Li kʼusi kak yichʼoj alel ta sventa li Mesiase

LI JUDIOETIKE xojtikinbeik onoʼox li stsʼibtak Isaías xchiʼuk yan j-alkʼopetike, jaʼ yuʼun jal xaʼox smalaojik li svuleb Mesiase. Jech noxtok, li judioetik ta skʼakʼalil Jesuse «ta xloʼilaj yoʼntonic» ta sventa li svuleb ti ta persa chkʼot ta pasele (Lucas 3:15). Li albil kʼopetik ta Vivlia taje, tsjambe lek smelolal li xkuxlejal Mesiase, mi junuk krixchano xuʼ xal ta stuk noʼox ta sventa taje, mi jaʼuk ti xakʼ akʼo xkʼot ta pasel yuʼun li Jesuse. Jkʼelbetik batel jlomuk skʼelobiltak.

Svokʼel. Li Isaiase laj xa onoʼox yalbe skʼoplal ti Mesías o li Cristoe, chvokʼ ta stojolal jun tojol tseb. Jaʼ yuʼun, kʼalal laj xaʼox yichʼ alel ta sventa li labal sba svokʼel Jesuse, li jtakbol Mateoe xi la stsʼibae: «Scotol ti jech icʼot ta pasele yuʼun jaʼ icʼot o cʼusi laj yal Cajvaltic ti cʼalal la xchʼamanbe ye yajʼalcʼop ta voʼonee. Jech laj yal: “Aʼyo avaʼyic, ta xlic xchiʼin yol jun tojol tseb”», xi (Mateo 1:22, 23; Isaías 7:14). Li Isaiase laj yal xtok ti Cristoe te chlik talel ta snitilulal David kʼalal tukʼ laj yalbe skʼoplal li lsaie (Jesé), stot li Davide. Li Jesuse, ta melel, jaʼ kʼot ta snitilulal li Davide (Mateo 1:6, 16; Lucas 3:23, 31, 32). Kʼalal skʼan toʼox xvokʼ yol li María, li anjel Gabriele xi laj yal ta stojolal li Jesuse: «Li Diose ta xacʼ ochuc ta ajvalilal jech chac cʼu chaʼal li smoltot David ta voʼonee» (Lucas 1:32, 33; Isaías 11:1-5, 10; Romanos 15:12).

Xkuxlejal. Jun veltae, kʼalal jaʼo te oy ta nail tsobobbail ta Nazaret li Jesuse, la skʼel ta stojolal krixchanoetik li kʼusi laj yal li Isaiase: «Li Espíritu yuʼun Diose liʼ oy ta jtojol. Jaʼ yuʼun la stʼujun, jech vocʼbil licom ta sventa yabtel. Jech tal calbe yaʼyic Lequil Aʼyej li bochʼotic abul sbaique». Li kʼusi kʼot ta pasel ta tsʼakale, xi laj yalbe sba skʼoplal stuke: «Liʼ ta orae icʼot xa ta pasel li cʼusi tsʼibabil liʼ laj avaʼyique» (Lucas 4:17-21; Isaías  61:1, 2). Li Isaiase laj yal xtok ti Mesiase ta slekil xkʼuxul yoʼonton ta xpoxta li buchʼutik ipike xchiʼuk ti muʼyuk la tspuk skʼoplale. Li ta Evanjelio yuʼun Mateoe ta xal ti jech kʼot ta pasele, xi laj yale: «Ep cristianoetic la xchiʼinic batel. La scolta scotol li jchameletic te oyique. Tsots laj yalbe batel ti mu me spucbeic batel scʼoplale. Jaʼ icʼot o ti jech onoʼox laj yal li jʼalcʼop Isaías ta voʼonee: [...] Mu sliques cʼop, mu tsotsuc chcʼopoj. [...] Mu jaʼuc chtal xchaʼcʼas li aj ti vochʼem xae» (Mateo 8:16, 17; 12:10-21; Isaías 42:1-4; 53:4, 5).

Svokol. Yan albil kʼopetik yuʼun Isaiase ta xal ti jutuk mu skotol li j-israeletike, maʼuk noʼox ta xal ti muʼyuk ta xchʼamik li Mesiase, yuʼun «ta xcʼot ta jbej jmac-acanil ton yuʼunic» (1 Pedro 2:6-8, Ch; Isaías 8:14, 15). Taje jaʼ jech kʼot ta pasel. Akʼo mi ep skʼelobil juʼelal la spas li Jesuse, li judioetike «muc onoʼox xchʼunic ti jaʼ Jcoltavaneje. Yuʼun jaʼ icʼot o cʼusi la stsʼiba ti jʼalcʼop Isaías ta voʼonee. Jech la stsʼiba: “Cajval, ¿bochʼo chchʼun li cʼusi laj calbecutique”?» (Juan 12:37, 38; Isaías 53:1). Maʼuk noʼox ti chʼabal xchʼunel yoʼontonike, ep judioetike yaloj mi ta xkoltaatik lokʼel ta anil yuʼun Mesías ta stojolal li jromail krixchanoetike xchiʼuk ti chchaʼakʼ li Ajvalilal ta snitilulal David liʼ ta Balumile. Jech, ta skoj ti laj yil ep svokol li Jesuse xchiʼuk ti chame, jutuk mu skotoluk muʼyuk la xchʼunik mi jaʼ li Mesiase. Akʼo mi albil xa onoʼox ta slivroal Isaías ti ta xil baʼyel svokol li Mesías ti kʼalal skʼan toʼox x-och ta Ajvalilale.

«Solel la jqʼuelan o ta nucul li jpate [...]. Muʼyuc bu la jnacʼ jsat ta stojol li bochʼotic la snaʼleicun xchiʼuc li bochʼotic la stubtaicune», xi onoʼox laj yal Mesías li ta slivroal yuʼun Isaiase. Taje jech onoʼox kʼot ta pasel kʼalal jaʼo laj yichʼ chapanel li Jesuse. Li Mateoe xi chale: «Jech lic stubtabeic sat, la smajic. Oy yantic la slecʼbeic ta majel xocon sat» (Isaías 50:6; Mateo 26:67). Jech noxtok, li Isaiase la stsʼiba: «La stsʼic scotol, me jbeluc muc xcʼopoj». Kʼalaluk Pilato la sjakʼbe Jesús ta sventa ti kʼu yuʼun sabat smul yuʼun li judioetike, «li Jesuse me jbeluc muc xcʼopoj. Li Pilatoe toj chʼayel icʼot yoʼnton» (Isaías 53:7; Mateo 27:12-14; Hechos 8:28, 32-35).

Slajel. Li slajel Jesús xchiʼuk li yan kʼusitik albil xa onoʼox toke, jaʼ kʼot ta pasel li kʼusi albil ta slivroal Isaiase. Jech kʼuchaʼal liʼe, li j-alkʼope xi xa onoʼox yaloje: «Coʼol laj yichʼ muquel jech chac cʼu chaʼal jpasmuliletic; coʼol imuc jech chac cʼu chaʼal jcʼulejetic» (Isaías 53:9). ¿Kʼu xi xuʼ chkʼot ta pasel li albil kʼop taje manchuk mi tsvalopatin sba stuk yileluk? Baʼyele, li Jesuse te jokʼol ta jtel teʼ cham xchiʼuk chaʼvoʼ j-elekʼetik (Mateo 27:38, NM). Pe ta mas tsʼakale, li José ta Arimateae te la smuk ta jun chʼen, ti jaʼ sventa jkʼulejetike, ti mu to jaluk yichʼoj pasele (Mateo 27:57-60). Kʼot onoʼox ta pasel li slajel Jesuse, jtos ti kʼusi tsots skʼoplal ta albil kʼopetik laj yal Isaiase. Li j-alkʼope xi onoʼox yaloj ta sventa li Mesiase: «Ta sventa li tuqʼuil Yajtunel Diose ep bochʼotic muʼyuc smul chcʼotic, yuʼun la xcuchbe scotol li xchopolilique». Jaʼ jech kʼot ta pasel: li slajel Jesuse la spoj lokʼel ta mulil skotol li tukʼil yajtuneltak Diose (Isaías 53:8, 11; Romanos 4:25).

Yan albil kʼopetik ti chkʼot ta pasel xtoke

Sventa xichʼ naʼel lek buchʼu li Mesiase, li Jesús xchiʼuk li yajtakboltake la stunesik mas li kʼusi yaloj Isaiase, jaʼ mu sta li yantik livroetik ta Vivliae. Akʼo mi jech, li livro taje maʼuk noʼox stuk ti chal li kʼusi xuʼ chkʼot ta pasel ta tsʼakale. Li ta Tsʼibetik ta Hebreo Kʼope oy mas albil kʼopetik ta sventa li Jesuse, li Ajvalilal yuʼune xchiʼuk li kʼusitik lek chakʼ kʼotuk ta pasel li ajvalil taje (Hechos 28:23; Apocalipsis 19:10). a ¿Mi oy van kʼusi chakʼ jnaʼtik ta melel ti chkʼot ta pasele? Li Jesuse xi laj yalbe li judioetik ti te yakal chaʼiike: «Mu me xanopic ti yuʼun tal jlajesbe scʼoplal li smantaltac Diose xchiʼuc li cʼusitic laj yal jʼalcʼopetique [jaʼ xkaltik, li Tsʼibetik ta Hebreo Kʼope]. Mu yuʼunuc tal jlajesbe scʼoplal; jaʼ tal cacʼ cʼotuc ta pasel. Melel chacalboxuc, cʼalal to tsta yorail chlaj li vinajel banamile, me jbeluc muʼyuc ta xlaj scʼoplal li cʼusitic yaloj Diose; persa chcʼot ta pasel scotol» (Mateo 5:17, 18).

Li Jesús eke laj yal yan albil kʼopetik ta Vivlia ti chkʼot ta pasel ta skʼakʼalile xchiʼuk li ta mas tsʼakal jutuke (Daniel 9:27; Mateo 15:7-9; 24:15). Jech noxtok, li Jesús xchiʼuk li yajtsʼaklomtake laj yalik kʼusitik yan chkʼot ta pasel ta mas tsʼakal, ep li kʼusitik taje kilojtik ti yakal chkʼotanuk ta pasel li ta jkʼakʼaliltike. Li ta yan mantal chtale ta jchanbetik mas skʼoplal yan albil kʼopetik ti yakal chkʼotanuk ta pasele xchiʼuk li kʼusitik jutuk xa skʼan xkʼot ta pasele.

[Tsʼib ta yok vun]

[Lokʼol ta pajina 4]

«Ta xlic xchiʼin yol jun tojol tseb»

[Lokʼol ta pajina 5]

«Muʼyuc bu la jnacʼ jsat ta stojol li bochʼotic la [snaʼleikune]»