Cha jtakotkutik ta ikʼel ta sjunul koʼontonkutik

¿MI MU oyuk ajakʼojbe aba junuk velta kʼusitik chkʼot ta pasel li ta Salon sventa Tsobobbail yuʼun yajrextikotak Jeovae? ¿Mi anaʼoj ti buchʼuuk noʼox xuʼ xkʼot li ta jtsobajelkutik ti chichʼ pasel ta jujun xemanae? Skotol ti buchʼu jech xal yoʼonton tskʼan chbate, lek chʼambil chkʼot.

Pe yikʼaluk van baʼyel cha kʼan cha naʼ kʼu yuʼun ta jtsob jbakutik, kʼusitik ta jpaskutik li ta tsobajeletik taje xchiʼuk kʼusitik tsnopik li buchʼutik maʼukik yajrextiko Jeova ti ayemik xae.

«Tsobic scotol li jchiʼiltactique»

Li krixchanoetike, ta voʼne xa onoʼox ta stsob sbaik sventa chichʼik ta mukʼ li Diose xchiʼuk sventa chchanik ta stojolal. Leʼ xa ta oxmil kiniento jabile, li ta Israele xi laj yichʼ alel mantale: «Tsobic scotol li jchiʼiltactique cʼalal ta vinic ta ants, ta ololetic xchiʼuc cʼalal ta yanlum cristianoetic ti te nacajtic ta avosilalique, yuʼun acʼo tal yaʼyic scotolic li smantal Mucʼul Dios chavaptaique. Yuʼun jech acʼo xchanic yichʼel ta mucʼ li Mucʼul Diose, xchiʼuc jech acʼo spasic batel li cʼusi chaʼyique» (Deuteronomio 31:12). Jaʼ toʼox jech chichʼik chanubtasel li j-israeletike —manchuk mi bikʼitik toʼox o yijil krixchanoetik xa— sventa chichʼik ta mukʼ xchiʼuk sventa chchʼunbeik smantal li Jeova Diose.

Kʼalal lik ayanuk yajtsʼaklomtak Cristo jayibuk sien jabil ta mas tsʼakale, li tsobajeletike jech-o tsots skʼoplal chichʼ ilel li ta melel relijione. Li jtakbol Pabloe xi la stsʼibae: «Acʼo jnoptic cʼu xʼelan tscʼan chcalbe jbatic, yuʼun jech coʼol acʼo cʼuxubinvancutic xchiʼuc coʼol acʼo jpastic cʼusitic lec. Mu me xijpaj ti ta jtsobilan jbatic ta yaʼyel scʼop Diose. Mu me jchantic jech chac cʼu chaʼal ti oy jayibuc nopen xa xaʼyic jeche. Tscʼan acʼo jtsatsubtasbe jba coʼntontic, acʼo cacʼtic persa, yuʼun poʼot xa chchaʼtal li Cajvaltique» (Hebreos 10:24, 25). Jech kʼuchaʼal jun utsʼ alalil ti kʼalal chchʼakbeik yorail sventa jmoj tsobolike mas chkʼuxubin sbaik ta skotolalik, taje jaʼ jech chkʼot ta pasel ek kʼalal tstsob sbaik sventa chichʼik ta mukʼ Dios li buchʼutik chtunik ta stojolale.

Ti vaʼ yelan chal ta Vivlia ti la spasik talel ta voʼnee, jech ta jpaskutik ek li yajrextikounkutik Jeovae, chib velta ta xemana ta jtsob jbakutik ta Salon sventa Tsobobbail xchiʼuk nopem xkaʼikutik ti jmoj o koʼol kʼusitik ta jchankutik li ta spʼejel Balumile. Jtos ti kʼusi chkoltavan-o li ta tsobajeletik taje, jaʼ ti chchanubtasvan ta yaʼibel smelolal, ta yakʼel ta jkuxlejaltik xchiʼuk ta stael sbalil li beiltaseletik ta Vivliae. Pe ta jujuntal jelel kʼusitik chakʼ jchantik. Kʼalal mu to xlik xchiʼuk kʼalal mi laj xaʼox li tsobajele, li buchʼutik ta jtsob jbakutike xuʼ xi loʼilajkutik sventa kʼusitik xuʼ jpat-o koʼontonkutik, vaʼun «jech coʼol [ta jtsatsubtas jbakutik]» (Romanos 1:12). Vaʼun chaʼa, ¿mi cha kʼan cha naʼ kʼusitik ch-echʼ li ta jujun tsobajele?

Mantal chichʼ lokʼesel ta Vivlia

Li baʼyel tsobajel yuʼun yajrextikotak Jeova ti bu mas ep krixchanoetik chkʼote, jaʼ jun mantal lokʼesbil ta Vivlia ti nopbil sventa buchʼuuk noʼox krixchanoal stabe sbalile, taje ch-echʼ ta sabado o ta domingo. Li Jesuse laj yakʼ mantaletik ek, jech kʼuchaʼal li Mantaletik laj yal ta Vitse (Mateo 5:1; 7:28, 29). Li jtakbol Pablo eke laj yal jun mantal ta jteklum Atenas (Hechos 17:22-34). Jech ek, li ta tsobajeletik taje ch-echʼ lekil mantaletik sventa skotol li buchʼutik chkʼotike, manchuk mi sba to velta chkʼotik.

Sventa chlik li tsobobbaile, chichʼ kʼejintael jun kʼejoj ti chlokʼ ta livro Canten alabanzas a Jehová. a Ti buchʼu jech xal yoʼontone xuʼ xvaʼi xchiʼuk xuʼ xkʼejin. Ta tsʼakale chichʼ pasel jun orasion, vaʼun chlik jun mantal ti lokʼem ta Vivlia ti chjalij 30 minuto (kʼelo li rekuadro bu chal «Mantaletik ti jtunelik sventa jkotoltike»). Li buchʼu chetʼes mantale tstijbe yoʼonton li buchʼutik te tsobolik sventa koʼoluk akʼo saʼik xchiʼuk akʼo skʼelik li tekstoetik ta Vivliae. Li voʼote  xuʼ xavichʼ talel li aVivliae o kʼalal skʼan to xlik li tsobajele xuʼ xa kʼanbe jlikuk jun yajrextiko Jeova.

Xchanel Li Jkʼel osil ta toyole

Jutuk mu skotoluk onoʼox velta, kʼalal mi tsuts li mantal sventa skotol krixchanoetike chtal li tsobajel ti jaʼ sbi Xchanel Li Jkʼel osil ta toyole. Taje jun ora chjalij, jaʼ chichʼ chanel jun loʼil ta Vivlia, chichʼ jakʼel xchiʼuk chichʼ takʼel. Li tsobajel taje tstij koʼontontik sventa akʼo jchanbetik li jbereaetik ti «ta yutsil yoʼntonic laj yichʼic ta mucʼ ti lequil achʼ cʼope. Yuʼun jujun cʼacʼal ta sqʼuelic [o ta xchanbeik li] scʼop Dios[e]» (Hechos 17:11, Ch).

Li tsobajel taje chlik ta jun kʼejoj xchiʼuk chichʼ tunesel jvokʼ mantal ti talem li ta revista sventa chichʼ chanele. Buchʼuuk noʼox junukal yajrextiko Jeova xuʼ xa yakʼbot jlikuk. Jun-chib mantaletik ti jaʼtik to laj yichʼ chanele, jaʼik liʼe: «Totil-meʼiletik, ta kʼanelal me xa chanubtas li akerem atsebike», «Mu me chopoluc spacol xavacʼbeic li bochʼo chopol cʼusi chaspasboxuque» xchiʼuk «Poʼot xa xlaj skotol li vokolile». Manchuk mi chichʼ jakʼel, muʼyuk bu sujbil chakʼ sloʼilk li buchʼutik chkʼotike. Li buchʼu chlokʼ ta yoʼontonik stakʼele baʼyel ta xchanik li jvokʼ mantale xchiʼuk li tekstoetik yichʼoj tale, taje jaʼ chtun sventa xchapanik li kʼusi chalike. Sventa chlaj li tsobajel taje chichʼ kʼejintael jun kʼejoj xchiʼuk chichʼ pasel jun orasion (Mateo 26:30; Efesios 5:19).

Xchanel Vivlia ta Tsobobbail

Li yajrextikounkutik Jeovae ta jtsob jbakutik xtok jun velta ta yutil xemana ta Salon sventa Tsobobbail. Chjalij jun ora xchiʼuk 45 minuto, pasbil ta oxvokʼ. Li baʼyele jaʼ sbi Xchanel Vivlia ta Tsobobbail xchiʼuk chjalij 25 minuto. Li tsobajel taje chakʼ jchantik stunesel lek li Vivliae, ti jel jnopbentike xchiʼuk li jtalelaltike sventa xi jkʼot ta jun lekil yajtsʼaklom Cristo (2 Timoteo  3:16, 17). Taje koʼol chichʼ pasel kʼuchaʼal li Xchanel Li Jkʼel osil ta toyole ti chichʼ jakʼel xchiʼuk chichʼ takʼele xchiʼuk ti jaʼ noʼox tstakʼik li buchʼu jech tskʼanike. Li kʼusi chichʼ chanele jaʼ jun livro o jun foyeto ti lokʼesbil ta Vivlia xchiʼuk ti pasbil yuʼun yajrextikotak Jeovae.

Oy van xa jakʼbe aba kʼu yuʼun ta jtuneskutik yan vunetik li ta jtsobajelkutike, ti maʼuk noʼox ta jtuneskutik li Vivliae. Yuʼun li yajtuneltak Dios ta skʼakʼalil Vivliae maʼuk noʼox la skʼelik li sKʼop Dios eke. Li Vivliae chal ti «la xchaʼaptaic lec li mantaletique; laj yalbeik lec smelol, yuʼun jech acʼo yaʼibeic lec smelol li israeletic te tsobolique» (Nehemías 8:7). Sventa xkaʼibekutik mas smelolal li slivroaltak Vivlia kʼuchaʼal Isaías, Daniel xchiʼuk Revelación [o Apocalipsis], li echʼ jabiletike la jchankutik vunetik ti chchapbe skʼoplal li livroetik taje.

Chanob vun sventa Kabteltik yuʼun Dios

Kʼalal mi laj li Xchanel Vivlia ta Tsobobbaile chlik li Chanob vun sventa Kabteltik yuʼun Diose, taje chjalij 30 minuto, li tsobajel taje tskolta yajtsʼaklomtak Cristo sventa «[xtojobik] ta chanubtasvanej» (2 Timoteo 4:2, NM). ¿Mi oy sjakʼojbot junuk velta anichʼon o junuk avamigo ta sventa Dios o ta sventa Vivlia ti muʼyuk itakʼ avuʼune? Li ta tsobajel taje ta jchantik kʼuxi xuʼ jtakʼtik xchiʼuk Vivlia li sjakʼobiltak ti vokolik ta takʼele. Jech taje, xuʼ xi xkaltik ek kʼuchaʼal li j-alkʼop Isaiase: «Li Mucʼul Diose la sbijubtasun lec, yuʼun jech ta jnaʼ cʼu xʼelan ta jcʼopan [o ta jtakʼbe] li bochʼotic lubenique» (Isaías 50:4).

Li ta Chanob vun sventa Kabteltik yuʼun Diose ch-echʼ baʼyel jun mantal ti te chlokʼ skʼoplal ta jun o mas kapituloetik ta Vivliae, ti laj xaʼox skʼelik baʼyel li buchʼutik te ta tsobajele. Ta tsʼakale li buchʼu chal mantale chalbe li buchʼutik te ta tsobajel ti akʼo yalik li kʼusitik mas jtunel ta xkuxlejal laj yilik li ta kapituloetik laj yichʼ chanele. Ta tsʼakale ch-echʼ yakʼ sloʼilik li buchʼutik stsakoj sbiik li ta Chanob vune.

Li jchanunetike ch-echʼik ta plataforma o ta yeloval tsobajel sventa tskʼelik jayibuk versikuloetik ta Vivlia o ch-echʼ yakʼik ta ilel kʼuxi ta xchapbe smelolal yan krixchano jun loʼil ta Vivlia. Ta tsʼakale, jun ermano ti lek chaneme ta stunes li livro Benefíciese de la Escuela del Ministerio  Teocrático sventa tslekil kʼopta kʼusitik lek la spasik jujun li buchʼutik echʼ yakʼ sloʼilike. Laj xtoke, xuʼ xalbe jun-chibuk mantal ta stuk noʼox sventa mas to xtojobik batel.

Taje maʼuk noʼox ta stabe sbalil li jchanune, yuʼun li buchʼutik te ta tsobajele chkoltaatik sventa xchanik lek skʼelel vun, xtojob xkʼopojik xchiʼuk sventa lekuk xtojob xchanubtasvanik. Mi laj li Chanob vun sventa Kabteltik yuʼun Diose, chlik li Tsobajel sventa Tunelale, sventa xlike chichʼ kʼejintael jun kʼejoj ti lokʼesbil ta jun tekstoe.

Tsobajel sventa Tunelal

Li slajebal tsobajele jaʼ sbi Tsobajel sventa Tunelal. Sventa jchantik kʼuxi xuʼ mas lek xi jchanubtasvan ta sventa li meleletik ta Vivliae ch-echʼ mantaletik, skʼelobiltak, xchiʼuk chichʼ chiʼinel ta loʼil jayibuk jchol mantaletik xchiʼuk xuʼ xal sloʼilik li buchʼutik te ta tsobajele. Jech la spasbe yajtsʼaklomtak li Jesuse: baʼyel la stsobanan sventa chalanbe kʼuxi chcholik li mantale, vaʼun la stakan batel (Lucas 10:1-16). Ti jech laj yichʼik chanubtasel taje koltaatik sventa tskʼupinik kʼusitik lekik ikʼot ta pasel li ta chol mantale, vaʼun ta tsʼakale laj yalbeik ek kʼusitik kʼot ta pasel li Jesuse (Lucas 10:17). Li Vivliae chal ti jech la sloʼiltabe sbaik ta jujun tal eke (Hechos 4:23; 15:4).

Li kʼusitik chichʼ chanel li ta tsobajel taje, ti jaʼ noʼox chjalij 35 minutoe te chlokʼ ta jun vun ti jaʼ sbi Kabteltik sventa Dios[e]. Li kʼusitik jaʼtik to laj yichʼ chanele jaʼik liʼe: «Utsʼ-alaliletik ti chichʼik ta mukʼ Jeovae», «Kʼu yuʼun chi jsutilan-o batel» xchiʼuk «Jchanbetik Cristo ti kʼuyelan ta jcholtik mantale». Sventa stsuts li tsobajele chichʼ kʼejintael kʼejoj xchiʼuk ch-echʼ tspas orasion jun ermano.

Li kʼusi tsnopik jlom buchʼu ayemike

Li tsobobbailetike oy ta yoʼontonik ti akʼo lek xaʼi sbaik skotolik li buchʼutik te chkʼotike. Jech kʼuchaʼal Andrew, ep kʼusitik toʼox chopol yaʼioj ta stojolal li yajrextikotak Jeovae. Jech oxal, kʼalal bat ta sba velta li ta tsobajele labal to sba laj yaʼi ti kʼuyelan toj lek laj yichʼ chʼamele. «Toj lek tajek laj kaʼi ti li bat ta tsobajele —xi chal li vinike—. Toj labal to laj kaʼi ti lek tajek yoʼontonik ta jtojolale xchiʼuk ti oyun ta yoʼontonike.» Jech kʼot ta pasel ta stojolal ek jun chex tseb ti jaʼ sbi Ashel ti likem talel ta Canadae: «Toj lek xa noʼox laj kaʼi li kʼusitik laj yalik tee. Mu toj vokoluk laj kaʼi xchikintael li kʼusi laj yalike», xi.

Yan ti buchʼu jech laj yaʼi sba eke jaʼ jun vinik likem ta Brasil ti jaʼ sbi Josee. Manchuk mi lek ojtikinbil ti simaron xaʼi sbae, laj yalbeik ti xuʼ xbat li ta Salon sventa Tsobobbaile. Li vinike xi chale: «Li buchʼutik te ta tsobajele snaʼojik kʼu kelan. Manchuk mi jech, skotolik li buchʼutik tee lek tajek yoʼonton la spasik ta jtojolal.» Jun vinik likem ta Japón ti jaʼ sbi Atsushie, xi chvul ta sjole: «Kʼalal sba velta li ay li ta stsobajel yajrextikotak Jeovae, jamal chkal ti yan jutuk laj kaʼi jbae. Pe lek laj kakʼ venta ti jechik kʼuchaʼal li yan krixchanoetik eke xchiʼuk ti tskʼanik ti akʼo lek xkaʼi jbae».

Xuʼ xtal avulaʼanunkutik

Jech kʼuchaʼal la avaʼi li kʼusi chalik li buchʼutik ayemik xae, lek sta-o ti xi jbat li ta tsobajeletik ta Salon sventa Tsobobbaile. Koliyal li mantaletik ta Vivlia cha chan tee, chavojtikin mas li Jeova Diose, xchiʼuk jaʼ cha xchanubtasot kʼusitik cha tabe sbalil li ta akuxlejale (Isaías 48:17).

Li ta stsobajel yajrextikotak Jeovae buchʼuuk noʼox xuʼ x-och xchiʼuk muʼyuk chichʼ kʼanel takʼin te. ¿Mi cha kʼan chtal avulaʼanunkutik junuk velta? Cha kalbotkutik ti lek chʼambilot cha kʼot kuʼunkutike.

[Tsʼib ta yok vun]

[Rekuadro ta pajina 21]

Mantaletik ti jtunelik sventa jkotoltike

Oy mas ta 170 jeltos mantaletik ti lokʼemik ta Vivliae. Xi sbi li jlome:

◼ ¿Mi tsots skʼoplal li kʼusi jchʼunojtik ta sventa ti bu lik tal krixchanoetike?

◼ Jechuk me xkiltik kʼuchaʼal chil Dios li lutsʼbaile xchiʼuk li nupunele

◼ Li Diose chakʼbe stoj smulik li buchʼutik tsokesik Balumile

◼ Kʼuxi tstsal kuʼuntik li vul-oʼonton ta jnuptan ta jkuxlejaltike

◼ ¿Mi jaʼ noʼox van te chpaj-o li kuxlejal liʼe?

[Lokʼol ta pajina 21]

Mantal sventa skotol krixchanoetik

[Lokʼol ta pajina 21]

Xchanel Li Jkʼel osil ta toyole

[Lokʼol ta pajina 22]

Xchanel Vivlia ta Tsobobbail

[Lokʼol ta pajina 22]

Chanob vun sventa Kabteltik yuʼun Dios

[Lokʼol ta pajina 23]

Tsobajel sventa Tunelal