Nopajan ta stojolal Dios

Li Jpasvaneje sta-o jkʼupil kʼoptatik Apocalipsis 4:11

«¿KʼU YUʼUN ti kuxulutike?» Xuʼ van jech ajakʼojbe aba ta sventa li smelolal kuxlejale. Ti buchʼutik xchʼunoj ti kʼunkʼun ikʼataj talel li kuxlejaletike mu xtakʼ yuʼunik. Pe li buchʼutik chchʼunik ti jaʼ te oy ta stojol Jeova Dios «li nioʼ sventa cuxlejale» snaʼik li stakʼobile (Salmo 36:9). Snaʼojik ti kʼu yuʼun la spas krixchanoetik li Diose, taje te ta jtatik ta Apocalipsis 4:11. Li ta versikulo taje —ti jaʼ la stsʼiba li jtakbol Juane— jkʼeltik batel kʼuxi chalbe srasonal ti kʼu yuʼun kuxulutike.

Li Juane chakʼbutik ta ilel jkʼejimoletik ta vinajel ti xi chalike: «Cajval, voʼot Diosot cuʼuncutic, voʼot noʼox atuc oy ta aventa albel alequilal, ichʼel ta mucʼ, xchiʼuc voʼot noʼox atuc oy [«xavichʼ akʼbel», NM] avuʼel. Yuʼun voʼot laj apas scotol li cʼusitic oye, yuʼun jech la scʼan avoʼnton ti jech oye, ti jech iʼayin scotole». Jech ta melel, jaʼ noʼox stuk Jeova xuʼ xichʼ ichʼel ta mukʼ xchiʼuk xichʼ tsakel ta venta, yuʼun jaʼ la spas skotol li kʼusitik oye. Mi jech taje, ¿kʼusi van skʼan spasik li kʼusitik kuxajtik ti pʼijike?

Li tekstoe chal ti sta-o albel slekilal, ichʼel ta mukʼ xchiʼuk xichʼ akʼbel svuʼel li Jeovae. Pe akʼo mi muʼyuk Buchʼu yan jech yutsilal, ti sta-o xichʼ ichʼel ta mukʼ xchiʼuk ti jech sjuʼel li ta vinajel-balumile, yepal li krixchanoetike mu xchʼunik mi jaʼ Jpasvanej. Lek ta alel, ti ta sjunul Balumile oy viniketik xchiʼuk antsetik ti chilbeik stalelaltak li ta skotol kʼusitik spasojane (Romanos 1:20). Jaʼ chtijbat yoʼontonik sventa xalbeik yutsilal xchiʼuk xichʼik ta mukʼ. Skotol li kʼusitik oye lek chakʼ ta ilel ti pasbil yuʼun Diose, ta skoj taje li viniketik xchiʼuk antsetike jamal chalik ta spʼejel Balumil ti jaʼ la spas li Jeovae, jaʼ yuʼun sta-o ti xichʼ tsakel ta venta xchiʼuk ti xichʼ kʼupil kʼoptaele (Salmo 19:1, 2; 139:14).

Li Jeovae maʼuk noʼox chichʼ albel slekilal xchiʼuk chichʼ ichʼel ta mukʼ, moʼoj, ch-akʼbat sjuʼel xtok yuʼun li yajtuneltake. Pe ¿kʼu van yelan ti oy buchʼu xuʼ xakʼbe sjuʼel li Jpasvanej ti skotol xuʼ yuʼune? (Isaías 40:25, 26.) Kʼalal la spasutik li Diose, koʼol la spasutik jech kʼuchaʼal li stuke, jech oxal —manchuk mi oy noʼox spajeb— koʼol kelantik kʼuchaʼal li stalelaltake, jech kʼuchaʼal li sjuʼele (Génesis 1:27). Xchiʼuk mi ta melel ta jkʼan ta jtojbetik ta vokol li kʼusitik spasoj ta jtojolaltike, jaʼ me tstij koʼontontik sventa jtunes juʼeltik xchiʼuk kipaltik sventa xkalbetik slekilal xchiʼuk xkichʼtik ta mukʼ. Maʼuk me ti xbat kipaltik ta spasel kʼusitik ta jkʼan jtuktike, moʼoj, jaʼ ta jtunestik sventa chi jtun ta stojolal li Diose (Marcos 12:30).

Vaʼun chaʼa, ¿kʼu yuʼun ti liʼ kuxulutike? Li ta slajebaltik xa li teksto ta Apocalipsis 4:11 chal ti skotol li kʼusitik oye «la scʼan [y]oʼnton [Dios] ti jech oye», vaʼun jech ayan skotol. Kuxulutik, yuʼun jaʼ jech tskʼan yoʼonton li Diose. Jaʼ xkaltik, yuʼun jaʼ jech la skʼan li Jeovae, maʼuk ti voʼotik jech la jkʼantike. Jaʼ yuʼun, kʼalaluk jaʼ noʼox te batem koʼontontik saʼel li kʼusi noʼox ta jkʼan jtuktike, xokol o muʼyuk sbalil li jkuxlejaltike. Mi ta jkʼan ti jun noʼox koʼontontike xchiʼuk ti oy noʼox sbalil li jkuxlejaltike skʼan me ta jchantik li kʼusi tskʼan Dios ta stojolal li krixchanoetike xchiʼuk ti jech jpastik li kʼuyelan tskʼan yoʼontone. Jaʼ noʼox jech xuʼ jtabetik srasonal ti kʼu yuʼun liʼ kuxulutike (Salmo 40:8).

[Stojel ta vokol ta pajina 23]

NASA, ESA xchiʼuk A. Nota (STScI)