¿Mi anaʼoj xa?

¿Kʼu yuʼun ta kʼunkʼun la xpoxta Jesús li maʼsat vinike?

Li ta Marcos 8:22-26 te ta jtatik li loʼil ti kʼuxi la xpoxta Jesús li jun maʼsat vinik ta Betsaidae. Te chal ti baʼyel la xjaxbe stub Jesús ta sat li vinike, vaʼun la sjakʼbe kʼusi ta xil. Ti kʼusi la stakʼ li vinike chakʼ ta ilel ti mu noʼox snaʼ li kʼusi ta xile: «Ta xquil ta xanovic li cristianoetique, pero xcoʼlaj xchiʼuc teʼetic ta xquil», xi. Vaʼun li Jesuse la spikbe yan velta li sate, li kʼusi kʼot ta pasele jaʼ liʼe: «Jech lic jamuc o lec, lic yil lec scotol». Ta aʼyele, li Jesuse ta kʼunkʼun la xpoxta li maʼsat vinike. ¿Kʼu yuʼun?

Li Vivliae muʼyuk bu ta xalbe mas smelolal, pe oy van kʼusi xuʼ jtsaktik ta venta yoʼ xichʼ aʼibel smelolale. Li jun krixchano kʼalal maʼsat ep jabile o jech onoʼox vokʼeme toj echʼ noʼox ep kʼusi chjel ta xkuxlejal kʼalal chjam sate. Kakʼtik junuk skʼelobil: leʼtik xa tale ta toʼox xichʼ tunesel pekʼux kaʼetik sventa ch-abtej ti bu chʼabal xojobal kʼakʼale. Li vaʼ pekʼux kaʼetik taje chnopik li ta ikʼal osile, yuʼun ti mi lokʼik ta sakil kʼakʼale chichʼ jun kʼakʼal sventa xnop yan velta li satik xtoke. Ta stojolal li vaʼ maʼsat ti ipoxtaat yuʼun Jesuse mas toj tsots li kʼusi kʼot ta stojolale. Li ta jkʼakʼaliltike, doktoretik sventa satile pasem yuʼunik jayibuk operasion sventa tskoltaanik buchʼutik maʼsatetik toʼoxe, jlome lek lokʼem yuʼunik. Pe, li buchʼutik poxtajem satike mu noʼox snaʼik kʼusi ta spasik yuʼun jaʼ ti toj ep kʼusitik chkʼot ta xchinabik ta skoj ti toj ep kʼusitik chilike. Chʼayal chkʼot yoʼontonik ta skoj ti ep koloretike, ti kʼuyelan pasbile xchiʼuk ti kʼuyelan xvinaj li kʼusitike, bakʼintike mu noʼox snaʼ kʼusi tspasik xchiʼuk mi jaʼuk xojtikinik ti kʼusi kʼunik noʼox ta ojtikinele. Ta kʼunkʼun, li chinabile chlik yojtikin batel li kʼusitik chil li satile.

Li Jesuse ta kʼunkʼun noʼox van la skolta li maʼsat vinike sventa chakʼbe ta ilel ti skʼanoje xchiʼuk ti tstsak ta ventae. Ta tsʼakale, li vinike «lic yil lec scotol» xchiʼuk laj yojtikinan li kʼusitik chile.

¿Kʼu yuʼun mu toj kʼunuk toʼox ta kʼelel li balbil vun ta skʼakʼalil Jesuse?

Li kʼu smukʼul jujulik sventa chichʼ pasel li balbil vune xuʼ van tsta 23 kʼalal ta 28 sentimetro snatil, li sjamleje jaʼ 15 kʼalal ta 23 sentimetro. Ep ta lik li vunetik taje chichʼanan pakʼel o chichʼanan tsʼisel ta lino no. Oy bakʼintike mas natik laj yichʼanan tunesel. Li balbil vun yuʼun Isaías ti laj yichʼ tael ta nab Muertoe yichʼoj vuklajuneb ta lik pergamino, jutuk mu vukub metro snatil ta stekel, ti jech kʼuyelan kʼejbil-o avie. Li balbil vun la stunes Jesuse yikʼaluk van jech snatil kʼuchaʼal taje (Lucas 4:16, 17).

Sventa li loʼil taje, Alan Millard xi chal ta slivro Discoveries From the Time of Jesus (Kʼusitik yichʼojan tael li ta skʼakʼalil Jesuse): «Li buchʼu ta skʼel li livro [balbil vune] stsakoj ta stsʼet kʼob sventa ta sjilchʼun bal, li jot sba li balbil vune ta sbatsʼi kʼob stsakoj sventa chchaʼbal-o batel kʼalal mi laj xaʼox skʼel li jujuchol bu yakal skʼelele. Li Jesuse laj van sjilchʼun xchiʼuk la xchaʼbal jutuk mu sjunuluk li balbil vun taje, sventa sta li kapitulo 61 yuʼun Isaías ti jaʼ la skʼel te ta snail tsobobbaile».

Li vaʼ kʼakʼaletik taje li svunal Isaiase muʼyuk toʼox bu chʼakbil ta kapitulo xchiʼuk versikuloetik, jech kʼuchaʼal li avie. Kʼalal akʼbat Jesús li balbil vun yuʼun Isaías te ta snail tsobobbail ta Nazarete, persa la saʼ li jsetʼ bu chal li kʼusi te xa ta jtatik ta Isaías 61:1, 2 li ta jVivliatik avie. Li Jesuse ta anil noʼox «la sta», taje jaʼ jech laj yakʼ ta ilel ti lek xojtikin li skʼop Diose.