Kʼusitik albil chkʼot ta pasel ta jtojolaltik ta jelavel

LI PEDROE xi chalbe skʼoplal ta sventa li kʼusi chkʼot ta pasel ta mas tsʼakal ta stojolal li Balumil xchiʼuk li krixchanoetike: «Li vuʼutique jaʼ xa ta jmalatic li achʼ vinajel xchiʼuc achʼ banamil ti yaloj onoʼox Dios ta xacʼbutique, ti bu puru tucʼ xa cʼusitic te oye», xi (2 Pedro 3:13). Li j-alkʼop Isaiase yalojbe xa onoʼox skʼoplal ta sventa li «achʼ vinajel banamil[e]» (Isaías 65:17; 66:22). Pe kʼalal laj yalbe skʼoplal li albil kʼop taje, li Pedroe laj yal ti muʼyuk to bu kʼotem ta pasel skotole.

Ta mas tsʼakale, tetik ta sjabilal 96 ta jkʼakʼaliltike, li jtakbol Juane akʼbat yil yuʼun Dios ti «achʼ banamil[e]» snitoj sba skʼoplal xchiʼuk li bendisionetik chichʼ talel li ajvalilal yuʼun Diose (Apocalipsis 21:1-4). Jech kʼuchaʼal laj xa kiltike, yakal xa chkʼot ta pasel li kʼusi laj yalik Jesús xchiʼuk jtakbol Pablo ta sventa li kʼusi chkʼot ta pasel kʼalal skʼan toʼox xtal li Ajvalilal yuʼun Diose. Jech un chaʼa, li achʼ balumil taje jutuk xa skʼan xkʼot ta pasel ta melel yuʼun li Ajvalilal yuʼun Diose. Pe, ¿kʼu van yelan li kuxlejal tee? Jkʼeltik kʼusi chalbutik li slivroal Isaías ta sventa taje.

Bendisionetik li ta achʼ balumile

Skotol li krixchanoetike ta lekilal chkuxiik xchiʼuk chichʼik ta mukʼ Dios. «Jech chlic scʼatajesic ta locub banamil li yespadaique; chlic scʼatajesic ta jos li slanzaique. Muʼyuc xa tsmil sbaic ta espada li jujun mucʼtic banamile; muʼyuc xa bochʼo chchapan sba lec ta xchanel pleito.» (Isaías 2:2-4.)

Lek xil sbaik li chonbolometik xchiʼuk li krixchanoetike. «Li oqʼuile tspas ta coʼol yoʼntonic xchiʼuc li chije; coʼol chcux yoʼntonic xchiʼuc unin tentsun li jtiʼval bolome; li bicʼtal vacax xchiʼuc leone jmoj chchiʼin sbaic ta xanubal. Jun noʼox unin biqʼuit querem ta xchabi batel. Li meʼ vacax xchiʼuc meʼ osoe coʼol tsaʼ sveʼelic, li yolique jmoj chvayic; li leone jobel tsloʼ jech chac cʼu chaʼal vacax. [...] Ta scotol li chʼul vits cuʼune muʼyuc cʼusi chopol ta jtatic te, yuʼun chnoj ta yotquinel Mucʼul Dios sbejel li banamile, jech chac cʼu chaʼal nojem ta voʼ li nabe.» (Isaías 11:6-9.)

Ch-epaj li veʼlile. «Li Mucʼul Dios ti echʼem svuʼele te ta vits Sión chchapan lequil veʼlil ta sventa li jujun banamile, xchiʼuc chchapan pasem yaʼlel tsʼusub ti voʼone xa lec pasbile; toj lec muic li veʼlile xchiʼuc toj lequic li pasem yaʼlel tsʼusube.» (Isaías 25:6.)

Chlaj skʼoplal li lajele. «[Li Diose] jʼechʼel ta slajesbe o scʼoplal li lajele; ta scusbe loqʼuel yaʼlel sat scotolic; ta stuʼpbe o scʼoplal liʼ ta banamil li cʼusi la soquesbe scʼoplal li steclumale. Jaʼ jech yaloj stuc li Mucʼul Diose.» (Isaías 25:8.)

Chchaʼkuxi li animaetike. «Yan li avuʼuntac ti chamenique ta xchaʼcuxiic; li sbecʼtalique ta xlic cuxiuc. Li bochʼotic vayemic ta pucuctique ta xlic julovicuc; ta xqʼuejinic yuʼun toj xcuxet noʼox yoʼntonic.» (Isaías 26:19.)

Tukʼ chchapanvan li Mesiase. «Mu jaʼuc noʼox jech ta xchapan ti cʼu xʼelan ta xil ta sate; mu jaʼuc noʼox jech ta spas ti cʼu xʼelan chaʼay ta xchiquine. Tucʼ ta xchapan li bochʼotic mu snaʼ spoj sbaique; jaʼ chal cʼu xʼelan lec chcom li bochʼotic abul sbaique [o manxuike].» (Isaías 11:3, 4.)

Chpoxtaj li maʼsatetike xchiʼuk li pakʼchikinetike. «Ta xlic jamuc satic li maʼsatetique; ta xlic jamuc xchiquinic li coquetique.» (Isaías 35:5.)

Tspas ta yaxal osil li taki xokol balumile. «Cuxetuc noʼox yoʼnton li taqui-xocol banamile ti muʼyuc cʼusi xchʼi o tee; cuxetuc noʼox yoʼnton yuʼun ta xlic nichinuc jech chac cʼu chaʼal nichimaltic. Ta xacʼ lec xnich jech chac cʼu chaʼal lirio nichim ta yaxaltic; cuxetuc noʼox yoʼnton, tseʼinuc noʼox.» (Isaías 35:1, 2.)

Ch-ayan «achʼ [...] banamil». «Ta xcacʼ ayinuc achʼ vinajel [achʼ ajvalilal ta vinajel, xchiʼuk] banamil [jtsop tukʼil krixchanoetik]. Li pocoʼe muʼyuc xa bochʼo ta snaʼ o; muʼyuc xa bochʼo ta snopilan o. Cuxetuc noʼox avoʼntonic, acʼaluc noʼox avoʼntonic sbatel osil ta sventa li cʼusi achʼ ta xcaqʼue. [...] Chlic spas lec snaic [li jnaklometik ta achʼ balumil yaloj onoʼox Diose], chlic naquiicuc stuquic; chlic stsʼunic lec stsʼusubic, ta sloʼbeic sat stuquic. Mu alticuc tspas lec snaic, mu yanuc bochʼo te chnaqui; mu alticuc tstsʼun lec stsʼusubic, mu yanuc bochʼo tsloʼbe sat. Jaʼ jech sjalil chcuxiic jech chac cʼu chaʼal sjalil cuxul jpets teʼ. Li bochʼotic tʼujbilic cuʼune ta to scʼupinic lec li yabtel yoc scʼobique. Muʼyuc bu altic chacʼ svocolic ta abtel; muc jaʼuc noʼox ch-alaj chnichʼnajic sventa chichʼ vocol, yuʼun jaʼ snitililtac li bochʼotic cacʼojbeic o bendicione, jaʼ jech yichʼojic bendición ec li smomnichʼnabtaquique. Cʼalal muʼyuc to chiscʼanbicun vocole, jtacʼojbeic xaʼox li scʼopique. Cʼalal jaʼ to chiscʼopanicune, caʼyojbeic xaʼox li scʼopique.» «Jech chal noxtoc li Mucʼul Diose: Jech chac cʼu chaʼal sbatel osil te chcom o li achʼ vinajel, achʼ banamil ta xcacʼ tale; jaʼ jech mu xlaj scʼoplalic o ec li amomnichʼnabique xchiʼuc li abiique.» (Isaías 65:17-25; 66:22.)

Li kʼusitik albil chkʼot ta pasel ta tsʼakal ti labalik sbae

Maʼuk noʼox stuk li slivroal Isaías chal ti oy kʼusi kʼupilik sba chtal ta tsʼakale. Jech onoʼox, ta sliklejal li Vivliae ta xal kʼusi ta spas Dios ta sventa li Ajvalilal yuʼune ti jaʼ bu tspas mantal li Cristoe. a ¿Mi cha kʼan cha kuxi li ta nichimal balumil taje? Li Vivliae chalbe smelolal li kʼusi tspas Dios ta tsʼakal ta sventa li kuxlejale xchiʼuk chal li kʼusi skʼan xa pas sventa xa kʼupine. Mi jech xal avoʼontone, li yajrextikotak Jeovae ta sjunul yoʼontonik xuʼ xa skoltaot sventa xa chanbe skʼoplal taje.

[Tsʼib ta yok vun]

[Lokʼol ta pajina 8]

Li krixchanoetike ta lekilal chkuxiik xchiʼuk li yantike, xchiʼuk li chonbolometike

 [Lokʼol ta pajina 9]

Chchaʼkuxiik li animaetike

 [Lokʼol ta pajina 10]

Spʼejel li Balumile chkʼataj ta paraiso