni juteb abtel ta jpaskutik ta sventa li svaʼanel naetik ti bu xuʼ xichʼik ta mukʼ li Diose».

¡Yan sba yutsil kʼusi tabil!

Li yavil ti bu xuʼ xichʼ ichʼel ta mukʼ li Diose maʼuk ti toj labal xa noʼox sbae, lek noʼox sba yutsil, ti jaʼ chkoltavan sventa anil noʼox chichʼ vaʼanel xchiʼuk ti muʼyuk ep chlaj takʼine. Ta xichʼ tunesel li kʼusitik oy yuʼunik te noʼoxe o ti kʼuyelan xuʼ xichʼ vaʼanel mi jech stakʼ pasel chilike. Jaʼ jech taje, xuʼ xichʼ vaʼanel ta vakib xemana noʼox jpʼej achʼ salon.

Li ta 2007, skotol li tsobobbailetik ta Belicee oy xaʼox yuʼunik achʼ Salon sventa Tsobobbail, ta skotolale jaʼ vuklajunpʼej. Li ta Mexicoe yichʼoj xa vaʼanel mas ta 1,400 ti te noʼox ilik talel ta sjabilal 1999.

 Akʼo mi ep xa yichʼoj pasel talel, ep to tajek li abtelal skʼan pasele (Mateo 9:37). Ti kʼuyepal li Rextikoetik ta Mexicoe mas ta 600,000, skotolik taje oxkoj ta xemana ta stsob sbaik sventa ta xchʼamik chanubtasel ti jaʼ te lokʼesbil talel ta sKʼop Diose. Jaʼ yuʼun un chaʼa, mas to ta chaʼmil salonetik skʼan vaʼanel. Ti ta yipuk noʼox krixchanoetik ta xichʼ pasel li matanal abtelal taje, mu xichʼ tael ti kʼu yepal ta xichʼ kʼanel ti jechuke. Pe jech kʼuchaʼal laj xa yakʼ ta ilel li kʼusitik kʼotemik ta pasele, «scotol xuʼ yuʼun tspas» ta skoj ti jaʼ ta xkoltavan li Jeovae (Mateo 19:26).

[Rekuadro xchiʼuk lokʼol ta pajina 30]

«Li kʼusi ta xalike, ta spasik»

Li buchʼu oyik ta tsobobbail yuʼun yajrextikotak Jeovae maʼuk noʼox stukik ti chtijbat yoʼontonik ta svaʼanel li jun Salon sventa Tsobobbaile. Jech kʼuchaʼal liʼe, ti kʼalal yakal chichʼ vaʼanel jun Salon sventa Tsobobbail ta Belicee, jun vinike laj yalbe yajnil —ti jaʼ te oy ta relijion pentekostale— ti mi tsuts yuʼunik li «xchʼulnaik» li yajrextikotak Jeovae, li vinik taje ta la xbat li ta stsobajelike. ¿Kʼu yuʼun ti jech tskʼan tspase? «Xvinaj ti te oy Dios ta stojolike —xi laj yal xtoke—. Muʼyuk ta saʼik kʼop kʼalal ta x-abtejike. Xchiʼuk li kʼusi ta xalike, ta spasik.»

[Lokʼol ta pajina 30]

Salon sventa Tsobobbail ta Orange Walk (Belice)

[Rekuadro xchiʼuk lokʼol ta pajina 31]

Jun abtelal ta spʼejel balumil

Yichʼojan chapanel jayTsop Jtuneletik ta Svaʼanel Salonetik sventa Tsobobbaile ta 120 mukʼtikil lumetik. Chichʼ alel butik lumal ti ta sjunul yoʼonton chtunik li buchʼutik ta moton ch-abtejik taje:

Angola, Bolivia, Croacia, Etiopía, Fiyi, Ghana, Hong Kong, India, Jamaica, Kazajistán, Liberia, Moldavia, Nigeria, Papúa Nueva Guinea, República Dominicana, Ruanda, Tuvalu, Ucrania, Venezuela xchiʼuk Zambia.

[Lokʼol ta pajina 31]

Salon sventa Tsobobbail ta Acapulco (México)

Jtsop ermanoetik ti oy ta sbaik Svaʼanel Salonetik sventa Tsobobbail ta México

[Lokʼol ta pajina 31]

Salon sventa Tsobobbail ta Tlaxcala (México)