¿MI OY avojtikinoj junuk krixchano ti toj ip chaʼi sbae?... ¿Mi oy van ta avoʼonton la kʼan la kolta ti jechuke?... ¿A ti yanuk-o slumal o srelijione? ¿Mi laj van akolta ti jechuke?... Leʼ xa ta oxmil jabile oy toʼox jun uni tseb ta slumal Israel ti oy buchʼu la skʼan la skoltae. Jkʼeltik li kʼusi kʼot ta pasele.

Li uni tsebe te toʼox nakal ta voʼneal Israel. Li lum taje xchiʼuk li nopol jteklum Siriae nopolik noʼox ta saʼ sbaik ta kʼop (1 Reyes 22:1). Ta jun veltae, li jsirioetike ochik ta Israel vaʼun laj yikʼik batel ta mosoil li uni tsebe. Laj yakʼik abtejuk kʼuchaʼal kiarail ta stojolal yajnil Naamán, li bankilal soltaro yuʼun jsirioetike. Li vaʼ vinik taje tsakbil ta tsatsal kʼaʼemal chamel, taje jaʼ jun chamel ti xuʼ tstʼolbe lokʼel sbekʼtal jun krixchanoe.

Li uni tsebe laj yalbe yajval ti kʼuxi xuʼ xkol li smalale. Xi laj yalbee: «Ti teuk ta Samaria li Naamane, Eliseo li j-alkʼop yuʼun Jeovae, xuʼ chkol yuʼun li xchamel ti jechuke», xut. Veno, ti kʼuyelan laj yalbe skʼoplal Eliseo li uni tsebe la xchʼun Naamán ti xuʼ tskolesat yuʼun li yaj-alkʼop Jeovae. Jaʼ yuʼun, la skʼan permiso ta stojolal Ben-adad —li ajvalil ta Siriae—, sventa xbat Naamán xchiʼuk jlom yajtuneltak, jutuk mu 150 kilometro xanavik batel sventa chbat saʼik li Eliseoe.

Baʼyel la svulaʼanik Joram, ajvalil ta Israel, xchiʼuk laj yakʼbeik yil li karta la stak ajvalil Ben-adad ti bu chal ti tskʼan koltael li Naamane. Pe, li Jorame, muʼyuk oy xchʼunel yoʼonton ta stojolal li Jeovae mi jaʼuk ta stojolal li Eliseoe. Yuʼun yaloj mi jaʼ noʼox tsaʼvan ta kʼop li Ben-adade. Kʼalal kʼot ta xchikin Eliseo li taje, xi la skʼanbe li ajvalil Jorame: «Acʼo taluc ta jtojol li [Naamane]», xut. Li j-alkʼope tskʼan chakʼbe yil Naamán ti Jeovae xuʼ xkol yuʼun li stsatsal chamele (2 Reyes 5:1-8).

Kʼalal kʼot Naamán xchiʼuk skaretatak xchiʼuk skaʼtak ta sna li Eliseoe, li j-alkʼope laj yakʼ akʼo lokʼuk tal jun yajkoltaobba sventa xi chalbee: «Batan, bat poco aba vucubuc velta ta ucʼum Jordán, jech ta xcol li acʼaʼel chamele». Li Naamane ilin, yuʼun yaloj mi jaʼ chlokʼ chʼamatuk yuʼun li Eliseoe xchiʼuk yaloj mi tsbakʼes skʼob ta stojolal li skʼaʼemal chamel sventa akʼo sak chʼayuk li xchamele. Pe, mu jechuk kʼot ta pasel, jaʼ noʼox lokʼ talel jun yajkoltaobba. Jaʼ yuʼun li Naamane ilinem lik stam sutel sbe ta slumal (2 Reyes 5:9-12).

Ti voʼotuk yajtunelot Naamane, ¿kʼusi la apas ti jechuke?... Veno, li yajtuneltake xi la sjakʼbeike: Ti jaʼuk laj yalbot kʼusi tsots ta pasel li j-alkʼope, ¿mi mu lajuk apas ti jechuke?  Vaʼun chaʼa, ¿kʼu yuʼun mu xa pok aba ta ukʼum sventa jech chkol li akʼaʼel chamele ti mu toj tsotsuk ta pasele?. Li Naamane la xchʼun li kʼusi albate. «Ibat spoc sba vucub velta ta ucʼum Jordán [...]. Li sbecʼtale toj lec icom. Jaʼ jech icom jech chac cʼu chaʼal sbecʼtal jun olol.»

Li Naamane sut batel ta stojolal li Eliseoe xchiʼuk xi laj yalbee: «¡Liʼ ta orae laj xa jnaʼ ti ta melel muʼyuc yan Dios ta scotol banamile, jaʼ noʼox liʼ ta Israele!», xi. Xchiʼuk laj yalbe xtok Eliseo ti «muʼyuc xa ta [x]chicʼbe, muʼyuc xa ta [s]milbe smoton yan dioseti[ke]; jaʼ xa noʼox ta [xakʼbe] smoton li Mucʼul Diose» (2 Reyes 5:13-17).

¿Mi oy van ta avoʼonton cha kolta buchʼu sventa chchan ta sventa Jeova xchiʼuk ti kʼusi chakʼ kʼotuk ta pasele, jech kʼuchaʼal la spas li uni tseb taje?... Kʼalal liʼ toʼox oy ta Balumil li Jesuse, jun vinik ti ip ta kʼaʼemal chamele laj yakʼ xchʼunel yoʼonton ta stojolal xchiʼuk xi laj yalbee: «Me chacʼan chacoltaune, xuʼ avuʼun chalecubtasun», xut. ¿Mi xa naʼ kʼusi la stakʼbe li Jesuse?... «Colan», xut. Vaʼun la skolesbe li xchamele, jech kʼuchaʼal la spas ta stojolal Naamán li Jeovae (Mateo 8:2, 3).

¿Kʼusitik anaʼoj ta sventa li achʼ balumil ti ta xichʼ talel li Jeovae, ti te skotol xa noʼox krixchanoetik muʼyuk xa ch-ipajike xchiʼuk ti xuʼ chkuxiik sbatel osile?... (2 Pedro 3:13; Apocalipsis 21:3, 4.) Mu ta naʼeteluk ti oy ta avoʼonton chavalbe yan krixchanoetik ta sventa li kʼusitik alakʼik sba achanoje.