La jchan xkʼuxubinel mas li jkuxlejale

MI JAʼUK TA JCHʼAY TA JOL LI 16 YUʼUN ABRIL TA 2007. Te toʼox nakʼalun ta yoxibal piso li ta mukʼta na Norris Hall, te ta Virginia Tech (Instituto Politécnico xchiʼuk Universidad Estatal yuʼun Virginia, ta Estados Unidos). Li vaʼ sob taje, ta xchibal xaʼox velta laj kil ti skʼan xkal kolaval ta skoj ti kuxulun jujun kʼakʼale.

Te toʼox oyun ta j-ofisina, jlikel xaʼox skʼan xi yal batel ta xchibal piso sventa chbat kichʼ talel kartaetik, kʼalaluk tal jun jchanubtasvanej sventa tskʼan koltael ta sventa li skomputadorae. Vaʼun, kʼalaluk jutuk xaʼox skʼan xi och li ta s-ofisinae, li ta yoxibal pisoe, laj kaʼikutik ti tstʼomesik pistola li ta xchibal pisoe. Li ochkutik ta ofisina ta anil, la jbajkutik li tiʼnae, vaʼun la jkakʼbekutik seguraoal. Mi jsetʼuk jnakutik li kʼusi yakal chkʼot ta pasele. Toj echʼ xa noʼox li xiʼkutik. ¿Kʼusi van chkʼot ta jtojolalkutik? Te la jnakʼ jba ta xchikin na xchiʼuk tsots la jkʼopon li Jeovae, sventa ta jkʼanbe koltael ti xkuchuk kuʼun ti kʼusiuk chtal ta tsʼakale.

Ti kʼalal ch-echʼ batel jujun minutoe, ivul ta jol li kʼusi kʼot ta jtojolal li ta kabtel leʼ xa ta voʼlajuneb jabile, kʼalal chi abtej toʼox ta smeltsanel karoetike. Jun kʼakʼal, li jun jchiʼil ta abtele itsan skʼakʼal li svalte ti noj ta kasolina yichʼoj batele. Ta skoj ti xiʼ tajmeke, la sjip batel, vaʼun toj chopol li kʼusi kʼot ta pasele, yuʼun li kasolina ti tsanem skʼakʼale ikʼot ta jsat, la jikʼbe li yikʼe xchiʼuk li kʼakʼ tajmek, maʼuk noʼox kʼakʼ jnukulil, jelav to batel ta jbekʼtal, ta jchʼut kʼalal to ta jol. Ta elikoptero laj yikʼikun batel ta jun ospital ti bu jaʼ sventa jkʼakʼeletike, te echʼ kuʼun oxib u xchiʼuk oʼlol ti bu persa chabibilune, ti jutuk xa mu te li chame. Kʼalal jelav xaʼox voʼob u ti laj kichʼ poxtaele xchiʼuk ti te li tsatsube, laj yalbikun ti xuʼ xa xi bat ta jnae, laj kal koliyal ti kuxul li sute. Ta melel, li kʼusi kʼot ta jtojolale jaʼ te la xchanubtasun ti skʼan jkʼuxubin jujun kʼakʼal li jkuxlejale. Kʼalal kʼot ta pasel taje, yajrextikoun xaʼox Jeova. Li vaʼ kʼakʼal taje, mas laj kakʼ ta koʼonton ti skʼan xi tun ta stojolal li buchʼu chi yakʼbun jkuxlejale, li Jeova Diose (Salmo 90:12; Isaías 43:10).

Ta skoj li kʼusi kʼot ta jtojolale mu xa xuʼ xi abtej ta jmeltsanej karo, jaʼ yuʼun lik jchan sventa komputadoraetik. Ta jelavel jutuke laj yikʼikun ta abtel ta Virginia Tech, jaʼ yuʼun, jaʼo te oyun li ta mukʼta na Norris Hall li ta sob ti kʼalal juʼ li milbaile.

Li kʼusi mu jnaʼkutik ti kʼusi yakal chkʼot ta pasel li ta xchibal pisoe, jaʼ ti yakal li milbail ti muʼyuk jech ilbil-o ta Estados Unidose. Li jmilvaneje la smil 32 krixchanoetik ti muʼyuk smulike, ta tsʼakale la smil sba ek. Ta slajebal xae, kʼalal echʼ xaʼox jtob minutoe laj kaʼikutik ti te xa oy polisiaetik li ta spat xokon ofisinae. Laj kaptakutik, vaʼun laj yikʼunkutik batel ti bu chʼabal xa kʼusi xibal sba xkʼot ta pasele.

Ti vaʼ kʼusi xibal sba kʼot ta jtojolale jaʼ te la xchanubtasun ti kuxlejale ta anil noʼox ta sak-chʼay batel xchiʼuk mu stakʼ naʼel kʼusi xuʼ xkʼot ta pasel ta stojolal (Santiago 4:14). Jaʼ yuʼun, li kʼusi mas leke jaʼ ti jpat koʼontontik ta stojolal li Jeovae, ti jaʼ J-akʼ kuxlejale, xchiʼuk jkʼuxubintik li mukʼta matanal ti chi julavutik jujun kʼakʼale (Salmo 23:4; 91:2).

[Stojel ta vokol ta pajina 22]

AP Photo/The Roanoke Times, Alan Kim