Li jkʼel vunetike tskʼan snaʼik

¿Kʼu yuʼun tskʼan xichʼ tunesel li sbi Diose akʼo mi mu stakʼ naʼel ti kʼuyelan ta alel ta melele?

Li avi kʼakʼale muʼyuk buchʼu snaʼ kʼuxi toʼox ta alel sbi Dios li ta voʼneal kʼop hebreoe. Pe akʼo mi jech, ti kʼuyepal te tsʼibabil ta Vivliae te van vukmiluk. Kʼalal ay ta Balumil li Jesuse, laj yakʼ ta ojtikinel li sbi Diose xchiʼuk la xchanubtas li yajtsʼaklomtak ti akʼo skʼanik ta orasion ti ichʼbiluk ta mukʼ xkʼot o ti xichʼ chʼultajesele (Mateo 6:9; Juan 17:6). Jaʼ yuʼun chaʼa, jamal ta ilel ti stunesbel sbi Diose jaʼ toj tunel sventa li xchʼunel yoʼonton li yajtsʼaklomtak Cristoe. Jech un chaʼa, mi jaʼ jun biil ti toj tunel tajmeke, ¿kʼu yuʼun mu stakʼ naʼel lek ti kʼuyelan ta xichʼ toʼox alel li ta voʼnee? Yuʼun oy chib srasonal ti toj tsots skʼoplale.

Baʼyele, yuʼun leʼ xa mas ta chaʼmil jabile, li judioetike lik xchʼunik ti muʼyuk la lek ti xichʼalbel tsots li sbi Diose. Jaʼ yuʼun, li buchʼu ta sta ta kʼelbel sbi Dios li ta sKʼop Diose, jaʼ noʼox ta xal Kajval. Jaʼ jech taje, te inop xaʼiik ti muʼyuk xa ta stunesik li sbi Diose.

Ta xchibale, yuʼun li ta voʼneal hebreo jaʼ noʼox ta konsonante ta xichʼtsʼibael. Jaʼ yuʼun chaʼa, ¿kʼuxi xuʼskʼelik? Ti kʼusi xuʼ xichʼ pasele jaʼ ti xichʼuk nochanbel junuk vokal li ta jujun kosonantee, jech sba kʼuchaʼal ta tsotsil xchiʼuk ta yan kʼopetik ti skʼan to nochanbel junuk letra li kʼopetik ti pasbil avreviare. Ta mas tsʼakale lik yichʼakʼel vokaletik li ta kʼopetike sventa mu xchʼay ta jolil ti kʼuyelan ta alel li jujupʼel kʼope, ti vaʼ taje jech laj yichʼ pasel li ta Tsʼibetik ta Hebreo Kʼope. Pe, ¿kʼusi kʼot ta stojolal li sbi Diose? Jaʼ laj yichʼ akʼbel vokaletik li kʼopilal Kajval sventa xichʼ vulesel ta jolil ti skʼan xichʼ tunesel ta xkʼexol li sbi Diose, akʼo mi bakʼintike jech onoʼox laj yichʼ iktael kʼuchaʼal onoʼoxe, ti mu jutebuk oy svokalile.

Ta skoj taje, li kʼuxi nabil lek ta sventa ti kʼuyelan ta alel li sbi Diose jaʼ li chanib konsonanteetik tee, ti jaʼ sbi Tetragrámaton. Jech kʼuchaʼal ta xal li Gran Enciclopedia Espasa, li Tetragrámaton jaʼ «sbi Dios, ti ta Hebreo kʼope [...] chichʼ tsʼibael ta chanib letraetik (YHVH)», xchiʼuk xuʼ xichʼ tsʼibael jech kʼuchaʼal YHWH xchiʼuk JHVH. Kʼalal laj yichʼ akʼbel vokaletik li JHVH, jaʼ te ilik talel li biil «Jehovah», ti jaʼ te laj yichʼ lokʼesel li biil «Jeova» kʼuchaʼal chichʼalel ta tsotsile.

Jech ta melel oy jayvoʼuk ti lek chanemike ta xalik ti akʼo xichʼ tunesel Yavé. Pe muʼyuk buchʼu snaʼ ta melel mi jaʼ jech toʼox ta alel li ta hebreo kʼope. Jech onoʼox, oy pʼijil viniketik ti muʼyuk xchʼamojik ta skoj ti oy jeltos srasonal yuʼunike. Jech noʼxtok, li ta kʼopetik avie li biiletik ta Vivliae mu masuk xkoʼolaj-o xchiʼuk li voʼneal hebreoe, xchiʼuk jutukik noʼox li buchʼu chopol chaʼiike. ¿Kʼu yuʼun? Yuʼun li biiletik taje jaʼ xa jech chichʼ alel li ta kʼopetik taje, xchiʼuk li buchʼutik jech ta xkʼopojik taje mu vokoluk ta tunesel ta xaʼiik. Jaʼ yuʼun, xuʼ jech xichʼalel ta sventa li sbi Jeova eke.

Li Vivliae ta xal ti Diose la stʼuj li yajtsʼaklomtak Cristo ta baʼyel siglo sventa jaʼ chkʼot ta steklumal sventa li sbie. Jaʼ yuʼun ta skoj taje, jaʼ kom ta sbaik yalel xchiʼuk spukel batel ti skʼan tunesel li sbi Diose (Hechos 2:21, NM; 15:14, NM; Romanos 10:13-15, NM). Li avie, li Diose oy ta yoʼonton ti skotoluk li yajtsʼaklomtak Cristo —kʼusuk kʼopal xi jkʼopoj— jtunesbetik li sbie, ti teuk ta joltik li smelolale xchiʼuk jmuyubtabetik sbi ta jkuxlejaltike.

[Tsʼib ti mukʼtik sletraile ta pajina 23]

Toj labal sba ta ilel ti sbi Diose te van tsʼibabil vukmiluk ta velta li ta Vivliae